Mat 10 | EkySCThai | STEP | แซ่ ฮู๊ อาโค เจ่ เช๊อซิเนอ เออ เก่ เหว่เถ่ แกเบ๊ เกอ โลเน๊ มู๊แหม่ เต๊เห่, โท๊โต่ แซ่ฮู๊ เหย่ซี เก่ แหย่โอ่เหม่เบ๊ ลอ เตชุ๊ยเตเช ปว๋า เต๊อเจ่อ อาเงเนอ, แบ่เจ่ เหย่ซู่ เอ๊แฮ เหย่ซี เด๊อ อา โอ่ เร๊อ อา เด๊อะ เป่ เหย่ซี เตอเรอฉว่าชอ.

Matthew 10

เพรโด่แนพู๊ เช๊อซิเนอ

(มาระโก ๓:๑๓-๑๙, ลูกา ๖:๑๒-๑๖)

1 แซ่ ฮู๊ อาโค เจ่ เช๊อซิเนอ เออ เก่ เหว่เถ่ แกเบ๊ เกอ โลเน๊ มู๊แหม่ เต๊เห่, โท๊โต่ แซ่ฮู๊ เหย่ซี เก่ แหย่โอ่เหม่เบ๊ ลอ เตชุ๊ยเตเช ปว๋า เต๊อเจ่อ อาเงเนอ, แบ่เจ่ เหย่ซู่ เอ๊แฮ เหย่ซี เด๊อ อา โอ่ เร๊อ อา เด๊อะ เป่ เหย่ซี เตอเรอฉว่าชอ.

2 เพรโด่แนพู๊ เต๊เห่ เช๊อซิเนอ อามุย หม่า แคร๋ อูเป เฮ๊เร๊อ, อาเหร่อเล๊อ เตเพร หม่า อามุย เร๊อ คูซีโมน หม่าโต่เรอ อู เอ๊ ลู เร๊อ คูเปโตร เร๊อ อาโป่ คูอันดรูว์, โทเรอ เพเศเบดี อาพู๊เพรคู คูยากอบ เร๊อ อาโป่ คูยอห์น, 3 โทเรอ คูฟีลิป เร๊อ คูบารโธโลมิว, คูโธมัส เร๊อ เพร กุยอาหมู่อาร๊า คูมัทธิว, โทเรอ เพอัลเฟอัส อาพู๊คู คูยากอบ โทเรอ คูธัดเดอัส, 4 โทเรอ คูซีโมน, อา หม่า อู เอ๊ ลู เร๊อ แย๊หล่อ ^{▼▼แย๊หล่อ หม่า ตู๊หมู่ตอกล๊อ อามุย, เร๊อ ตู๊หมู่ตอกล๊อ เออเนอหม่า อา ซิหยื่อ อาโอ่ แลแค เด๊อ โรมัน อา เตเป๊ออาเล โต่. อา ซิหยื่อ โอ่ เกอเร๊อดื่อ เร๊อ อาเทออาเก่.} ตู๊หมู่ตอกล๊อ อาเกล เตเพร, เร๊อ คูยูดาส อิสคาริโอท เด๊อ อา อิเชตาแก แบ่เจ่ เนอเตเพร.

แบ่เจ่ เหย่ซู่ อานอจว๊า เพรโด่แนพู๊ เต๊เห่ เช๊อซิเนอ

(มาระโก ๖:๗-๑๓, ลูกา ๙:๑-๖)

