Matthew 7

เตเฮ๊บูเฮ๊บย่า อู, เตเตเนซื๊อบอ เตเนซื๊อบย่า อู

(ลูกา ๖:๓๗-๓๘, ๖:๔๑-๔๒)

1“เฮ๊บอ เฮ๊บย่า เตเนซื๊อบอ เตเนซื๊อบย่า แต่ อู, แต่เหม่ นี๋. จอแปแหร่ เก่ เมเลอ กาคยาฉื่อ แซ่เกอคยา ซี ฮู๊เนอ ปา. 2เมเตเฮ๊เรอ จอแปแหร่ อา เมเลอ กาคยาฉื่อ เน, ฮู๊เน เฮ๊บอ เฮ๊บย่า อู, เน เตเนซื๊อบอ ซื๊อบย่า อู เนอ ปา. เนเม อู บ๋าเตเนอ, จอแปแหร่ อา เม กาคยาฉื่อ เกอลาติ เน บ๋า เนอ ปา. ^a

3“อาหมื่ออาม๊า โอ่แพ๊ เด๊อ ซี โป่แหว่ เพรหยื่อเอ่ เตเพร อา เป๊เส่ปล่อกู แพ๊ เร๊อ ซี แม๊เถอะ, หม่าแน๊เรอ ส่อกว่า ต๊ากว่า โอ่ เจ๊อ เด๊อ ซี เป๊เส่ปล่อกู เจ๊อ เนอ, ซี แม๊เถอะ เกอเร๊อ เกออู โต่ เมเต? 4เบ๊อะส่อกว่า โอ่ เจ๊อ เด๊อ ซี เป๊เส่ปล่อกู เบ๊อะเนอ, ซี จว๊าเฮ๊โต่ ซี โป่แหว่ เตเพร เน๊อ, ‘แว ตาคว๊า เถ่แก เป่ เน อาหมื่ออาม๊า โอ่เด๊อ เน เป๊เส่ปล่อกู เนอ,’ เฮ๊เนอหม่า, อา หนิ แหน่ แอ? 5เพร จ่าจ๊อจ่าเต อาเหน่ ซี๋, พย๊าเถ่แก เหร่อเล๊อ ส่อกว่า โอ่ เด๊อ ซี เป๊เส่ปล่อกู เนอ, ตื๊อเรอ ซี แม๊เถอะโลแร๊ เร๊อ ซี ตาคว๊า เถ่แก แจ่ เป่ อาหมื่ออาม๊า โอ่ เด๊อ ซี โป่แหว่ อา เป๊เส่ปล่อกู เออเนอ แพ๊.

6“เตบูโพ๊ เนอ เด๊อะ แต่ เร๊อ ถุ่ยเต๊เห่ แต่เหม่, โทปาเร๊อ อา เก่ อ่า กาคยา ซี ปา. วีตา เป่ แต่ หล่อเซ๊หล่อโพร เต๊เห่ เด๊อ แท๊ เต๊เห่ อาเป๊เส่เง เนอ แต่เหม่, ซี เก่ วีตา เป่ อา เฮ๊เนอหม่า อา เก่ หยิตาแก ลอ ปา, โทปาเรอ อา อ่า กาคยา ซีปา”

กุย แลแค, แม๊ปู แลแค, ด่อ แลแค

(ลูกา ๑๑:๙-๑๓)

7“กุย มอ แลแค, ซี เก่ พย๊าหนิ ปา. แม๊ปู มอ แลแค, ซี เก่ แม๊เถอะ ปา. ด่อมอ แลแค, กู่ดาเนอ, จอแปแหร่ เก่ บ๊าโม เป่ดื่อ ซี ปา. 8เมเตเฮ๊เรอ ล๋อ แกแย เด๊อ อา กุยเต เต๊เห่เนอ, อา เก่ พย๊าหนิ ปา, เร๊อ ล๋อ แกแย เด๊อ อา แม๊ปู เต เต๊เห่เนอ, อา เก่ แม๊เถอะ ปา, เร๊อ ล๋อ แกแย เด๊อ อา ด่อ กู่ดา เต๊เห่เนอ, จอแปแหร่ เก่ บ๊าโม เป่ ลู ปา.

