Matthew 27

เหย่ซี เอ๊จว๊า เหย่ซู่ เด๊อ คุ๊ยปีลาต อาโอ่

(มาระโก ๑๕:๑, ลูกา ๒๓:๑-๒, ยอห์น ๑๘:๒๘-๓๒)

1อาโหน่โตโร เหมาะลี โรมื่อ เบ๊อะเนอ, ล๋อ เพรหลู่แต ทวาดุทวาเต เต๊เห่ เร๊อ แกแยยิวพู๊ กู่กล๊อดุ โหมะพรู โหมะเผระ ทวาดุ แฮ โอ่กู๊โอ่แก๊ ลอ ลู เร๊อ เหย่ซี เก่ เมเซอ เหย่ซู่. 2เหย่ซี จอกลอ เร๊อ แบ่เจ่ เหย่ซู่ เร๊อ อา จุ่ยจว๊าแก ลู เด๊อ คุ๊ยปีลาต อา โอ่ เร๊อ อา จว๊าเด๊อะตาแก ลู เด๊อ อา กู๊ยากู.

คูยูดาส อิสคาริโอท เซอแก

(เพรโด่แนพู๊ เต๊เห่ ๑:๑๘-๑๙)

3เบ๊อะคูยูดาส เด๊อ อา อิเชตาแก ลู เนอเตเพร แม๊เถอะ เด๊อ อู แด๊เฮอเจแม๊ เมเซอ แบ่เจ่ เหย่ซู่ เบ๊อะเนอ, อา ซิเปลซิหย่อ แหน่เจ๊อ เร๊อ อา แฮ เด๊อะดว๊า คยาแซ๊ รือหย่าเออ โซเชอ เด๊อ เพรหลู่แต ทวาดุทวาเต เต๊เห่ อา โอ่ เนอ แกแยยิวพู๊ โหมะพรูโหมะเผระ เต๊เห่ อา โอ่. ^a 4เร๊อ อา เฮ๊ เหย่ซี เน๊อ, “แว เมซื๊อเฮ๊อ จอแปแหร่ เฮ๊อ, เมเตเฮ๊เรอ แว อิเชแกเฮ๊อ แกแย เด๊อ อา เตซื๊อโอ่ เตอเจ๋อ โต่ เออเตเพร เฮ๊อ”

เร๊อ เหย่ซี เฮ๊ฉื่อ กาคยา ลู เน๊อ, “เน ข่า เร๊อ เหน่ดื่อฮ๊อ เป ซิเง โต่เกอ เน โต่”

5เร๊อ คูยูดาส เว๊อตาแก รือหย่าเออ เบ๊อะเตหลู่แต โฮกู เนอ เร๊อ อา เถ่กาแก. โทเรอ อา เถ่จว๊า เด๊อ อาโร โต๊โผ่ เร๊อ อา จว๊า จอเซอแก อาเหน่.

6เพรหลู่แต ทวาดุทวาเต เต๊เห่ โถ่ ดว้าคยา รือหย่า เออเต๊เห่ เร๊อ อา เฮ๊ แลแค เน๊อ, “เก่ พย๊า รือหย่าเออ เป เก่ ฉู่โนเต่อ เด๊อ เตหลู่แเตโฮ รือกู เฮ๊หม่า, อาโต เร๊อ เป ยูดาห์ อาเต เตซว๊าเตแส่ โต่, เมเตเฮ๊เรอ รือ เออเนอหม่า อู เด๊อะ เน๊อ เหล่เมเซอ แกแย แพ๊.” 7เหย่ซี แด่แล แลแค อาซิปล่อ เนอ อา เก่ พรี เร๊อ เพร แบ๊ดีปอ เตเพร อาเห่ขุ เต๊เหล่ เร๊อ เหย่ซี อา แด่ เป่ เร๊อ แกแยยิวพู๊ หม่าโต่ เต๊เห่ อาโลขุ. 8ฮู๊เนอ อาขว่าอาคยา, เห่ขุ เบ๊อะเนอ โต๊โผ่เนอ อู เอ๊ เร๊อ เห่ขุสุ่ย, โต่กู๊แหน่. 9เพรโพร เยเรมีย์ อา เตเฮ๊หนื่ออื่อ เออเนอ อา เล๊อแถ่บาแถ่ เฮ๊อ, “เหย่ซี พย๊า รือหย่า โซเชอ เร๊อ อิสราเอลพู๊ เต๊เห่ เฮ๊ ลู เนอ, เป แด่ ลู อางู บ๊าเออ หม่า อา โตเฮ๊อ. 10รือหย่า เนอเต๊เห่เนอ เร๊อ เหย่ซี อาพรีเร๊อ เพรแบ๊ดีปอ อาเห่ขุ เต๊เหล่ ฮู๊ แบ่เจ่ นอพรี แวเนอ.” ^b