5 เบ๊อะแบ่เจ่ เหย่ซู่ นอจว๊า อา โคเจ่ เช๊อซิเนอ เออ เบ๊อะเนอ, อา แด๊โฉ่จว๊าหนิ เหย่ซี อาโหง่ เน๊อ, “จว๊า แต่ เด๊อ แกแยยิวพู๊ หม่าโต่ เต๊เห่ อาเกลเนอ แต่เหม่ นี๋, โทเรอ จว๊าโน แต่ เด๊อ แกแยสะมาเรีย อาดออาโฉ่กู เนอ แต่เหม่เหม่ นี๋. 6 จว๊าตื๊อแพ๊ เด๊อ เปเมวเจอะ อิสราเอลพู๊ เด๊ออาเกล เด๊อ อาแซ่เน๊อ ซิหมิ โอ่เหม่ เนอเต๊เห่ อา โอ่ เนอแพ๊ นี๋. 7 เบ๊อะซี จว๊า เบ๊อะเนอ, แด๊โฉ่โด่แน เป่ อู เน๊อ, ‘ม๊อขุ อาเทอ อาเก่ ผื่อกาเฮ๊อ,’ ฮู๊เนอ นี๋. 8 แหย่โอ่เหม่ แกแย เด๊อ อาชุ๊ยอาเช เต๊เห่, เมเซอเพร กาคยา แกแย เด๊อ อา เซอ เต๊เห่, แหย่โอ่เหม่แก แกแย จุมู๊แหม่ เต๊เห่, เหว่เถ่แก แลแค โลเน๊โลหน่า, ซี พย๊าหนิ ครา ลอเฮ๊อ ล๋อ เตเออ เต๊เห่ อาขว่าอาคยา, กุย แต่ อู อาคว๊าอาเก่ แต่เหม่ นี๋, เมครา เป่ เกออู นี๋. 9 เท เบ่เบ่, รือ เบ่เบ่, ตีลีแบ เบ่เบ่, ฉู่จว๊า หนิ แต่ แลแค เด๊อ ซีฮ๊อท๊อกู แต่เหม่ นี๋. 10 ปยา เบ่เบ่, จา เบ่เบ่, แข่แด๊พ๊า เบ่เบ่, อิแท๊ เบ่เบ่, พย๊าจว๊าเล๊อพย๊าจว๊ากลอ หนิ แลแค แต่เหม่. เมเตเฮ๊เรอ แกแย เด๊อ อา แรเต เต๊เห่เนอ อา โต พย๊าหนิ เกอดื่อ ฮู๊ อา ซิ หยื่อ เนอ เต๊เห่. ^b

11 “เบ๊อะซี จว๊าโนเฮ๊อ เด๊อ วีกู หม่าโต่เร๊อ ดอ ตอ ดอ อากูเนอ, แม๊ปู หนิ แกแย เด๊อ ซี เหล่ซิเล เร๊อลู เตเพรเพร เร๊อ จว๊าโอ่โอ่เกอ เด๊อ อาหี่ เนอ. เร๊อ โอ่ตือดื๊อ เกอเร๊อ อา เบ๊อะเนอ โต่เด๊อ ซี เถ่กาปา เนอ นี๋. 12 เบ๊อะซี โน เด๊อ หี่เนอ เตเมกู เบ๊อะเนอ, กุย จอแปแหร่ เด๊อ อา เก่เด๊อะบุ๊ยเด๊อะเตอเรอ หี่ เนอเตเม นี๋. 13 หี่เนอ เตเม เก่ อา โตเบ่ พย๊าหนิ เตเด๊อะบุ๊ยเด๊อะเตอเรอ เก่เฮ๊เรอ แด่โอ่แก ซี เตโมเตแร๊ อา เตเด๊อะบุ๊ยเด๊อะเตอเรอ เด๊อ เหย่ซี อาหี่กู เนอ. เก่ เหย่ซี เอ๊โมฉื่อแร๊ ซี โต่ เก่เฮ๊เรอ พย๊ากาคยา คยาแซ๊ ซี เตโมเตแร๊ เนอ นี๋. 14 แกแย เตเพรเพร เก่ เอ๊ฉื่อ ซี โต่, เก่ หม่าโต่ เรอ อา เก่ หนิดา ซีโหง่ โต่ เก่เฮ๊เรอ, เบ๊อะซี เถ่จว๊าแก เฮ๊อ เร๊อ หี่ เนอเตเม เบ๊อะเนอ, หม่าโต่เรอ ดอเนอตอดอ เบ๊อะเนอ, โซตาแก เห่หมื่อ เด๊อ ซี กู๊โด่ลู เนอเต๊เห่. ^{▼▼โซตาแก เห่หมื่อ อาโหง่แลช๊า หม่า, เหย่ซู่ อา โคเจ่ เต๊เห่ เด๊อะโล เร๊อ อา แม๊ ปา เหย่ซี โต่ เฮ๊อ.} ^d 15 แว เฮ๊จ๊อจ๊อ ซี, ช๋า จอแปแหร่ เมจากาคยา แกแยเห่ขุพู๊ เบ๊อะเนอ, อาเก่ เมจา จาเล๊อ ลอเจ๊อ แกแย เออเนอ ตอดอปา. เน๊อ วีโสโดม เน๊อ วีโกโมราห์ปา. ^{▼▼เด๊อ เหร่อเคเนอ เบ๊อะเพอับราฮัม โอ่เซอเพร ปา เด๊อ เห่ขุเออ เนอ, แกแย โอ่ เด๊อ วีเนอ เนอวี อากู เต๊เห่เนอ, อา เม เตมู๊แหม่รีแจ่ แหน่เจ๊อ อาขว่าอาคยา, จอแปแหร่ เมปย๊าแก ลอวีเนอ เนอวี.} ^f

