Matthew 5

เตโด่แน เด๊อ โฉ่ขุ

(ลูกา ๖:๒๐-๒๓)

1เบ๊อะแบ่เจ่ เหย่ซู่ แม๊เถอะ เร๊อ แกแย เบ๊หมู่ เต๊เห่ เบ๊อะเนอ, อา จว๊าแถ่ โอ่แนโอ่ เด๊อ โฉ่ลู. เร๊อ อา โคเจ่ เต๊เห่ แฮ เด๊อ ลูโอ่. 2เร๊อ อา เป๊อแถ่ อิซว๊า เหย่ซี เร๊อ อา เฮ๊ เน๊อ,
3“แกแย เด๊อ อา ซิเลแถ่ หนิ ตื๊อแพ๊ จอแปแหร่ เด๊อ เตล๋อ ปลี เออ เต๊เห่เนอ, อา พย๊าหนิ เตเด๊อะบุ๊ยเด๊อะเตอเรอ. เมเตเฮ๊เรอ ม๊อขุ เทอเลเก่กู เนอหม่า แกแย ฮู๊เนอ เต๊เห่ อาเต เฮ๊อ.
4แกแย เด๊อ อาโหง่อาเห่ ซี เต๊เห่เนอ, อา พย๊าหนิ เตเด๊อะบุ๊ยเด๊อะเตอเรอ. เมเตเฮ๊เรอ จอแปแหร่ เก่ อิลออี๊ เหย่ซี ปา. ^a

5แกแย เด๊อ อา ซิโดซิงา เร๊อ อา แด่หยว่า อาซิปล่อ เต๊เห่เนอ, อา พย๊าหนิ เตเด๊อะบุ๊ยเด๊อะเตอเรอ. เมเตเฮ๊เรอ เห่ขุ เออต๊าบ่าเนอ, อา เก่ ทวาลอ ลูเต ปา. ^b

6แกแย เด๊อ อา ซิหยื่อ หม่าแหน่ อาจ๊ออาเต เต๊เห่เนอ, อา พย๊าหนิ เตเด๊อะบุ๊ยเด๊อะเตอเรอ. เมเตเฮ๊เรอ อา เก่ พย๊าหนิ อาก๊อ อาบาลอ เตจ๊อ เตเต เด๊อ อา ซิหยื่อ เนอ เต๊เห่ปา. ^c

7แกแย เด๊อ อา ซิยอ กล่าเบ่เกอเร๊อ อู เต๊เห่เนอ, อา พย๊าหนิ เตเด๊อะบุ๊ยเด๊อะเตอเรอ. เมเตเฮ๊เรอ จอแปแหร่ อา ซิยอ ฉื่อ เกอลาติ เหย่ซี ปา.

8แกแย เด๊อ อาซิปล่อ อาโพ๊อาแปละ เต๊เห่เนอ, อา พย๊าหนิ เตเด๊อะบุ๊ยเด๊อะเตอเรอ. เมเตเฮ๊เรอ อา เก่ แม๊เถอะ ผื่อต๊อต่อ เจ๊อ อาเหน่ เร๊อ จอแปแหร่ ปา. ^d

9แกแย เด๊อ อา เมเปเมดวา เต เต๊เห่เนอ, อา พย๊าหนิ เตเด๊อะบุ๊ยเด๊อะเตอเรอ. เมเตเฮ๊เรอ จอแปแหร่ เก่ เอ๊ เหย่ซี เน๊อ อาพู๊ เต๊เห่ ปา.

