Matthew 25

เพรเหมาะ พู๊เส่ เพร เช๊อ อาหรี่อาแก

1“เบ๊อะเนอ เค “ม๊อขุ เทอ เลเก่กู เนอ, อาแซ่เน๊อ เพร เหมาะ พู๊เส่ครวาโคร อู อาเพร เช๊อ พย๊าหนิ หมิเคว๊กอ เร๊อ จว๊าโอ่ป่อ แม๊ชือ กาฉู่แด่ เพรคู แฮ อาหรี่อาแก เออเนอเฮ๊อ. ^a 2ซิแง เร๊อ อา ลีแม, ซิแง เร๊อ อา ลีแม เกออู โต่. 3เพรเหมาะ เด๊อ อา ลีแม เกออู โต่ เออซิแง เนอ, อา พย๊าแฮ หนิเกอ อาหมิเคว๊กอ ตื๊อดื่อเรอ อา พย๊าแฮ หนิเล๊อ เกอโป่ หน่าฉิ โต่. 4หม่าแน๊เรอ เพร เหมาะ เด๊อ อา ลีแม เออซิแง เนอ อา พย๊าแฮหนิ อาหมิเคว๊กอ เร๊อ อา พย๊าแฮหนิเล๊อ โป่ หน่าฉิ เร๊อ แป เต๊เห่. 5กาฉู่แด่เพรคู แฮโต่เบ่ อาแป่เหย่แป่เช อาขว่าอาคยา, เหย่ ซี โอ่เมอคา เร๊อ อา โอ่เมอหนิ ลอ แลแค.

6“เบ๊อะเหมาะเนเค เนอ, อู เอ๊โท เน๊อ, ‘เก๊อ กาฉู่แด่เพรคู แฮเฮ๊อ, เถ่จว๊า แม๊ฉื่อ มอ แลแค.’

7“เพรเหมาะ พู๊เส่ เด๊อ อา ครวาโครอู เออ ล๊อ ปลี ก๊อถ่อ เร๊อ ตี๊หรี่แตแร แลแค อาหมิเคว๊กอ ปว๊าเตเพร. 8เพรเหมาะ ลีแม เกออู โต่ เต๊เห่ เฮ๊ เพรเหมาะ ลีแม เต๊เห่ เน๊อ, ‘เด๊อะเกอ เป ซีหน่าฉิ, เปหมิเคว๊กอ เตเร ปีเฮ๊อ.’

9“หม่าแน๊เรอ เหย่ซี เฮ๊ฉื่อ เน๊อ, ‘โต่, อาโป่เป่ โต่ เกอ ปา ซีเง โต่, อาแร๊เล๊อ หม่า ซี จว๊าพรี เกอเร๊อ ข่อดื่อ ซีเง เด๊อ อู เหล่อิเช หน่าฉิ เหล่โอ่เนอ.’

10“เบ๊อะเหย่ซี จว๊าปาแพ๊ เด๊อ แกล๊ลู เบ๊อะเนอ, กาฉู่แด่เพรคู แฮโต่เบ่ เล๊เฮ๊อ, เพรเหมาะลีแม เด๊อ อา โอ่ ตี๊หรี่แตแร อาเหน่ เต๊เห่ แฮโน เต่อเกอ เร๊อ กาฉู่แด่เพรคู เด๊อ กาฉู่เมฉู่แด่ อา เตเอ่เตโอ เหล่โอ่ เร๊อ อู เมบี๊แก กู่ดา.

11“เด๊อคยา เร๊อ เพรเหมาะ เด๊อ อา ลีแม เกออู โต่ เออเต๊เห่ กาโต่ เร๊อ อา เฮ๊ แลแค เน๊อ, ‘แบ่เจ่, แบ่เจ่, บ๊าโม เป่เกอ เหร่อ เป กู่ดา’ ^b

12“ตื๊อดื่อเรอ กาฉู่แด่ เพรคู เฮ๊ฉื่อ เหย่ซี เน๊อ, ‘แว เฮ๊แหน่ เจ๊อ ซี, แว ซิเงน๊อ ซี โต่.’

13“ฮู๊เนอเรอ โอ่ส่าเซ แลแค, เมเตเฮ๊เรอ ม๊อเนอม๊อเซ เด๊อ แกแยพู๊คู เออ เก่ แฮคยาแซ๊ เบ๊อะเนอ ปาเนอ, ซี ซิเงแจ่โต่.

