Matthew 9

แบ่เจ่ เหย่ซู่ แหย่โอ่เหม่ แกแยเพ เซอชิกยา เตเพร

(มาระโก ๒:๑-๑๒, ลูกา ๕:๑๗-๒๗)

1แบ่เจ่ เหย่ซู่ โน เด๊อ ส่อเกลอกู เร๊อ จว๊าเบ๊ เทออ่อดุ เร๊อ อา กา เด๊อ อาดอ เด๊อ อา จว๊าโอ่ เออตอดอ. 2แกแย เต๊เห่ แย๊แฮหนิ แกแย เซอชิกยา เตเพร เด๊อ แบ่เจ่ เหย่ซู่ อา โอ่ เร๊อ อา โอ่เมอโอ่ แพ๊ เด๊อ เหล่เมอขุ. เบ๊อะแบ่เจ่ เหย่ซู่ แม๊เถอะ เหย่ซี เตหยื่อ เบ๊อะเนอ, อา เฮ๊ แกแย เซอชิกยา เนอเตเพร เรอ, “แว พู๊เพรคู๋ แด่ฉว่าแด่ชอ แหน่ ซิปล่อ นี๋. แว ปลวาแกเฮ๊อ เน เตซื๊อ เฮ๊อ.”

3เบ๊อะเนอโตโพ๊ เพร อิซว๊า เตซว๊าเตแส่ อาซ๊าร๊า เต๊เห่ เตเน แลแค เด๊อ อา ซิปล่อกู เน๊อ, “แกแย เออเตเพร เฮ๊เบ่ ซื๊อ จอแปแหร่ เฮ๊อ.”

4แบ่เจ่ เหย่ซู่ ซิเง ล๊อปลู๊ ลอปลี เหย่ซี เตเน เนอเต๊เห่ เร๊อ อา เฮ๊ เหย่ซี เน๊อ, “หม่าเมเต ซี จว๊า เตเน มู๊แหม่รีแจ่ โต่ เตฮู๊เนอ เต๊เห่ เด๊อ ซี ซิปล่อกู เมเต? 5‘แว ปลวาแก เน เตซื๊อ เฮ๊อ’ เฮ๊หม่า อายูเล๊อ แอ? เก่หม่าโต่เรอ ‘ก๊อถ่อ เร๊อ จว๊ามอ’ เฮ๊หม่า อายูเล๊อ แอ? 6หม่าแน๊เรอ แซ่ฮู๊ ซีเก่ ซิเง แลแค เน๊อ เด๊อ เห่ขุ เออเนอ, แว อาโอ่ เร๊อ เตอเรอฉว่าชอ เด๊อ แว ปลวาแกเบ๊ อู เตซื๊อเตปล๊า เต๊เห่ อาเง เนอเรอ แว เก่ เด๊อะโล เป่ ซี,” อา เฮ๊ แกแยเพ เซอชิกยา เออเตเพร เน๊อ, “ก๊อถ่อ ถู่ลูหนิ เน เหล่เมอเด๊เนอ เร๊อ กามอ เด๊อ เน หี่เนอ.” 7แกแย เซอชิกยา เนอเตเพร ก๊อถ่อกา เด๊อ อาหี่. 8จอแปแหร่ เด๊อะตาเป่แกแย อา เตอเรอฉว่าชอ ฮู๊เออ อาขว่าอาคยา, เบ๊อะแกแย เบ๊หมู่ แม๊เถอะ เตเมอาเหน่ ฮู๊เนอ เบ๊อะเนอ, เหย่ซี ซิอิเช ซิแหน่ซิเตเร แลแค จอแปแหร่ เร๊อ ถู่เซ๊แถ่ แลแค จอแปแหร่.

