Matthew 28
แบ่เจ่ เหย่ซู่ เซอเพร กาคยา.
(มาระโก ๑๖:๑-๘, ลูกา ๒๔:๑-๑๒, ยอห์น ๒๐:๑-๑๐)
1เบ๊อะแกแยยิวพู๊ อา ม๊อเนอโด่ จว๊าตาลว๊า โทเฮ๊อ, เหมาะลี โรมื่อเหมาะคี๊ โป๊โหล่ เบ๊อะเนอ, แกแยมักดาลา ดอกูโหมะ เหมาะมารีย์ เร๊อ เหมาะมารีย์ เด๊อ อาโรเตเพร แฮแม๊ แลแค แบ่เจ่ อาโลกู. 2เร๊อ เตเน่วท๊อดี ฉว่าแหน่เจ๊อ, เมเตเฮ๊เรอ แบ่เจ่ อา เตเน่ว เตเพร โอ่ เด๊อ ม๊อขุ แฮแล ถู่ลอ ตาพาแก หล่อกู่ดา เนอ เตเม เร๊อ อา แฮ โอ่แนโอ่ เด๊อ หล่อ เนอเตเม อาขุ. 3อาเหน่กล่อ เร๊อ เตเค แซ่เจ๊อ เน๊อ ฉ่าลีบ๊อ เนอ เจ๊อ, โทเรอ อาจาเนอ อา บูแปล๊ แซ่เจ๊อ เน๊อ บูขุ แล เนอ เจ๊อ. 4เพรโอ่ป่อ เต๊เห่ แตแนตากยา ลอปลี เจ๊อ. เหย่ซี ซิอิเช ตาลว๊าซิลือ เร๊อ เหย่ซี แซ่ เจ๊อ เน๊อ แกแยเซอ เนอ เจ๊อ. 5เร๊อ ม๊อขุ เตเน่ว เฮ๊ เพรเหมาะ เออซิเนอ เน๊อ, “ซิอิเช แลแค แต่เหม่, เมเตเฮ๊เรอ ซี แม๊ปู เหย่ซู่ เด๊อ อู มือเซอแถ่ ลู เด๊อ อี๊ถื่อดีเต่ลู เนอเตเพร เนอหม่า แวซิเง. 6หม่าแน๊เรอ อา โอ่ปา เบ๊อะเออ โต่เฮ๊อ. ฮู๊ อา เฮ๊หนื่ออื่อ โทเฮ๊อ เนอ, อา ก๊อถ่อเซอเพร กาคยา โทเฮ๊อ. แฮแม๊มอ อา เหล่โอ่เมอ เออเนอ. 7แว เฮ๊ ซี๋, กาแด๊โฉ่ แพรมอ อา โคเจ่ เนอเต๊เห่ เน๊อ, ‘อา ก๊อถ่อเซอเพร กาคยา เฮ๊อ กู๊แหน่ เฮ๊อ, เร๊อ อา จว๊า โอ่หนื่ออื่อ เหร่อ เฮ๊อ ซี เด๊อ กาลิลี เก่กู เนอ เฮ๊อ. ซี เก่ จว๊าแม๊เถอะ อา เบ๊อะเนอ ปา,’ กู๊แหน่ เร๊อ แว แด๊โฉ่โล เป่ ซีโท เฮ๊อ” 8ฮู๊เนอเรอ เพรเหมาะ เออซิเนอ โอ่ เบ๊อะโลกู เนอ เร๊อ อา โต๊โปล่ตาปยา เถ่กา แลแค. เหย่ซี ซิอิเชเช, ซิครือครือ เจ๊อ เร๊อ อา แกล่กา แด๊โฉ่ เป่ แลแค อา โคเจ่ เต๊เห่. 9โตโพ๊โต แบ่เจ่ เหย่ซู่ แม๊เถอะ ตาฉื่อ เหย่ซี เร๊อ อา เฮ๊โมเฮ๊แร๊ฉื่อ เหย่ซี. เร๊อ เหย่ซี แฮโต แบ่เจ่ เร๊อ อา แฮ ปื่อหม่า ลู กู๊โด่ ตารา เร๊อ จ๊อบู่จ๊อเบแถ่ ลู. 10โทเรอ แบ่เจ่ เฮ๊ เหย่ซี เน๊อ, “ซิอิเช แต่ แลแค แต่เหม่. กาแด๊โฉ่ เป่ แลแค เปโป่ เปแหว่ เด๊อ อาหยื่อเอ่ เนอ, จว๊า แลแค เด๊อ กาลิลีเก่ เนอ, ซี เก่ จว๊าแม๊เถอะ แว เบ๊อะเนอ ปา, เฮ๊โฉ่ เป เหย่ซี ฮู๊เนอ นี๋”เพรโอ่ป่อ เต๊เห่ กาแด๊โฉ่โล เร๊อ แบ่เจ่ โอ่ ปาโต่เฮ๊อ