แด๊ ค๊าโข่ เพรแรเต ซิโซ อาหรี่อาแก

(ลูกา ๑๙:๑๑-๒๗)

14“ม๊อขุ เทอเลเก่กู เนอ, อา แซ่ เกอโป่ดื่อ เร๊อ แกแย เตเพร เด๊อ อา เตเร เถ่จว๊า แกล๊ เร๊อ เอ๊ปล๊อ อาหลู่เล๊ เต๊เห่. เร๊อ อา เด๊อะแก อา เตดุแหย่แถ่เซ เต๊เห่ เด๊อ อาหลู่เล๊ เต๊เห่ อา กู๊ยากู. ^c 15เตเพร เร๊อ อา เด๊อะแก ลู เท เบ่แงโจ่ย, เตเพร โป่เรอ เร๊อ เนอโจ่ย, เด๊อ อาโรเตเพร เกอลาติ เรอ โต๊โจ่ย, ฮู๊ เหย่ซี โอ่เร๊อ อา เตแจ่เตลีแมเนอ, เร๊อ อา เบ เป่ เหย่ซี โทเรอ อา เถ่จว๊าแก แกล๊. 16แกแย เด๊อ อา พย๊าหนิ เท แงโจ่ย เออเตเพรเนอ, อา พย๊าหนิ เฮ๊อเฮ๊อ เนอ อา เถ่จว๊า เมกื่อเมค๊า เร๊อ อา จว๊า เมหนิเถ่ เอ๊เล๊อโป่ เท เบ่แงโจ่ย. 17ฮู๊เนอเรอ, อา พย๊าหนิ เท เนอโจ่ย เออเตเพรเนอ, อา จว๊า เมกื่อเมค๊า เถ่เอ๊แถ่เล๊อ โป่ เนอโจ่ย. 18หม่าแน๊เรอ เด๊อ อา พย๊าหนิ เท โต๊โจ่ย เออเตเพรเนอ, อา เถ่จว๊า เร๊อ อา จว๊า เว เห่กู ตูกู เร๊อ อา จว๊า ปลือ โอ๊บี๊แก อาแบ่เจ่ เทเออ เด๊อ เห่เล.

19“ม๊อเนอม๊อเซ งยาแฮ เฮ๊อ เร๊อ หลู่เล๊ เออเต๊เห่ อา แบ่เจ่ กาโต่ เร๊อ อา กาแด๊เฮอ โปล คยา เท เด๊อ อา เด๊อะแก เหย่ซี เนอเต๊เห่. 20หลู่เล๊ เด๊อ อา พย๊า หนิ เท แงโจ่ย เออเตเพรเนอ, อา พย๊าแฮ เอ๊แถ่โป่ แงโจ่ย เร๊อ อา เฮ๊ อาแบ่เจ่ เน๊อ, ‘แบ่เจ่, เน เด๊อะแก แว เทอารา แงโจ่ย. เร๊อ เออเล๊, แว เมเถ่หนิ เอ๊เล๊อโป่ เฮ๊อ แงโจ่ย เฮ๊อ.’

21“อาแบ่เจ่ เฮ๊ฉื่อ ลู เน๊อ, ‘อ่อ, อาแร๊ แหน่เจ๊อ, เน หม่า เพรแรเต เด๊อ อาแร๊ เร๊อ อาจ๊อ เร๊อ แว. เน จ๊อ เร๊อ แว เด๊อะเน เตปีตี้วแพ๊ เออเต๊เห่ อาขว่าอาคยา, แว เก่ เด๊อะ โอ่เอ๊แถ่ เล๊อ โป่ เน เตแร เด๊อ เน เก่ เป๊อตี๊หรี่ เอ๊เล๊อ โป่ เร๊อ เออเนอ ปา. แฮ ซิครือซิลอ โหร่เกอดื่อ เร๊อ แว!’

22“แกแย เด๊อ อา พย๊าหนิ เท เนอโจ่ย เออเตเพรเนอ, อา พย๊าแฮ เอ๊แถ่โป่ เนอโจ่ย เร๊อ อา เฮ๊ อาแบ่เจ่ เน๊อ, ‘แบ่เจ่, เน เด๊อะ แว เท อารา เนอโจ่ย, เร๊อ เออเล๊, แว เม เถ่นี๋ เอ๊เล๊อโป่ เฮ๊อ เนอโจ่ย เฮ๊อ.’

