Matthew 26

เหย่ซี เตเร เตเน เคร เมเซอ แบ่เจ่

(มาระโก ๑๔:๑-๒, ลูกา ๒๒:๑-๒, ยอห์น ๑๑:๔๕-๕๓)

1เบ๊อะแบ่เจ่ เหย่ซู่ เฮ๊โฉ่ โล เป่ลอโทเฮ๊อ เออ เต๊เห่ เบ๊อะเนอ, อา เฮ๊ อา โคเจ่ เต๊เห่ เนอ, 2“ซี ซิเงเฮ๊อ เน๊อ, อาโหล่ปา เนอเนอ หม่า ป่วย เด๊อ อู เอ๊ เร๊อ ป่วยเตจว๊า ตา ลว๊า แฮโต่เฮ๊อ. อู เก่ อิเชตาแก แกแยพู๊คู เออ ปา เร๊อ อู เก่ มือเซอแถ่แก ลู เด๊อ อี๊ถื่อดีเต่ลู ปา.” ^a

3เบ๊อะเนอเบ๊อะเนอ, เพรหลู่แต กู่กล๊อขุแกล เต๊เห่ เร๊อ แกแยยิวพู๊ เตจ๊อบู่จ๊อเบ กู่กล๊อขุแกล เต๊เห่ โอ่ปล๊อลอ ลู เด๊อ เพรหลู่แต กู่กล๊อดุเล๊อ คายาฟาส อาโฮกู. 4เหย่ซี ตี๊หรี่แตแร โอ่หนื่ออื่อ ลอ เฮ๊อ เนอ อา เก่ แม๊ปลู ปื่อ เร๊อ เมเซอ เหย่ซู่. 5หม่าแน๊เรอ เหย่ซี เฮ๊ เกอเร๊อลู เน๊อ, “เบ๊อะเป เมป่วย อาเคเออเนอ เป โต ปื่อหนิ ลู โต่, ปาหม่า แกแย เบ๊หมู่ เต๊เห่ ซิปล่อดุ เร๊อ อา เมตอปลอแลยอ ลอเห่.”

อู แล๊ตา เทอโนมื๊อ เด๊อ เหย่ซู่ อา กู่กล๊อลู เบ๊อะดอเบธานี ดอกู

(มาระโก ๑๔:๓-๙, ยอห์น ๑๒:๑-๘)

6เบ๊อะแบ่เจ่ เหย่ซู่ โอ่ เด๊อ ดอเบธานี คูซีโมน เด๊อ จุมู๊แหม่ เบ่ น๊อ ลู เนอเตเพร หี่. 7เพรเหมาะ เตเพร แฮ เด๊อ ลูโอ่ เร๊อ อา พย๊าแฮหนิ แป เด๊อ อู เม อา เร๊อ หล่อบู เด๊อ อา โอ่บา เร๊อ เทอโนมื๊อ งูดุงูชอ เออแตแป เร๊อ เบ๊อะแบเจ่ เหย่ซู่ โอ่แน เบ๊อะดีเหร่ช๊า เบ๊อะเนอ, อา แฮแล๊ตา เด๊อ แบ่เจ่ เหย่ซู่ อา กู่กล๊อลู. ^b

8เบ๊อะอา โคเจ่ เต๊เห่ แม๊เถอะ เบ๊อะเนอ, อา ซิปล่อดุ เร๊อ อา แด๊เฮอ ลู เน๊อ, “จว๊าเมลอ แกเด เมเต? 9เก่ อิเช เทอโนมื๊อ เออเนอ เฮ๊หม่า อา หนิ งูดุงูชอ แหน่เจ๊อ เร๊อ อา หนิ รือ เออเนอ เด๊อ เร๊อ แกแย โซพ๊าโซแรฮู๊ เนอ กอกอ”

