Matthew 16

แกแย ทวา แกแยยิวพู๊ ทวาดุทวาเต เต๊เห่ นอเด๊อะโล เหย่ซู่ เตโค๊ตีกลี๊

(มาระโก ๘:๑๑-๑๓, ลูกา ๑๒:๕๔-๕๖)

1ฟาริสีพู๊ เร๊อ สะดูสีพู๊ เต๊เห่ แฮ เด๊อ แบ่เจ่ เหย่ซู่ อา โอ่ เร๊อ อา แฮ กุยแม๊แต๊แก่ เหย่ซู่ เด๊อ อา เก่ เด๊อะโลเตโค๊ ตีกลี๊ เด๊อ อาโอ่ เด๊อ ม๊อขุ แฮเต๊อเจ่อ. ^a

2เร๊อ อา เฮ๊ฉื่อ เหย่ซี เน๊อ, “ต๊อเหมาะ เตเร ตาเฮ๊อ เบ๊อะเนอ, ม๊อ เก่ ลี เฮ๊เรอ ซี เฮ๊ แลแค เนอ, ป่าโรปา หม่า เก๊ จือโต่. 3โทเร๊อ เหมาะลี เบ๊อะเนอ, เหมาะ เก่ ลี, อ๊อโหล่ เก่ โด เฮ๊อเร๊อ ซี เฮ๊ แลแค เนอ, เก่แลแล แฮ ปา, ซี แม๊ ม๊อเล เตเมทวาแถ่ เต๊เห่ เร๊อ ซี แม๊ลว๊า ซิเงหนื่ออื่อ เหร่อ เก่จือ เก่แลเซ๊ อาหรี่อาแก, ตื๊อดื่อเรอ เตเหม่ทวาแถ่ อาเหน่ กู๊แหน่เออ เต๊เห่เนอ, ซี จว๊า ซิเง ลว๊า เหร่อ อาโหง่แลช๊า โต่ หม่า ฮู๊เต? 4แกแยมู๊แหม่ เด๊อ อาจ๊อ เกออู เร๊อ จอแปแหร่ โต่ เออเตอทือ เต๊เห่ จว๊ากูยแม๊ โต่ แว เตเม อาโค๊ตีกลี๊ เต๊อเจ่อ, หม่าแน๊เรอ แว เก่ เด๊อะโล เป่ ตื๊อแพ๊ เหย่ซี เตโค๊ตีกลี๊ เต๊อเจ่อ เด๊อ อาแซ่เน๊อ เพรโพร คูโยนาห์ เนอปา แพ๊,” อา เฮ๊โทเรอ อา เถ่จว๊า ตาพาแก เร๊อ เหย่ซี. ^b

ฟาริสีพู๊ เต๊เห่ เร๊อ สะดูสีพู๊ เต๊เห่ อาโฮหมื่อ

(มาระโก ๘:๑๔-๒๑)

5เบ๊อะเหย่ซี เถ่จว๊าเบ๊ โทเฮ๊อ เทออ่อดุ เบ๊อะเนอ, อา โคเจ่ เต๊เห่ โชตาปา ฉู่จว๊าหนิ ค๊อมู. 6แบ่เจ่ เหย่ซู่ เฮ๊ เหย่ซี เน๊อ, “รอหนิ แลแค ฟาริสีพู๊ เต๊เห่ เร๊อ สะดูสีพู๊ เต๊เห่ อาโฮหมื่อ เนอ นี๋.” ^c

7เร๊อ เหย่ซี โด่แน เกอเร๊อ ลู เหย่ซู่ เฮ๊ โหง่ เออเนอ เตเพร เน๊อ เตเพร เร๊อ อา เฮ๊ แลแค ฮู๊เออ, “แบ่เจ่ เฮ๊ เป ฮู๊เออเนอหม่า, หม่าเด๊อ เป โชตาปา พย๊าจว๊าหนิ เป่ ลู ค๊อมูเนอ เฮ๊อ.”

