Mat 24 | EkySCThai | STEP | เบ๊อะแบ่เจ่ เหย่ซู่ เถ่จว๊าแก เด๊อ เตหลู่แตโฮ เกเร๊รากู เบ๊อะเนอ, อา โคเจ่ เต๊เห่ แฮ เด๊อ ลูโอ่ เร๊อ อา นอแม๊ ลู เร๊อ เตหลู่แตโฮ เด๊อ อู ช๊อแถ่ ลู เนอเต๊เห่.

Matthew 24

อู เก่ เม ตาพรอแก เตหลู่เตโฮ ปา อาหรี่อาแก

(มาระโก ๑๓:๑-๒, ลูกา ๒๑:๕-๖)

1 เบ๊อะแบ่เจ่ เหย่ซู่ เถ่จว๊าแก เด๊อ เตหลู่แตโฮ เกเร๊รากู เบ๊อะเนอ, อา โคเจ่ เต๊เห่ แฮ เด๊อ ลูโอ่ เร๊อ อา นอแม๊ ลู เร๊อ เตหลู่แตโฮ เด๊อ อู ช๊อแถ่ ลู เนอเต๊เห่.

2 เร๊อ อา แด๊เฮอ อา โคเจ่ เต๊เห่ เน๊อ, “ล๋อ เตเนอ เต๊เห่ ซี แม๊เถอะ ล๋อแอ? แว แด๊โฉ่จ๊อจ๊อ เป่ ซี, หล่อ เออ เต๊เห่เนอ, อู เก่ แฮ ด่อตาพรอแก ลอ อา ปา หล่อ เออ เต๊เห่ เนอ อา โอ่จิจือ ปา ลู เตเม๋ โต่ ปา.”

(มาระโก ๑๓:๓-๑๓, ลูกา ๒๑:๗-๑๙)

3 เบ๊อะแบ่เจ่ เหย่ซู่ โอ่แนโอ่ เด๊อ โต๊โฉ่โฉ่ขุ เบ๊อะเนอ, อา โคเจ่ เต๊เห่ แฮโอ่ผื่อเกอ ตื๊อดื่อ ลู เร๊อ เหย่ซี เฮ๊ ลู เน๊อ, “แด๊โฉ่โล เป่เกอแม๊ เป เด๊อ เน เฮ๊ ปื๊อหนื่อ เต๊เห่เนอ, อา เก่ ทวาแถ่ เบ๊อะเกเต ปา? เน เตเร แฮ เบ๊อะเกเต ปา, โทเรอ เห่ขุเออ เก่ ตื๊อดื่อแก เบ๊อะเกเต ปาเนอ อาเมว โค๊ตีกลี๊ เมม๊าเมแด เต๊อเจ่อเจ่อ เก่ โอ่โลแถ่ แม๊เถอะ เหร่อ ปา แอ?”

4 แบ่เจ่ เฮ๊ฉื่อ เหย่ซี เน๊อ, “รอหนิ แลแค ซีเหน่ นี๋, นออิลออี๊โหล่แลโฮ จว๊าหนิ แต่ อู เร๊อ ซีเหน่ แต่เหม่ นี๋. 5 เมเตเฮ๊เรอ แกแย เก่ แฮดี๊กว๊า แลโฮแล เกอเร๊อ แลแค อาเหน่ เร๊อ แวมุยปา เต๊เห่เนอ อาโอ่เอ๊ลาปา, เร๊อ เหย่ซี เก่ แด๊กว๊าแลโฮ เร๊อ แลแค อาเหน่เร๊อ, ‘แว หม่า ครี๊’ เร๊อ เหย่ซี เก่ อิลออี๊โหล่ แลโฮ เอ๊ลา อู ปา. 6 ซี เก่ หนิโฮ เตช๊าเตปา เร๊อ ซี เก่ หนิโฮโท หนิโฮแล เร๊อ อู เก่ช๊าเก่ปา ลู ปา ตื๊อดื่อเรอ ซิอิเช เบ่ยอเบ่สี่ แต่ แลแค แต่เหม่ นี๋. ฮู๊เออ เต๊เห่ เนอหม่า อา เบ่ ทวาแถ่ แหน่ ปา, หม่าแน๊เรอ เออเนอหมา เห่ขุ เตเร ตื๊อดื่อ เฮ๊อเนอ หม่าล๋ายโต่. 7 เมเตเฮ๊เรอ เมวเจอะ เต๊อเจ่อ เร๊อเต๊อเจ่อ เก่เต๊เก่ เร๊อ เต๊เก่, เทอเก่ เต๊เก่ เร๊อ เต๊เก่ เก่ช๊าเก่ปา ลู ปา. เก่วีเก่กอ เร๊อ เตเน่วท๊อดีปา เต๊เห่ เก่ โอ่แถ่โท โอ่แถ่แล ลอปลี เด๊อ เห่ขุเออ โต๊โผ่ โท โต๊โผ่ ปา. 8 ล๋อ เตทวาแถ่ เออเต๊เห่ เนอหม่า หม่าปาแพ๊ เตจาเตจือ อา แก่ช๊ากูลู่เด๊อ อาแซ่เน๊อ เพร เหมาะ เชฮ๊อ ตื๊อแฮโต่ปา เนอแพ๊.