23“เร๊อ อาแบ่เจ่ เฮ๊ฉื่อ ลู เน๊อ, ‘อ่อ, อาแร๊ แหน่เจ๊อ. เน หม่า เพรแรเต เด๊อ อาแร๊ เร๊อ อาจ๊อ เร๊อ แว. เน จ๊อ เร๊อ แว เด๊อะเน เตปีตี้วแพ๊ เออเต๊เห่ อาขว่าอาคยา, แว เก่ เด๊อะ โอ่เอ๊แถ่ เล๊อ โป่ เน เตแร เด๊อ เน เก่ เป๊อตี๊หรี่ เอ๊เล๊อ โป่ เร๊อ เออเนอ ปา. แฮ ซิครือซิลอ โหร่เกอดื่อ เร๊อ แว!’

24“เออโตโพ๊เรอ แกแย เด๊อ อา พย๊าหนิ เท โต๊โจ่ย เออเตเพรเนอ อา แฮเฮ๊ อาแบ่เจ่ เน๊อ, ‘แบ่เจ่, แว ซิเง เร๊อ เน หม่า แกแย ตูกลู๊ แหน่เจ๊อ เตเพร. โบ๊ เด๊อ ช๊อ เกออู โต่ เต๊เห่เนอ, เน จว๊า เก๊กา ดื่อเง, โบ๊ เด๊อ เน โหล่ เกออู โต่ เต๊เห่เนอ เน จว๊าปอกาปล๊อ ดื่อเง. 25ฮู๊เนอ อาขว่าอาคยา, แว ซิอิเช เร๊อ แว จว๊า ปลือ โอ่แก เนเท เออโต๊โจ่ย เด๊อ เห่เล, แม๊มอ, เออเล๊ เท เด๊อ เน เด๊อะแก แว เนอ.’

26“เร๊อ อาแบ่เจ่ เฮ๊กาคยาฉื่อ ลู เน๊อ, ‘หลู่เล๊จา หลู่เล๊จือ, หลู่เล๊เตเกลเลแบ่, เน ซิเง เร๊อ โบ๊ เด๊อ แว ช๊อ หม่าโต่ เต๊เห่เนอ, แว จว๊า เก๊กา ดื่อเง, โบ๊ เด๊อ แว โหล่ หม่าโต่ เต๊เห่เนอ แว จว๊า ปอกาปล๊อ ดื่อเง, แวเฮ๊? 27เน เก่ ซิเง ฮู๊เนอเรอ เน แร๊ โต เด๊อะบ่อแก แวเท เออ เด๊อ เพร พย๊าบ่อ พย๊าโหล่ เท เต๊เห่ กู๊ยากู โต่เมเต? เน เก่ เมฮู๊เนอ เฮ๊เรอ, ช๋า แว กาคยา ปาเนอ แว เก่ พย๊าหนิ กาคยา อาพู๊พู๊ อาโหมะโหมะ ปา กอกอ.

28“‘พย๊า กาคยาดว๊า คยาแซ๊ เทเนอ โต๊โจ่ย เร๊อ เด๊อะ เร๊อ แกแย เด๊อ อา พย๊าหนิ เท อาโจ่ย เช๊อ เออเนอ เตเพร. 29เมเตเฮ๊เรอ ล๋อ แกแย เด๊อ อูหยื่อเอ่ หนิลู เร๊อ อูแด่โอ่ ตาเต เด๊อ ลูโอ่ เนอเต๊เห่เนอ, อูเก่ เด๊อะ เอ๊แถ่ เล๊อโป่ ลูปา. เร๊อ อาเต เก่โอ่ ตาป่อตาเป เจ๊อปา หม่าแน๊เรอ อูแด่โอ่ ปีติ้วแพ๊ ตาเต เด๊อะ ลูโอ่ เร๊อ อู หยื่อเอ่ หนิ ลูโต่ เต๊เห่ เนอ, อู เก่ พย๊า เผ่ แก ลอ เหย่ซี ปา. ^d 30ต่าเถ่แก หลู่เล๊ โอ่เล๊อโอ่กลอ เออเตเพร เด๊อ เตคี๊เตลอ อาเกล เนอ. เบ๊อะเนอโต๊โผะเนอ อู เก่ จว๊าโหง่จว๊าเห่, อู เก่ อ่า ตาจ๊า เจ๊อ อากู๊เคอ ปา.’ ^e

