Matthew 14

เจเทอ คูยอห์น เซอ ฮู๊เต อาหรี่อาแก

(มาระโก ๖:๑๔-๒๙, ลูกา ๙:๗-๙)

1เบ๊อะเนออาเค เพรเป๊อเต เฮโรด หนิโฮ แบ่เจ่ เหย่ซู่ อาหรี่อาแก. 2เร๊อ อา เฮ๊ อาหลู่เล๊ เต๊เห่ เน๊อ, “อา หม่า เพรเจเทอ คูยอห์น เนอเต เพร แพ๊, อา เซอเพรกาคยา เฮ๊อ, ตื๊อเรอ อา เมแจ่ เตโค๊ตีกลี๊ เนอเต๊เห่ เฮ๊อเนอ.”

3– 4คุ๊ยเฮโรด ย๋อ จว๊าพย๊า เกอเร๊อ คยาแซ๊ดื่อ อาคี โหมะเฮโรเดียส หม่าเฮ๊อ อาเหล่ โกล ทวา อาโป่ คูฟีลิป อาเม อาขว่าอาคยา, คูยอห์น เฮ๊โทเฮ๊แซ๊แซ๊ ลู เน๊อ, “เน จว๊าพย๊าหนิ คยาแซ๊ เนคี ฮู๊เนอ หม่า อาโต เร๊อ เตซว๊าเตแส่โต่.” ^a อา เฮ๊ ลู ฮู๊เนอเรอ อา นอจว๊าปื่อ จอกลอหม่า อาเกลอฮู๊ เต๊เห่ เร๊อ คูยอห์น เร๊อ อา นอด๊อตาแก ลู เด๊อ ทอกู. ^b 5คุ๊ยเฮโรด ซิหยื่อ เมเซอแก เจ๊อ คูยอห์น ตื๊อดื่อเรอ แกแยยิวพู๊ เต๊เห่ ย๋อ หยื่อเอ่ เร๊อ คูยอห์น หม่า เพรโพร เตเพร อาขว่าอาคยา, อา ซิอิเช เหย่ซี อาเหล่ เร๊อ อา เมเซอ บื่อ ลู โต่.

6หม่าแน๊เรอ เบ๊อะคุ๊ยเฮโรด อาม๊อเนอ อาโอ่เนอ แฮโต่เฮ๊อ เบ๊อะเนอ, โหมะเฮโรเดียส อาพู๊เพรเหมาะ เลเผระ เด๊อ คุ๊ยเฮโรด อาเป๊เส่เง เน๊อ ซิเผระ เต๊เห่ อาเป๊เส่เง เร๊อ คุ๊ยเฮโรด ซิปล่อโม โตซิปล่อ โกโน๋ โต่ อาขว่าอาคยา, 7คุ๊ยเฮโรด อาอ๊อแล เรอ “เน ซิหยื่อ กุย อิเตเต๋ เนอ, แว เก่ เด๊อะ เน เด๊อ เน กุยแว ฮู๊เนอ.” 8อาโหมะ เฮ๊ เป่ ลู เน๊อ อา จว๊า เฮ๊ คุ๊ยเฮโรด เน๊อ, “ปาตือ เป่ แว เพร เจเทอ คูยอห์น อาแกโบ เร๊อ แด่ เป่ แว อากู่กล๊อ เออเนอ เด๊อ ดีเบกู เร๊อ แฮเด๊อะ แว เบ๊อะเออ.” 9คุ๊ยเฮโรด อา ซิปล่อโม โต่ ตื๊อดื่อเรอ อา ย๋อ อ๊อแล โทเฮ๊อ เด๊อ อาซิเผระ เต๊เห่ อาเป๊เส่เง อาขว่าอาคยา, อา เฮ๊ตา อาเกลอฮู๊ เต๊เห่ เน๊อ อา เก่ จว๊าเมฮู๊ เพรเหมาะเป๊เจ่ เออเตเพร กุย ลู เนอ. 10เหย่ซี จว๊า เด๊อ ทอกู เร๊อ อา จว๊าปาตือ กา คูยอห์น อาแก่โบ. 11เหย่ซี แด่โน คูยอห์น อา กู่กล๊อเออ เด๊อ ดีเบกู เร๊อ อา แฮเด๊อะ เน๊อ เป๊เจ่เพรเหมาะเนอเตเพร เร๊อ พู๊เจ่โหมะเออ จอกา เด๊อ อาโหมะโอ่. 12คูยอห์น อา โคเจ่ เต๊เห่ แฮพย๊ากา ลู เหน่กล่อ โอ่แกเออ เร๊อ กา โล๊แก ลู. โทเรอ เหย่ซี จว๊า แด๊โฉ่เป่ แบ่เจ่ เหย่ซู่.