คุ๊ยปีลาต แด๊เฮอ เหย่ซู่

(มาระโก ๑๕:๒-๕, ลูกา ๒๓:๓-๕, ยอห์น ๑๘:๓๓-๓๘)

11เบ๊อะเนออาเค เหย่ซู่ ก๊อถ่อ โอ่เด๊อ คุ๊ยปีลาต อาเป๊เส่เง เร๊อ อา แด๊เฮอ ลู เน๊อ, “เน หม่า แกแยยิวพู๊ อาคุ๊ย เตเพร หม่าแหน่ แอ?” เร๊อ อา เฮ๊ฉื่อ คุ๊ย เน๊อ, “อ่อ, อา หม่าแหน่ ฮู๊ เน เฮ๊เนอ เฮ๊อ”

12เบ๊อะเพรหลู่แต ทวาดุทวาเต เต๊เห่ เนอ แกแยยิวพู๊ โหมะพรูโหมะเผระ เด๊อ อา ทวา ทวาดุทวาเต เต๊เห่ เก่ ลู เตซื๊อ เบ๊อะเนอ, แบ่เจ่ เฮ๊ กาคยาฉื่อ ตือมื๊อ โต่. 13คุ๊ยปีลาต แด๊เฮอ ลู เน๊อ, “อู เก่ ลอ เน เร๊อ เน เมซื๊อเมปล๊า ฮู๊เออ ฮู๊เนอหม่า เน หนิโฮ โต่ แอ?” 14หม่าแน๊เรอ แบ่เจ่ เหย่ซู่ เฮ๊กาคยาฉื่อ ลู โหง่ ตือมื๊อ โต่ อาขว่าอาคยา, คุ๊ย อาคย๊าอายื๊อ แหน่เจ๊อ.

เหย่ซี เฮ๊ปลื๊อแก โหง่ เด๊อ อา เก่ เมเซอ แบ่เจ่.

(มาระโก ๑๕:๖-๑๕, ลูกา ๒๓:๑๓-๒๖, ยอห์น ๑๘:๓๙-๑๙:๑๖)

15คุ๊ยอาเหล่โกล โอ่ เนอ ปวาหน่าหน๋า เตจว๊าตาลว๊าป่วย ตา เบ่ เฮ๊อ เฮ๊เนอ, แกแย เบ๊หมู่ เต๊เห่ เก่ นว๊าเถ่ แกแยจา เด๊อ อู ด๊อตา ลู เด๊อะ ทอกู เนอเต๊เห่ เตเพร. เร๊อเหย่ซี นว๊าแถ่ เบ๊อะเตเตเพร เตเพรเบ่ คุ๊ย ปลวาเถ่ เหย่ซี แพ๊.

16เบ๊อะเนออาเค อู ด๊อตา แกแย มีลาดุ เด๊อ อามู๊แหม่ เร๊อ อามุย เร๊อ คูบารับบัส โอ่เตเพร.