เตเมจาเมจือ เด๊อ อา เก่ ป่อชิเต่อ เพรโด่แนพู๊ เต๊เห่

(มาระโก ๑๓:๙-๑๓, ลูกา ๒๑:๑๒-๑๗)

16 “แว นอจว๊า ซี แซ่เน๊อ แว ปลวาจว๊า ซิหมิ เด๊อ ถุ่ยมี อาเกล เนอ. เมฮู๊เนอเรอ ลีแม เกอ แลแค ฮู๊ หรู่เต๊เห่เนอ, เร๊อ ซิปล่อ โพ๊แปละอาโพ๊อาแปละ เกอ แลแค ฮู๊ ถู่หลุ่ย เนอ นี๋. ^g 17 รอ หนิ แลแค ซีเหน่, เมเตเฮ๊เรอ อู เก่ ปื่อ ซูจว๊า ซี เด๊อ เตจ๊อเบโฮ กู่กล๊อ เต๊เห่ เหล่โอ่กู๊ แม๊เถอะ ตาฉื่อ ลู อาหี่กู ปา, เร๊อ อา เก่มือเก่ปอ ซี เด๊อ เตจ๊อเบโฮ เต๊เห่ อากู ปา. ^h 18 เด๊อ แวขว่าแวคยา เร๊อ อู เก่ จุ่ยตู๊หรู่ แฮ ซี เด๊อ เพรเป๊อเต เด๊อ อา ทวา กู่กล๊อ เต๊เห่ เน๊อ คุ๊ยเต๊เห่ อา โอ่ ปา. ซี เบ่ แด๊โฉ่โด่แน เด๊อะ โล หนิเป่ เหย่ซี เร๊อ แกแยยิวพู๊ หม่าโต่ เต๊เห่ เน๊อ แวหรี่แวแก ปา. 19 หม่าแน๊เรอ เบ๊อะเหย่ซี ปื่อ ซี เบ๊อะเนอ, เบ่กู่เบ่แก หนื่ออื่อ แต่ เน๊อ ซี เก่ เฮ๊เบ่ แต่เหม่ปา. หม่าโต่เรอ ซี เก่ เฮ๊เบ่ ฮู๊เตเนอ แต่เหม่. เบ๊อะแฮโต่เบ่ ปาเนอ, จอแปแหร่ เก่ เด๊อะ ซี โหง่ เด๊อ ซี โต เฮ๊เบ่ เนอเต๊เห่ ปา. 20 โหง่ เนอเต๊เห่ หม่า ซี เตเฮ๊เบ่ เร๊อดื่อ ซีเหน่ หม่าโต่, อา หม่าดื่อ เปเพ จอแปแหร่ แหย่โยบูโพ๊ นอ เฮ๊เบ่ เด๊อ ซี เบ่ เฮ๊ แพ๊.