10แกแย เด๊อ อู เมจาเมจือ ลู เด๊อ อาจ๊ออาเต อาขว่าอาคยา, เต๊เห่เนอ, อา พย๊าหนิ เด๊อะบุ๊ยเด๊อะเตอเรอ. เมเตเฮ๊เรอ เด๊อ ม๊อขุ อาเทออาเก่กู เนอหม่า แกแย ฮู๊เนอ เต๊เห่ อาเต เฮ๊อ. ^e

11“เบ๊อะอู เป๊อเจ่ออิแช๊ ซี, อู เมจาเมจือ ซี, อู เกบูเกบย่า ซี เร๊อ อู เฮ๊ มู๊แหม่รีแจ่ ซี เด๊อ แวขว่าแวคยา เต๊เห่เนอ, ซี พย๊าหนิ เตเด๊อะบุ๊ยเด๊อะเตอเรอ. ^f 12ซิครือซิลอ แลแค, ซิกอล๊อแกแน แลแค นี๋, เมเตเฮ๊เรอ ซี เตเมหนิคว๊าเก่ เด๊อ ม๊อขุ เนอ อาดุ แหน่ แหน่ เจ๊อ เพรโพร เด๋อ หนู่เค เต๊เห่เนอ อู เมจาเมจือ โทเฮ๊อ เหย่ซี ฮู๊เนอเฮ๊อ.” ^g

อี๊เส่ เร๊อ เตลี

(มาระโก ๙:๕๐, ลูกา ๑๔:๓๔-๓๕)

13“ซี เต๊เห่ หม่า อาแซ่เน๊อ เห่ขุ อี๊เส่ เนอ. หม่าแน๊เรอ อี๊เส่ เก่ ชือเฮ ปาโต่ เฮ๊เรอ จว๊าเม ชือเฮ กาคยา แจ่ปา อา ฮู๊เต? อู นอจ่อ แจ่ปาโต่. อู เก่ วีแก แก อา เด๊อ แกล๊เดกู เร๊อ อู หยิตา พร๊อ จว๊าแก ลอ แพ๊ อา. ^h

14“ซี เต๊เห่ หม่า อาแซ่เน๊อ เห่ขุ อาเตลี เนอเฮ๊อ. วี โอ่เด๊อ โฉ่ขุ ตีวี เนอ อู เม ตาดวาบี๊แจ่ อา โต่. ⁱ 15อู ชีลี โท หมิเคว๊กอ เร๊อ อู โตโกล๊บี๊ อา เร๊อ ขริเนอ อา โอ่ เตเพร่ว โต่. อู แด่แถ่ อา เด๊อ หมิเคว๊กอ เหร่ขุ เร๊อ อา ลี เป่ ลออู ตี๊หี่แตแพ. ^j 16ฮู๊เนอเฮ๊อ, แซ่ฮู๊ อู เก่ ถู่เซ๊แถ่ เปเพ โอ่เด๊อ ม๊อขุ เออเตเพร อาเงเนอ, นอลีเตเค จว๊าโล เกอ ซี เตเมแร๊ เนอเต๊เห่ เด๊อ อู ปว๋า เตเพร อาแบ๊เง เนอ.” ^k

