Mar 9:2-13 | EkySCThai | STEP | ม๊อเนอ โซซว๊า บาโทเฮ๊อเนอ แบ่เจ่ เหย่ซู่ เอ๊หนิ คูเปโตร, คูยากอบ เร๊อ อาโป่ คูยอห์น เร๊อ อา จว๊าแถ่ เด๊อ โฉ่แถ่โล เตเม อาลู, เบ๊อะอา โอ่ ตื๊อดื่อ เร๊อ เหย่ซี เบ๊อะเนอ, จอแปแหร่ ถู่แหล่แต๊แกละ โค๊แก แบ่เจ่ เหย่ซู่ อาเหน่กล่อ เด๊อ เหย่ซี เป๊เส่เง.

Mark 9:2-13

จอแปแหร่ ถู่แหล่แต๊แกละโค๊แก เหย่ซู่ อาเหน่กล่อ

(มัทธิว ๑๗:๑-๑๓, ลูกา ๙:๒๘-๓๖)

2 ม๊อเนอ โซซว๊า บาโทเฮ๊อเนอ แบ่เจ่ เหย่ซู่ เอ๊หนิ คูเปโตร, คูยากอบ เร๊อ อาโป่ คูยอห์น เร๊อ อา จว๊าแถ่ เด๊อ โฉ่แถ่โล เตเม อาลู, เบ๊อะอา โอ่ ตื๊อดื่อ เร๊อ เหย่ซี เบ๊อะเนอ, จอแปแหร่ ถู่แหล่แต๊แกละ โค๊แก แบ่เจ่ เหย่ซู่ อาเหน่กล่อ เด๊อ เหย่ซี เป๊เส่เง. ^a 3 อา เห่อจา เต๊เห่เนอ อาบูแปล๊เตเคแถ่ ลอปลี เจ๊อ เร๊อ อา บูชูตู๊ เล๊อปา เจ๊อ เร๊อ อู โฉ่โพ๊ เห่อจา เด๊อ เห่ขุเออ เนอ เจ๊อ. 4 ฮู๊เนอโทเรอ อา โคเจ่ เนอ ซิโซ แม๊เถอะ เพรโพร คูเอลียาห์ เด๋อ งย๊าเค เนอเตเพร เร๊อ คูโมเสส โอ่โลแถ่ เร๊อ เหย่ซี เฮ๊เบ่ แลแค เร๊อ แบ่เจ่ เหย่ซู่.

5 คูเปโตร เฮ๊ เหย่ซู่ เน๊อ, “เกอ, ซ๊าร๋า, เหล่โอ่ เบ๊อะเออ โต๊โผ่ เร๊อ อาตว่า โมแร๊ ลา, เป เก่ ช๊อแถ่เป่ ซี เหล่สื่อ โซเม, เตเมเร๊อ เนเง, เตเมเร๊อ คูโมเสส อาเง, เตเมเร๊อ เพรโพร เอลียาห์ อาเง.” 6 เหย่ซี ซิอิเช ตาลว๊า ซิลือ เร๊อ คูเปโตร อาโตเบ่ เฮ๊ ฮู๊เตเนอ อา ซิเง ปาโต่ อาคยา อา เฮ๊เถ่ แตแรแกฮู๊เนอ.

7 เร๊อ อ๊อโหล่ ตื๊อบื่อ แลปอ ตาบี๊แก เหย่ซี เร๊อ โหง่พราเถ่ เด๊อ อ๊อโหล่กู เร๊อ อา เฮ๊ เน๊อ, “เออเตเพร หม่า แวพู๊คู เด๊อ แว โม เกอเร๊อ อา เตเพร, เร๊อ หนิดา แลแค อาโหง่ นี๋.” ^b

8 โอ่ เตอเปลอฮู๊ เร๊อ เหย่ซี แม๊ตีวี๊ตาวา เร๊อ แม๊เถอะ แพ๊ตื๊อ เหย่ซู่เนอ เตเพร่ว แพ๊, เด๊อ อาโร ซิเนอเนอ แม๊เถอะ ปาโต่ เฮ๊อ.

9 เบ๊อะเหย่ซี โอ่ เด๊อ โฉ่ลู แก๊ตา เบ๊อะเนอ, เหย่ซู่ เฮ๊แก เหย่ซี โหง่ เน๊อ, “ล๋อ ซี แม๊เถอะ เออเนอเต๊เห่ แด๊โฉ่โล เป่ แต่ แล อู เตเพร่ว แต่เหม่ นี๋. แกแยพู๊คู หม่าเฮ๊อ แวเออ ก๊อถ่อเซอเพร กาคยา เฮ๊อ เด๊อ เตเซอ ปา ตื๊อเรอ แด๊โฉ่โลเนอ เป่แพ๊ อู นี๋,” อา เฮ๊แก เหย่ซี ฮู๊เนอ. 10 เหย่ซี เฮ๊โฉ่โลเป่อูเตเพร๊โต่ หม่าแน๊เรอ เหย่ซี โด่แน เกอเร๊อ เป่ลู เตเพร เร๊อ เตเพร เร๊อ อา เฮ๊ แลแค เน๊อ, “เตเซอ ก๊อถ่อเซอเพร กาคยา อาโหง่แลช๊า หม่า อิเต แฮ?” อา แด๊เฮอ เกอเร๊อ ลอ ลู ฮู๊เนอ.

11 เหย่ซี แด๊เฮอ เหย่ซู่ เน๊อ, “เพรอิซว๊า เตซว๊าเตแส่ อาซ๊าร๊า เต๊เห่ เฮ๊ เร๊อ เพรโพร เอลียาห์ เบ่แฮ เหร่อเล๊อ เร๊อ เมสสิยาห์ เด๊อ อาเพรเมแลเปล๊กา อู เออเนอ เตเพร ปา, อา จว๊าเฮ๊โต่ ฮู๊เนอ เมเต?” ^c

12 เร๊อ อา เฮ๊ฉื่อ เหย่ซี เน๊อ, “เพรโพร เอลียาห์ เบ่ แฮ เหร่อเล๊อปา เร๊อ อา เบ่ แฮ ตี๊หรี่แตแร เมแร๊ กาคยา เตล๋อ ปลี เนอหมา อา หม่าแหน่ เจ๊อ ว๊า, หม่าแน๊เรอ ลีเทส่อพ๊า เฮ๊ เร๊อ แกแยพู๊คู เออ อา โตเบ่ ข่าเบ่ เอ๊แหน่เจ๊อ เตจาเตจือ ปา. เร๊อ อูซ๊อต๊าหน่า แด่ตาพาแก อา ปา อา จว๊าเฮ๊โต่ ฮู๊เออเมเต? 13 หม่าแน๊เรอ แว เฮ๊ ซี, เพรโพร เอลียาห์ ^{▼▼เหย่ซู่ เฮ๊ “เอลียาห์,” อาโหง่แลช๊า หม่า เพรเจเทอ คูยอห์น} แฮโทเฮ๊อ เร๊อ แกแย เต๊เห่ เม ลู จู๊ดื่อ เหย่ซี ซิปล่อ ซิหยื่อ เม ลู เนอแพ๊. เออ หม่า อา ทวาแถ่ เฮ๊อ ฮู๊ลีเทส่อพ๊า ราอื่อเหน่ ลูหรี่ลูแก เนอ เฮ๊อ.”