9 “โทเรอ อู เก่ปื่อ เก่จอ ลอ ซี ปา, อู เก่มือ เก่ปอ ลอ ซีปา, โท๊โต่ อูเก่ เมเซอ ซี ปา. เด๊อ ซี จ๊อ เร๊อแว อาขว่าอาคยา, เร๊อ แกแย ปว๋า เตเพร ซิโตโค ซี ปา. ^a 10 เบ๊อะเนอเค ปา แกแย เก่ วีแก เอ๊ลา อา เตหยื่อเตแหน่ปา. เหย่ซี เก่ เตเน เช เอ่ ลูมุย เตเพร เร๊อ เตเพร ปา. เร๊ออา เก่ ซิโตโคเกอ เร๊อ ลู เตเพร เร๊อ เตเพร ปา. 11 โท๊โต่ เพรโพร อากลว่า แลโฮ อาเหน่ เต๊เห่ เก่ โอ่โล แถ่ เอ๊ลา ปา, เร๊อ อา เก่ อิลออี๊โหล่ แลโฮ เอ๊ลา อู ปา. 12 เตมู๊แหม่รีแจ่ โอ่แถ่เอ๊ อาขว่าอาคยา, เตโมเร๊อ ลู เตเพร เร๊อ เตเพร เก่ โอ่เหม่ แฮ เร๊อ แฮ ปา. 13 หม่าแน๊เรอ แกแย เด๊อ โอ่กลอช๊อหม่า เด๊อ อาเตหยื่อ เตแหน่ โต่เด๊อ อาตื๊อดื่อ เต๊เห่เนอ, จอแปแหร่ เก่ กาเมแลเปล๊ เหย่ซี ปา. ^b 14 โทเรอ ม๊อขุ อาเทอ อาเก่ อา เตซิครือซิลอมีลา เออเนอ, อู เก่ แด๊โฉ่โด่แน หนิโฮ เป่ลอ แกแย โอ่ เด๊อ เห่ขุเออ ต๊าบ่า ลอ ปา, เทอเก่ ปว๊าเต๊เก่ อา หนิโฮน๊อ ลอโทเฮ๊อ เตข่าเฮ๊โล ปา ตื๊อหม่า เห่ขุเออ เก่ ตื๊อดื่อแก โหน่ แพ๊.”

เต ต๊อหร่อเซ๊ ซิอิเช

(มาระโก ๑๓:๑๔-๒๓, ลูกา ๒๑:๒๐-๒๔)

