Matthew 2

เพรลีแมลีเพ๊ แฮ แม๊เถอะ เหย่ซู่

1เหย่ซู่ โอ่เป๊เจ่แล เด๊อ วีเบธเลเฮม, ยูดาห์ เก่ อากู, เบ๊อะคุ๊ยเฮโรด เป๊อเทอเป๊อเก่ เบ๊อะเนอ. เหย่ซู่ โอ่เป๊เจ่แล โทเนอ เพรลีแมลีเพ๊ ▼

▼เพรแม๊ปู ซิเง เฉ่ อาหรี่อาแก เต๊เห่.

เด๊อ เก่ซิเถ่ เต๊เห่ แฮ เด๊อ วีเยรูซาเล็ม เร๊อ แฮแด๊เฮอ คุ๊ย เน๊อ, 2“เป๊เจ่พู๊ เด๊อ อา เตเร ทวาแถ่ แกแยยิว อาคุ๊ย เออเตเพร เนอหม่า อา โอ่เป๊เจ่แล โตเบ๊อะเตโต๊โผ่? เมเตเฮ๊เรอ เป แม๊เถอะแถ่ อาเฉ่ โอ่เถ่โล เด๊อ เก่ซิเถ่ ตากยา เร๊อ เป แฮ เด๊อ เป เก่ จ๊อบู่จ๊อเบแถ่ อา.”

3เบ๊อะคุ๊ยเฮโรด หนิโฮ เตเฮ๊เบ่ ฮู๊เออ เบ๊อะเนอ, อา ซิปล่อกู่ ซิปล่อแก. ล๋อ วีเยรูซาเล็มพู๊ เต๊เห่ ซิปล่อกู่ ซิปล่อแก เกอ ล๋อปลี เจ๊อ. 4อา เอ๊ โอ่กู๊ โอ่ปล๊อลอ ล๋อ เพรหลู่แต ทวาดุทวาเต เต๊เห่ เร๊อ เพรอิซว๊า เตซว๊าเตแส่ อาซ๊าร๊า เต๊เห่. เร๊อ อา แด๊เฮอ เหย่ซี เน๊อ, “เพรโพร เต๊เห่ เฮ๊หนื่ออื่อ เร๊อ เพรเมแลเปล๊กา เมสิยาห์ เออเตเพรเนอ อา เก่ โอ่เป๊เจ่แล โตปา เบ๊อะเตโต๊โผ่เต ปา,” อา เฮ๊. 5เร๊อ เหย่ซี เฮ๊ฉื่อ ลู เน๊อ, “อา เก่ โอ่เป๊เจ่แล เด๊อ วีเบธเลเฮม, ยูดาห์ เก่ อากู เนอปา, เพรโพร มีคาห์ รา เร๊อ อา เฮ๊ เน๊อ,

6แบ่เจ่ เฮ๊ เน๊อ, ‘เก๋อ วีเบธเลเฮ๋ม, วี เด๊อ อา โอ่ เด๊อ ยูดาห์เก่ กู เออเต๊เห่ อาเกลเนอ, เน หม่า วี ปีตี๊เล๊ออู เด๊อ อามุย โลเทอโลเก่ เกออู โต่. ฮู๊เนอ หม่าโต่. เมเตเฮ๊เรอ เพรเป๊อเต เตเพร เด๊อ อา เก่ ตอกอเตเก เร๊อ อา เก่ ยูแกล๊ยูโกลหนิ แว อิสราเอลพู๊ เออตู๊หมู่ เก่ โอ่แถ่ เด๊อ เนกู ปา.’” ^b

7ฮู๊เนอเรอ คุ๊ยเฮโรด เอ๊โห่เอ๊เซ๊ เพรลีแมลีเพ๊ เด๊อ อา โอ่ เด๊อ เก่ซิเถ่ แฮ เออเต๊เห่ เร๊อ อา แด๊เฮอ ตาเต เหย่ซี เน๊อ เฉ่ เออต๊อปล่อเนอ อา โอ่โลเถ่ เป่ เหย่ซี บ๊อเกเต, ฮู๊เนอ. 8อา นอจว๊า เหย่ซี เด๊อ วีเบธเลเฮม เร๊อ อา เฮ๊ เหย่ซี เน๊อ, “จว๊าแม๊ปู ตาเต แลแค เป๊เจ่พู๊ เนอเตเพร นี๋. แซ่ฮู๊ แว เก่ จว๊า จ๊อบู่จ๊อเบแถ่ หนิเกอ อา เนอ, ซี เก่ แม๊เถอะ เฮ๊อเฮ๊อ เน๊อ กาแด๊โฉ่ เล๊เป่ เกอ แว นี๋.”