9“เด๊อ ซีเกลเนอ ซีพู๊ เก่ กุยเอ่ ซี เหล่เอ่ เฮ๊เรอ ซี เด๊อะเอ่ เหย่ซี เร๊อ หล่อ เนอหม่า อา โอ่แหน่ เตเพรเพร แอ? 10โต่หม่าเเน๊ ซีพู๊ เก่ กุยเอ่ ซีเต๊ว เฮ๊เรอ ซี เด๊อะเอ่ เหย่ซี เร๊อ หรู่แร เนอหม่า อา โอ่แหน่ เตเพรเพร แอ? 11ซี หม่า แกแย เด๊อ มู๊แหม่ รีแจ่ เต๊เห่ แพ๊ ตื๊อดื่อเรอ ซี ซิเง เด๊อะเอ่ ซีพู๊ซีเลอ เต๊เห่ เร๊อ เตเด๊อ อาแร๊ เต๊เห่ เจ๊อ เก่เฮ๊เรอ, เตเนแม๊มอ แลแค ซีเพ เด๊อ ม๊อขุ เออเตเพร เนอ, อา เก่ เด๊อ ตาเต หม่าแหน่ เป่ เจ๊อ เตแร๊ เต๊เห่ เร๊อ แกแย เด๊อ อา กุยแถ่ ลู เนอเต๊เห่ ปา. 12เม เป่ อู ฮู๊ ซี ซิหยื่อ นอเม อู เน๊อ ซีเหน่ เนอ นี๋. เมเตเฮ๊เร๊อ ล๋อ เออเต๊เห่หม่าคูโมเสส อา เตซว๊าเตแส่ เร๊อ เพรโพร เต๊เห่ อา เต โหง่เฮ๊แก เต๊เห่ เนอ, อาซิหยื่อเฮ๊ อาโหง่แลช๊า เนอหม่า เออเนอ เฮ๊อ.” ^b

แกล๊เนอโบ

(ลูกา ๑๓:๒๔)

13“จว๊าโน แลแค เด๊อ กู่ดา อาอิ เนอตูกู, เมเตเฮ๊เรอ กู่ดาแหล่ เออตูกูเนอ เร๊อ แกล๊ แหล่ เออโตโบเนอ, อา ซูจว๊า อู เด๊อ เตเซอ ตูจูเพร เหล่โอ่ เร๊อ อู จว๊า โนโหร่โนเอ๊ แหน่เจ๊อ. 14หม่าแน๊เรอ กู่ดา อาอิ เออตูกู เนอ แกล๊อิ เร๊อ แกล๊อิ เออโตโบ เด๊อ อา ซูจว๊า อู เด๊อ เตเซอเพร ตูจูเพร เออเนอ, แกแย แม๊เถอะ ปีตี๋ แหน่เจ๊อ ลู.”

ส่อเส่ เร๊อ อาเหมาะ

(ลูกา ๖:๔๓-๔๕)

15“รอหนิ แลแค ซีเหน่ เร๊อ เพรกลว่า แลโฮ อาเหน่ ฮู๊ เพรโพร เนอเต๊เห่ นี๋. เหย่ซี หม่า แกแย กลว่า แหล่โฮ แซ่เน๊อ ซิหมิ เด๊อ อาซิโดซิงาเนอ หม่าแน๊เรอ เหย่ซี หม่า แกแย มู๊แหม่รีแจ่ แซ่เจ๊อเร๊อ ถุ่ยมี เนอ เจ๊อ. 16เด๊อ เหย่ซี เมเตมู๊แหม่ อาขว่าอาคยา, ซี ซิเง แจ่ เร๊อ เหย่ ซีหม่า เพรกลว่า แลโฮ แฮอาเหน่ เต๊เห่ แพ๊. แกแย เด๊อ อาจว๊าแม๊ปู บ่าเอ่ แท๊ทือเส่ เด๊อ ส่อแช๊หม่อลู, หม่าโต่เรอ อาจว๊า แม๊ปู บ่าเอ่ ก่อดุ๊ยเส่ เด๊อะ ส่อแช๊ หม่อ ลู เนอหม่า อาโอ่ แหน่แอ? 17ฮู๊เนอเฮ๊อ, ส่อ เด๊อ อาแร๊ เนอ, อา เก่ เส่แถ่ เด๊อ อาแร๊. หม่าแน๊เรอ ส่อเหมาะ เด๊อ อาแร๊โต่ เนอ, อา เก่ เส่เถ่แพ๊ ส่อเส่ เด๊อ อาแร๊โต่ แพ๊. 18ส่อเหมาะ เด๊อ อาแร๊ เนอ, อาเส่เถ่ แจ่ ส่อเส่ เด๊อ อา มู๊แหม่ โต่. โทเรอ ส่อเหมาะ เด๊อ อา มู๊แหม่ เนอ, อา เส่เถ่ แจ่ ส่อเส่ เด๊อ อาแร๊โต่. 19ล๋อ ส่อเหมาะ เด๊อ อา เส่แถ่ อาแร๊โต่ เต๊เห่เนอ, อู เก่ ปาตือแก ลู ปา เร๊อ อู เก่ วีโนแก ลอ ลู เด๊อ หมิกู ปา. ^c 20เมฮู๊เนอ เร๊อ ซี เก่ ซิเง แจ่ เพร กลว่า แลโฮ อาเหน่ เออเต๊เห่เนอ เร๊อ อา เตเส่แถ่โพแถ่ เนอเต๊เห่แพ๊.” ^d