15 ฮู๊เนอเรอ, “ซีเก่ แม๊เถอะ เน๊อ ซิหย่อซิบี โต ก๊อถ่อ โอ่ เด๊อ เตหลู่ แตโฮกู เหล่โอ่เนอโต่ ตื๊อดื่อ เร๊อ อา ก๊อถ่อ โอ่ เบ๊อะเนอ ปา. เร๊อ เด๊อ เออ อาขว่าอาคยา, เร๊อ อู เก่ แด่ โอ่ แหร่ แก เตเตหลู่เตโฮกู เหล่โอ่ปา. เพรโพร คูดาเนียล เฮ๊โล โทเฮ๊อ เน๊อ. เตซีหย่อซิบี อาหรี่อาแก เออ เฮ๊อ. เบ๊อะซี แม๊เถอะ อาทวา แถ่เฮ๊อ ฮู๊เออ อาเค ปาเนอ, แกแย เด๊อ อาแด๊ ลี เออ ต๊าบ่า โต ซิเงโปล แลแค, ^c เด๊อ เพรโพร คูดาเนียล เหล่แด๊โฉ่ เฮ๊แก เด๊อซี แด๊ ลี เออเต๊เห่ โตเบ่ ซิเงโปล แลแค. 16 โทเรอ เบ๊อะซี แม๊เถอะ เฮ๊อ เต ทวาแถ่ เบ๊อะเนอ, แกแย เด๊อ อา โอ่ เด๊อ ยูดาห์ เก่กู เต๊เห่ เบ่ แกล่เถ่ แลแค เด๊อ โฉ่ขุเนอ. 17 แกแยโอ่ เด๊อ หี่ขุ รือดือ เตเพรเพร เนอ นอแกล่ตา พย๊าหนิ แต่ อา ตาหมื่อตาเต เด๊อ อาหี่ด๊อกู เนอเต๊เห่ แต่เหม่. ^d 18 แกแย โอ่ เด๊อ กู๊เกล ขุ เต๊เห่เนอ นอกา พย๊าหนิ แต่ อาจากลอ แต่เหม่. 19 เบ๊อะเนอเคปา เนอ อา เก่ โซพ๊าโซแร เป่ แหน่เจ๊อ เพรเหมาะ เด๊อ อา โอ่ เร๊อ อาฮ๊ออาเซ๊ เร๊อ อาพู๊ อินู๊ ปาลู เนอเต๊เห่ อาเง ปา. 20 ซี เบ่ เถ่แกล่ เบ๊อะเนอเคเนอ, แซ่ฮู๊ ตาโตเบ่ แต่ เร๊อ เก๊โหร่เค แต่เหม่ หม่าโต่เรอ แกแยยิวพู๊ อาม๊อเนอโด่ แต่เหม่เนอ, กุยจ๊อเบ แลแคนี๋. 21 เบ๊อะเนอเคปา, เตแป่เตเช เร๊อ เตจาเตจือ เต๊เห่ เก่ โอ่แถ่ ดุแหน่เจ๊อปา. เด๊อ เหขุทวาแถ่ลู่ปา โต่เจ๊อ กู๊แหน่เค เออเนอ เบ่เบ่, เด๊อโหน่ เด๊อคยาปาเบ่เบ่, เตแป่เตเช เตจาเตจือ เด๊อ แม๊เถอะน๊อ แตแค๊โต่เนอ อาเก่ ทวาแถ่ปา. ^e 22 จอแปแหร่ เก่ เมโผ่ เป่ เตจาเตจือ เออ เบ๊อะโต่ เฮ๊เนอ, แกแย โอ่เซอเพรเบ๊ เตเพร่ว โต่. หม่าแน๊เรอ จอแปแหร่ ลอ แม๊ แกแย เด๊อ อา นว๊าแถ่ เออเต๊เห่ อาเป๊เส่ อาขว่าอาคยา, อา เก่ เมโผ่แฮ ม๊อเนอ ม๊อเซ เต๊เห่ ปา. 23 เบ๊อะเนออาเคปา เนอ, แกแย เตเพรเพร เก่ เฮ๊ เน๊อ, ‘เน แฮ แม๊มอ, ครี๊ โอ่เบ๊อะเออ,’ โต่หม่าเเน๊ ‘อา โอ่ เด๊อเนอ,’ อาเก่ เฮ๊ ฮู๊เนอ ปาตื๊อดื่อเรอ หยื่อเอ่ แต่ แลแค แต่เหม่ นี๋. 24 เมเตเฮ๊เรอ เพรกลว่า แลโฮ ฮู๊ ครี๊เนอ เนอ เพรกลว่า แลโฮ ฮู๊ เพรโพร ซี เต๊เห่เนอ อา เก่ โอ่แถ่ เอ๊ลา ปา. เหย่ซี เก่ เมตาปา คย๊ายื๊อ ลออู เร๊อ อาเต เมโค๊ตีกลี๊ เป่อู เต๊เห่ ปา. อา เก่ เมแจ่ เฮ๊เนอหม่า อา ซิหยื่อ อิลออี๊โหล่ แลโฮ หนิ เจ๊อ แกแย เด๊อ จอแปแหร่ นว๊าพย๊า โทเฮ๊อ ลู เนอ เต๊เห่เจ๊อ. 25 หนิดา แลแคนี๋, เตเออ เต๊เห่ ทวาแถ่ แต่ล๋ายโต่ เบ๊อะเนอ, แว เด๊อะรอเด๊อะเรโทเฮ๊อ เป่ ซี เฮ๊อ.