แบ่เจ่ อิซว๊า อู เน๊อ เตซว๊าเตแส่ อาหรี่อาแก

17“เตเนซื๊อ แต่ แลแค แว เน๊อ แว แฮเมปย๊า คูโมเสส อา เตซว๊าเตแส่ เร๊อ ลี เด๊อ เพรโพร ราแก เนอเต๊เห่ แต่เหม่ นี๋. แว แฮ เด๊อ แว เก่ แฮ เมปย๊าเมหลู่ เตเนอ เต๊เห่ หม่าโต่. แว แฮ เมเล๊อเมบา เป่ เต รา หนื่ออื่อ เออเต๊เห่ เนอแพ๊. 18แว เฮ๊จ๊อจ๊อ ซี, ม๊อขุ เร๊อ เห่ขุ ตาพรอแก ตื๊อดื่อเรอ, ลีปล่อ เด๊อ อา ปีตี๊เล๊ออู ตอปล๊อ เบ่เบ่, ลีปล่อ เมม๊าเมแด เด๊อ อา ปีตี๊เล๊อ ตอปล๊อ เนอเบ่เบ่, ตีกี๋ หม่า อา เบ่ โอ่เหม่แก หนิ โต่. ล๋อ ลีเออ เต๊เห่ เฮ๊หนื่ออื่อ เนอ อา เบ่ เล๊อบา เหร่อ ลอ. ^l 19อูเปเป๋ เบ่เบ่, เด๊อ อา เคตาลว๊าจว๊าตาแก โหง่เฮ๊แก เด๊อ อา ปีตี๊เล๊ออู ต๊อปล่อ เร๊อ อา เก่ อิซว๊า อู เนอ อู เก่ เคตาลว๊าจว๊าตาแก แซ่เกอฮู๊ เหย่ซีเนอ เก่เฮ๊หม่า เด๊อ ม๊อขุ เทอเลเก่กู ปาเนอ, จอแปแหร่ เก่ แด่ อา ฮู๊ แกแย เด๊อ อา ปีตี๊เล๊อ อู เตเพร ปา. หม่าแน๊เรอ อูเป่เป๋ เบ่เบ่ เด๊อ อาโอ่เซอเพร ครวา เตซว๊าเตแส่ เร๊อ อาอิซว๊าอู เด๊ออูเก่ ครวาเมเกอ ฮู๊เนอ เฮ๊เนอหม่า, เด๊อ ม๊อขุ เทอเลเก่กู เนอ, จอแปแหร่ เก่ แด่ อา เน๊อ แกแย เด๊อ อาดุเล๋อ อู เตเพร ปา. 20ฮู๊เนอเร๊อ แว เฮ๊จ๊อจ๊อ ซี, ซี เก่จ๊อเก่เตเล๊อ เร๊อ เพรอิซว๊า เตซว๊าเตแส่ อาซ๊าร๊า เออเต๊เห่ เร๊อ ฟาริสี เออเต๊เห่ โต่ เฮ๊เนอหม่า, ซี โนเบ๊ แจ่ เด๊อ ม๊อขุ เทอเลเก่กู ตีกี๋ โต่.”

แบ่เจ่ อิซว๊า อู เร๊อ เตซิปล่อดุสู่เทอทู อาหรี่อาแก

21“ซี หนิโฮ โทดื่อเฮ๊อ เร๊อ จอแปแหร่ เฮ๊ อู มู๋ หนู่เค เน๊อ, ‘เมเซอ แต่ แกแย แต่เหม่. แกแย เตเพรเพร เด๊อ อา เมเซอ อู เนอ, อู เบ่ เมจากาคยา ลู ปา.’ ^m 22หม่าแน๊เรอ แว เฮ๊ ซี เน๊อ, แกแย เตเพรเพร เด๊อ อา ซิปล่อดุ อา โคแบ๊ซว๊า เต๊เห่เนอ, อู โตเบ่ เมจากาคยา อา. โท๊โต่ แกแย เตเพรเพร เด๊อ อา เฮ๊ แกแยจอครอ อา โคแบ๊ซว๊า เต๊เห่เนอ, อู โตเบ่ เอ๊จว๊า เมจากาคยา ลู. เด๊อ แกแยยิวพู๊ อา กู่กล๊อดุกู๊ฉู่ทู เต๊เห่ อาเป๊เส่เง. หม่าแน๊เรอ แกแย เตเพรเตเพร เก่ เฮ๊ อู เน๊อ, ‘โอ่เล๊อโอ่กลอ’ ฮู๊เนอ เฮ๊เนอหม่า, อา โต รอ เกอเร๊อ อาเหน่, เมเตเฮ๊เรอ อา แฮโต ผื่อเฮ๊อ เร๊อ หง่าหร่าปอรากยา อากูเฮ๊อ.

23“เมฮู๊เนอเรอ, เน พย๊าแฮหนิ เน เตหลู่เตแต เด๊อ เตหลู่อาเหร่ อา โอ่ เร๊อ เบ๊อะเน เตเร หลู่แถ่ อาเค, เน เก่ เตเนแถ่เบ่โต่ แกแย เตเพรเตเพร เด๊อ เน เมซื๊อ ลู เร๊อ อาซิปล่อ โมเป่ล๋าย เน โต่ เก่เฮ๊เรอ, 24แด่แก เน เตหลู่เตแต เบ๊อะเตหลู่อาเหร่ อาแบ๊เงเนอ, เร๊อ กาเม เพรเมดือ โครเคร เหร่อ เร๊อ อาเนอ. โทเรอ แฮ หลู่แถ่ เนอ เน เตหลู่เตแต เออ.