เตเมจากาคยา เด๊อคยา ตื๊อดื่อ

31“ช๊า แกแย อาพู๊คูเออ แฮ เร๊อ อาเตอเรอดุเตอเรอทู ปา, เร๊อ อาม๊อขุ เตเน่วพู๊ เต๊เห่ เก่ แฮ เต่อเกอ เน๊อ ลู เบ๊อะเนอ, อา เก่ โอ่แนโอ่ เด๊อ อา กู่แกล๊ แถ่โล เตเค อาขุ ปา. ^f 32แกแยปว๊าเมวเจอะ ปว๊าเต๊อเจอะ เนอ, อา เก่ แฮ โอ่ปล๊อลอ เด๊อ ลูเป๊เส่เง ปา, เร๊อ ฮู๊ เพรเกซิหมิ อาเบโค๊ เกอเร๊อ อาซิหมิ เต๊เห่ เร๊อ เป่ เต๊เห่เนอ, อา เก่ เบ โค๊ลอ แกแย เออเต๊เห่ ปา. 33อา เก่ แด่โค๊ ซิหมิ เต๊เห่ เด๊อ อากู๊ขุ จ๊อทว๊า ตากยา ปา, เร๊อ เป่ เต๊เห่เนอ อา เก่ แด่ โค๊เล๊อ เด๊อ อากู๊ขุ จ๊อจิ ตากยา ปา.

34“เบ๊อะเนอปาเนอ, คุ๊ย เออเตเพร เก่ เฮ๊ แกแย เด๊อ อากู๊ขุ จ๊อทว๊า เออเต๊เห่ ปา เน๊อ, ‘แฮมอ แลแค, ซี หม่า แกแย เด๊อ อา พย๊าหนิ แวเพ จอแปแหร่ อา เตเด๊อะบุ๊ยเด๊อะเตอเรอ เต๊เห่, แฮโน พย๊าดว้า แลแค ม๊อขุ เทอเลเก่กู อาอู่เจ เต๊เหย่ เด๊อ อู ตี๊หรี่แตแร โอ่หนื่ออื่อ เป่ ซี เด๊อ เห่ขุทวาลู่ ม๊อขุทวาเซปา เนอ. 35เมเตเฮ๊เรอ เบ๊อะแว ซิกู๊ซิวี เนอ ซี เด๊อะเอ่เด๊อะโอ แว, เบ๊อะแว ซิโอเทอ เนอ ซี เด๊อะโอ แว, เบ๊อะแว จว๊าทวา ซิเผระ เบ๊อะเนอ, ซี เอ๊โอ่ โมฉื่อ แว. 36เบ๊อะแว โอ่ก่าโกล เคเนอ, ซี เด๊อะกือเด๊อะแซ๊ แว. เบ๊อะแวชุ๊ยแวเช เบ๊อะเนอ, ซีแม๊ซีตู่ เกอเร๊อ แว. เบ๊อะอู ด๊อตา แว เด๊อ ทอกูเบ๊อะเนอ, ซี แฮ โอ่เล เกอ แว.’

37“เร๊อ แกแยจ๊อแกแยเต เออเต๊เห่ เก่ เฮ๊ฉื่อ อา เน๊อ, ‘แบ่เจ่, เป จว๊าแม๊เถอะน๊อ เน ซิกู๊ซิวี เร๊อ เป จว๊า เด๊อะเอ่น๊อ เน บ๊อเคเต? เน ซิโอเทอ เร๊อ เป จว๊า เด๊อะโอน๊อ เน บ๊อเคเตเต? 38เป แม๊เถอะเน เน ทวา ซิเผระ เร๊อ เป จว๊า เอ๊ฉื่อน๊อ เน บ๊อเกเต, โต่หม่าแน๊ เน โอ่ก่าโกล เร๊อ เป จว๊า เด๊อะกือเด๊อะแซ๊น๊อ เน บ๊อเคเตเต? 39เป แม๊เถอะ เน โอ่ชู๊ยโอ่เช เบ๊อะเนอ เบ่เบ่, โต่หม่าแน๊ เบ๊อะอู ด๊อตา เน เด๊อ ทอกู อาเค เนอเบ่เบ่, เป จว๊า แฮ โอ่เลน๊อ เกอ เน บ๊อเคเต?’