17เร๊อ เบ๊อะแกแย เบ๊หมู่ แฮโอ่ป่อ ลอ ลู เบ๊อะเนอ, เพคุ๊ยปีลาต แด๊เฮอ เหย่ซี เน๊อ, “ซี ซิหยื่อ นอปลวาเถ่ แว เบ๊อะเตเพรเต? หม่า ซี ซิหยื่อ นอปลวาเถ่ แว เด๊อ คูบารับบัส แอ? หม่าโต่หม่า เหย่ซู่ เด๊อ อู เอ๊ ลู เร๊อ ครี๊ เออเตเพรเนอ แอ? อา แด๊เฮอเหยีซี ฮู๊เนอ.”

18เมเตเฮ๊เรอ อา ซิเง โทเฮ๊อ เร๊อ เตจ๊อเบ ทวาดุทวาเต เต๊เห่ ซิเคว๊หนิ เกอเร๊อ เหย่ซู่ เร๊อ เหย่ซี แฮเด๊อะตาแก เหย่ซู่ เด๊อ ลูโอ่แพ๊.

19เบ๊อะคุ๊ยปีลาต โอ่แนโอ่ เด๊อ อาเหล่แด๊เฮอ เจแม๊ อู กู่ แกล๊แถ่อาโล เบ๊อะเนอ, อาเม นอแฮแด๊โฉ่ แกแยเต๊เห่ เร๊อ อา เวคุ๊ยปีลาต เร๊อ อา เฮ๊ เน๊อ, “จว๊าเมเบ่แต แกแย เด๊อ อาเตซื๊อ โอ่โต่ เออเตเพรเนอ ตีกี๋ แต่เหม่ นี๋, เมเตเฮ๊เรอ แว โอ่เมอแหม่ แร๊ เจ๊อ อาหรี่อาแก ตีกี๋ เจ๊อ โต่.”

20หม่าแน๊เรอ เพรหลู่แต ทวาดุทวาเต เต๊เห่ เร๊อ แกแยยิวพู๊ โหมะพรูโหมะเผระ เด๊อ อา ทวา ทวาดุทวาเต เต๊เห่เนอ, อา จว๊า อิลอ แกแย เบ๊หมู่ เต๊เห่ เร๊อ อา เก่ กุยเถ่ คูบารับบัส เร๊อ เก่ เมจากาคยา เซอแก เหย่ซู่.

21เร๊อ คุ๊ยปีลาต แด๊เฮอ เหย่ซี เน๊อ, “เออซิเนอ อาเกล ซี ซิหยื่อ นอปลวาเถ่แก แว เบ๊อะเตเพรเต?” เร๊อ เหย่ซี เอ๊โทแถ่ฉื่อ เน๊อ, “คูบารับบัส!” 22เร๊อ คุ๊ยปีลาต แด๊เฮอ เหย่ซี เน๊อ, “เก่ เมฮู๊เนอเรอ เหย่ซู่ เด๊อ อู เอ๊ ลู เร๊อ ครี๊ เออเตเพรเนอ แว เบ่ เม อา ฮู๊เต?” เร๊อ เหย่ซี เฮ๊ฉื่อ เน๊อ, “มือเซอ แถ่แก อา เด๊อ อี๊ถื่อดีเต่ลู เนอ.” อาเฮ๊ แลแค ฮู๊เนอ 23เร๊อ คุ๊ยปีลาต แด๊เฮอ เหย่ซี เน๊อ, “จว๊า มือเซอ แถ่แก อา เมเต? อา จว๊า เมซื๊อเมปล๊า แคร๊ อิเต?” เร๊อ เหย่ซี ลื๋อ เอ๊โทแถ่ฉว่าฉว่า เล๊อ โป่ เน๊อ, “มือเซอแถ่แก อา เด๊อ อี๊ถื่อดีเต่ลู เนอ” 24เบ๊อะคุ๊ยปีลาตแม๊เถอะ ซิเงเฮ๊อ เร๊อ อู หนิดา ปา ลู เตเฮ๊เบ่ โต่, โท๊โต่ แกแย เออเต๊เห่ เก่ เป๊อแถ่ เมตอปลอแลยอ ซู๊ซ๊า แฮเฮ๊อ อาขว่าอาคยา, อา พย๊า เทอกู๊จุ เร๊อ อา ซีปลีแก อากู๊ขุ เด๊อ แกแย เบ๊หมู่ อา เป๊เส่เง เร๊อ อา เฮ๊ เน๊อ, “แกแย เออเตเพร อาสุ่ยเนอ อา ตาเบ่ โต่เกอ ปา เด๊อ แวขุ โต่เฮ๊อ. ซี เร๊อ ซีดื่อเฮ๊อ.” ^c 25เร๊อ แกแย ล๋อ ปลี เฮ๊ฉื่อ เน๊อ, “อาสุ่ย เนอ นอแลเบ่ดื่อ เด๊อ เป เร๊อ เป่พู๊เป่เลอ เต๊เห่ อาขุ เนอ.” 26เร๊อ อา ปลวาเถ่แก เป่ เหย่ซี คูบารับบัส เร๊อ อา นอ เกลอฮู๊ เต๊เห่ เก่ มือ แบ่เจ่ เหย่ซู่ เร๊อ อิปลี๊ หรี่. โทเรอ อา เด๊อะตา เด๊อ เกลอฮู๊ เต๊เห่ อา กู๊ยากู เด๊อ อา เก่ จว๊า มือเซอแถ่แก แบ่เจ่ เหย่ซู่ เด๊อ อี๊ถื่อดีเต่ลู.