21 “เบ๊อะเนออาเค ปาเนอ, โป่ เก่ นอเมเซอ เกอ เร๊อดื่อ อาแหม่ เร๊อ อูโร ปา, เร๊อ เพ เก่ นอเมเซอ เร๊อดื่อ อาพู๊ เร๊อ อูโร ปา, อาพู๊เก่ วื๊อ กาคยาฉื่อ เกอเร๊อดื่อ อาโหมะอาเพ เต๊เห่ ปา, เร๊อ อา เก่ นอ เมเซอ เกอเร๊อดื่อ แกแย เร๊อ อาโหมะ อาเพ ปา. ⁱ 22 เด๊อ แวขว่าแวคยา เนอ, อู ปว๋า เตเพร เก่ ซิเถ่ ลอ ซี ปา. ^jหม่าแน๊เรอ แกแย เด๊อ อา ก๊อถ่อแตแน โอ่กลอช๊อหม่า เด๊อ อา เตหยื่อเตแหน่ อากู โต่เด๊อ อาตื๊อดื่อ เต๊เห่เนอ, จอแปแหร่ เก่ เมแลเปล๊กา เหย่ซี ปา.” ^k 23 อู เก่ เมจาเมจือ ซี เบ๊อะเออ โต๊โผ่ เก่เฮ๊เรอ แกล่จว๊า โดโต่ เด๊อ อาโร โต๊โผ่ เนอ. แว เฮ๊จ๊อจ๊อ ซี, เบ๊อะซี จว๊า ปวาลอ แต่ล๋าย ล๋อ อิสราเอล อาวี เออเต๊เห่ ล๋ายโต่เนอ, แกแยเห่ขุ อาพู๊คูเออ เก่ แฮเล๊ ปา. ^l

24 “โคเจ่ เนอ อาแจ่อาลีแม เล๊อ เร๊อ อาซ๊าร๊า แตแค๋ โต่. ^m หลู่ เฮ๊เนอหม่า อาเตเรแซ่เน๊อ หลู่เล๊. หม่าแน๊เรอ อาจาเล๊อ, อาคว๊าเก่โอ่เกอโต่ เตปาลาโอ่โต่ อาเบ่ทวาโต่ เด๊อ อาเซอ เตเพรเนอ, อาดุเล๊อ เร๊อ อาแบ่เจ่ แตแค๋ โต่. ⁿ 25 โคเจ่ เตเพร เก่ แจ่ บ๊า อาซ๊าร๊า เนอ, เร๊อ หลู่ เตเพร เก่ แจ่ บ๊า อาแบ่เจ่ เนอ เฮ๊หม่า โป่เฮ๊อ. แว ทวา เจ๊อ หี่กู่กล๊อ เตเพร เร๊อ เหย่ซี เก่ เอ๊ แว เร๊อ โลเน๊โลหน่า อา กู่กล๊อดุ เด๊อ อามุย เร๊อ เบเอลเซบูล เออ เก่เฮ๊เรอ ซี เด๊อ อา ทวา แพ๊ หี่พู๊แพพู๊ เต๊เห่เนอ, อา เก่ เอ๊ จา เอ๊ มู๊แหม่ เล๊อ ปา เจ๊อ ซีมุย ปา. ^o

ซิอิเช จอแปแหร่, ซิอิเช แต่ แกแยเห่ขุพู๊ แต่เหม่

(ลูกา ๑๒:๒-๗)