8แบ่เจ่ เหย่ซู่ ซิเง เร๊อ เหย่ซี เฮ๊เบ่ ลู เร๊อ ค๊อมู อาหรี่อาแก อาขว่าอาคยา, อา แด๊เฮอ เหย่ซี เน๊อ, “แกแย เตหยื่อ ปีตี๊ ซี๋, หม่าเมเตเน๊อ ซี จว๊าโด่แน เกอเร๊อ เป่ลู เนอ ซี โชตาปา พย๊าจว๊าหนิ ค๊อมู อาหรี่อาแก ฮู๊เต? 9โต่กู๊แหน่เรอ ซี ซิเงโปล เป่ เกอแหน่ แลอู โต่ แอ? เบ๊อะแว เด๊อะเอ่ ค๊อมู แงกล่อ เร๊อ แกแย แงรี๊ เบ๊อะเนอ, ซี พย๊าดว้าปล๊อ คยาแซ๊ อา โอะแกเล๊อ เนอเต๊เห่เรอ อา โอะ บ๊าขริเต เนอหม่า ซี โชตาปาเฮ๊อ แอ? ^d 10หม่าโต่เรอ เบ๊อะแว เด๊อะเอ่ แกแย ลุยรี๊ เร๊อ ค๊อมู โซซว๊าต๊อกล่อ เบ๊อะเนอ, ซี พย๊าดว้าปล๊อ คยาแซ๊ อา โอะแกเล๊อ เนอเต๊เห่เรอ อา โอะ บ๋าครี่ เต, ซี โชตาปา เฮ๊อ แอ? ^e 11แว เฮ๊ ค๊อมู อาหรี่อาแก หม่าโต่, เนอหม่า ซี โต ซิเง เกอเฮ๊อ อู เฮ๊อ. แว เฮ๊ ซี, รอหนิ แลแค ฟาริสีพู๊ เต๊เห่ เร๊อ สะดูสีพู๊ เต๊เห่ อาโฮหมื่อ เนอ นี๋.” 12เบ๊อะเนอเค เหย่ซู่ โคเจ่ เต๊เห่ ซิเงโปลแฮ เร๊อ แบ่เจ่ เหย่ซู่ นอ รอหนิ เหย่ซี เร๊อ โฮหมื่อ เด๊อ อู เม โต๊โผ่ ดุแถ่ อา เร๊อ ค๊อมู เนอ หม่าโต่. อา นอรอหนิ เหย่ซี เร๊อ ฟาริสีพู๊ เต๊เห่ เร๊อ สะดูสีพู๊ เต๊เห่ อา เตอิซว๊าอี๊แส่ เต๊เห่ เนอแพ๊.

คูเปโตร อ๊อแล เร๊อ เหย่ซู่ หม่า ครี๊

(มาระโก ๘:๒๗-๓๐, ลูกา ๙:๑๘-๒๑)

13เบ๊อะแบ่เจ่ เหย่ซู่ จว๊าโต่ เด๊อ วีแกซารียา คูฟีลิปปี เบ๊อะเนอ, อา แด๊เฮอ อา โคเจ่ เต๊เห่ เน๊อ, “อู เฮ๊ แลแค แกแยเห่ขุ อาพู๊คูหม่า หม่าแวเออ เน๊อ แว หม่า อูเป?”

14เหย่ซี เฮ๊ฉื่อ ลู เน๊อ, “เต๊เห่เห่เรอ อา เฮ๊ เน๊อ เน หม่า เพรเจเทอ คูยอห์น, เต๊เห่เห่ ลาติ เร๊อ เนหม่า เพรโพร คูเอลียาห์, เต๊เห่เห่เรอ อา เฮ๊ เน๊อ เนหม่า เพรโพร คูเยเรมีย์, โต่หม่าเเน๊ เนหม่า เพรโพร โคดื่อ เด๊อ อาโร เต๊เห่ อาเกล เตเพรเพร แพ๊.” ^f

15แบ่เจ่ เหย่ซู่ แด๊เฮอ เหย่ซี๋, “หม่าแน๊เรอ, ซี เนอ ล่า, ซี เฮ๊ เกอ แว หม่าอูเป?” อา เฮ๊ เนอ,