10แบ่เจ่ เหย่ซู่ ซิเง อาขว่าอาคยา, อา เฮ๊ เหย่ซี เน๊อ, “ซี จว๊า เมดู๊แด เพรเหมาะ เออเตเพร เมเต? อา เมเตเออ เนอหม่า อาแร๊ แหน่เจ๊อ เด๊อ แวเง เฮ๊อ. 11แกแย โซพ๊าโซแรพู๊ เต๊เห่ โอ่เต่อเกอ เร๊อ ซี ปว๋า โตโพ๊ เจ๊อ, หม่าแน๊เรอ แวเออเนอ แว โอ่เต่อตี๊ตี๊ เกอ เร๊อ ซี โต่. ^c 12เบ๊อะอา แล๊ตา เทอโนมื๊อ เออ เด๊อ แว เหน่ลู เนอ เออเนอหมา, หม่าเฮ๊อ อา ตี๊หรี่ โอ่หนื่ออื่อ เป่เฮ๊อ แว เบ๊อะอู เก่ โล๊ ตาแว เด๊อะโลก ปาเนอเฮ๊อ. 13แว เฮ๊จ๊อ เจ๊อ ซี, ช๊า อู จว๊าเล เฮ๊โฉ่โด่แน เฮ๊อ เตซิครือมีลา เออ เด๊อ เห่ขุ เออ ต๊าบ่า เบ๊อะเต๋ โต๊โผ่ ปาเบ่เบ่, อู เก่ เตเนแถ่ โต่เบ่หนิ เร๊อ อา ปา, เร๊อ อู เก่ โด่แน หนิ เต เด๊อ อา เม โทเฮ๊อ เออเนอปา.”

คูยูดาส ซิปล่อโต เด๊อ อา เก่ อิเชแก แบ่เจ่

(มาระโก ๑๔:๑๐-๑๑, ลูกา ๒๒:๓-๖)

14เด๊อ แบ่เจ่ เหย่ซู่ อา โคเจ่ เช๊อซิเนอ เด๊ออาเกล อามุย เร๊อ คูยูดาส อิสคาริโอท เฮ๊เออเตเพรเนอ, อา จว๊า เด๊อ เพรหลู่แต ทวาดุทวาเต เต๊เห่ อา โอ่. 15เร๊อ อา จว๊า แด๊เฮอ เหย่ซี เน๊อ, “แว เก่ เด๊อะตาแก เหย่ซู่ เด๊อ ซี กู๊ยากู เฮ๊เรอ ซี เด๊อ แว บ๋า เต?” เร๊อ เหย่ซี เด๊อ ลู รือหย่า โซเชอ. ^d 16เป๊อแถ่ เบ๊อะเนอ เร๊อ คูยูดาส ทื๊อแม๊ ม๊อเนอม๊อเซ เด๊อ อา เก่ ตาโตตาเบ่ เด๊อ อา เก่ อิเชตาแกหนิ เหย่ซู่.

เตจว๊าตาลว๊าป่วย เตเอ่โอบูโพ๊ เหมาะเฮ๊

(มาระโก ๑๔:๑๒-๒๑, ลูกา ๒๒:๗-๑๓, ยอห์น ๑๓:๒๑-๓๐)

17เบ๊อะป่วย เอ่ ค๊อมู โชโด โฮหมื่อกลุย อาเหร่อเล๊อ เตอเนอ เนอ, อา โคเจ่ เต๊เห่ แฮ เด๊อ เหย่ซู่ อา โอ่ เร๊อ อา แฮ แด๊เฮอ ลู เน๊อ, “ป่วยเตจว๊า ตา ลว๊า เอ่เฉ่บูโพ๊ เหมาะเฮ๊ เออเนอ, เน ซิหยื่อ นอตี๊หรี่แตแร โต เป เบ๊อะโต๊โผ่เต?”

18เร๊อ อา เฮ๊ฉื่อ เหย่ซี เน๊อ, “จว๊าโน เด๊อ วีกู เนอเรอ จว๊า เด๊อ เพรคู เนอเตเพร อา โอ่ เนอ เร๊อ จว๊า เฮ๊ ลู เน๊อ, ‘ซ๊าร๊า เฮ๊ เนอ, ม๊อเนอม๊อเซ ผื่อเฮ๊อ เด๊อ แวเง เฮ๊อ, เร๊อ แว เบ่เอ่เบ่โอ เต่อ ป่วยเตจว๊า ตา ลว๊า เอ่เฉ่บูโพ๊เหมาะเฮ๊ เร๊อ แว โคเจ่ เด๊อ เนหี่กู’ เฮ๊ อา ฮู๊เนอนี๋.” 19เร๊อ อา โคเจ่ เต๊เห่ เมฮู๊ อา เฮ๊ เหย่ซี เนอ เร๊อ เหย่ซี จว๊า ตี๊หรี่แตแรหนิ แลแค ป่วยเตจว๊า ตา ลว๊า เอ่เฉ่บูโพ๊เหมาะเฮ๊ อาเง เบ๊อะเนอ.

20เบ๊อะเหมาะคี๊โป๊โหล่เฮ๊อ เบ๊อะเนอ, แบ่เจ่ เร๊อ อา โคเจ่ เช๊อซิเนอ โอ่แนโอ่ ตาวา โหร่ลอ ลู เด๊อ เหล่เอ่ดีดี่เหร่ อาแก่ช๊า. 21เร๊อ เบ๊อะเหย่ซี เอ่ดี เบ๊อะเนอ, อา เฮ๊ เหย่ซี เน๊อ, “แว เฮ๊จ๊อจ๊อ ซี, เด๊อ ซีเกล เออ, แกแย เด๊อ อา เก่ อิเชตาแก แว ปาเนอ อา โอ่ เตเพร.”