เกลอฮู๊ เต๊เห่ เมโตโมเต๊เก่ แบ่เจ่ เหย่ซู่

(มาระโก ๑๕:๑๖-๒๑, ยอห์น ๑๘:๒-๓)

27โทเรอ คุ๊ย อา เกลอฮู๊ เต๊เห่ เอจว๊า แบ่เจ่ เหย่ซู่ เด๊อ เกลอฮู๊โกล เหล่โอ่ เบ๊อะคุ๊ยโฮ เตเร๊กู เนอ เร๊อ เกลอฮู๊ เยโซซว๊า แฮโอ่ปล๊อ ตาวาลอ ลู.

28โทเรอ เหย่ซี โปล๊แก แบ่เจ่ เหย่ซู่ อาจา เร๊อ อา แซ๊แถ่ เป่ ลู จาจวา ลีล๊อซอ ตือปือ.

29โทเรอ เหย่ซี อี๊ขุ ตาวา ส่อแช๊เหมาะ แซ่เน๊อ กู๊โก่ เนอเรอ อา โก่แถ่ เป่ ลู. เหย่ซี นอปื่อ ลู อิแท๊ เด๊อ อากู๊ขุ จ๊อทว๊า ตากยา เร๊อ เหย่ซี แด๊งือแล เด๊อ ลู เป๊เส่เง เร๊อ อา เฮ๊ โตโมเต๊เก่. เม แลหวิแลวอ กู๊เนอ ลอลู เน๊อ, “เก๊อยูดาห์อาคุ๊ยดู๋, โอ่เซอเพร ม๊อเนอ ทูดื่อ นี๋!”

30เหย่ซี ถู่ปล๊า ลู เร๊อ ปลีเทอ, เหย่ซี พย๊า อิแท๊ เร๊อ มือโท มือแซ๊แซ๊ เจ๊อ เร๊อ ลู กู่กล๊อเจ๊อ.

31เบ๊อะเหย่ซี เมย๊อเมเล งยาโครโท ลู เนอ, อา โปล๊ ตาแก คยาแซ๊ จาจวาทู เนอตือปือ เร๊อ อา แซ๊แถ่ เต๊เปล่ เป่ คยาแซ๊ ลู เร๊อ อาจา เร๊อดื่อ เนอตือปือ. โทเรอ อา เอ๊เถ่จว๊าแก ลู เร๊อ อา เก่ จว๊า มือเซอแถ่แก ลู เด๊อ อี๊ถื่อดีเต่ลู.