26 “เมฮู๊เนอเรอ ซิอิเช แต่ แกแย เห่ขุพู๊ แต่เหม่. ล๋อ เต ด๊อโอ๊ด๊อบี๊ เต๊เห่เนอ, จอแปแหร่ อา บ๊าโมแถ่ โลลอ อา ปา, เร๊อ ล๋อ เตเมโห่เมเซ๊ เต๊เห่เนอ, จอแปแหร่ เก่เม เถ่ โล ลอ อา ปา. ^p 27 โหง่ เด๊อ แว เฮ๊ เป่ ซี เด๊อ อาคี๊เกล เต๊เห่เนอ, จว๊าเฮ๊เบ่ แลแค เด๊อ อาลีเกล เนอ นี๋. โหง่ เด๊อ ซี หนิโฮโห่ หนิโฮเซ๊ เต๊เห่เนอ, แถ่ เอ๊โท แลแค เด๊อ หี่กู่กล๊อขุ เนอ นี๋. 28 แกแย เด๊อ อา เมเซอ แจ่ ซี เหน่กล่อ ตื๊อดื่อเรอ อา เมเซอ แจ่ ซี แหย่โยบูโพ๊ โต่ เต๊เห่เนอ, ซิอิเช แต่ อาเหล่ แต่เหม่. ซิอิเช แลแค จอแปแหร่ เด๊อ อา เมเซอ แจ่ ซี เหน่กล่อ เร๊อ ซี แหย่โยบูโพ๊ เนอเจ่อลอ เออเนอ เด๊อ หง่าหร่าปอรากยากู เนอเตเพร นี๋. 29 ถู่เพร่ฮู๊ เนอเบ่เนอ อู อิเช แพ๊ ลู เร๊อ รือหย่า เตเม๊ แพ๊, แวเฮ๊โต่? หม่าแน๊เรอ เพ จอแปแหร่ อา นอแลตา เซอ เหย่ซี โต่ เฮ๊เนอ, เบ๊อะเต๊เบ่ แพ๊เน๋อ อา แลตาเซอ เด๊อ เห่ขุโต่. 30 ล๋อ ซี กู๊โล เด๊อ ซี กู่กล๊อลู เนอเต๊เห่ เจ๊อเรอ, จอแปแหร่ แด๊เบ่ หนื่ออื่อ โทลอปลี เจ๊อเฮ๊อ. 31 ฮู๊เนอเรอ ซิอิเช แต่เหม่! ซี งูดุงูชอ เล๊อ เจ๊อ เร๊อ ถู่เผระฮู๊ เนอ ตูปลูเต๊เผ่ เจ๊อ.

เตเอ๊โมฉื่อ ครี๊ เร๊อ เตเท๊ฉื่อ ครี๊

(ลูกา ๑๒:๘-๙)

32 “อูเปเป๋ เบ่เบ่ อา เก่อ๊อแล แว เด๊อ แกแย โอ่โร๊ลู อา เป๊เส่เงเนอ, แว เก่ อ๊อแล เกอ อา ฮู๊เนอ เด๊อ แว เพจอแปแหร่ โอ่ เด๊อ ม๊อขุ อา เป๊เส่เง เนอปา. 33 หม่าแน๊เรอ อูเป่เป๋ เบ่เบ่ อา เก่ โชโม๊บิแก แว เนอ อา หยื่อเอ่ แว โต่ เด๊อ แกแย โอ่โร๊ลู อา เป๊เส่เง ปา เตเพรเพร เฮ๊เนอ, แว เก่ เท๊ฉื่อ เกอ อา เด๊อ แวเพ จอแปแหร่ เป๊เส่เง เด๊อ ม๊อขุ เนอปา. ^q

เตเปเตดวา หม่าโต่ เตกย๊าเตงา แพ๊

(ลูกา ๑๒:๕๑-๕๓, ๑๔:๒๖-๒๗)

34 “เตเน แต่ แลแค เร๊อ แว พย๊าแฮ เตเปเตดวา เด๊อ เห่ขุ เออเนอ แต่เหม่. แว พย๊าแฮ เตเปเตดวา หม่าโต่. แว พย๊าแฮ เน๊ เต๊เบ่. 35 เมเตเฮ๊เรอ, แว แฮ เด๊อะโอ่ทวาแถ่