แว ซิเงน๊อ ซี แตแค๋ โต่

(ลูกา ๑๓:๒๖-๒๗)

21“ล๋อ แกแย เด๊อ อา เอ๊ แว เน๊อ, ‘แบ่เจ๋ แบ่เจ่เนอ’ อา โน หนิลอ เด๊อ ม๊อขุ เทอเลเก่กู ปว๋า เตเพร หม่าโต่. อา โนหนิ ตื้อแพ๊ ดื่อ แกแย เด๊อ อา เมโตเมเบ่ แวเพ เด๊อ ม๊อขุ เตเพร อาซิปล่อ เนอเต๊เห่ แพ๊. 22ช๋า ม๊อเนอ เมจากาคยา ปา เตอเนอเนอ, แกแย แฮ เฮ๊ โลแถ่ โหร่เอ๊ ลาปาเนอ, ‘แบ่เจ๋ แบ่เจ่, เป แด๊โฉ่โด่แน เป่ อู แกแยเต๊เห่ เด๊อ แหย่โยบูโพ๊แบ่เจ่ นอแว แด๊โฉ่ เด๊อ เนมุย คยา, โทเรอ เป เหว่เถ่แก โลเน๊โลหน่า เต๊เห่ เอ๊แหน่เจ๊อ เด๊อ เนมุย คยา, โทเรอ เป เด๊อะโล อาเมวโค๊ตีกลี๊ เต๊เห่ เอ๊ แหน่เจ๊อ เด๊อ เนมุย คยาเนอ อาเอ๊ลาเฮ๊อ, แวเฮ๊แต.’ 23เบ๊อะเนอเคปา แว เก่แด๊โฉ่ฉื่อ เหย่ซี เน๊อ, ‘แว ซิเงน๊อ ซี แตแค๋ โต่. แกแย เด๊อ อา เม เตมู๊แหม่รีแจ่ ซี๋ เถ่จว๊า ตาพาแก ยา เร๊อ แว.’” ^e

เพร ช๊อแถ่หี่ ซิเนอ.

(ลูกา ๖:๔๗-๔๙)

24“ฮู๊เนอเร๊อ แกแย เตเพรเพร เด๊อ อา หนิโฮ แวเต อิซว๊า เออ เต๊เห่ อา ครวาเม จว๊าโตโคร เฮ๊เนอหม่า, อา แซ่เฮ๊อ เร๊อ แกแย ลีแม เตเพร ช๊อโอ่ อาหี่ เด๊อ หล่อขุ เนอเฮ๊อ. 25เก่จือดุแฮ เทอดุแถ่บา, เก่แลเซ๊ แลแลดุ แฮเบ่ หี่เออ ตื๊อดื่อเรอ, อา แลคื๊อโต่, เมเตเฮ๊เรอ อู ช๊อแถ่ อา เด๊อ หล่อขุ. 26หม่าแน๊เรอ แกแย เตเพรเพร เด๊อ อา หนิโฮ แวเต อิซว๊า เออ เต๊เห่ เร๊อ อา เก่ หนิดา ครวาเม เกอ โต่ เฮ๊เนอ, อาแซ่เน๊อ แกแย จอครอ ช๊อแถ่โอ่ อาหี่ เด๊อ เห่โซขุ เนอ เฮ๊อ. 27เก่จือดุแฮ เทอดุแถ่บา, เก่แลเซ๊ แลแล แฮเบ่ หี่เออ เร๊อ อา แลพรอ ลอหล่าตี๊กลิ แพ๊.”

เหย่ซู่ เตอเรอโพรฉว่าชอ

28เบ๊อะแบ่เจ่ เหย่ซู่ เฮ๊โทเฮ๊อ เตเออเต๊เห่ เบ๊อะเนอ, แกแย เบ๊หมู่ เด๊อ อา หนิโฮ ลู อิซว๊าอี๊แส่ เออเต๊เห่เนอ, อา คย๊าอายื๊อ ลอปลี เจ๊อ. ^f 29เมเตเฮ๊เรอ, อา อิซว๊าอี๊แส่ แซ่เกอฮู๊ เพรอิซว๊า เตซว๊าเตแส่ อาซ๊าร๊า เนอเต๊เห่ อิซว๊า เนอ โต่. อา อิซว๊า แซ่เจ๊อเร๊อ แกแย เด๊อ อา โอ่ เร๊อ อา เตอเรอฉว่าชอ เตเพร อิซว๊า เนอเจ๊อ.