11เบ๊อะเพรเหมาะ เออเต๊เห่ กา เด๊อ แกล๊ลู เบ๊อะเนอ, เพรโอ่ป่อ โลกู เต๊เห่ กา โกโน โต่ลอ เฮ๊อ เด๊อ วีกู. เร๊อ อา เมแคร๋ ฮู๊เตเนอ, อา กา แด๊โฉ่โล เป่ เพรหลู่แต ทวาดุทวาเต เต๊เห่. 12เบ๊อะเพรหลู่แต ทวาดุทวาเต เต๊เห่ แม๊เถอะ ตาฉื่อ เร๊อ แกแยยิวพู๊ โหมะพรูโหมะเผระ เด๊อ อา ทวาดุทวาเต เต๊เห่ เบ๊อะเนอ, เหย่ซี เบ่ เม แลแค ฮู๊เต ปาเนอ อา ตี๊หรี่แตแร แลแค. โทเรอ เหย่ซี ข่าเด๊อะ เจ๊อ เกลอฮู๊ เต๊เห่ รือ ตูปลูเต๊เผ่ เร๊อ อา เฮ๊ เหย่ซี เนอ, 13“ซี โตเบ่ เฮ๊ แลแค ฮู๊เออ, ‘เบ๊อะเป โอ่เมอ ตาปา เบ๊อะเนอ, อา โคเจ่ เต๊เห่ แฮพย๊าโห่ กาแก ลู เฮ๊อ.’ เฮ๊แลแค ฮู๊เนอ นี๋. 14เตทวาแถ่เออเนอ, อา เก่ โลจว๊าโต เด๊อ คุ๊ยโอ่ ปา เก่ เฮ๊เรอ, แซ่ฮู๊ ซี เก่ ป่อชิเต่อ เตซู๊ซ๊าโต่เนอ, เป แม๊ เฮ๊ ดื่อปา” 15ฮู๊เนอเรอ เกลอฮู๊ เต๊เห่ พย๊า แลแค รือ เออเนอ เร๊อ อา เฮ๊ ฮู๊ เหย่ซี อิซว๊า ลูเนอ. โหง่ เออตือมือเนอ, แกแยยิวพู๊ เต๊เก่เล เฮ๊ เกอเร๊อ ลอ ฮู๊เนอ โต่กู๊แหน่ เจ๊อ.แบ่เจ่ เฮ๊เบ่ เร๊อ อา โคเจ่ เต๊เห่
(มาระโก ๑๖:๑๔-๑๘, ลูกา ๒๔:๓๖-๔๙, ยอห์น ๒๐:๑๙-๒๓, เพรโด่แนพู๊ เต๊เห่ ๑:๖-๘)
16เออโตโพ๊เรอ อา โคเจ่ เออ เช๊อเตเพร จว๊า แลแค เด๊อ กาลิลี โฉ่ขุ ฮู๊ แบ่เจ่ แด๊โฉ่ หนื่ออื่อแก เหย่ซี เนอ. a 17เบ๊อะเหย่ซี แม๊เถอะ อา แบ่เจ่ เบ๊อะเนอ, เหย่ซี จ๊อเบแถ่ ลู ตื๊อดื่อเรอ เต๊เห่เห่ เนอ อาซิปล่อ หร่าเหร่ ปา. 18เร๊อ แบ่เจ่ เหย่ซู่ แฮ เด๊อ เหย่ซี โอ่ เร๊อ อา เฮ๊ เหย่ซี เน๊อ, “เตอเรอฉว่าชอ เด๊อ ม๊อขุ เบ่เบ่, เด๊อ เห่ขุเออเนอ เบ่เบ่, อู เด๊อะ ลอเฮ๊อ เน๊อ แว เฮ๊อ. 19เมฮู๊เนอเรอ, แว เฮ๊ซี๋ จว๊า แลแค เด๊อ แกแย เมว เจ่อ เต๊เห่ อาโอ่, เร๊อ จว๊า เมทวาแถ่ เหย่ซี เน๊อ แว โคเจ่ นี๋. จว๊า เจ เป่ แลแค เหย่ซี เทอ เร๊อ เพ อามุย, พู๊คู อามุย เร๊อ แหย่โยบูโพ๊แบ่เจ่ อามุย นี๋. b 20โทเรอ อิซว๊าอี๊แส่ แลแค เหย่ซี เน๊อ อา เก่ จูเอ่ ครวาเม ลอฮู๊ แว เฮ๊ แก ซีโหง่ เนอเต๊เห่ นี๋. แว เก่ โอ่เต่อเกอ เร๊อ ซี ปว๊า โพ๊ เจ๊อ ปา, โต่ เจ๊อ เด๊อ เห่ขุ ตื๊อดื่อแก เจ๊อปา เบ่เบ่, แว เก่ โอ่ เกอ เร๊อ ดื่อซีปา.”
Copyright information for
EkySCThai