22เออโตโพ๊เรอ เหย่ซี ซิปล่อ โมปา เจ๊อ ตีกี๋ โต่. เร๊อ อา แด๊เฮอ แลแค แบ่เจ่ เตเพร โท เตเพร เน๊อ, “แบ่เจ่, เน เฮ๊เร๊อ เตเพรหม่า แว หม่าโต่ แวเฮ๊?”

23แบ่เจ่ เฮ๊ฉื่อ เหย่ซี เน๊อ, “แกแย เด๊อ อา บ๊อโนเอ่ เต่อเกอ เร๊อ แว เด๊อ เบหล่อกู เนอเตเพร หม่า หม่าเฮ๊อ แกแย เด๊อ อาอิเช ตาแก แว เนอเตเพรเฮ๊อ. ^e 24ฮู๊ ลีเทส่อพ๊า ราม๊าหนื่ออื่อ เร๊อ แกแย อาพู๊ หม่าเฮ๊อ แวเออ อา เบ่ เซอ แหน่ปา ตื๊อดื่อเรอ เตปย๊า เตหลู่ โอ่ เกอ ดื่อ แกแย เด๊อ อา เก่ อิเชตาแก แกแยพู๊คู เออเตเพรเนอ, จอแปแหร่ เก่เมจากาคยาลู ปา. อา เก่ โอ่เป๊เจ่แล โต่ เฮ๊เนอหม่า อาแร๊เล๊อ ปา เจ๊อ เด๊อ ลูเง เจ๊อ.”

25เออโตโพ๊เรอ คูยูดาส เด๊อ อา เก่ อิเชตาแก ลู เออเตเพร แด๊เฮอ ลู เน๊อ, “ซ๊าร๊า, เน เฮ๊ เนอเตเพรหม่า แว หม่าโต่, แวเฮ๊?” แบ่เจ่ เฮ๊ฉื่อ ลู เน๊อ, “หม่าเฮ๊อ, หม่าเน เนอ เฮ๊อ.”

(มาระโก ๑๔:๒๒-๒๖, ลูกา ๒๒:๑๔-๒๓, โครินธ์ อาเหร่อเล๊อ ต๊าบ่า ๑๑:๒๓-๒๕)

26เบ๊อะเหย่ซี เอ่เฉ่เบ๊อะเนอ, แบ่เจ่ เหย่ซู่ พย๊า ค๊อมู เร๊อ อา เฮ๊บุ๊ยเฮ๊เตอเรอ จอแปแหร่, โทเรอ อา บิกยา เร๊อ อา เด๊อะตา เด๊อ อา โคเจ่ เต๊เห่ อา กู๊ยากู, เร๊อ อา เฮ๊ เหย่ซี เน๊อ, “พย๊าเอ่มอ แลแค, เออ หม่า แว เหน่กล่อ เฮ๊อ”

27โทเรอ อา พย๊าแถ่ เบ เร๊อ อา เฮ๊บุ๊ยเฮ๊เตอเรอ เร๊อ อา เด๊อะตา แฮเง เด๊อ อา โคเจ่ เต๊เห่ อา โอ่ เร๊อ อา เฮ๊ เหย่ซี เน๊อ, “โอมอ แลแค เออ. 28เบเออหมา เต๊อ๊อแล นอแล อาเซ เด๊อ หม่าเฮ๊อ แวสุ่ย เด๊อ อา เก่ ทุ๊ยตา เร๊ออาเก่ โปลแก แกแยโอ่โหร่ เตซื๊อปา. ^f ▼

▼อูราโอ่ ลีพ๊ามู๋หนูเคเนอ, เต๊เห่เห่ เนอ อูราโน ป่าโต่

29แว แด๊โฉ่ เป่ ซี, เป๊อแถ่ กู๊แหน่เออ ตาเป่แฮเนอ แว โอน๊อ ปา แท๊ทือเทอ เออ โต่เฮ๊อ. โต่ช๊า แว เก่ กาโอ เต่อ โป่แซ๊ แท๊ทือเทอ อาเซ เร๊อ ซี เบ๊อะโอ่ เด๊อ แวเพ อาเทออาเก่กู ปา.”