เกลอฮู๊ เต๊เห่ มือเซอแถ่ เหย่ซู่ เด๊อ อี๊ถื่อดีเต่ลู

(มาระโก ๑๕:๒๒-๓๒, ลูกา ๒๓:๒๗-๔๓, ยอห์น ๑๙:๑๗-๒๗)

32เบ๊อะเหย่ซี เถ่จว๊า เบ๊อะเนอ, อา แม๊เถอะ แกแย ไซรีนพู๊ เด๊อ อามุย เร๊อ คูซีโมน เออเตเพร เร๊อ เกลอฮู๊ เต๊เห่ นอแย๊ ตื๊อดื่อ ลู เร๊อ เหย่ซู่ อี๊ถื่อดีเต่ลู.

33เหย่ซี จว๊า เด๊อ เหล่โอ่ โต๊โผ่ เด๊อ อู เอ๊ เร๊อ กลโกธา เฮ๊ เออเนอโต๊โผะ. (กลโลธา อาโหง่แลช๊า หม่า กู่กล๊อครุ๊ย เห่ขุ) 34เบ๊อะเนอ เคเนอ, เหย่ซี เด๊อะโอ ลู เทอแย เด๊อ อา โกล ซีแล๊เต่อ เร๊อ เตขุเข่ เต๊อเจ่อ เด๊ออู เอ๊เน๊อ, กอ เร๊อ เหย่ซู่ โปแม๊ โทเรอ อาซิโอโต่. ^d

35เบ๊อะเหย่ซี มือเซอ แถ่ โทเฮ๊อ เหย่ซู่ เด๊อ อี๊ถื่อดีเต่ลูเนอ, เหย่ซี เบพย๊า โหร่ลู เหย่ซู่ อาจาเต๊เห่. เร๊อ เหย่ซี บ๊อแลแค เตแบบุ๊ยเต๊อเจ่อ, เด๊อ อาเก่ ตาโต เบ๊อะเตเพรเนอ อาพย๊าแลแค แพ๊. ^e 36โทเรอ เหย่ซี โอ่แนตา แลแค เร๊อโอ่ป่อแม๊หนิเร๊อ เหย่ซู่. 37เด๊อ อา กู่กล๊อเท๊ เนอ, เหย่ซี ราแถ่โอ่ ลีแด่เตซื๊อ ต๊าหร่า เน๊อ, “อา หม่า เหย่ซู่, แกแยยิวพู๊ เต๊เห่ อาคุ๊ย” 38อู มือเซอแถ่ เต่อเกอ ลู เร๊อ แกแยมู๊แหม่แหย่เอ่อู ซิเนอ, เด๊อ จ๊อทว๊า เตเพร เด๊อ จ๊อจิ เตเพร. 39แกแย เด๊อ อา จว๊าผื่อ กาผื่อ แลแค เบ๊อะอาช๊า เนอเต๊เห่ เฮ๊เบ่ล๊า เฮ๊เบ่ เล เร๊อเนอตา แลแค อากู่กล๊อ, เป๊อเจ่ออิแช๊ เร๊อ อาเฮ๊แลแคลูเน๊อ, ^f 40“เน เฮ๊ เนอ เน เก่ เมตาพรอแก เตหลู่แเตโฮ เร๊อ โซเนอ อากู เน ช๊อแถ่ โทเบ๊ คยาแพ๊ เน เฮ๊ เนอแต๋. เมแลเปล๊ เกอ เร๊อมอ เนเหน่ แต๋. เน เก่ หม่าแหน่ จอแปแหร่ อาพู๊ เฮ๊เรอ เก๊ตามอ เด๊อ อี๊ถื่อดีเต่ลู เออเนอ แต๋.” ^g