9เบ๊อะเหย่ซี หนิโฮโท คุ๊ย เฮ๊ โหง่ ฮู๊เออ เร๊อ อา เถ่จว๊า แลแค. เบ๊อะเหย่ซี เถ่จว๊า เบ๊อะเนอ, เฉ่ เด๊อ เหย่ซี แม๊เถอะ เนอต๊อปล่อ โอ่โลเถ่ เป่ เหย่ซี. เฉ่ เนอต๊อปล่อ ซูจว๊า เหร่อ เหย่ซี เด๊อ เง เร๊อ อา จว๊า โอ่โก๊ โตตื๊อแถ่ เจ๊อ เป่ เหย่ซี เบ๊อะเป๊เจ่พู๊ โอ่เร๊อ อาเหล่โอ่ เนอ. 10เบ๊อะเหย่ซี แม๊เถอะ เฉ่เนอต๊อปล่อ เบ๊อะเนอ, อา ซิครือซิลอ แหน่เจ๊อ. 11เร๊อ เหย่ซี โน เด๊อ อาหี่กู เร๊อ โนแม๊เถอะ เป๊เจ่เออ โอ่เต่อเร๊อ อาโหมะ มารีย์. เหย่ซี แด๊งือแล จ๊อบู่จ๊อเบแถ่ ลู. โทเร๊อ อา พย๊าเถ่ เท เร๊อ เตโนมื๊อ เด๊อ อู เอ๊ เน๊อ แหว่ขื่อแซ๊ เร๊อ มู๊หร่า เด๊อ อางูดุงูชอ เออเต๊เห่ เร๊อ อา เด๊อะ เน๊อ เป๊เจ่ เชหยู่. 12เร๊อ จอแปแหร่ เด๊อะรอเด๊อะเร เพรลีแมลีเพ๊ เออเต๊เห่ เด๊อ อา เตโอ่เมอแหม่ อากู เน๊อ เหย่ซี เก่ กาโต ปา แต่ คุ๊ยเฮโรด แต่เหม่. เร๊อ เหย่ซี กาโค๊แก แกล๊ เด๊อ อาโร โตโบ เด๊อ อาเก่.

เถ่แกล่จว๊า เด๊อ อียิปต์เก่

13เบ๊อะเพรลีแมลีเพ๊ เออเต๊เห่ กาโทเฮ๊อ เนอ, จอแปแหร่ อาม๊อขุ เตเน่วพู๊ เตเพร แฮโอ่โลเถ่ เป่ เพโยเซฟ เด๊อ อา เตโอ่เมอแหม่ อากู เร๊อ อา เฮ๊ ลู เน๊อ, “ก๊อถ่อมอ! เร๊อ เอ๊หนิ เป๊เจ่พู๊ เร๊อ อาโหมะเนอ เร๊อ เถ่แกล่จว๊าแก มอ เด๊อ อียิปต์เก่ เนอ. แว เก่ แด๊โฉ่ แต่ล๋าย เน เตอเจ๋อ โต่ เก่เฮ๊เรอ ตูรู๊ โอ่ตื๊อดื่อ แลแค เบ๊อะเนอ นี๋, เมเตเฮ๊เรอ คุ๊ยเฮโรด เตเร นอ อาเกลอฮู๊ เต๊เห่ แม๊ปูเมเซอ เป๊เจ่พู๊ เออเตเพร.”

14อา ป่าก๊อถ่อ เร๊อ อา ก๊อถ่อ เอ๊หนิ เป๊เจ่เออ เร๊อ อาโหมะ เร๊อ เถ่จว๊า เด๊อ อียิปต์เก่ เบ๊อะเหมาะคี๊เหมาะเน เนอ. 15อา จว๊าโอ่ เบ๊อะเนอ โต่เด๊อ คุ๊ยเฮโรด อาเซอ. เตทวาแถ่ อาเหน่ ฮู๊เออเนอหม่า อา เมเล๊อเมบาแถ่ แบ่เจ่ จอแปแหร่ นอ เฮ๊หนื่ออื่อแก อาเพรโพร คูโฮเชยา เน๊อ, “แว เอ๊เถ่กาแก แวพู๊ เด๊อ อียิปต์เก่.” ^c