30โทเรอ เหย่ซี อิโร ถู่เซ๊แถ่ จอแปแหร่ เร๊อ อา เถ่จว๊าแถ่ แลแค เด๊อ โต๊โฉ่ โฉ่ขุ.

แบ่เจ่ เหย่ซู่ เฮ๊โพร อาเหน่ เด๊อ เปโตร เก่ โชโม๊บิแก ลู ปา

(มาระโก ๑๔:๒๗-๓๑, ลูกา ๒๒:๓๑-๓๔, ยอห์น ๑๓:๓๖-๓๘)

31โทเรอ แบ่เจ่ เหย่ซู่ เฮ๊ เหย่ซี เน๊อ, “เออ เตเซ ซี วิ แก แว ปา เมเตเฮ๊เรอ ลีเทส่อพ๊า ราม๊า เฮ๊เนอ,

‘แว เก่ มือ เพรเก ซิหมิ ปา, เร๊อ ซิหมิเบ๊หมู่ เต๊เห่ เก่ แกล่โพร๊ แกล่แพร ลอ ปา.’ ^h

32หม่าแน๊เรอ ช๊า แว เซอ ก๊อถ่อกาคยา แซ๊ปาเนอ, แว เก่ จว๊า เหร่อ ซี เด๊อ กาลิลี เก่กู เนอ ปา.” ⁱ

33คูเปโตร เฮ๊ฉื่อ เน๊อ, “อู เก่ วิแก แก ลอ เจ๊อ เนเบ่เบ่, แว วิแก เจ๊อ เน ตีกี๋ โต่.”

34หม่าแน๊เรอ แบ่เจ่ เหย่ซู่ เฮ๊ฉื่อ ลู เน๊อ, “แว เฮ๊จ๊อจ๊อ เน, เออเตเซ เบ๊อะชาเพ อี๊อู่แถ่ แต่ล๋ายโต่ ปา เนอ, แวซิเง น๊ออาโต่ เน เก่ โชโม๊บิแก แว โซโพ๊ ปา.”

35หม่าแน๊เรอ คูเปโตร เฮ๊ฉื่อ เน๊อ, “แว โตเบ่ เซอ เต่อเกอ เจ๊อ เร๊อ เน เบ่เบ่, แว ซิเงน๊อ อา โต่ เนอ แว โชโม๊บิแก เจ๊อ เน ตีกี๋ โต่ เฮ๊อ” เร๊อ อา โคเจ่ เด๊อ อาโร เต๊เห่ ครวาเฮ๊เกอ ลอ ฮู๊เนอเนอ.

แบ่เจ่ เหย่ซู่ จว๊า กุยจ๊อเบ เด๊อ เกทเสมนี เหล่โอ่ โต๊โผ่

(มาระโก ๑๔:๓๒-๔๒, ลูกา ๒๒:๓๙-๔๖)

36โทเรอ แบ่เจ่ เหย่ซู่ เร๊อ อา โคเจ่ เต๊เห่ จว๊า เด๊อ เหล่โอ่ โต๊โผ่ เด๊อ อู เฮ๊ เร๊อ เกทเสมนี เร๊อ อา เฮ๊ เหย่ซี เน๊อ, “เบ๊อะแว จว๊า จ๊อเบ เด๊อ เนอโต๊โผะ เบ๊อะเนอปาเนอ, โอ่แนโอ่แก โก๊หลื่อ แลแค เบ๊อะเออ นี๋.” 37อา เอ๊ครวาจว๊าหนิ คูเปโตร เร๊อ เพเศเบดี อาพู๊เพรคู ซิเนอ จว๊าเต่อ เกออา เร๊อ อา ซิเปลซิหย่อ แฮ เร๊อ อา ซิปล่อกู่ ซิปล่อแก แฮแหน่เจ๊อ. 38โทเรอ อา เฮ๊ เหย่ซี เน๊อ, “แว ซิเปลซิหย่อ เซอแกเฮ๊อ, อา แซ่เจ๊อเร๊อ แว เตเร เซอ เจ๊อเฮ๊อเนอ. โอ่แก แลแค เบ๊อะเออ เร๊อ โอ่ส่าเซ แลแค นี๋.”

39อา จว๊า เป่แฮโป่ เด๊อ เง ตี๊กิแพ๊ เร๊อ อา โอ่เมอ โตโกลตา เด๊อ เห่ขุ เร๊อ อา กุยจ๊อเบ เร๊อ อา เฮ๊ เน๊อ, “เก๋อ เพ เก่ หม่าแน๊เรอ เน เก่ พย๊า ตาพาแก เป่ แว เบหล่อ เตจาเตจือ เออเต๊เบ่ เด๊อแวโอ่ หม่า อาหนิ แพ๊ หม่าแน๊เรอ แว ซิหยื่อ เม จู๊ ดื่อ แว ซิปล่อ โต่ จู๊ ดื่อแพ๊ เน ซิ ปล่อ นี๋.”

