Matthew 19
เม เร๊อ เว โอ่แก ลู อาหรี่อาแก
(มาระโก ๑๐:๑-๑๒)
1เบ๊อะแบ่เจ่ เหย่ซู่ เฮ๊ โทเฮ๊อ เตเออ เต๊เห่ เบ๊อะเนอ, อา โอ่ เด๊อ กาลิลีเก่ เร๊อ อา เถ่จว๊าแก เด๊อ ยูดาห์เก่ เด๊อ อาโอ่ เด๋อ เทอ จอร์แดน เทอแลโหมะ แบ๊เร ตากยา. 2แกแย ครวาปลูครวาเผ่ เกอลอ ลูคยา เร๊อ อา แหย่โอ่เหม่ เป่ อู เตชุ๊ยเตเช เบ๊อะเนอ. 3เร๊อ ฟาริสีพู๊ เต๊เห่ เนอ, แฮ โต่เด๊อเหย่ซู่อาโอ่ เร๊อ อา แฮ ทื๊อ แม๊ แบ่ เจ่ เหย่ซู่ เตซื๊อ เร๊อ แด๊เฮอ ลู เน๊อ, “แกแย เตเพรเพร เก่ โอ่ แก อาเม เฮ๊ หม่า อาหนิแพ๊ เป เตซว๊าเตแส่ เฮ๊แหน่ ฮู๊เนอ แอ?” 4แบ่เจ่ เฮ๊ฉื่อ เหย่ซี เน๊อ, “เด๊อ เห่ขุทวาลู่ ม๊อขุทวาเซ เบ๊อะเนอ, ‘จอแปแหร่ แบ๊แล ตื้อ แพ๊ เพรคู เตเพร เร๊อ เพรเหมาะเตเพร แพ๊’ เนอหม่า ซี แด๊น๊อ เกออู โต่ แอ? a 5โทเรอ, จอแปแหร่ อาเฮ๊ เนอ, ‘เมฮู๊เนอเรอ, เพรคู เออเนอ อา เบ่ แด่แก อาโหมะอาเพ เร๊อ อา เบ่ จว๊า โอ่เต่อเกอ เร๊อ อาเม, เร๊อ แกแย เออซิเนอเนอ อา ทวาแถ่เฮ๊อ เตเพรเพร่ว แพ๊ เฮ๊อ.’ b 6ฮู๊เนอเรอ เหย่ซี หม่า แกแย ซิเนอ หม่าปาโต่เฮ๊อ. อา ทวาแถ่เฮ๊อ ลู เตเพรเพร่ว เฮ๊อ อาขว่าอาคยา, เต เด๊อ จอแปแหร่ แด่ โอ่เต่อ ลู เนอ, แกแยเห่ขุพู๊ นอ เบ่ นอ โอ่แก หนิ ลูเต เพร๋ โต่.” 7เร๊อ ฟาริสี เต๊เห่ แด๊เฮอ โป่ ลู เน๊อ, “เก่เฮ๊ ฮู๊เนอเรอ, หม่าเมเตเร๊อ คูโมเสส จว๊า เฮ๊โต่ เร๊อ เพรคู เตเพรเพร เก่ รา ลีโอ่แกเม อา เตราม๊าราแด ต๊าบ่า เร๊อ อา เด๊อ เร๊อ อาเม เร๊อ อา เก่ โอ่แก อาเม เฮ๊เนอหม่า อาหนิ แพ๊” อา จว๊า นอเด๊อะโต่ ฮู๊เนอหม่า เมเต? c 8เร๊อ แบ่เจ่ เหย่ซู่ เฮ๊ฉื่อ เหย่ซี เน๊อ, “ซี ย๋อ เมวกู่ กล๊อ เพรอ ดื่อ ซีเง อาขว่าอาคยา, คูโมเสส ปลวา ซี เด๊อ ซี โอ่แก ซีเม ฮู๊เออเนอหม่า อาหนิ แพ๊. หม่าแน๊เรอ จอแปแหร่ แบ๊ตาลู่เห่ขุ อาเค เนอ, อา นอโอ่แก อูโต่. 