26 “ฮู๊เนอเรอ แกแย เตเพรเพร เก่ เฮ๊ ซี เน๊อ, ‘จว๊าแม๊ แลแค เมอเล๊, เมสิยาห์ โอ่เด๊อ เก่เชเทอแก หล่อตาม๊าขุเนอ,’ อา เก่ เฮ๊ซี ตื๊อดื่อเรอ จว๊า แม๊ แลแค แต่เหม่ นี๋. โต่หม่าเเน๊ อา เก่ เฮ๊ ซี เน๊อ, ‘อาโอ่ เบ๊อะหี่ด๊อกู เออแพ๊,’ อาเก่เฮ๊ ตื๊อดื่อเรอ หยื่อเอ่ แต่เหม่เหม่. ^f 27 เมเตเฮ๊เร๊อ ฮู๊ ฉ่าลีบ๊อ เตเคแถ่ เด๊อ เก่ซิเถ่ เร๊อ แกแย โอ่ เด๊อ เก่แบ๊โน เต๊เห่ แม๊เถอะเนอ, แกแยพู๊คู หม่าเฮ๊อ แวเออ เก่ แฮ ปา หม่า อา แซ่ ฮู๊เนอ ปา. 28 เตซอเตหล่อ โอ่เบ๊อะเต๋ หม่า ลาแต่ โอ่ปล๊อ เบ๊อะเนอ.” ^g

แกแย อาพู๊คู อา เก่แฮ อาหรี่อาแก

(มาระโก ๑๓:๒๔-๒๗, ลูกา ๒๑:๒๕-๒๘)

29 “เบ๊อะเตจาเตจือ, เตแป่เตเช ม๊อเนอ ม๊อเซ โอ่ทวาแถ่ ตาลว๊า โทเฮ๊อ ปาเนอ, โตโพ๊โต

‘จอแปแหร่ เก่ เมคี๊แก ต๊อเหมาะ ปา เล เก่ ลี ปาโต่เฮ๊อ เฉ่ เด๊อ ม๊อเล เต๊เห่ อา แลตาพรอ แก ลอปา. เร๊อ จอแปแหร่ เก่ เม โกโยลอ ม๊อเล อาเตโพรเตเตอเรอ ล๋อปลี เต๊เห่ปา.’ ^h

30 “เบ๊อะเนออาเค ปาเนอ, แกแยพู๊คู หม่าเฮ๊อ แวเออ อา เตแฮแล เมม๊าเมแด เก่โอ่โล แถ่ เด๊อ ม๊อเล ปา. โทเรอ ล๋อแกแย โอ่เด๊อ เก่ปว๋าเต๊เก่ เก่โหง่เก่เห่ ลอ ปา. เหย่ซี เก่ แม๊เถอะ แลแค แกแยพู๊คู หม่าเฮ๊อ แวเออ อา เก่ แถ่ แด๊ แฮหนิ อ๊อโหล่ เด๊อ ม๊อเล ปา. เร๊อ อา เก่ โอ่เล๊อบา เจ๊อ เร๊อ อา เตโพรเตเตอเรอ เร๊อ อา เตอเรอฉว่าชอ เต๊เห่ปา. ⁱ 31 จอแปแหร่ เก่ นอแฮแล เตเน่ว เต๊เห่ ปา เร๊อ อาเก่ โอ๊ พราฉว่า แถ่กวา ปา. เร๊อ อา เก่ เอ๊โอ่ปล๊อ เต่อลอ แกแย เด๊อ แบ่เจ่ นว๊าแถ่ โทเฮ๊อ เหย่ซี เร๊อ อา โอ่ แลแค เด๊อ เห่ขุ ลุยกยาลุยหน่อ เต๊เห่ปา.