40โทเรอ อา กาคยา แซ๊ เด๊อ อา โคเจ่ เต๊เห่ อา โอ่ เร๊อ อา กา แม๊เถอะ เหย่ซี โอ่เมอหนิ ตาปา ลอ, เร๊อ อา แด๊เฮอ คูเปโตร เน๊อ, “ซี โอ่ส่าเซ งยา เต่อเกอ เร๊อ แว เบ๊อะตือมือเนอแพ๊ เร๊อ ซี ส่าเซ เบ๊โต่ แอ? 41แซ่ฮู๊ ซี เก่ จว๊าโน เต่อเกอ แต่ เด๊อ อิลออี๊โหล่ อากู แต่เหม่เนอ, ส่าเซ เร๊อ กุยจ๊อเบ แลแค นี๋. ซี ซิหยื่อ เมเกอแหน่ เจ๊อ ตื๊อดื่อเรอ ซี เหน่กล่อ เออเนอ อา อ๊าเจ่เหร่เจ่ แหน่เจ๊อ.”

42อา จว๊า โป่แซ๊ โตโพ๊เนอ เร๊อ อา กุยจ๊อเบ เน๊อ, “เก๋อ แว เพ๋, แว เบ่ โอ่แหน่ เฮ๊อ เตจาเตจือ เบหล่อเออ เออเต๊เบ่ เออ, พย๊าตาพาแกโต่ เก่ เฮ๊เรอ, จู๋ ดื่อ แพ๊ เน ซิปล่อ นี๋.”

43เบ๊อะอา กาคยา แม๊ โป่แซ๊ อา โคเจ่ เต๊เห่เนอ, อา กาแม๊เถอะ เร๊อ เหย่ซี โอ่เมอตาปา ลอปลี. เหย่ซี ซิโอ่เมอ จา ตา ลว๊าซิลือ เร๊อ อา แม๊ เถ่ เบ๊ ปา เจ๊อ โต่. 44เร๊อ อา เถ่จว๊า กุยจ๊อเบ โป่แซ๊ โซโพ๊โตโพ๊ เร๊อ อา เฮ๊แซ่ คยาแซ๊ ฮู๊ อา เฮ๊ เหร่อ เนอแพ๊.

45โทเร๊อ อา กาคยา เด๊อ อา โคเจ่ เต๊เห่ อา โอ่ เร๊อ อา เฮ๊ เหย่ซี เน๊อ, “ซี โอ่ เมอ โอ่โก๊ เตเบ๊ซิพร๊า ตื๊อดื่อ ปา เจ๊อ แลแค ฮู๊เต? หนิดา แม๊มอ แลแค, หน่าหลิ เด๊อ อู เก่ อิเชตาแก แกแย อาพู๊คูเออ เด๊อ เพรเตเหล่ซื๊อโอ่ เต๊เห่ อา กู๊ยากูเนอ, อา แฮโต่เฮ๊อ. 46ก๊อถ่อมอ แลแค, เร๊อ เป เก่ จว๊า, เพร อิเชตาแก แว เออเตเพร แฮโต่เฮ๊อ”

คูยูดาส เอ๊แฮหนิ แกแย เต๊เห่ เร๊อ อา แฮปื่อ แบ่เจ่ เหย่ซู่

(มาระโก ๑๔:๔๓-๕๐, ลูกา ๒๒:๔๗-๕๓, ยอห์น ๑๘:๓-๑๒)

