Matthew 4

โลเน๊มู๊แหม่ กู่กล๊อ อิลออี๊โหล่ แบ่เจ่ เหย่ซู่

(มาระโก ๑:๑๒-๑๓, ลูกา ๔:๑-๑๓)

1แซ่ฮู๊ โลเน๊มู๊แหม่ กู่กล๊อ เก่ อา อี๊ลอ หนิ เหย่ซู่ เร๊อ, แหย่โยบูโพ๊ แบ่เจ่ ซูจว๊า ลู เด๊อ เก่เชเทอแก หล่อตาม๊าขุ. ^a 2เหย่ซู่ แค๊เอ่ดี เนอลุยเชอ เซลุยเชอ โทเรอ อา แลแด๊ ซิเอ่ซิโอ. 3เบ๊อะเนออาเค โลเน๊มูแหม่ กู่กล๊อ แฮ เด๊อ ลูโอ่ เร๊อ อา เฮ๊ ลู เน๊อ, “เน เก่ หม่า จอแปแหร่ อาพู๊ เตเพร เฮ๊เรอ, นอตาหล่อ เออเต๊เห่ เร๊อ นอทวาแถ่ อา เร๊อ ค๊อมู เนอ.”

4หม่าแน๊เรอ เหย่ซู่ เฮ๊ ลู เน๊อ, “ลีเทส่อพ๊า เฮ๊ฮู๊เออ, ‘แกแยเห่ขุพู๊ เซอเพร ตื๊อแพ๊ เน๊อ เหล่เอ่เหล่โอ เนอ หม่าโต่. แซ่ฮู๊ แกแยเห่ขุพู๊ เก่ เซอเพร อาเงเนอ, ล๋อ จอแปแหร่ เฮ๊เบ่โหง่ เนอเต๊เห่ หม่า อา โหล่ เกอ ดื่อดื่อ.’” ^b

5โทเรอ โลเน๊มู๊แหม่ กู่กล๊อ เอ๊จว๊า เหย่ซู่ เด๊อ วีเยรูซาเล็ม วีบูโพ๊ เร๊อ อา นอจว๊าแถ่โอ่ ลู เด๊อ เตหลู่แตโฮ อา กู๊โก่ขุ แถ่โลเล๊อ โต๊โต่. 6เร๊อ อา เฮ๊ ลู เน๊อ, “เน เก่ หม่า จอแปแหร่ อาพู๊ เตเพร เก่เฮ๊เรอ, อี๊ฉ่าตามอ! เมเตเฮ๊เรอ, ลีเทส่อพ๊ากู เฮ๊ เน๊อ,
‘จอแปแหร่ นอ แม๊ตู่ ตอกอเตเกหนิเกอเร๊อ เน เร๊อ อา เตเน่วม๊อขุ เต๊เห่ เนอปา. เร๊อ แซ่ฮู๊ เน กู๊โด่ เก่ ต่าเบ่ เร๊อ หล่อ เตเม เนอ, เหย่ซี เก่ แพ๊แถ่ฉื่อดื่อ เน ปา.’” ^c

7เหย่ซู่ เฮ๊ฉื่อ ลู เน๊อ, “ลีเทส่อพ๊า เฮ๊โป่ เน๊อ, ‘เน เบ่ ทื๊อแม๊หนิ เน แบ่เจ่ จอแปแหร่ โต่.’” ^d

8โลเน๊มู๊แหม่ กู่กล๊อ เอ๊จว๊า โป่แซ๊ ลู เด๊อ โฉ่แถ่โล เตเม อาลู, เร๊อ อา เด๊อะโล ลู เร๊อ เทอเก่ ปว๊าเต๊เก่ เด๊อ เห่ขุเออ เร๊อ อา เตลีเตเค เร๊อ อา เตดุแหย่แถ่เซ เต๊เห่. 9โลเน๊มู๊แหม่ กู่กล๊อ เฮ๊ เหย่ซู่ เน๊อ, “เน เก่ แด๊งือจ๊อเบ แว เก่เฮ๊เรอ, ล๋อ เออเต๊เห่เนอ แว เก่ เด๊อะลอ เร๊อ เน ปา.”