‘พู๊เพรคู เร๊อ เพ, พู๊เพร เหมาะ เร๊อ โหมะ, อาแด่ เร๊อ เผร่เพรเหมาะ เก่กย๊า เก่งา ลู ปา แพ๊. 36 แกแย เตเพรเพร เด๊อ อู เก่ ซิเถ่ซิฮา หนิ ลู ปา เนอหม่า อา เก่ หม่าดื่อแพ๊ อา โอ่เต่อเด๊อ หี่ด๊อ หี่แพ กู เร๊อดื่อ ปา แพ๊.’ ^r

37 “แกแย เตเพรเพร เด๊อ อา โมเกอเร๊อ เล๊อ อาโหมะอาเพ เร๊อ แว เฮ๊เนอ, อา ต่า เกอ เร๊อ แว โต่. แกแย เตเพรเพร เด๊อ อา โมหนิเกอเร๊อ เล๊อ อา พู๊เหมาะพู๊คู เร๊อ แว เฮ๊เนอ, อา ต่า เกอ เร๊อ แว โต่. 38 แกแย เตเพรเพร เด๊อ อา แย๊ เกอเร๊อดื่อ อา อี๊ถื่อดีเต่ โต่โต่, แวคยา เร๊อ อา ครอครวา โต่โต่ เตเพรเนอ, อา ต่า เกอ เร๊อ แว โต่. ^s 39 แกแย เตเพรเพร เด๊อ อา ซิโล เกอเร๊อ อาซิปล่อ เซอเพร เนอ, อา เก่ แลจุ แก อาซิปล่อ เซอเพร ปา. แกแย เด๊อ อา ชิโล เกอ เร๊อ อา เหล่ เซอเพร โต่ เด๊อ แวเงเนอ, อา เก่ พย๊าหนิ เหล่ เซอ เพร ตูจูเพร เง ปา. ^t

หม่าอูเป๋ เบ่เบ่ เด๊อ อา เอ๊ฉื่อ แบ่เจ่ เหย่ซู่ อา โคเจ่ เนอ, อา เอ๊ฉื่อ เฮ๊อ เหย่ซู่ เฮ๊อ.

(มาระโก ๙:๔๑)

40 “แกแย เด๊อ อา เอ๊ฉื่อ ซี เนอหม่า อา เอ๊ฉื่อเฮ๊อ แว เฮ๊อ. ^u เร๊อ แกแย เด๊อ อา เอ๊ฉื่อ แว เนอหม่า, อา เอ๊ฉื่อเฮ๊อ เพ จอแปแหร่ เด๊อ อา นอกา แว เออเนอ เตเพร เฮ๊อ. ^v 41 แกแย เตเพรเพร ย๋อ ทวา จอแปแหร่ อาเพรโพร เร๊อ แกแย เตเพรเพร เก่ เอ๊โมฉื่อ เพรโพร เออเตเพรเนอ, จอแปแหร่ เก่ เด๊อะ อา เตเมหนิคว๊าเก่ ฮู๊ อา เด๊อะ เพรโพร เต๊เห่เนอ ปา. แกแย เตเพรเพร ย๋อ ทวา แกแยจ๊อแกแยเต เร๊อ แกแยเตเพรเพร เก่ เอ๊โมฉื่อ แกแยจ๊อแกแยเต เออ เตเพร เฮ๊เนอ จอแปแหร่ เก่ เด๊อะ อา เตเมหนิคว๊าเก่ ฮู๊ อา เด๊อะ แกแยจ๊อแกแยเต เต๊เห่เนอ ปา. 42 แว เฮ๊จ๊อจ๊อ ซี, แกแย เตเพรเพร ย๋อ ทวา แว โคเจ่ เด๊อ อา ปีตี๊เล๊อ เตเพร อาขว่าอาคยา, อูเป่เป๊ เบ่เบ่ เด๊อ อา เด๊อะโอ แกแย เออเตเพร เร๊อ เทอกู๊จุ เตเบ แพ๊ เนอ จอแปแหร่ เก่ เด๊อะ หม่าแหน่ เจ๊อ ลู เตเมหนิคว๊าเก่ แหน่ เจ๊อปา.”