41เพรหลู่แต ทวาดุทวาเต เต๊เห่ เร๊อ เพรอิซว๊า เตซว๊าเตแส่ อาซ๊าร๊า เต๊เห่ เร๊อ แกแยยิว โหมะพรู โหมะเผระ อา ทวาดุทวาเต เต๊เห่ เฮ๊เบ่ล๊า เฮ๊เบ่ เล แซ่เกอ ลอ ดื่อ ลู ฮู๊เนอ เนอ, 42“อา เมแลเปล๊ แจ่ อู ซิปล่อเซอเพร ตื๊อดื่อเรอ อา เมแลเปล๊ แจ่ หนิเกอเร๊อ อาหน่าโต่ ว๊า. อา หม่า อิสราเอล อาคุ๊ย แวเฮ๊โต่ นอเก๊ตา มอ อา เด๊อ อี๊ถื่อดีเต่ลูเนอ แต๋, เร๊อ เป หยื่อเอ่ เกอดื่อ กอกอ. 43อา หยื่อเอ่ จอแปแหร่ แวเฮ๊. จอแปแหร่ เก่ซิปล่อ โอ่เร๊อลู เฮ๊เรอ นอเมแลเปล๊กา มอลู กู๊แหน่เออเนอ กอกอ? เมเตเฮ๊เร๊อ อา เฮ๊ เด๊อะ อาเหน่ เน๊อ, ‘แว หม่า จอแปแหร่ อาพู๊คู เม’” ^h 44แกแย เพรมู๊แหม่แหย่เอ่อู เด๊อ อู มือเซอแถ่ เต่อเกอ เร๊อ เหย่ซู่ เออซิเนอเนอ, อา เป๊อเจ่ออิแช๊ เกอดื่อ ลู ฮู๊เนอเนอเฮ๊อ.

แบ่เจ่ เหย่ซู่ เซอ

(มาระโก ๑๕:๓๓-๔๑, ลูกา ๒๓:๔๔-๔๙, ยอห์น ๑๙:๒๘-๓๐)

45เป๊อแถ่ เบ๊อะเหมาะโถ่ จ๊อเรเน๊ เนอ เร๊อ อา โต่แฮ เด๊อ เหมาะกุ่ยตาแล โซมือ อากูเนอ, เก่ คี๊ตือรือ ตาลอ เจ๊อ เต๊เก่เล เจ๊อ. 46ผื่อผื่อ เบ๊อะเหมาะกุ่ยแล โซมือ เบ๊อะเนอ, เหย่ซู่ จ่าเพรอ เอ๊โทแถ่ เน๊อ, “เอลี, เอลี, ลามา สะบัก ธานี,” อาโหง่แลช๊า หม่า “แว จอแปแหร่, แว จอแปแหร่, เน วีแก แว เมเต?” ⁱ

47แกแย ก๊อถ่อโอ่ เบ๊อะเนอ เต๊เห่ หนิโฮ แลแค เหย่ซู่ เอ๊โทแถ่ ฮู๊เออ เร๊อ เหย่ซี เฮ๊ แลแค เน๊อ, “อา เอ๊โทแถ่เฮ๊อ เพรโพร เอลียาห์.”

48เบ๊อะเหย่ซี อาเกล เนอเตเพร, โตโพ๊โต อา แกล่จว๊าพย๊า แซ่เน๊อ แตแพ๊ เร๊อ อา จว๊าเจโน เด๊อ เทอแยฉ่า โซกู เร๊อ อา จอกลอหม่า เด๊อ เหว่เคอ เร๊อ อา โต๊โหล่แถ่ นอจุ๊ยโอ เร๊อ แบ่เจ่ เหย่ซู่. ^j 49ล๋อ อา โอ่แก เนอเต๊เห่ เฮ๊ ลู เน๊อ, “อา โอ่ ดื่อเฮ๊อ ฮู๊เนอ, เป โอ่ป่อแม๊ โก๊หลื่อ เตอเปลอฮู๊ โป๊, หม่า เป แม๊เถอะ ช๊าเหล่ เพรโพร เอลียาห์ แฮ เมแลเปล๊ ลู ปา แอ, หม่าโต่แอ,” อา เฮ๊แลแค ฮู๊เนอ.