แบ่เจ่ เหย่ซู่ เอ๊ คูมัทธิว

(มาระโก ๒:๑๓-๑๗, ลูกา ๕:๒๗-๓๒)

9เบ๊อะแบ่เจ่ เหย่ซู่ เถ่จว๊าแก เบ๊อะเนอ, อา แม๊เถอะ แกแย เตเพร อามุย เร๊อ คูมัทธิว โอ่แนโอ่ แรเต เด๊อ เหล่กุย อาหมู่อาร๊า หี่กู. แบ่เจ่ เหย่ซู่ เฮ๊ ลู เน๊อ, “จว๋า, ครวาเกอ แวคยา เร๊อ ทวาเกอ แว โคเจ่.” เร๊อ คูมัทธิว ก๊อถ่อจว๊า เร๊อ ครวาเกอ ลูคยา.

10เบ๊อะแบ่เจ่ เหย่ซู่ เอ่ดี เหมาะเฮ๊ เด๊อ คูมัทธิว หี่ เบ๊อะเนอ, เพรกุยอาหมู่อาร๊า เต๊เห่ เร๊อ เพร เตซื๊อพู๊ เต๊เห่ แฮ เอ่เต่อปลู เอ่เต่อเผ่ เกอ ลอ เร๊อ เหย่ซู่ เร๊อ อา โคเจ่ เต๊เห่. ^a 11เบ๊อะ ฟาริสี เต๊เห่ แม๊เถอะ ฮู๊เออ เนอ, อา แด๊เฮอ เหย่ซู่ โคเจ่ เต๊เห่ เน๊อ, “ซี ซ๊าร๊า เร๊อ อา จว๊า เอ่เต่อโอเต่อ เกอโต่ เน๊อ เพรกุยอาหมู่อาร๊า เน๊อ เพรเมเตซื๊อพู๊ ฮู๊เนอเต๊เห่ เมเต?”

12แบ่เจ่ เหย่ซู่ หนิโฮโฮ เน๊อ อา เฮ๊ฉื่อ เหย่ซี เน๊อ, “แกแย เด๊อ อา โอ่โมโอ่รี เต๊เห่เนอ, อา โหล่ เน๊อ เตขุ ซ๊าร๊า โต่. แกแย เด๊อ อาชุ๊ยอาเช เต๊เห่เนอ ตื๊อหม่า อา โหล่ แพ๊ เตขุ ซ๊าร๊า แพ๊. 13หม่าแน๊เรอ แม๊ปูซิเง แลแค จอแปแหร่ ซิหยื่อ เฮ๊ อาโหง่แลช๊า เต๊เห่ เด๊อ อา เฮ๊ เน๊อ, ‘แว ซิหยื่อ เตหลู่เตแต โต่, แว ซิหยื่อแพ๊ เตซิยอกล่าเบ่ เกอเร๊อ ลู เตเพร เน๊อ เตเพร เนอแพ๊.’ ^b เมเตเฮ๊เรอ, แว แฮ เอ๊ กา แกแย เด๊อ อาจ๊ออาเต เนอเต๊เห่ หม่าโต่. แว แฮ เอ๊ กา แพ๊ แกแย เด๊อ อา เตซื๊อเตปล๊าโอ่ดื่อ เง เนอเต๊เห่ แพ๊.” ^c

เตแด๊เฮอ โด่เอ่เฉ่ อาหรี่อาแก

(มาระโก ๒:๑๕-๒๒, ลูกา ๕:๓๓-๓๙)

14โทเร๊อ คูยอห์น เพรเจเทอ อา โคเจ่ เต๊เห่ แฮ เด๊อ แบ่เจ่ เหย่ซู่ อา โอ่ เร๊อ อาแฮ แด๊เฮอ แบ่เจ่ เหย่ซู่ เน๊อ, “เป เร๊อ ฟาริสี เต๊เห่เนอ, เป โด่เอ่เฉ่, หม่าแน๊เรอ เน โคเจ่ เออเต๊เห่ อา โด่เอ่ เกออู เฉ่ โต่ เมเต?”