47เบ๊อะแบ่เจ่ เหย่ซู่ เฮ๊เบ่ ปาแพ๊ เบ๊อะเนอ, คูยูดาส เด๊อ อา โอ่เต่อเกอ ลู โคเจ่ เช๊อซิเนอ อาเกล เออเตเพรเนอ, อา แฮโต่ เบ๊อะเนอ. เร๊อ อาแฮเต่อ เกอเร๊อ อู ตูปลูเต๊เผ่ เจ๊อ เร๊อ เหย่ซี พย๊าแฮหนิ แลแค อิมือ, อิปอ เร๊อ เน๊ เต๊เห่. แกแย เออเต๊เห่ เนอหม่า หม่าแพ๊ เพรหลู่แต ทวาดุทวาเต เต๊เห่ เร๊อ แกแยยิว ทวาดุทวาเต เต๊เห่ ปลวาแฮ เหย่ซี เนอแพ๊. 48เพรอิเชตาแก แบ่เจ่ เออเตเพรเนอ อา เด๊อซิเง โอ่หนื่ออื่อ เหร่อ โทเฮ๊อ เหย่ซี เน๊อ, “แกแย เด๊อ แว โนมื๊อ อา เตเพร เนอหม่า หม่าเฮ๊อ เหย่ซู่ แฮปื่อ แลแค ลู นี๋,” อาเฮ๊หนื่ออื่อ ลูฮู๊เนอ. 49อา แฮ โตเด โต๊โพ๊แฮ เด๊อ แบ่เจ่ เหย่ซู่ อา โอ่ เร๊อ อา แฮ เฮ๊ ลู เน๊อ, “ซ๊าร๊า, เน โอ่โมโอ่แร๊ แอ?” โทเรอ อา โนมื๊อ ลู. 50เร๊อ แบ่เจ่ เฮ๊กาคยาฉื่อ ลู เน๊อ, “โคแบ๊ซว๊าโม๋, เน เตเร แฮเม อิเตเนอ ตูรู๊ เมมอ.”

โทเรอ แกแย เต๊เห่ แฮปื่อแก เหย่ซู่. 51แกแย เด๊อ อา ครวา แฮเกอ เร๊อ แบ่เจ่ เหย่ซู่ อาเกล เตเพรเนอ, อา บ๊าเถ่ อาเน๊ เร๊อ อา ปาตือแก เพรหลู่แต กู่กล๊อดุเล๊อ อาหลู่เล๊ เตเพร อากู๊เหล่โก่ โตโค๊.

52แบ่เจ่ เฮ๊ ลู เน๊อ, “แรโน ดว้าแก เนเน๊ เร๊อ เมเตเฮ๊เร๊อ แกแย เด๊อ อา ปื่อ เน๊เนอ อา เก่ เซอ เร๊อ เน๊คยา ปา. 53แซ่ฮู๊ เตเน่วม๊อขุพู๊ เต๊เห่ เก่ แฮแล เตเกบี๊เกอเร๊อ แว อาเงเนอ, แว เก่ กุย แวเพ เด๊อ อา เก่ นอกี๊ตา เหย่ซี เกลอฮู๊หมู่ดุ เช๊อเนอหมู่ เฮ๊เนอ, แวเพ เด๊อะตา โตโพ๊ เด๊อะตา เจ๊อ แว หม่า อา หนิ เจ๊อ เจ๊อเนอหม่า ซี ซิเงโต่ แอ? 54เก่ แว เมฮู๊เนอ เฮ๊เรอ ลีเทส่อพ๊า ราหนื่ออื่อ เด๊อ อา เบ่ทวา แถ่ ฮู๊เออเนอ, อา จว๊าเล๊อบาแถ่ แจ่ ฮู๊เต?”

55โทเรอ แบ่เจ่ เหย่ซู่ เฮ๊ แกแย เบ๊หมู่ เน๊อ, “แว หม่า แกแยมู๊แหม่ รีแจ่ เตเพรแหน่แอ? ซี แฮปื่อ แว เร๊อ ซี แฮ เจ๊อ เร๊อ เน๊ เร๊อ อิมืออิปอ เจ๊อ ฮู๊เต? แว โอ่แน อิซว๊าอิ๊แส่ อู เด๊อ เตหลู่แต โฮกู ปวาเนอปวาเซ เจ๊อ เร๊อ ซี ปื่อ แว โต่โต่. ^j 56หม่าแน๊เรอ เตทวาแถ่ อาเหน่ ฮู๊เออ เนอหม่า แซ่ฮู๊ เพรโพร ราหนื่ออื่อแก เต๊เห่ เก่เล๊อเก่บาแถ่ อาเง แพ๊.” โทเรอ ล๋อ อา โคเจ่ เต๊เห่ ปลวาแกลู เร๊อ เถ่แกล่ ตาพาแก ลอ ลูเหล่.

แกแยยิวพู๊ ทวาดุทวาเต เต๊เห่ แด๊เฮอ เจแม๊ เหย่ซู่

(มาระโก ๑๔:๕๓-๖๕, ลูกา ๒๒:๕๔-๕๕, ๒๒:๖๓-๗๑, ยอห์น ๑๘:๑๓-๑๔, ๑๘:๑๙-๒๔)