พย๊าหนิ เตอิซว๊า เด๊อ ก่อดุ๊ยเหมาะ อา โอ่

(มาระโก ๑๓:๒๘-๓๑, ลูกา ๒๑:๒๙-๓๓)

32 “กู๊แหน่เร๊อ พย๊า หนิ แลแค เตอิซว๊า เต๊อเจ่อ เด๊อ ก่อดุ๊ยเหมาะ อาลู เออเนอ. อา ดา เหล่ แด๊เจ่ ต๊าหม่าเถ่เฮ๊อ, อาเหล่ เบ่เฮ๊อ เฮ๊เรอ ซี ซิเง เร๊อ เก่กู่เค ผื่อแฮ โต่เฮ๊อ. 33 เมฮู๊เนอเฮ๊อ เบ๊อะซี แม๊เถอะเฮ๊อ ล๋อ เตเออ เต๊เห่ทวาแถ่ เฮ๊อ ปา เบ๊อะเนอ, ซิเง แลแค เร๊อ แกแยพู๊คู หม่าเฮ๊อ แวเออ อา แฮผื่อโต่เฮ๊อ เด๊อ กู่ดากูทือ เฮ๊อ นี๋. 34 แว แด๊โฉ่โล จ๊อจ๋อ เป่ เจ๊อ ซี, ล๋อ แกแย เด๊อ อา โอ่เซอเพร กู๊แหน่เออตือทือ เต๊เห่ เซอลอ แต่ล๋ายโต่ เนอ, เบ๊อะเตเออเต๊เห่ โอ่ เก่ทวาแถ่ ลอ ปา. ^{▼▼เพรลีแมลีเพ๊ เด๊อ อา ซิเง ลีเทส่อพ๊า เต๊เห่เห่ เนอ, อา หยื่อเอ่ เร๊อ เหย่ซู่ เฮ๊ แพ๊ วีเยรูซาเล็ม เก่ ปย๊าแก ปา แพ๊. อา เฮ๊ เร๊อ เห่ขุ ตื๊อดื่อ ปา อาหรี่อาแก เนอ หม่าโต่.} 35 ม๊อขุ เร๊อ เห่ขุ เก่ อาโอ่เหม่แก ปา ตื๊อดื่อเรอ แวลาแวโหง่ เออเต๊เห่เนอ อาโอ่เหม่แก เป่ แตแค๋ โต่.

ม๊อเนอม๊อเซ เออเนอ อู ซิเง เตเพร่ว โต่

(มาระโก ๑๓:๓๒-๓๗, ลูกา ๑๗:๒๖-๓๐, ๑๗:๓๔-๓๖)

36 “หม่าแน๊เรอ เตเออเต๊เห่ เก่ ทวาแถ่ ม๊อเนอม๊อเซ เร๊อ ตาโตตาเบ่ เบ๊อะเกเต ปาเนอ อู ซิเง เตเพร่ว โต่. เตเน่ว โอ่ เด๊อ ม๊อขุ เนอเต๊เห่ เจ๋อ เบ่เบ่ อา ซิเง โต่. จอแปแหร่ อาพู๊คู เน๊ออาเหน่ เร๊อดื่อ อาเหน่เบ่เบ่ อา ซิเง โต่โต่. อา ซิเง แพ๊ตื๊อ แวเพ เตเพร่ว แพ๊. 37 เบ๊อะแกแยพู๊คู เก่ แฮปาเนอ, อา ทวาแถ่ แซ่ฮู๊ เพโนอาห์ ทือเคเนอ เนอปา. 38 เมเตเฮ๊เรอ เบ๊อะเทอ ดุบี๊ แต่ล๋ายโต่ เบ๊อะเนอ, อูเอ่อูโอ, กาฉู่แด่ฉู่เม ลูโต่ เจ๊อ เบ๊อะเพโนอาห์ โน เด๊อ ส่อเกลอดุกู เนอเตอเนอ เจ๊อ. ^k 39 เต เกเร ทวาแถ่ ฮู๊เตปาเนอ, โต่ เจ๊อ เบ๊อะเทอแฮ ดุ เซอแก ลอ เจ๊อเฮ๊อ เหย่ ซี เบ๊อะเนอ, อา ซิเง แลแค เตอเจ๋อ โต่. ช๋า แกแยพู๊คู แฮเฮ๊อ ปา เบ๊อะเนอ, อา เก่ ทวาแถ่ แซ่เกอดื่อ ฮู๊เออเนอ ปา. ^l 40 เบ๊อะเนอเคปา, เพรคู ซิเนอ เด๊อ อา แร โหร่ลู เต เด๊อ กู๊เกลขุ เนอ, เตเพร เร๊อ อู เก่ เอ๊กาแก ลู ปา, เตเพร เร๊อ อา เก่ แด่โอ่แกลู ปา. 41 เพรเหมาะ อิช๊าตือฉื่อ ลู บ๊วยเอ่ ซิเนอเนอ, จอแปแหร่ เก่ เอ๊กาแก อา เตเพร ปา. เตเพร เร๊อ อา เก่ แด่โอ่แกลู ปา.