16เบ๊อะคุ๊ยเฮโรด ซิเงเฮ๊อ เร๊อ เพรลีแมลีเพ๊ เต๊เห่ แลโฮแก เฮ๊อ ลู เบ๊อะเนอ, อา ซิปล่อดุ แหน่แหน่ เจ๊อ ฮู๊ อา แม๊ปูซิเง ตาเต หนิโทเฮ๊อ เด๊อ เพรลีแมลีเพ๊ เออเต๊เห่ อาลู เน๊อ เฉ่ โอ่โลเถ่ เป่ เหย่ซี เบ๊อะเกเต เนอ, อา นอเมเซอ ลอ เพรคู เป๊เจ่พู๊ เนอหนะ ตากาแล เต๊เห่ เด๊อ อา โอ่ เด๊อ วีเบธเลเฮม อากูเนอ เร๊อ ดอโอ่ ตีวี๊ตาวา เบ๊อะเนอ ล๋อ ปลี. 17เมฮู๊เนอเร๊อ, จอแปแหร่ เฮ๊หนื่ออื่อ เฮ๊อ อาโหง่ เนอ เพรโพร เยเรมีย์ เนอ อา เล๊อบา แถ่เฮ๊อ. 18เพรโพร เยเรมีย์ เฮ๊ เน๊อ,

“เตโหง่เตเห่ เก่ โอ่แถ่ เด๊อ วีรามาห์ อากู ปา อู เก่ โหง่ตื๊อดื่อ ซิปล่อ, อู เก่ เห่ตื๊อดื่อ สู่เทอ เจ๊อ ปา. นางราเชล อากลุยอาแล เต๊เห่ อาโหง่อาเห่ เร๊อลอ อาพู๊ ปา. เด๊อ อาพู๊ เต๊เห่ เซอลอ เร๊อ อา เตเน โตโคเซ๊ เออเนอ, อู อิลอโอ่อี๊แจ่ปา ลู เตเพร่ว โต่.” ^d

โอ่ เด๊อ อียิปต์เก่ เถ่กา

19เบ๊อะคุ๊ยเฮโรด เซอโทเฮ๊อ เร๊อ เพโยเซฟ โอ่ปา เด๊อ อียิปต์เก่ อาเค เนอ, จอแปแหร่ อา เตเน่วม๊อขุ เตเพร แฮโอ่โลเถ่ เป่ ลู เด๊อ อา เตโอ่เมอแหม่ เออเนอ. 20เร๊อ อา เฮ๊ ลู เน๊อ, “ก๊อถ่อมอ! เอ๊หนิ เป๊เจ่ เร๊อ อาโหมะเนอ เร๊อ กาคยา คยาแซ๊มอ เด๊อ อิสราเอล เก่เนอ, เมเตเฮ๊เรอ แกแย เด๊อ อา แม๊ปูเมเซอ เป๊เจ่พู๊ เออเตเพรเนอ, อา เซอ เฮ๊อ.”

21เร๊อ อา ป่าก๊อถ่อ, เร๊อ อา เอ๊หนิ เป๊เจ่เออ เร๊อ อาโหมะ เร๊อ อา กาคยา เด๊อ อิสราเอล เก่. 22หม่าแน๊เรอ เบ๊อะเพโยเซฟ หนิโฮ เน๊อ คุ๊ยเฮโรด อาพู๊คู คุ๊ยอารเคลาอัส แถ่เป๊อ อาเพ เหล่โกล เด๊อ ยูดาห์เก่ เบ๊อะเนอ, อา ซิอิเช เร๊อ อา กาโต บื่อโต่. จอแปแหร่ เด๊อะรอเด๊อะเร เพโยเซฟ เด๊อ อา เตโอ่เมอแหม่อากู เร๊อ อา จว๊าสี่กย๊า กาคยา โอ่เด๊อ กาลิลีเก่กู. 23เหย่ซี กาโอ่ เกอเร๊อ วีเนอ เตอวี หม่า อู เอ๊ เร๊อ วีนาซาเร็ธ. เออ หม่า อา เมเล๊อเมบาแถ่ เฮ๊อ เพรโพร เต๊เห่ เฮ๊หนื่ออื่อ เน๊อ, “อู เก่ เอ๊ ลู เน๊อ วีนาซาเร็ธพู๊ ปา,” เนอเฮ๊อ. ^e