50เบ๊อะแบ่เจ่ เอ๊โทแถ่ฉว่าฉว่า คยาแซ๊โป่ โตโพ๊ โทเนอ อาซิปล่อ เซอเพร เถ่จว๊าแก.

51เบ๊อะเนอเค อิเกบ่าดุ เด๊อ อู จ่อตาตือบี๊ เด๊อ เตหลู่แต โฮกู เนอต๊าบ่า แลยา แก๊แถ่แกแล ปลื๊อแก เนอกยา. เตเน่วท๊อดี โทเรอ หล่อ เต๊เห่ ลูแอ เพ๊ลอ. ^k 52โลกู เต๊เห่ ลูโมแถ่ ลอ เร๊อ แกแยบูโพ๊พู๊ เด๊อ อา เซอ โทเฮ๊อ เนอเต๊เห่ ก๊อถ่อเซอเพร กาคยา เอ๊ลา. 53เหย่ซี โอ่ เด๊อ โลกู เร๊อ เถ่กา. โทเรอ เด๊อ คยา เบ๊อะแบ่เจ่ เหย่ซู่ครี๊ เซอ ก๊อถ่อกาคยา โทเนอ เหย่ซี กา กาโน แลแค เด๊อ วีบูโพ๊ เยรูซาเล็ม อากู เร๊อ อู แม๊เถอะ โร๊ลู เหย่ซี. 54เบ๊อะโรมัน เกลอฮู๊เตเย กู่กล๊อ เออเตเพร เร๊อ แกแย เด๊อ อา โอ่ป่อแม๊เร๊อ เหย่ซู่โล เออเต๊เห่ แม๊เถอะ เตเน่วท๊อดี เร๊อ ล๋อ เตทวาแถ่ อาเหน่ เออเต๊เห่ เบ๊อะเนอ, เหย่ซี ซิอิเช เร๊อ อา เฮ๊ แลแค เน๊อ, “อา หม่า จอแปแหร่ อาพู๊ หม่าแหน่ แหน่ เฮ๊อ.”

55เพรเหมาะ เด๊อ อา โอ่ป่อ แม๊จว๊าจู เด๊อ อายา เต๊เห่ โอ่โหร่โอ่เอ๊ กู๊ลา เบ๊อะเนอ. เพร เหมาะ เนอเต๊เห่ หม่า อาโอ่ เด๊อ กาลิลีเก่ เรอ ครวา เกอ เร๊อ เหย่ซู่. เร๊อ เหย่ซี เออ เต๊เห่ หม่าเพรเหมาะ เด๊อ อา แม๊ตู่ เมจว่าหนิ เหย่ซู่ เต๊เห่ เฮ๊อ. ^l 56เด๊อ เหย่ซี เออเต๊เห่ อาเกลเนอ แกแย มักดาลา ดอกูโหมะ เหมาะมารี, คูยอกอบ เร๊อคูโยเซฟ อาโหมะ โหมะ มารีย์ เร๊อ คูเศเบดี อาพู๊ เต๊เห่ อาโหมะ.

เหย่ซู่ อา โคแบ๊ซว๊า เต๊เห่ อาโล๊หนิ ลู

(มาระโก ๑๕:๔๒-๔๗, ลูกา ๒๓:๕๐-๕๖, ยอห์น ๑๙:๓๘-๔๒)