16คูซีโมน เปโตร เฮ๊ฉื่อ ลู เน๊อ, “เน หม่า ครี๊ เด๊อ อา เมแลเปล๊ กา อู เตเพรเฮ๊อ. เนหม่า อา ทวา จอแปแหร่ เด๊อ อา เซอเพร เตเพร อาพู๊คู.” ^g

17เร๊อ แบ่เจ่ เหย่ซู่ เฮ๊ฉื่อ ลู เน๊อ, “เพโยนาห์ อาพู๊, คูซีโมน, จอแปแหร่ เด๊อะบุ๊ยเด๊อะเตอเรอ เฮ๊อ เน, เมเตเฮ๊เรอ เออ หม่า แกแยเห่ขุพู๊ เด๊อะซิเง แถ่โล เน หม่าโต่, หม่าดื่อ เพ จอแปแหร่ เด๊อ ม๊อขุ เตเพร เด๊อะซิเง แถ่โล เน แพ๊. 18เร๊อ แว เฮ๊ เน, เนมุย เร๊อ คูเปโตร ▼

▼เปโตร อาโหง่แลช๊า หม่า “หล่อ”

เร๊อ แว เก่ ช๊อแล แว เพรหยื่อเอ่ ตู๊หมู่ตอกล๊อ เด๊อ หล่อเออ อาลู ปา. เตเซอ อาเตฉว่าเตชอ เออเนอ, อา เมเป่แจ่ เพรหยื่อเอ่ปล๊อหมู่ โต่. 19แว เก่ เด๊อะ เน ม๊อขุ เทอเลเก่กู ชอถี่ ปา. ล๋อ เน จอกลอหม่า อู เด๊อ เห่ขุ เออเนอ, จอแปแหร่ เก่ จอกลอหม่า เกอดื่อ อู เด๊อ ม๊อขุ ปา. ล๋อ เน ฉิย๊า ปลวาแก เด๊อ เห่ขุ เออเต๊เห่เนอ, จอแปแหร่ เก่ ฉิย๊า ปลวาแก เกอดื่อ ฮู๊เนอ เด๊อ ม๊อขุ ปา.” ⁱ 20เร๊อ แบ่เจ่ เหย่ซู่ เด๊อะรอเด๊อะเร อา โคเจ่ เต๊เห่ เนอ, แว หม่า ครี๊ เตเพรเนอ จว๊าแด๊โฉ่โล เป่ แต่ อู เตเพร่ว แต่เหม่ นี๋.

แบ่เจ่ เหย่ซู่ แด๊โฉ่โล เร๊อ อา เก่ ข่าเบ๊ เตจาเตจือ เร๊อ เตเซอ ปา

(มาระโก ๘:๓๑-๙:๑, ลูกา ๙:๒๒-๒๗)

21เป๊อแถ่ เบ๊อะเนอ เร๊อ ตาแฮเงเนอ, แบ่เจ่ เหย่ซู่ เฮ๊โฉ่โปล เป่ อา โคเจ่ เต๊เห่ เนอ, แว เบ่จว๊า เด๊อ วีเยรูซาเล็ม เร๊อ แกแยยิวพู๊ เตจ๊อบู่จ๊อเบ โหมะพรู โหมะเผระ, เพรหลู่แต ทวาดุทวาเต, เพรอิซว๊า เตซว๊าเตแส่ อาซ๊าร๊าเต๊เห่ เหย่ซี เก่ เมจาเมจือ แว ปว๊าเมว ปว๊าเจ่อ ปา. เหย่ซี เก่ เมเซอ แว ปา หม่าแน๊เรอ โซเนอโซเซ ปา จอแปแหร่ เก่เมเซอเพร กาคยา แว ปา.

22คูเปโตร เอ๊จว๊า ตาพา จ่าเจ แบ่เจ่ ตี๊กิแพ๊ เร๊อ อา ซิพรวา ลู เน๊อ, “แบ่เจ่ จอแปแหร่ เก่ เมตาตือเป่ ดื่อเนปา. อา เบ่ ทวาแถ่หนิ ตีกี๋ โต่.”