9แว เฮ๊ ซี, แกแย เตเพรเพร เด๊อ อาเม จว๊าซื๊อ เพรคู หม่าโต่ ตื๊อดื่อเรอ อา เก่ โอ่แก อาเม เร๊อ เตหรี่เตแก เด๊อ อาโร เต๊อเจ่อ เร๊อ อาเก่ จว๊า พย๊า โค๊ อา เม โอ่เก อาเม เด๊อ อาโร เตเพร เฮ๊เนอหม่า, อา จว๊า ซื๊อ เน๊อ เพรเหมาะ เนอ เต เพร เฮ๊อ” d 10เร๊อ อา โคเจ่ เต๊เห่ เฮ๊ ลู เน๊อ, “เตหรี่เตแก ฮู๊เออ เก่ ทวาแถ่ แจ่ เด๊อ เมเร๊อเว อาเปล่กู เก่เฮ๊เรอ เก่ พย๊าเม โต่ หม่า อาแร๊เล๊อ กอ?” 11หม่าแน๊เรอ เหย่ซู่ เฮ๊ฉื่อ เหย่ซี เน๊อ, “แกแย จูเอ่เบ๊ เกอ เตอิซว๊าอี๊แส่ เออ ปว๋า เตเพร โต่. เตอิซว๊าอี๊แส่ เออเนอ อาจูเอ่เบ๊ตื๊อแพ๊ แกแย เด๊อ จอแปแหร่ เด๊อะ ลู เด๊อ อา เก่ โอ่เซอเพร เบ๊ เต๊เห่อาเง แพ๊. 12เมเตเฮ๊เรอ แกแย เต๊เห่เห่ เนอ, อาอ๊าอาเหร่ โอ่โต่ ปา เจ๊อ เด๊อ อา โหมะฮ๊อกู ปา อาขว่าอาคยา, อาพย๊า อาเมโต่. เต๊เห่เห่ เนอ อู ชุ๊ยแก ลูเดอะ. แกแยเต๊เห่เห่ เด๊ออาเบ่หยื่อ เบ่แหน่ จอแปแหร่ อาเทอ อาเก่ อาขว่าอาคยา, อา อ๊าแล เฮ๊อ อาซิปล่อ เร๊อ อาพย๊า ปา อาพู๊อาเม โต่. แกแย เด๊อ อา จูเอ่เบ๊ เตอิซว๊าอี๊แส่ เออเต๊เห่เนอ, นอเม เหย่ซี ฮู๊เนอ.”แบ่เจ่ เหย่ซู่ เด๊อะบุ๊ยเด๊อะเตอเรอ เป๊เจ่พู๊ เต๊เห่.
(มาระโก ๑๐:๑๓-๑๖, ลูกา ๑๘:๑๕-๑๙)
13อู แเอ๊แฮ เป๊เจ่พู๊ เต๊เห่ เด๊อ แบ่เจ่ เหย่ซู่ อา โอ่, เมเตเฮ๊เรอ เหย่ซี ซิหยื่อ นอแด่แถ่ แบ่เจ่ เหย่ซู่ อากู๊ขุ เด๊อ เป๊เจ่พู๊ เออเต๊เห่ อาเหน่ลู, โทเรอ อา ซิหยื่อ นอกุยจ๊อเบเป่ พู๊เจ่ เต๊เห่ เร๊อ เหย่ซู่. หม่าแน๊เรอ อา โคเจ่ เต๊เห่ ซิพรวาฉื่อ แกแย เด๊อ อา เอ๊แฮ เป๊เจ่พู๊ เออเต๊เห่. 14เร๊อ แบ่เจ่ เหย่ซู่ เฮ๊ เหย่ซี เน๊อ, “ปลวาแฮ เป๊เจ่พู๊ เนอเต๊เห่ เด๊อ แวโอ่เออ, เมตาตือ แต่ เหย่ซี แต่เหม่, เมเตเฮ๊เรอ ม๊อขุ อาเทออาเก่ เนอหม่า แกแย เด๊อ อา แด่หยว่า อาซิปล่อ แซ่เน๊อ เป๊เจ่พู๊ เออเนอเต๊เห่ อาเตเฮ๊อ.” 15เร๊อ อา แด่แถ่โท อากู๊ขุ เด๊อ เหย่ซี อาลู เร๊อ อา เถ่จว๊าแก.แบ่เจ่ เหย่ซู่ เฮ๊รอ เฮ๊เร หนิ แกแน ดุแหย่เต๊เห่