57เบ๊อะเหมาะเฮ๊แล เฮ๊อ เบ๊อะเนอ, แกแยเพดุแหย่ โอ่ เด๊อ วีอาริมาเธีย เร๊อ อามุย เร๊อ คูโยเซฟ เฮ๊ เออเตเพร แฮโต่. อา หม่า อาทวา โทเฮ๊อ แบ่เจ่ เหย่ซู่ อา โคเจ่ เตเพร. 58อา จว๊า เด๊อ คุ๊ยปีลาต อา โอ่ เร๊อ อา จว๊ากูย เหย่ซู่ อาโล เร๊อ คุ๊ยปีลาต เฮ๊ตา อู เร๊อ อู เก่ เด๊อ เหย่ซู่ อาโล เออเนอ เร๊อ คูโยเซฟ. 59เร๊อ คูโยเซฟ จว๊าพย๊าตา โลเออ เร๊อ อา โบ่บี๊ ลู เร๊อ อิเกแบะปลีทู ต๊าบ่า. 60เร๊อ อู จว๊าฉู่โน ลู เด๊อ โลกูเซ ตูกู. โลกูเซ เออ ตูกู หม่า คูโยเซฟ อาเตเร๊อดื่อ. อา นอ ขื่อกู โน หนื่ออื่อ อู เด๊อ หล่อกู. อา ถู่ลอบี๊ โลกู เออเนอ เร๊อ หล่อดุ เตเม โทเรอ อา กาแก. 61แกแยมักดาลา ดอกูโหมะ มารีย์ เร๊อ มารีย์ เด๊อ อาโรเตเพร โอ่แนโอ่ ช๊าเน๊ เด๊อ โลกู อาเบ๊เง.

เกลอฮู๊ โอ่ป่อหม่าแร๊ เหย่ซู่ อาโลกู เต๊เห่

62ม๊อเนอแงเนอ หม่า ม๊อเนอ เด๊อ แกแยยิวพู๊ เต๊เห่ ตี๊หรี่แตแร โอ่หนื่ออื่อ เตล๋อ ปลี เด๊อช๊า ป๊าโร ม๊อเนอโด่ เนอเตอเนอ อาเง. ม๊อแงเนอ โท ช๊าป่าโร ม๊อเนอโด่ เออ เบ๊อะเนอ, เพรหลู่แต ทวาดุทวาเต เต๊เห่ เร๊อ ฟาริสี เต๊เห่ จว๊า แลแค เด๊อ คุ๊ยปีลาต อาโอ่. 63เร๊อ เหย่ซี จว๊า เฮ๊ ลู เน๊อ, “คุ๊ย, เป เตเนหม่า ปา เร๊อ เบ๊อะเพแลโฮดุ เนอเตเพร โอ่เซอ เพรปา เบ๊อะเนอ, อา เฮ๊ เน๊อ, ‘โซเนอโทปา เนอ, แว เก่ ก๊อถ่อเซอเพร กาคยา ปา,’ อาเฮ๊ฮู๊เนอ. ^m 64ฮู๊เนอเรอ เฮ๊ตา เกลอฮู๊ เต๊เห่ เร๊อ นอโอ่ป่อหม่า ตาเต บา อา โซเนอเนอ. ปาหม่า อา โคเจ่ เต๊เห่ แฮพย๊าโห่ เกอเร๊อ ลู เร๊อ อา จว๊า เฮ๊ เป่ อู เนอ อา ก๊อถ่อเซอเพร กาคยา เฮ๋อ, ฮู๊เนอเห่. ปาหม่า เตแหล่โฮ เด๊อ คยา เออ ตือมือ เนอ, ซิอิเช เน๊อ อาจา เล๊อ เน๊อ เต แหล่ โฮ เด๊อ อาเหร่อ เนอตือมือ เห่.”

65คุ๊ยปีลาต เฮ๊ฉื่อ เน๊อ, “เก่ เมฮู๊เนอเรอ เอ๊จว๊าหนิ แลแคเกลอฮู๊ เพรโอ่ ป่อ เนอเต๊เห่ เร๊อ จว๊า มอ แลแค. แอ๊จื๊อโอ่ ป่อ หม่า แร๊แร๊ แลแค บ๋า ซี โอ่ ป่อ เบ๊เป่ เนอ.” 66ฮู๊เนอเรอ แซ่ฮู๊ เหย่ซี เก่ เมหม่า เมกลอแร๊ โลกู เออ เร๊อ เหย่ซี จว๊าเกล๊ แถ่โล อาเตม๊าเตแด เต๊อเจ่อ เด๊อ โลกู ม๊าเท๊ลู, โทเรอ อานอ โอ่ ป่อหม่า หนิ เร๊อ เกลอฮู๊ เต๊เห่.