57แกแย เด๊อ อา แฮปื่อ เหย่ซู่ เออเต๊เห่เนอ, อา ปื่อกา ลู เด๊อ เพรหลู่แต กู่กล๊อดุเล๊อ เพคายาฟาส เฮ๊เออ เตเพรเนอ อาหี่. เบ๊อะเนอ หม่า เพร อิซว๊า เตซว๊าเตแส่ อาซ๊าร๊า เต๊เห่ เร๊อ แกแยยิว เตจ๊อบู่จ๊อเบ โหมะพรู โหมะเผระ เต๊เห่ โอ่ปล๊อ ลอเฮ๊อ ลู เบ๊อะเนอ. 58เปโตร ครวาจว๊า ช๊าเน๊ เกอ แพ๊ แบ่เจ่ เหย่ซู่. อา จว๊า โนโต่เกอ เด๊อ เพรหลู่แต อากู่กล๊อ ดุเล๊อ เออเตเพร เบ๊อะอาเกเร๊กูเร๊อ อา โน โอ่แน เต่อเกอ เร๊อ เกลอฮู๊ เด๊อ อา โอ่ป่อ เตเกหนิเนอ เต๊เห่. เร๊อ คูเปโตร โอ่ป่อแม๊ เร๊อ อู เกเร เด๊อะเฮอ เจแม๊ แคร๊ แบ่เจ่เหย่ซู่ ฮู๊เต ปา, ฮู๊เนอ.

59แซ่ฮู๊ เหย่ซีเก่ เมจากาคยา เมเซอแก หนิ เหย่ซู่ อาเงเนอเรอ, เพรหลู่แต ทวาดุทวาเต เต๊เห่ เร๊อ แกแยยิวพู๊ โอ่ เร๊อ อาเตอเรอฉว่าชอ เล๊ออู เต๊เห่ แม๊ปู แลแค อาเหล่เกแหล่โฮ เหย่ซู่ อาเตซื๊อ เต๊เห่. 60แกแย ข่า เด๊อะโล แลโฮแลแห่ เอ๊โล ลูเตซื๊อ ตื๊อดื่อเรอ อากู่กล๊อดุกู๊ฉู่ทู เต๊เห่ แม๊เถอะเน๊อ อา เก่ ลูเตซื๊อ เออเต๊เห่เนอ อา ตาเตโต่.

เด๊อคยาตื๊อดื่อเร๊อ แกแย ซิเนอ แฮเถ่ เร๊อ อา เฮ๊ เนอ, 61“แกแย เออเตเพรเนอ อา เฮ๊ เน๊อ, ‘แว เมตาพรอแก จอแปแหร่ เตหลู่แตโฮเออ เร๊อ โซเนอ อากู แว อิช๊อแถ่เบ๊ คยาแพ๊,’ อาเฮ๊ฮู๊เนอ” ^k

62โทเรอ เพรหลู่แต กู่กล๊อดุเล๊อ เตเพร ก๊อถ่อ เร๊อ แด๊เฮอ เหย่ซู่ เน๊อ, “เน เฮ๊ กาคยาฉื่อ อู แฮแด่ เน เตซื๊อ เออเต๊เห่ ตือมื๊อ โต่ เมเต? อู แฮเก่แฮยูลอ เน เตซื๊อ เออเนอหมา เน หนิโฮ โต่ แอ?” 63หม่าแน๊เรอ อา แด๊ต๊ากลว่า แพ๊. เพรหลู่แต กู่กล๊อดุเล๊อ เนอเตเพร เฮ๊ เน๊อ, “แว แบ แวโหง่ เร๊อ จอแปแหร่ เด๊อ อา เซอเพร เออเตเพร เร๊อ แว เก่ แด๊เฮอ เน, เน หม่า เมสิยาห์ หม่าเฮ๊อ จอแปแหร่ อาพู๊ เนอเตเพร หม่าแหน่ ฮ๊อแอเนอ, เฮ๊เป่แม๊เป.”

64เร๊อ แบ่เจ่ เหย่ซู่ เฮ๊ฉื่อ ลู เน๊อ, “อ่อ, เน เฮ๊เนอหม่า อาหม่า, หม่าแน๊เรอ แว เก่ เฮ๊เป่ ลอ ซี ปว๋า เตเพร เร๊อ เนอปาเนอ ซี เก่ แม๊เถอะ แกแย อาพู๊คู เก่โอ่แน เด๊อ จอแปแหร่ อาเตโพร เตเตอเรอฉว่าชอ ฉว่าชอเล๊ออู เออเตเพร อากู๊ขุ จ๊อทว๊า เนอตากยา ปา. โทเรอ แว แถ่แฮ อ๊อโหล่ ปาเนอ ซี เก่ แม๊เถอะปา.” ^l

65เออโตโพ๊เรอ เพรหลู่แต กู่กล๊อดุเล๊อ เออเตเพร ท๊อเย อาจา เร๊อ อา เฮ๊ เน๊อ, “อา เฮ๊ซื๊อเฮ๊อ จอแปแหร่ เฮ๊อ. เป จว๊าโหล่โต่ปา เพรข่าเฮ๊โล เต๊เห่ ฮู๊เต? แม๊มอ แลแค, ซี หนิโฮ แลแค เฮ๊อ อา เฮ๊เบ่ซื๊อ จอแป แหร่ เร๊ออาเหน่ เจ๊อเฮ๊อ. ^m 66ซี เตเน ฮู๊เต?”