15แบ่เจ่ เหย่ซู่ เฮ๊ฉื่อ เหย่ซี เน๊อ โหง่ค๊าโข่ ตือมือ เร๊อ อา เฮ๊ เน๊อ, “เบ๊อะกาฉู่แด่เพรคู โอ่เต่อเกอปา เร๊อ อาโค ซิเผระ ซิแม เบ๊อะเนอ, อา โคซิเผระ เออเต๊เห่ จว๊าซิเปล แจ่ ฮู๊เต? หม่าแน๊เรอ ช๋า เบ๊อะแฮโต่เฮ๊อ เด๊อ อู เอ๊จว๊า ตาพาแกเฮ๊อ กาฉู่แด่เพรคู เฮ๊อปา เบ๊อะเนอ, เหย่ซี เก่ โด่เอ่โด่โอ แลแค ปา.

16“อู เช๊เผ่ เห่อจาเลอ เร๊อ เยขริเซ เด๊อ อา ตียุ๊ย ล๋ายโต่เออ เนอ อา โอ่ เตเพร่ว โต่, เมเตเฮ๊เรอ เก่ เช๊เผ่ เฮ๊เนอ, เยขริเซเออ อา เก่ ท๊อตียุ๊ยกา เร๊อ ลื๋อ อาท๊อตียุ๊ย แลเย แหล่โป่ เห่อจาเลอ เออ ปา. 17อู ยือโน แท๊ทือเส่ เทอแยเซ เด๊อ เทอโอพ๊าเลออากู เนอ อา โอ่ เตเพร่ว โต่. อู เก่ ยือโน ฮู๊เนอ เฮ๊เรอ, เทอโอพ๊า อา ป่อเพ๊ เร๊อ แท๊ทือเส่ เทอแย อา แลโก่ลอ ปา. โท๊โต่ เทอโอพ๊า เก่ ปย๊า แก ลอปา. ฮู๊เนอเรอ อู ยือโน แพ๊ แท๊ทือเส่ เทอแย อาเซ เนอ เด๊อ เทอโอ พ๊า อาเซ กู แพ๊. เออ, เก่ เมฮู๊เนอเรอ เทอแยเบ่เบ่ เทอโอพ๊าเบ่เบ่ อาปย๊า ปาโต่.”

เพรเหมาะเป๊เจ่ เด๊อ อา อาเซอ เตเพร เร๊อ แกแยโหมะ เด๊อ อา แฮ เต่อเบ่ แบ่เจ่ เหย่ซู่ จาจวาแก เตเพร

(มาระโก ๕:๒๑-๔๓, ลูกา ๘:๔๐-๕๖)

18เบ๊อะอา เฮ๊เบ่ อู ฮู๊เออ เบ๊อะเนอ, เตจ๊อเบโฮ กู่กล๊อดุ เตเพร แฮ แด๊งือแล เด๊อ ลูเป๊เส่เง เร๊อ อา เฮ๊ ลู เน๊อ, “แว พู๊เพร เหมาะ ตื๊อเซอปาแพะ, หม่าแน๊เรอ กาเกอ แว เร๊อ กาแด่แถ่ เน กู๊ขุ เด๊อ อาเหน่ลู หม่า อา เกล๊ เซอเพร แหน่ แพะ.” 19แบ่เจ่ เหย่ซู่ ก๊อถ่อ เร๊อ ครวากาเกอ ลู. เร๊อ อาโคฮู๊เจ่ ก๊อถ่อ ครวากา เกอลู.

20เบ๊อะเหย่ซี จว๊า เด๊อ แกล๊ลู เบ๊อะเนอ, อาโอ่ เพรเหมาะ เตเพร เด๊อ อา เตชุ๊ยเตเช สุ่ยตา โอ่โก๊โต่ อางยา เจ๊อ เช๊อเนอหน่า เนอ, อา ครวาจว๊าเกอ แบ่เจ่ เหยซู่ เร๊อ อา แฮ เต่อเบ่ แบ่เจ่เหย่ซู่ จาจวาแก. 21“เก่ แว เต่อเบ่ แพ๊เบ๊อะอาจาจวาแก เออเนอแพ๊ หม่า, แว เตชุ๊ยเตเช เออ เกล๊ โอ่เหม่ แหน่ เฮ๊อ,” อาเตเนโห่ เกอ เร๊อ ดื่อ อาเหน่ เร๊อ อาแฮ เด๊อเหย่ซู่ แบ๊คยา เร๊อ อาแฮ เต่อลู จาจวาแก.