23แบ่เจ่ เหย่ซู่ ตีรี๊ กาคยาโต คูเปโตร เร๊อ อา เฮ๊ ลู เน๊อ, “เก๋อ โลเน๊มู๊แหม่รีแจ่ กู่กล๊อ, เถ่จว๊า ตาพาแก เร๊อ แว, เน หม่า อาแซ่เน๊อ หล่อ เตเม เด๊อ อู เหล่ตอพอเบ่ เตเม เนอแพ๊. เน เหล่เตเน เต๊เห่เนอ อาแซ่เน๊อ แกแยเห่ขุพู๊ อาเหล่เตเน เนอ แพ๊. อา แซ่เกอ เร๊อ จอแปแหร่ อา เหล่เตเน เต๊เห่เนอ หม่าโต่.”

24โทเรอ แบ่เจ่ เหย่ซู่ เฮ๊ อา โคเจ่ เต๊เห่ เน๊อ, “แกแย เตเพรเพร เก่ ซิหยื่อ ครอครวา เกอแว เฮ๊เรอ, อา โตเบ่ เม ฮู๊ แว ซิหยื่อ นอเมลู เนอเต๊เห่, อา เม จู๋ ดื่อ อาซิปล่อ หม่า อาหนิ โต่. อา เบ่ แย๊แถ่ เกอเร๊อดื่อ อา อี๊ถื่อดีเต่ เร๊อ อา เบ่ ครอครวา เกอแวคยา. ^j 25เมเตเฮ๊เรอ แกแย เตเพรเพร เด๊อ อา ซิโล เกอเร๊อ อาซิปล่อ เซอเพร เนอ, อา เก่ แลจุ แก อาซิปล่อ เซอเพร ปา. หม่าแน๊เรอ แกแย เด๊อ อาวิแก ซิปล่อ เซอเพร เด๊อ แวเง เตเพรเพรเนอ, อา เก่ พย๊าหนิ ซิปล่อเซอเพร ตูจูเพรเง ปา. ^k 26แกแย เตเพรเพร อา พย๊าหนิ ลอ เจ๊อ เห่ขุต๊าบ่า เตดุแหย่แถ่เซ เต๊เห่ เจ๊อ ตื๊อดื่อเรอ อา เก่ แลจุแก อา ซิปล่อตูจูเพรเออ เฮ๊เนอ อาบุ๊ย เด๊อ ลูเง ฮู๊เต? แกแย เด๊อ อา ซิหยื่อ หนิเบ่ กาคยา คยาแซ๊ อา ซิปล่อเซอ ตูจูเพร เออ เตเพรเพรเนอ, เตดุแหย่แถ่เซ เด๊อ อา เก่ อิพรีเบ๊ เน๊อ อา ซิปล่อเซอเพร เออเนอ อา โอ่ เตอเจ๋อ โต่. 27เมเตเฮ๊เร๊อ แกแยเห่ขุ อาพู๊คู หม่าเฮ๊อ แว เออ เก่ แฮคยาแซ๊ เกอเร๊อ อาเพ อาเตอเรอดุเตอเรอทู ปา, เร๊อ อาม๊อขุ เตเน่ว เต๊เห่ ปา ^l เร๊อ อา เก่ เด๊อะเลอ กาคยาฉื่อคยา อู ปว๋า เตเพร ฮู๊ เหย่ซี เมโทเฮ๊อ เนอเต๊เห่ ปา. ^m 28แว เฮ๊ หม่าแหน่ เจ๊อ ซี, แกแย เต๊เห่เห่ เด๊อ อา ก๊อถ่อโอ่ เบ๊อะซีเกลเออ เต๊เห่เห่เนอ, เบ๊อะเหย่ซี เซอแต่ล๋าย โต่ เนอ, เหย่ซี เก่ แม๊เถอะน๊อ แลแค แกแยเห่ขุ อาพู๊คู เก่ แฮ ฮู๊ คุ๊ย เตเพรเนอ อุ้ย ปา.”