แบ่เจ่ เหย่ซู่ โบ่เอ่ แกแย แงรี๊

(มาระโก ๖:๓๐-๔๔, ลูกา ๙:๑๐-๑๗, ยอห์น ๖:๑-๑๔)

13เบ๊อะแบ่เจ่ เหย่ซู่ หนิโฮ เนอ อู เมเซอ โทเฮ๊อ คูยอห์น เบ๊อะเนอ, อา เร๊อ อา โคเจ่ เต๊เห่ จว๊าโน แถ่แด๊หนิ ส่อเกลอ เร๊อ เถ่จว๊าแก แลแค ตื้อดื่อ เด๊อ เหล่โอ่อาโส่อาเคร เด๊อ อู โอ่ เตเพร่ว โต่ โต๊โผ่. เร๊อ เบ๊อะแกแย เบ๊หมู่ หนิโฮเฮ๊อ เบ๊อะเนอ, อา โอ่ แลแค เบ๊อะวีกู เนอเต๊เห่ เร๊อ อา เถ่ครวา จว๊าเกอ แลแค เร๊อ กู๊โด่ เด๊อ โคขุ ตากยา. 14เบ๊อะแบ่เจ่ เหย่ซู่ เถ่โคขุเออ เบ๊อะเนอ, อา แม๊เถอะ แกแย เบ๊หมู่ดุ จว๊า โอ่ป่อ โอ่หนื่ออื่อ เหร่อ ลอเฮ๊อ เด๊อ เงเฮ๊อ. เบ๊อะอา แม๊เถอะ เหย่ซี เนอ อา ซิยอ เกอเร๊อ เหย่ซี เร๊อ อา แหย่โอ่เหม่ เป่ลอ แกแยชุ๊ย เด๊อ เหย่ซีเกล เนอเต๊เห่.

15เบ๊อะเหมาะเฮ๊ ต๊อเหมาะ เตเร ผื่อตาเฮ๊อ เบ๊อะเนอ, อา โคเจ่ เต๊เห่ แฮ เด๊อ ลูโอ่ เร๊อ อา แฮเฮ๊ ลู เน๊อ, “เหล่โอ่ เบ๊อะเออโต๊โผ่หม่า ดอ โอ่ผื่อ ตอด๋อโต่, โท๊โต่ เหมาะเฮ๊ เฮ๊อ อาขว่าอาคยา, แซ่ฮู๊ เหย่ซี เก่ จว๊าพรีเอ่ เกอเร๊อดื่อ แลแค อา เหล่เอ่เหล่โอ เด๊อ ดอเด๊อโฉ่ เนอเต๊เห่เนอ เร๊อ นอกา มอ แกแย เออเต๊เห่.”

16แบ่เจ่ เหย่ซู่ เฮ๊ฉื่อ เหย่ซี เน๊อ, “โหล่นอกา เหย่ซี โต่. แม๊ เด๊อะเอ่เด๊อะโอ เป่ เหย่ซี เต๊อเจ่อเจ่อ เนอ.”