40“คุ๊ย เออเตเพร เก่ เฮ๊ฉื่อ เหย่ซี เน๊อ, ‘แว เฮ๊แหน่ เจ๊อ ซี, เด๊อ แว โป่แหว่ เต๊เห่ อาเกล, ซี เมจว่าน๊อ แกแย เด๊อ อู เตเน ปีติ้วเล๊อ ลู เตเพร เนอหม่า หม่าเฮ๊อ ซี เมจว่า แว เฮ๊อ.’

41“โทเรอ อา เก่ เฮ๊ติ แกแย โอ่ เด๊อ อากู๊ขุ จ๊อจิ เต๊เห่ เน๊อ, ‘เถ่จว๊า ตาพาแก เร๊อ แว, ซี หม่า แกแย เด๊อ อา พย๊าหนิ เตอิชอมู๊แหม่ เต๊เห่, จว๊าโน เกอ แลแค เด๊อ อู ตี๊หรี่แตแร โอ่หนื่ออื่อ เป่ โลเน๊มู๊แหม่รีแจ่ กู่กล๊อ เนอโตโด เร๊อ อา โลเน๊โลหน่า เนอเต๊เห่ อาเง เด๊อ เหย่ซี เก่ จว๊าโอ่ เบ๊อะหมิ เด๊อ อา ปีเป่ โตโพ๋ โต่ เนอเต๊เผ่อากู เนอ. 42เมเตเฮ๊เรอ เบ๊อะแว ซิเอ่ซิโอ เนอ, ซี เด๊อะเอ่เด๊อะโอ แว โต่. 43เบ๊อะแว ทวา ซิเผระ เบ๊อะเนอ, ซี เอ๊โอ่ โมฉื่อ แว โต่. เบ๊อะแว โอ่ก่าโกล เบ๊อะเนอ, ซี เด๊อะกือเด๊อะแซ๊ แว โต่. เบ๊อะแวชุ๊ยแวเช เบ๊อะเนอ, โท๊โต่ เบ๊อะอู ด๊อโอ่ แว เด๊อ ทอกู เนอ, ซี แฮแม๊แฮตู่เกอ แว โต่.’

44“เร๊อ เหย่ซี เก่ เฮ๊ฉื่อ ลู เน๊อ, ‘แบ่เจ่, เน ซิกู๊ซิวี เบ๊อะเนอ เบ่เบ่, เน ซิโอเทอ เบ๊อะเนอ เบ่เบ่, เน จว๊า ทวา ซิเผระ เบ๊อะเนอ เบ่เบ่, เน โอ่แต่กือ โอ่แต่แซ๊ เบ๊อะเนอ เบ่เบ่, เนชู๊ยเนเช เบ๊อะเนอ เบ่เบ่, อู ด๊อตา เน เด๊อ ทอกู เบ๊อะเนอ เบ่เบ่, เป จว๊าแม๊เถอะ เน เร๊อ เป เมจว่า เน โต่ เบ๊อะเคเต?’

45“เร๊อ อา เก่ เฮ๊ฉื่อ เหย่ซี เน๊อ, ‘แว เฮ๊แหน่ เจ๊อ ซี, เด๊อ แว โป่แหว่ เต๊เห่ อาเกล เนอ, ซี เก่ เมจว่าน๊อ อู แกแย เด๊อ อู เตเน ปีติ้ว เล๊อ ลู เตเพร่ว โต่ เนอหม่า แซ่เฮ๊อ ซี เมจว่า น๊อ แว โต่ เฮ๊อ.’

46“ฮู๊เนอเรอ เหย่ซี เก่ ข่าเบ่ เด๊อ เตเมจากาคยา ตูจูเพร ตาแลเคร๊ ปา, หม่าแน๊เรอ แกแย จ๊อเต เออเต๊เห่เนอ อา เก่ โนหนิ เด๊อ ม๊อขุ เร๊อ อาเก่ พย๊าหนิ ซิปล่อเซอเพร ตูจูเพรปา.” ^g