25“แกแย เตเพรเตเพร เก่ เฮ๊ เน เน๊อ เน เมซื๊อเมปล๊า ลู เร๊อ อา เก่ เอ๊แถ่ เน เด๊อ คุ๊ยหี่ เก่เฮ๊เรอ, เบ๊อะซี แฮ โหร่ลู เด๊อ แกล๊ลู เบ๊อะเนอ, เม ตาโตตาเบ่แพร เล๊แก เน๊อ อาเนอ. ปาหม่า อา เด๊อะตาแก เน เด๊อ เพรเฮ๊เบ่เมโตเต อา กู๊ยากู, เร๊อ เพรเฮ๊เบ่เมโตเต เออ เก่ เด๊อะตา แฮเง เน เด๊อ เพรโอ่ป่อ ด๊อตา อู เด๊อ ทอกู เต๊เห่ อา กู๊ยากู เร๊อ อา เก่ ด๊อโนแก เน เด๊อ ทอกู ปา. 26แว เฮ๊จ๊อจ๊อ เน, เน เก่ ปล๊าลีลอเบ๊ เนฉู่ เออเนอ โต่ เฮ๊เนอหม่า, เน เถ่เบ๊ โต่.”

จว๊าซื๊อ อูพู๊อูเม อาหรี่อาแก

27“ซี หนิโฮ โทเฮ๊อ เน๊อ จอแปแหร่ เฮ๊ เน๊อ, ‘จว๊าซื๊อ แต่ อูพู๊อูเม แต่เหม่.’ ⁿ 28หม่าแน๊เรอ แว เฮ๊ ซี, แกแย เตเพรเพร เด๊อ อา แม๊ เพรเหมาะ เร๊อ อา เตเน ปาต๊าเนอ, อา จว๊าซื๊อเฮ๊อ เน๊อ เพรเหมาะ เนอเตเพร เด๊อ อา ซิปล่อกู เฮ๊อ. 29เนเป๊เส่ จ๊อทว๊า ตากยา เก่ นอเม เน เตซื๊อ เก่เฮ๊เรอ, ก๊ออูเถ่แก เร๊อ วีแก แก อา เนอ. เก่เม เนอ พื๋อ อู เก่ วีตาแก ลอ เน ซีเหน่กล่อ ชีเพร ลอ เด๊อ หง่าหร่าปอรากยากู เนอ, เนเป๊เส่ เลปย๊าแก ตากยา หม่า อาแร๊เล๊อ ปา เจ๊อ. ^o 30เน กู๊ขุ จ๊อทว๊า ตากยา เก่ นอเม เน เตซื๊อ เก่เฮ๊เรอ, ปาตือ เร๊อ วีแก แก อาเนอ. เก่เม เนอ พื๋ออู เก่ วีตาแก ลอ เน ซีเหน่กล่อ ชีเพร ลอ เด๊อ หง่าหร่าปอรากยากู เนอ, เน กู๊ขุ ตือแก โตโค๊ หม่า อาแร๊เล๊อ ปา เจ๊อ.” ^p

เม เร๊อ เว โอ่แก ลู

(มัทธิว ๑๙:๙, มาระโก ๑๐:๑๑-๑๒, ลูกา ๑๖:๑๘)

31“อู เฮ๊ เน๊อ, ‘แกแย เด๊อ อา ซิหยื่อ โอ่แก อาเม เนอ, อา โตเบ่ เด๊อะ เพรเหมาะ เนอเตเพร เน๊อ ลีโอ่แกปลื๊อ ลู อา เตราม๊าราแด ต๊าบ่า.’ ^q 32หม่าแน๊เรอ แว เฮ๊ ซี, เพรคู อูเป่เป๋ เบ่เบ่, อาเม เก่จว๊าซื๊อ เพรคู หม่าโต่ เร๊อ อา เก่ โอ่แก อาเม เฮ๊เนอ, อา นอ จว๊าซื๊อ เฮ๊อ อาเม เร๊อ เพรคู เฮ๊อ. เพรคู อูเป่เป๋ เบ่เบ่ เด๊อ อา เก่ จว๊าพย๊า เร๊อ เพรเหมาะ เด๊อ อาเว โอ่แก ลู เออเตเพรเนอ, อา เมซื๊อเฮ๊อ เน๊อ เพรเหมาะ เนอเตเพร เฮ๊อ.” ^r