17เร๊อ เหย่ซี เฮ๊ฉื่อ ลู เน๊อ, “เปเต่ โอ่ แพ๊ตื๊อ ค๊อมู แงกล่อ เร๊อ เต๊วฮู๊ เนอเบ่ แพ๊.”

18เร๊อ อา เฮ๊ เหย่ซี เน๊อ, “พย๊าแฮ เด๊อ แว โอ่ เออ.” 19เร๊อ อา นอโอ่แนแลลอ ล๋อ แกแย เนอเต๊เห่ เด๊อ มีออโซเลขุ. อา พย๊า ค๊อมู แงกล่อ เร๊อ เต๊ว เนอเบ่เออ เร๊อ อา โด่แด แม๊ตู่แถ่ เด๊อ ม๊อเล เร๊อ อา เฮ๊บุ๊ยเฮ๊ตาเร๊อแถ่ จอแปแหร่ โทเร๊อ อา บิกยา ค๊อมู. โทเรอ อา เด๊อะตา เด๊อ อา โคเจ่ เต๊เห่ อาลู. เร๊อ อา โคเจ่ เต๊เห่ เด๊อะจว๊า แฮเง เด๊อ แกแย เบ๊หมู่ เต๊เห่ อาโอ่. 20เหย่ซี เอ่ โป่เอ่โป่โอ เอ่ก๊อโอบา ลอปลี เจ๊อ ปว๋า เตเพร เจ๊อ. อา โคเจ่ เต๊เห่ พย๊าดว้าปล๊อ คยา อา โอ่แกเล๊อ เต๊เห่เนอ อา โอ่บา ปา เจ๊อ เน๊อ ขริเนอ เช๊อเนอเม เจ๊อ. 21แด๊โชชื่อแพ๊ เพรคูดุ เด๊อ, อา ผื๋อ โอ่ดื่อ แงรี๊ เจ๊อ. เพรเหมาะ เร๊อ เป๊เจ่พู๊ เต๊เห่เนอ แด๊โต่ ลู โต่.

แบ่เจ่ เหย่ซู่ จว๊า เด๊อ เทอขุ

(มาระโก ๖:๔๕-๕๒, ยอห์น ๖:๑๕-๒๑)

22เหย่ซีโถ่โอ่ปล๊อ โทโท เร๊อ เหย่ซู่ นอจว๊าโน แถ่แด๊ ลอ อา โคเจ่ เต๊เห่ ส่อเกลอ เร๊อ อา นอเถ่จว๊า เหร่อแก เหย่ซี เด๊อ เทออ่อ เบ๊เร. เร๊อ เบ๊อะอา โคเจ่ แถ่แด๊ ส่อเกลอ เบ๊อะเนอ, อา เร๊อ อา ปลวากาแก ลอ แกแย เบ๊หมู่ เนอเต๊เห่. 23อา ปลวากาโท แกแย เบ๊หมู่ เร๊อ, อา จว๊าแถ่ กุยจ๊อเบ เด๊อ โฉ่ขุ. เร๊อ เบ๊อะโหมะคี๊ โป๊โหล่แฮ เฮ๊อ เบ๊อะเนอ. อาโอ่ตื้อดื่อ เบ๊อะเนอ เตเพร แพ๊. 24หม่าแน๊เรอ เบ๊อะส่อเกลอ เนอเต๊เบ่ เถ่จว๊า ยาลาเฮ๊อ เด๊อ เทอดุกู เบ๊อะเนอ, เก่แลเซ๊ดุ พอกาช๊าฉื่อ เหย่ซี เร๊อ เทอ ฮ๊าโฮ๊ แฮ แปล่ กล๊อกลี๊ ลอ เหย่ซี ส่อเกลอ.

25เบ๊อะชา อี๊อู่เตเย เหมาะ เตเร ลีบูเฮ๊อ เบ๊อะเนอ, แบ่เจ่ เหย่ซู่ จว๊า เด๊อ เทอขุ เร๊อ อา แฮโต เหย่ซี. 26เบ๊อะอา โคเจ่ เต๊เห่ แม๊เถอะ ลู จว๊า เด๊อ เทอขุ เบ๊อะเนอ, เหย่ซี ซิอิเช แตแนตากยา เจ๊อ เร๊อ อา เอ๊โท แลแค เน๊อ, “เก๋อ โลเน๊.”