42 “เมฮู๊เนอเรอ โอ่ส่าเซ แลแค, เมเตเฮ๊เรอ ซีแบ่เจ่ เก่ แฮ เบ๊อะเตอเนอ ปา เนอ ซี ซิเง โต่. 43 หม่าแน๊เรอ ซิเงแลแค เน๊อ, หี่แบ่เจ่ เก่ ซิเง เร๊อ เพรเอ่โห่ เตเร แฮ เบ๊อะเตเซเต ปาเนอ, อา เก่ โอ่ป่อฉื่อ ปา เร๊อ เพรเอ่โห่ แฮโน เอ่โห่แจ่ อาตาเต เด๊ออาหี่ กูโต่. ^m 44 ฮู๊เนอ อาขว่าอาคยา, เออเต๊เห่เนอ เบ่เบ่, โอ่ตี๊หรี่แตแร โอ่หนื่ออื่อ เกอ แลแค ซีเหน่ นี๋, เมเตเฮ๊เรอ หน่าหลิ เบ๊อะซี เตเนโต่ โต่ ปาเนอ, แกแยพู๊คู หม่าเฮ๊อแวเออ เก่ แฮ ปา.

เพรแรเต เด๊อ อาจ๊อ เร๊อ อาโหง่ เร๊อ เพรแรเต เด๊อ อาจ๊อ เร๊อ อาโหง่ โต่

(ลูกา ๑๒:๓๕-๔๘)

45 “หลู่ เด๊อ อาจ๊อ เร๊อ อา ลีแม เตเพรหม่า อูเป? หลู่ เด๊อ อาจ๊อ เตเพร หม่าหม่าเฮ๊อ แบ่เจ่ เด๊อะตา ลู เตแร เด๊อ อา เบ่ แม๊ตู่ โบ่เอ่โบ่โอหนิ หลู่เล๊ เด๊อ อาโร เต๊เห่ เด๊อลู กู๊ยากู, เร๊อ อาโบ่เอ่ โต เหย่ซี เร๊อ หน่าหลิ เออเตเพร เนอเฮ๊อ. 46 แบ่เจ่ เก่ กาแม๊เถอะ เร๊อ อาหลู่ เออเตเพร แรเต แร๊ เก่เฮ๊เรอ อาเก่ เด๊อลู คว๊าเก่ ปา. 47 แว เฮ๊จ๊อจ๋อ เจ๊อ ซี, แบ่เจ่ เออเตเพร อา ตาหมื่อตาเต ล๋อ ปลีเนอ, อา เก่ เด๊อะตาลอ เด๊อ ลู กู๊ยากู ปา, เร๊อ อา เก่ นอแม๊ นอตู่ หนิ เร๊อ ลู ปา. 48 หม่าแน๊เรอ หลู่ เด๊อ อาแร๊โต่ เออเตเพร เนอ, อา เก่ เตเน เด๊ออาซิปล่อกู เน๊อ, ‘แวแบ่เจ่ กาคยา เหล่แพร น๊อ ล๋ายโต่,’ อาเก่เตเน เร๊อ, 49 อา เก่มือเก่ปอ หลู่เล๊ เด๊อ อาโร เต๊เห่ปา, เร๊อ อาเก่ เอ่มือโอแพร๊ เต่อ เร๊อ แกแย เหล่โกล เอ่มือ โอมือ เต๊เห่ปา. 50 เร๊อ หน่าหลิ เบ๊อะหลู่เล๊ เนอเต เพร อาเอ่โอ โชตาบา เบ๊อะเนอ, อาแบ่เจ่ เก่ กาคยาโต เบ๊อะเนอ เคปา. 51 แบ่เจ่ เก่ เมจากาคยา ลู ปา เร๊อ อา โอ่ แด่โน โต่แก ลู เนอ เบ๊อะแกแย จ่าจ๊อจ่าเต อาเหน่ เนอเต๊เห่ เหล่โอ่ เนอปา. เหล่โอ่ เบ๊อะเนอ โต๊โผ่เนอ อู เก๊โหง่เก่เห่, อู เก่ อ่า ตาจ๊า เจ๊อ อากู่เคอ เจ๊อ ปา.”