22แบ่เจ่ เหย่ซู่ ตีรี๊ แม๊กาคยา เร๊อ แม๊เถอะ ลู เบ๊อะเนอ, อา เฮ๊ ลู เน๊อ, “พู๊เหมาะ, แด่ฉว่าแด่ชอ เน ซิปล่อ นี๋, เน เตหยื่อ เออเนอ, อา แหย่โอ่เหม่ แกเฮ๊อ เร๊อ เตเชเฮ๊อ.” เออโตโพ๊เรอ เพรเหมาะ เออเตเพร อา เตเชเนอ, อา โอ่เหม่ โตโพ๊ โอ่เหม่แก เจ๊อ.

23เบ๊อะเหย่ซู่ แฮโน เด๊อ แกแยยิวพู๊ กู่กล๊อ เออเตเพร อาหี่กู เบ๊อะเนอ, อา แม๊เถอะ เพรโอ๊ปีโล๊ เต๊เห่ เร๊อ แกแย โหง่เห่ ตูปลูเต๊เผ่ เร๊อ อา เฮ๊ เหย่ซี เน๊อ, 24“จว๊าตาพา ลอ แลแค. เป๊เจ่เพรเหมาะ เออเตเพร หม่า อา เซอ หม่าโต่, อา โอ่เมอ ตาปา แพ๊.” อา เฮ๊เม ฮู๊เนอเรอ อู งยาโคร ลอปลี ลู. 25เบ๊อะอู นอเถ่ลอ เร๊อ แกแย เนอเต๊เห่ เด๊อ อากลอ เบ๊อะเนอ, เหย่ซู่ โน เด๊อ หี่ด๊อกู เบ๊อะเป๊เจ่เพรเหมาะ เหล่โอ่เมอ เบ๊อะเนอ, เร๊อ อา ปื่อ ลูกู๊ขุ เบ๊อะเนอ, เป๊เจ่เพรเหมาะ เออเตเพร ก๊อถ่อกาคยาแซ๊. 26เตหรี่เตแก เออ อา โล ปีชี จว๊าลอ เจ๊อ ปว๊าเทอปวาเก่ เจ๊อ.

แบ่เจ่ เมลี กาคยา แกแย เป๊เส่คี๊ ซิเนอ โทเรอ อา เมแร๊ กาคยา แกแยเป๊ เตเพร

27เบ๊อะแบ่เจ่ เหย่ซู่ เถ่จว๊าแก เบ๊อะเนอ โต๊โผ่ เบ๊อะเนอ, แกแย เป๊เส่คี๊ ซิเนอ ครวา เอ๊โท เกอ ลู เน๊อ, “เก๋อ เพดาวิด อาพู๊, ซิยอ เร๊อ เมจว่า เกอ เป นี๋.”

28เบ๊อะแบ่เจ่ จว๊าโน เด๊อ หี่ เตเมกู เบ๊อะเนอ, แกแย เออซิเนอ ครวาโน เกอ ลู เร๊อ แบ่เจ่ เหย่ซู่ แด๊เฮอ เหย่ซี เน๊อ, “แว เมลี แจ่ ซี เป๊เส่, หม่า ซี หยื่อเอ่ แอ?”

เหย่ซี เฮ๊ฉื่อ เน๊อ, “อ่อ, เป หยื่อเอ่, แบ่เจ่”

29เร๊อ แบ่เจ่ เต่อแฮ เหย่ซี เป๊เส่ปล่อ เร๊อ อา เฮ๊ เน๊อ, “เด๊อ ซี หยื่อเอ่ อาขว่าอาคยา, แว แหย่โอ่เหม่ ซี.” 30เร๊อ เหย่ซี เป๊เส่ ลีกาคยา คยาแซ๊ ลอ. แบ่เจ่ เหย่ซู่ เฮ๊ตาเฮ๊เตแก เหย่ซี เน๊อ, “แด๊โฉ่โล เป่ แต่ อู เตเพร่ว แต่เหม่ นี๋” 31หม่าแน๊เรอ เหย่ซี เถ่จว๊า เร๊อ จว๊าเล แด๊โฉ่ ปีชีลอ เตหรี่เตแก เออ เบ๊อะเนอเต๊เก่ อากู เด๊อ เหล่โอ่ ปว๋า โต๊โผ่.