10โทเรอ เหย่ซู่ เฮ๊ ลู เน๊อ, “โลเน๊มู๊แหม่ กู่กล๋อ! จว๊า ตาพายาแก ลีเทส่อพ๊า เฮ๊ เน๊อ, ‘จ๊อเบแถ่ ตื้อแพ๊ เน แบ่เจ่ จอแปแหร่ เร๊อ เมแพ๊ตื้อ อาเตเม แพ๊ นี๋,’” ^e อา เฮ๊ ฮู๊เนอ.

11โลเน๊มู๊แหม่ กู่กล๊อ เถ่จว๊าแก โท ลูเหล่ เน๊อ, ม๊อขุ เตเน่วพู๊ เต๊เห่ แฮแม๊ตู่ เมจว่า เกอเร๊อ ลู.

เหย่ซู่ เป๊อแถ่ เม อา แรเต เด๊อ กาลิลีเก่

(มาระโก ๑:๑๔-๑๕, ลูกา ๔:๑๔-๑๕)

12เบ๊อะเหย่ซู่ หนิโฮ เร๊อ อู ปื่อด๊อตา คูยอห์น เด๊อ ทอกู ▼

▼เต๊เห่เห่ เร๊อ อา เฮ๊ เร๊อ โปกู.

เฮ๊อ เบ๊อะเนอ, อา เถ่กาแก เด๊อ กาลิลีเก่. ^g 13อา เถ่จว๊าแก เร๊อ วีนาซาเร็ธ เร๊อ เด๊อคยาเนอ อา จว๊า โอ่เด๊อ วีคาเปอรนาอูม เด๊อ อา โอ่ผื่อ เร๊อ กาลิลี เทออ่อดุ อาช๊า เนอ ตีวี. เหล่โอ่ เบ๊อะเนอ โต๊โผ่ หม่า อา โอ่ผื่อ เร๊อ เศบูลูนเก่ เร๊อ เห่ขุนัฟทาลีเก่. ^h 14เออ หม่า อา เมเล๊อเมบาแก เฮ๊อ เพรโพร อิสยาห์ อา เตเฮ๊หนื่ออื่อ เน๊อ,

15“เก๋อ กาลิลี เก่โหมะดุ เด๊อ แกแยยิวพู๊ หม่าโต่ เต๊เห่ โอ่ เกอเร๊อ เฮ๊อ, เศบูลูนเก่ เร๊อ นัฟทาลีเก่, เด๊อ อา โอ่ เด๊อ เทออ่อดุทือ เต๊เห่, เร๊อ เทอ แลโหมะจอร์แดน อาเทอแล แบ๊เร เต๊เห่, ล๋อ ปลี ซี๋, ⁱ 16แกแย เด๊อ อา โอ่ เด๊อ เตซื๊อ อา เตคี๊ ลอ อาเล ซี๋, ซี แม๊เถอะเฮ๊อ เตลีเตเค ดุ เฮ๊อ. แกแย เด๊อ อา โอ่ เด๊อ เตเซอเตเหม่ อาคี๊เล ซี, เตลี ช๊าเตเค ตาเฮ๊อ ซี เฮ๊อ.” ^j

17ตาเป่แฮ เบ๊อะเนอเรอ เหย่ซู่ เป๊อแถ่ แด๊โฉ่โด่แน เป่ อู เน๊อ, “ถู่แหล่แต๊แกละ แลแค ซีซิปล่อ, เมเตเฮ๊เรอ ม๊อขุ อาเทอ อาเก่ ผื่อแถ่เฮ๊อ.” ^k

เหย่ซู่ เอ๊ครวาหนิ เพรเมเอ่ เต๊วฮู๊ ซิลุย

(มาระโก ๑:๑๖-๒๐, ลูกา ๕:๑-๑๑)

18เบ๊อะเหย่ซู่ จว๊า รว๊า กาลิลี เทออ่อทือ เบ๊อะเนอ, อา แม๊เถอะ โป่ เร๊อ แหม่ ซิเนอ เตเพร เร๊อ อามุย เร๊อ คูซีโมน โต่เรอ อู เอ๊ ลู เร๊อ คูเปโตร, เร๊อ อาโป่ คูอันดรูว์. เบ๊อะเนอโตโพ๊ เหย่ซี อาจว๊า วีเอ่ เต๊ว เร๊อ ตีวี เด๊อ เทอ อ่อทือ, เมเตเฮ๊เรอ อา แม๊ปูเอ่ แลแค แพ๊ อาฮ๊อกูเฉ่ เร๊อ เต๊ว แพ๊. 19เร๊อ แบ่เจ่ เฮ๊ เหย่ซี เน๊อ, “จว๋า, ครวา เกอแวคยา. แซ่ฮู๊ ซี เก่ เอ๊หนิ แกแย ฮู๊ ซี ปื่อเอ่ หนิ เต๊วเออ เนอ, แว เก่ อิซว๊าอี๊แส่ เกอเร๊อ ซี.” 20ตื๊อหื่อโต เหย่ซี แด่แก อา ตีวี เร๊อ อา ครวาจว๊าเกอ ลูคยา.

21แบ่เจ่ จว๊าเป่แฮ โป่ เด๊อ เง ตี๊กิแพ๊ เร๊อ อา แม๊เถอะ โป่ โป่เร๊อแหม่ ซิเนอ เด๊อ อามุย เร๊อ คูยากอบ เร๊อ คูยอห์น. เหย่ซี หม่า เศเบดี อาพู๊. เหย่ซี โอ่แนเต่อ เร๊อ อาเพ เด๊อ ส่อเกลอกู เร๊อ เช๊รี เกอเร๊อ อา ตีวี เต๊เห่. เร๊อ แบ่เจ่ เอ๊ครวา เหย่ซี. 22ตื๊อหื่อโต เหย่ซี แด่แก อาส่อเกลอ เร๊อ อาเพ เร๊อ อา ครวาจว๊าเกอ เหย่ซู่ อาคยา.

เหย่ซู่ แหย่โอ่เหม่ เตชุ๊ยเตเช.

(ลูกา ๖:๑๗-๑๙)

23เหย่ซู่ เลจว๊า ลอ กาลิลี เต๊เก่เล เร๊อ อา เลจว๊า อิซว๊าอี๊แส่ อู เด๊อ เตจ๊อเบ โฮกู ปว๋า โต๊โผ่. อา แด๊โฉ่โด่แน เป่ แกแยยิวพู๊ เต๊เห่ เร๊อ จอแปแหร่ อาเทอ อาเก่ เตซิครือมีลา อาหรี่อาแก. เร๊อ อา แหย่โอ่เหม่ เป่ ลอ อู เตชุ๊ย ปว๊าโตเมว เตเช ปว๊าเต๊อเจ่อ. ^l 24แบ่เจ่ อามุย โลปีชี จว๊าลอ ซีเรียเก่ เต๊เก๋เล อาขว่าอาคยา, อู เอ๊แฮ แกแย เด๊อ อา เบ่ เตชุ๊ยเตเช ปว๊าเต๊อเจ่อ เด๊อ ลูโอ่. เร๊อ อู เอ๊แฮ แกแย เด๊อ อา เชจาเชจือ ลูเหน่ เต๊เห่, โลเน๊โลหน่า เมเบ่ ลู เต๊เห่, อา ตีมุยแท๊ ซี เต๊เห่, เร๊อ อา เซอชิกยา ซี เต๊เห่ เด๊อ อา โอ่ เร๊อ อา แหย่โอ่เหม่ ลอเป่ อู ปว๋า เตเพร. 25แกแย โอ่โหร่ โอ่เอ๊ โอ่เด๊อ กาลิลีเก่, เน๊อ วีเช๊อ โอ่ปล๊อจือ เต่อลู เด๊อ อู เอ๊ เร๊อ เดคาโปลิส, เน๊อ วีเยรูซาเล็ม, เร๊อ ยูดาห์เก่, เร๊อ แกแย โอ่เด๊อ เทอแลโหมะจอร์แดน เทอแล แบ๊เร เต๊เห่ ครวาปลูครวาเผ่ เกอ ลอ ลูคยา.