27หม่าแน๊เรอ โตโพ๊โต, แบ่เจ่ เหย่ซู่ เฮ๊ เหย่ซี เน๊อ, “แด่คือแด่ฮา แลแค ซี ซิปล่อ. ซิอิเช แลแค แต่เหม่, เออ หม่า แว แพ๊.”

28เร๊อ คูเปโตร เฮ๊ เน๊อ, “แบ่เจ่, เก่ เน หม่าแหน่ เฮ๊เรอ เฮ๊ แว เด๊อ แว เก่ แฮเกอ เด๊อ เทอขุ เด๊อ เน โอ่.”

29เร๊อ อา เฮ๊ ลู เน๊อ, “แฮมอ.”

เร๊อ คูเปโตร เถ่จว๊า เด๊อ ส่อเกลอกู เร๊อ อา จว๊าเด๊อ เทอขุ แฮโต เหย่ซู่. 30หม่าแน๊เรอ เบ๊อะอา แม๊เถอะ เก่แลชอ เทอฮ๊าโฮ๊ เบ๊อะเนอ, อา ซิอิเช เร๊อ อา แลจื๊อตา, เร๊อ อา เอ๊โท เน๊อ, “แบ่เจ่, เมจว่า เร๊อ แว นี๋.”

31แบ่เจ่ เหย่ซู่ บ๊อแฮ อากู๊ขุ โตโพ๊โต เร๊อ อา จุ่ยแถ่ ลู เร๊อ อา เฮ๊ ลู เน๊อ, “เน เตหยื่อ ปีตี๋ ลา ว๋า, เน ซิปล่อ หร่าเหร่ เมเต?”

32เบ๊อะเหย่ซี แถ่โน เด๊อ ส่อเกลอกู เบ๊อะเนอ, เก่แลเซ๊โอ่โก๊ แฮ. 33เบ๊อะเนออาเค แกแย โอ่ เด๊อ ส่อเกลอกู เนอเต๊เห่ จ๊อเบแถ่ แบ่เจ่ แบ่เจ่เหย่ซู่ เร๊อ อา เฮ๊ เน๊อ, “แน หม่า จอแปแหร่ อาพู๊คู เตเพร หม่าแหน่แหน่ เน เฮ๊อ.”

แบ่เจ่ แหย่โอ่เหม่ เตชุ๊ยเตเช เด๊อ วีเยนเนซาเรทเก่

(มาระโก ๖:๕๓-๕๖)

34เหย่ซี จว๊าเบ๊ เฮ๊อ เทออ่อดุเออ เร๊อ อา จว๊าโต่ แลแค เด๊อ วีเยนเนซาเรท เก่. 35ดอพู๊โฉ่พู๊ เบ๊อะเนอ เต๊เห่ โตเตเนหม่า เหย่ซู่ เร๊อ เหย่ซี จว๊าแด๊โฉ่ เป่ลอ ล๋อ แกแย เด๊อ อา โอ่ แลแค เด๊อ เก่กู เบ๊อะเนอ เร๊อ อู เอ๊ แฮ ลอ แกแยชุ๊ย แกแยเช เต๊เห่ เด๊อ เหย่ซู่ โอ่. 36เหย่ซี กุย ซิยอ แบ่เจ่เร๊อ นอ ขระเบ่ แพ๊ อา จาจวาแก เร๊อ เพรชุ๊ย เพรเช เออเต๊เห่เนอ ตีกิฮู๊แพ๊. เร๊อ แกแย เด๊อ อา ขระ ลู จาจวาแก เต๊เห่เนอ, อา เตชุ๊ยเตเช โอ่เหม่ ลอปลี เจ๊อ.