เตอ๊อแล อาหรี่อาแก

33“แว เฮ๊ คยาแซ๊ เน๊อ, ซี หนิโฮ โทดื่อเฮ๊อ จอแปแหร่ เฮ๊ อู มู๋ หนู่เค เน๊อ, เมปย๊าแก เด๊อ เน เต อ๊อแล โทเฮ๊อ เน๊อ แบ่เจ่ จอแปแหร่ เป๊เส่เง เนอ เต๊เห่ แต่เหม่. ^s จ๊อเน๊อ เน เต อ๊อแล เด๊อ เน อ๊อแล โท เฮ๊อ เน๊อ แบ่เจ่ จอแปแหร่ เต๊เห่ เนอ. ^t 34หม่าแน๊เรอ แว เฮ๊ ซี, เบ๊อะซี อ๊อแล เต๊อเจ่อเจ่อ เบ๊อะเนอ, จว๊าแบ แต่ ตีกี๋ แต่เหม่. ^u ม๊อขุ เบ่เบ่, จว๊าแบ แต่ ตีกี๋ แต่เหม่. ม๊อขุ หม่า จอแปแหร่ เหล่โอ่ เหล่โอ่แน. ^v 35เห่ขุ เบ่เบ่, จว๊าแบ แต่ ตีกี๋ เหม่, เมเตเฮ๊เรอ เห่ขุ หม่า จอแปแหร่ กู๊โด่ เหล่หยิ. ^w วีเยรูซาเล็ม เบ่เบ่ จว๊าแบ แต่ ตีกี๋ เหม่เหม่, เมเตเฮ๊เรอ วีเยรูซาเล็ม หม่า คุ๊ยดุ จ๊อแพ๊ทู เหล่โอ่. ^x 36จว๊าแบ กาเด๊อะ แต่ เน กู่กล๊อ แต่เหม่เหม่, เมเตเฮ๊เรอ กู่โล โตโบฮู๊ แพ๊เนอ เน เมลอเมบู แจ่โต่. 37เน เฮ๊เบ่ เบ๊อะเนอ, อาหม่าเร๊อ ‘อาหม่า’ เฮ๊เนอ, อาหม่าโต่เร๊อ ‘อาหม่าโต่’ เฮ๊เนอ, ล๋อ เตเฮ๊เล๊อะเฮ๊กลอ เนอเต๊เห่ หม่า อา แฮ เด๊อ โลเน๊มู๊แหม่ กู่กล๊อ อา โอ่ แพ๊.”

เมเลอ ฉื่อคยา

(ลูกา ๖:๒๙-๓๐)