32เบ๊อะแกแย เป๊เส่คี๊ เออซิเนอ เถ่จว๊า โทเนอ, อู เอ๊แฮหนิ แกแยเพ เด๊อ โลเน๊ เมเบ่ ลู เร๊อ อา เป๊ เตเพร เด๊อ แบ่เจ่ เหย่ซู่ อาโอ่. 33เบ๊อะแบ่เจ่ เหย่ซู่ เหว่เถ่แก โทเฮ๊อ โลเน๊ เบ๊อะเนอ, แกแยเป๊ เออเตเพร เฮ๊เบ่ แจ่ กาคยา คยาแซ๊. เร๊อ แกแย เบ๊หมู่ เต๊เห่ คย๊าอายื๊อ แหน่เจ๊อ. “อาทวา เต ฮู๊เออ เด๊อ อิสราเอลพู๊ อาเกล เนอ แม๊เถอะ แต่ล๋าย แตแค๋ โต่,” เตเพร๊ เร๊อ เตเพร อาเฮ๊แลแค ลู เนอ.

34หม่าแน๊เรอ, ฟาริสี เต๊เห่ เฮ๊ เน๊อ, “อา เหว่เถ่แก แจ่ โลเน๊ เต๊เห่ ฮู๊เออ เนอหม่า หม่าแพ๊ โลเน๊ กู่กล๊อดุ เนอเต๊เห่ ย๋อ เด๊อะ ลู เตอเรอฉว่าชอ เนอ ขว่าคยา แพ๊.” ^d

เหย่ซู่ ซิยอเกอเร๊อ แกแย เบ๊หมู่

35แบ่เจ่ เหย่ซู่ เล จว๊าลอ วี ปว๊าวี ดอ ปว๋า ตอดอ เร๊อ เล อิซว๊าอี๊แส่ เป่ อู เด๊อ แกแยยิวพู๊ เตจ๊อเบโฮ เต๊เห่ อากู, เร๊อ จว๊าโน โด่แนแด๊โฉ่ เป่ อู เร๊อ จอแปแหร่ อาเทออาเก่ อา เตซิครือมีลา อาหรี่อาแก, เร๊อ แหย่โอ่เหม่ เป่ ลอ อู เตชุ๊ยเตเช ปว๋า เต๊อเจ่อ. ^e 36เบ๊อะอา แม๊เถอะ แกแย เบ๊หมู่ เด๊อ อา เบ่แป่เบ่เช เร๊อ อาเหล่ ซิเล เกอเร๊อ อู โอ่ เตเพร่ว โต่ เร๊อ อา แซ่เน๊อ ซิหมิ ตู๊หมู่ เด๊อ อู เพรเก เหย่ซี โอ่โต่ เออ เต๊เห่ เบ๊อะเนอ, แบ่เจ่ เหย่ซู่ ซิยอ เกอเร๊อ แหน่เจ๊อ เหย่ซี. ^f 37เบ๊อะเนอเค, อา เฮ๊ อา โคเจ่ เต๊เห่ เน๊อ, “โบ๊ เด๊อ เหล่เก๊ เนอ อามีเอ๊ลาเฮ๊อ, หม่าแน๊เรอ เพรเก๊โบ๊ โอ่ปีตี๋ แหน่เจ๊อ. ^g 38เร๊อ กุย แลแค จอแปแหร่ เด๊อ อาทวา แหล่ แบ่เจ่ เนอ เร๊อ อา เก่ ซูจว๊า เพรเก๊โบ๊ เต๊เห่ เด๊อ อาแหล่ขุ เออเนอ นี๋.”