(มาระโก ๑๐:๑๗-๓๑, ลูกา ๑๘:๑๘-๓๐)
16แกแย เตเพร แฮ เด๊อ แบ่เจ่ เหย่ซู่ อา โอ่ เร๊อ อา แฮ แด๊เฮอ ลู เน๊อ, “ซ๊าร๊า, แซ่ฮู๊ แว เก่ พย๊าหนิ ซิปล่อเซอเพร ตูจูเพร อาเงเนอ, เต อาแร๊ เต๊อเจ่อเจ่อ เด๊อ แว โตเบ่ เมเนอหม่า แคร๋ หม่าอิเต?” 17แบ่เจ่ เหย่ซู่ แด๊เฮอ ลู เน๊อ, “เมเตเร๊อ เน จว๊า แด๊เฮอโต่ แว เนอ เตแร๊ อาหรี่อาแก เมเต? แกแย เด๊อ อาแร๊ หม่าแหน่ เนอหม่า อา โอ่ แพ๊ตื๊อ จอแปแหร่ เต แพ๊. เน เก่ ซิหยื่อ พย๊าหนิ ซิปล่อเซอเพร ตูจูเพร เก่เฮ๊เรอ ลือครวา เมเกอ ฮู๊ จอแปแหร่ โหง่เฮ๊แก เนอ.” 18แกแย เนอเตเพร แด๊เฮอฉื่อ ลู เน๊อ, “เตซว๊าเตแส่ เบ๊อะเต ตามาเต?” แบ่เจ่ แบเจ่เหย่ซู่ เฮ๊ฉื่อ ลู เน๊อ, “‘เมเซอ แต่ แกแย แต่เหม่, e จว๊าซื๊อ แต่ อูพู๊อูเม แต่เหม่, f เอ่โห่เอ่ฮี๊ แต่เหม่, g ข่า แหล่โฮ แลแห่ แต่เหม่ h 19เบ่หยื่อ เบ่ แหน่ เนโหมะเนเพ, iโม เกอเร๊อ เนหี่ หี่แพหี่ช๊า เต๊เห่ แซ่ฮู๊ เน โม เกอเร๊อ เนเหน่ เนอ’” j 20“เออเต๊เห่เนอ แว เมโทลอเฮ๊อ แว โหล่เมปา แคร๋ หม่าอิเต?” เพรคู พู๊เส่ เออเตเพร เฮ๊ฉื่อ กาคยา ลู ฮู๊เนอ. 21เร๊อ แบ่เจ่ เหย่ซู่ เฮ๊ ลู เน๊อ, “เก่ เน ซิหยื่อ ทวาแถ่ แกแย เด๊อ อา เล๊อบา เตเพร เก่เฮ๊เรอ กา อิเชแกลอ เน ตาหมื่อตาเต เนอเต๊เห่ เร๊อ เด๊อะแก เร๊อ แกแย โซพ๊าโซแรพู๊ เต๊เห่เนอ. เน เก่ เมฮู๊เนอ เฮ๊เรอ เน เก่ พย๊าหนิ เตดุแหย่แถ่เซ เด๊อ ม๊อขุ ปา. กา เม โท ฮู๊ เนอเรอ, แฮ ครวาเกอ แวคยา.” 22เพรคู พู๊เส่ เออเตเพรเนอ, อา ย๋อ ดุแหย่ ตาปอตาเป เจ๊อ อาขว่าอาคยา, เบ๊อะอา หนิโฮ โท แบ่เจ่ เหย่ซู่ เฮ๊ ลู ฮู๊เออ เบ๊อะเนอ, อา ซิเตเร เร๊อ อา เถ่จว๊าแก. 23เออโตโพ๊เรอ เหย่ซู่ เฮ๊ อา โคเจ่ เต๊เห่ เน๊อ, “แว เฮ๊จ๊อจ๊อ เกอซี, แกแย ดุแหย่ เตเพร เตเร โน เด๊อ ม๊อขุ เทอเลเก่กู เนอหม่า, อาแป่อาแหย่ แหน่เจ๊อ เด๊อ ลูเง. 24แว เฮ๊ โป่ ซี๋, ตีซิโบดุ โตโด เตเร ปย๊าโน เด๊อ เท๊หลิกูเนอ อายู เล๊อปา เจ๊อ เร๊อ แกแย ดุแหย่แถ่เซ เตเพร เตเร โน เด๊อ ม๊อขุ เทอเลเก่กู เนอ เจ๊อ.” 25เบ๊อะอา โคเจ่ เต๊เห่ หนิโฮ อา เฮ๊ ฮู๊เออ เนอ, อา คย๊า อายื๊อ ลอ แลแค เร๊อ อา แด๊เฮอ ลู เน๊อ, “เก่ เมฮู๊เนอเรอ อูเป เตเพร เตเร พย๊าหนิ ปา เต เม แลเปล๊ กา เป?” 26แบ่เจ่ เหย่ซู่ แม๊ตู่ แต่ เหย่ซี เร๊อ อา เฮ๊ เหย่ซี เน๊อ, “แกแยเห่ขุพู๊ เมแลเปล๊ แจ่ เกอเร๊อ อาเหน่โต่ ตื๊อดื่อเรอ, จอแปแหร่ เมแจ่เต ปว๋า เต๊อเจ่อ.” 27เร๊อ คูเปโตร เฮ๊ฉื่อ อา เน๊อ, “แม๊มอ, เป แด่แก ลอ เจ๊อเฮ๊อ เตปว๋า เต๊อเจ่อ เร๊อ เป ครวาเกอเฮ๊อ เนคยาเฮ๊อ ฮู๊เนอเรอ เป เตเร พย๊าหนิ เกอ อาคว๊าอาเก่ อิเตเต ปา?” 28แบ่เจ่ เหย่ซู่ เฮ๊ฉื่อ เหย่ซี เน๊อ, “แว เฮ๊จ๊อจ๊อ ซี๋, เบ๊อะจอแปแหร่ ตี๊หรี่แตแร เห่ขุเซ, เด๊อ เห่ขุเซปา, โทเรอ แกแยอาพู๊คู หม่าเฮ๊อ แวเออ เก่ โอ่แน เด๊อ กู่แกล๊เท แถ่โล ปา. kซี เด๊อ อา ครวา เกอแว เออเต๊เห่ เก่ โอ่แนน๊อ เกอดื่อ เด๊อ กู่แกล๊เท แถ่โล เช๊อเนอเม อาโอ่ เออเนอ ปา, เร๊อ ซี เก่ เมจากาคยา เร๊อ ดื่อ อิสราเอลพู๊ เช๊อเนอโหมะ เออเนอ ปา. l 29โท๊โต่ อูเปเป๋ เบ่เบ่, เด๊อ แวขว่า แวคยาเรอ, อา แด่แก อาหี่อาเพร๊ เบ่เบ่, อาโป่อาแหม่ เต๊เห่ เบ่เบ่, อาโหมะอาเพ เบ่เบ่, อาพู๊ อาเลอ เต๊เห่ เบ่เบ่, อา เก่ พย๊าหนิ เอ๊เล๊อ ปา เจ๊อ เร๊อ อา แด่แก เนอเต๊เห่ อาโพ๊ เด๊อ อาเยกู ปา, โทเรอ อา เก่ พย๊าหนิ ซิปล่อเซอเพร ตูจูเพร ปา. 30หม่าแน๊เรอ แกแย โอ่ เด๊อ เงเล๊อ อู เต๊เห่เนอ, อา เก่ โอ่แก เด๊อคยาเล๊อ อู ปา, เร๊อ แกแย โอ่แก เด๊อคยาเล๊อ อู เต๊เห่เนอ อา เก่ โอ่ เด๊อ เงเล๊อ อู ปา. ▼▼แกแย เด๊อ อูเต เน เน๊อ อาโหล่ดุ เล๊อ อู เตเพร เนอ, อา เก่ โอ่ แก เด๊อ คยา เล๊อ อู ปา. แกแย เด๊อ อา โอ่ แก เด๊อ คยา เล๊อ อู เตเพร ปา เนอ อาเก่ ทวา แถ่ แกแย เด๊อ อู โหล่ดุ เล๊อ อา ปา
เหย่ซู่ เฮ๊ เป่ เหย่ซี ฮู๊ เนอ” n
Copyright information for
EkySCThai