38“ซี หนิโฮ โทดื่อเฮ๊อ อู เฮ๊ เน๊อ, ‘เก่ แกแย เตเพรเพร เมปย๊า อู เป๊เส่ปล่อ เนอ, เน เบ่ เมปย๊าฉื่อเลอ อา เป๊เส่ปล่อ. โทเรอ อา เก่ เมแลเก่ อู กู่เคอ เนอ, เน เบ่ เมแลเก่ ฉื่อเลอ อากู่เคอ.’ ^y 39หม่าแน๊เรอ แว เฮ๊ ซี, เมเลอฉื่อ กาคยา แต่ แกแยมู๊แหม่ เนอเตเพร แต่เหม่. เก่ อา แปล่ ซี กู๊หลิเล จ๊อทว๊า แตกยา เฮ๊เรอ เด๊อะ แปล่ โป่ อา เด๊อจ๊อจิ เนอตากยาเนอ. 40แกแย เตเพรเพร เก่ เฮ๊ ซี เน๊อ ซี เมซื๊อ ลู, เร๊อ อา เก่ กุยปล๊า ซี เน๊อ จา ตือปือ เด๊อ เพรเฮ๊เบ่เมโตเต อาเป๊เส่เง เก่เฮ๊เรอ เด๊อะโป่ อา เร๊อ ซี จากลอดุ เนอ. 41แกแย เด๊อ อาเป่เอ่ เป่โอ ซี เร๊อ อา นอแย๊จว๊า ยา ซี ตี กิโล เก่เฮ๊เรอ, แย๊จว๊า เป่ อา เนอ กิโลเนอ นิ. 42แกแย อูเป๊เบ่ เด๊อ อา กุย ซี เตเพรเพรเนอ, เด๊อะเป่ อา นิ. แกแย เด๊อ อา กุยบ่อกุยโหล่ ซีเนอ, เด๊อะบ่อเด๊อะโหล่ เป่ อา นี๋.”

โมหนิเกอเร๊อ แกแย เด๊อ อา ซิเถ่ ซี เนอเต๊เห่

(ลูกา ๖:๒๗-๒๘, ๖:๓๒-๓๖)

43“ซี หนิโฮ โทดื่อเฮ๊อ อู เฮ๊ เน๊อ, ‘โมหนิเกอเร๊อ เนซว๊าเนโค เร๊อ ซิโตโคแก แกแย เด๊อ อา ซิเถ่ ซิงา เนเนอ.’ ^z 44หม่าแน๊เรอ แว เฮ๊ ซี, โมหนิเกอเร๊อ แกแย เด๊อ อา ซิเถ่ ซี เนอเต๊เห่ เร๊อ กุยจ๊อเบ เป่ แกแย เด๊อ อา เมจาเมจือ ซี เนอ เต๊เห่. 45ซี เก่ โมหนิเกอเร๊อ อู ฮู๊เนอ เก่เฮ๊เรอ ซี หม่าเฮ๊อ เพ จอแปแหร่ เด๊อ ม๊อขุ เตเพร อา พู๊เหมาะพู๊คู ซีเต๊เห่ เฮ๊อ, เมเตเฮ๊เรอ, แกแยมู๊แหม่ เต๊เห่ เบ่เบ่, แกแย แร๊ เต๊เห่ เบ่เบ่, จอแปแหร่ นอแถ่แพ๊ ต๊อเหมาะ เต๊เบ่เบ่ แพ๊. แกแยจ๊อ เต๊เห่ เบ่เบ่, แกแย จ๊อโต่ เต๊เห่ เบ่เบ่, จอแปแหร่ นอเก่จือตา เก่เนอ หม่า อา แซ่ลู แพ๊. 46ซี เก่ โมหนิเกอเร๊อ ตื้อแพ๊ แกแย เด๊อ อา โมหนิเกอเร๊อ ซี เนอเต๊เห่ แพ๊ เก่เฮ๊เรอ จอแปแหร่ เด๊อะ ซี คว๊าเก่โต่. เก่ เมแพ๊ ฮู๊เนอ เก่เฮ๊เรอ เพรกุยอาหมู่อาร๊า เต๊เห๋ หม่า อา เมแจ่ แพ๊แพ๊. 47ซี เก่ เฮ๊โมเฮ๊แร๊ แพ๊ตื๊อ ซีโป่ซีแหม่ เก่เฮ๊เรอ, อา เหล่โค๊แต๊แกละ โต ฮู๊เต? แกแย เด๊อ อา หยื่อเอ่แหน่ เกอ อู จอแปแหร่ โต่ เต๊เห่ เร๊อ ฮู๊ ซี เมเน๋อ หม่า อา เมแจ่แพ๊ แวเฮ๊แต? 48เมฮู๊เนอเรอ, ฮู๊ ซีเพ เด๊อ ม๊อขุ เออเตเพร อา แร๊เล๊อบา เนอ, แร๊เล๊อะบา แซ่เกอ เร๊อ อา เนอ นี๋.” ^aa