เร๊อ เหย่ซี เฮ๊ฉื่อ แลแค เน๊อ, “อา โต๋ เซอ แหน่เฮ๊อ,” ฮู๊เนอ.

67โทเรอ เหย่ซี ถู่ปล๊า ลูเป๊เส่, มือลู, ปลู๊ ลู, เต๊เห่เห่ เร๊อ อา แปล่ ลู. ⁿ 68เร๊อ เหย่ซี เฮ๊ ลู เน๊อ, “เก๊อ ครี๊, เฮ๊โพร เป่ แม๊ เป, หม่าอูเป มือ เนเป?”

คูเปโตร โชโม๊บิแก เหย่ซู่

(มาระโก ๑๔:๖๖-๗๒, ลูกา ๒๒:๕๖-๖๒, ยอห์น ๑๘:๑๕-๑๘, ๑๘:๑๕-๒๗)

69เบ๊อะเนอโตโพ๊ เปโตร โอ่แนโอ่ เด๊อ เกเร๊กู เร๊อ หลู่เล๊ เพรเหมาะพู๊ เตเพร แฮโต เด๊อ ลูโอ่ เร๊อ อา เฮ๊ ลู เน๊อ, “เน หม่า ตู๊หมู่มู๋แพ๊ ลูเน๊อ แกแยกาลิลีพู๊ เหย่ซู่ เนอเตเพร แพ๊ว๊า.”

70หม่าแน๊เรอ เปโตร โชโม๊บิแก ลอ เหย่ซี เบ๊อะเนอ เต๊เห่ เร๊อ อา เฮ๊ เน๊อ, “แว โอ่เต่อ เกอ โต่. เพรเหมาะ เออเตเพร เฮ๊ เออเนอหมา แว ซิเงน๊อ เกออา โต่.”

71โทเรอ อา เถ่จว๊า เด๊อ กู่ดาดุทือ เร๊อ เพรแรเต เพรเหมาะ เด๊อ อาโรเตเพร แม๊เถอะ ลู เร๊อ อา เฮ๊ เป่ อู เบ๊อะเนอ เต๊เห่ เน๊อ, “เออเตเพร หม่า อา ครวาเกอ เร๊อ วีนาซาเร็ธอาพู๊ เหย่ซู่ ครี๊ เนอ เตเพร ว๊า”

72อา โชโม๊บิแก โป่แซ๊ เร๊อ อา แบ อาเหน่ เน๊อ, “แว ซิเงน๊อ ลู โต่”

73เด๊อคยา เตอเปลอฮู๊ เร๊อ แกแย ก๊อถ่อ ตีวี๊ตาวา ผื่อ เบ๊อะเนอ เต๊เห่ แฮโต คูเปโตร เร๊อ อา เฮ๊ ลู เน๊อ, “เน หม่า อาโคฮู๊เจ่ เตเพร หม่าแหน่ เจ๊อ เฮ๊อ, เน เฮ๊เบ่ ตาลา เนอ อา แซ่ กาลิลี ตาลา เจ๊อ.”

74เออโตโพ๊เรอ คูเปโตร เป๊อแถ่ แบแลหนิ อาเหน่ เด๊อ จอแปแหร่ เบ๊เง เร๊อ อา เฮ๊ เน๊อ, “แกแย เออเตเพร หม่า แว ซิเงน๊อ ลู โตโพ๊ โต่.”

อา เฮ๊โทโท เนอ ชาเพ อี๊อู่แถ่ 75คูเปโตร เตเนแถ่ โต่เบ่ แบ่เจ่ เหย่ซู่ เฮ๊หนื่ออื่อแก ลู โหง่ เน๊อ, “เบ๊อะชาเพ อี๊อู่แถ่ แต่ล๋ายโต่ เคเนอ, เน เก่ โชโม๊บิแก อู เร๊อ แว ซิเงน๊อ อา โต่ โซโพ๊ ปา,” อาขว่าอาคยา, อา เถ่จว๊า เด๊อ อากลอ เร๊อ อา จว๊า โหง่เซอโหง่โอ่ เจ๊อ.