Matthew 12:22-30
แบ่เจ่ เหย่ซู่ เร๊อ เบเอลเซบูล
(มาระโก ๓:๒๐-๓๐, ลูกา ๑๑:๑๔-๒๓, ๑๒:๑๐)
22โทเรอ เหย่ซี เอ๊แฮหนิ แกแยเพ เด๊อ โลเน๊ เมเบ่ ลู เร๊อ อา เป๊เส่คี๊ เร๊อ อา เป๊ เกอ เร๊อ เออเตเพร เด๊อ แบ่เจ่ เหย่ซู่ อาโอ่. แซ่ฮู๊ อา เก่ เฮ๊เบ่แจ่, แม๊เถอะ แจ่ กาคยา คยาแซ๊ เนอ, อา แหย่โอ่เหม่ เป่ ลู. 23แกแย เบ๊หมู่ เต๊เห่ คย๊าอายื๊อ แหน่เจ๊อ, เร๊อ อา เฮ๊ แลแค เน๊อ, “แกแย เออเตเพร หม่า คุ๊ยดาวิด อาพู๊ เจ๊อกอ?” 24หม่าแน๊เรอ เบ๊อะ ฟาริสี เต๊เห่ หนิโฮ อู เฮ๊ ฮู๊เนอ อาเค, เหย่ซี เฮ๊ เน๊อ, “อา เหว่เถ่เบ๊ โลเน๊โลหน่า เนอเต๊เห่ หม่า หม่า แพ๊ โลเน๊โลหน่า อา กู่กล๊อดุ เบเอลเซบูล เมจว่า ลู แพ๊” a 25แบ่เจ่ เหย่ซู่ ซิเง เหย่ซี เหล่เตเน เต๊เห่ เร๊อ อา เฮ๊ เหย่ซี เน๊อ, “เก่เต๊เก่ อากูเนอ อา ลูโพร๊ลูแพรแก แกลอ อากย๊า อางา ช๊าหนิ เร๊อ ดื่อลู เตเพร เร๊อ เตเพร เก่ เฮ๊ เรอ อาลูโพร๊ลูแพร ลอปา. วีตีวี เบ่เบ่ เน๊อ หี่ตี๊หี่ เร๊อตี๊หี่ อากย๊า อางา เร๊อดื่อ ลู อา ลูโพร๊ลูแพร ลอ ลู ปา. 26โลเน๊โลหน่า อา เหว่เถ่แก เกอเร๊อ คยาแซ๊ดื่อ อาแกแย เต๊เห่ เก่เฮ๊เรอ อาแซ่เน๊อ อา ช๊า กาคยา เกอเร๊อ คยาแซ๊ ดื่อ อาเหน่ แพ๊. ฮู๊เนอเรอ อาเทออาเก่ จว๊าโอ่ กลอหม่า แจ่ ฮู๊เต? 27เก่ แว เหว่เถ่ โลเน๊โลหน่า เนอ เบเอลเซบูล อา เตอเรอฉว่าชอ เก่เฮ๊เรอ, ซี โคเจ่ เต๊เห่ เกอลาติ เรอ อา นอจ่อ หม่าอูเป อา เตอเรอฉว่าชอ เร๊อ อา เหว่เถ่ เป? หม่า อา นอจ่อ โลเน๊มู๊แหม่รีแจ่ กู่กล๊อ อา เตอเรอฉว่าชอ แอ? อา นอจ่อ หม่า น๊อโต่. ฮู๊เนอ อาขว่าอาคยา, ซี โคเจ่ อา เด๊อะโล เกอเร๊อดื่อ ซี เมเต ซื๊อ เนอปา. 28หม่าแน๊เรอ แว เก่ เหว่เถ่แก โลเน๊โลหน่า เออเต๊เห่ เร๊อ จอแปแหร่ อา แหย่โยบูโพ๊ เก่เฮ๊เรอ, เออเนอ หม่า อายูโล เน๊อ จอแปแหร่ เป๊อะเทอ เป๊อะเก่ เออเนอ อา แฮโต่เฮ๊อ เด๊อ ซีโอ่ เฮ๊อ. 29“หม่าโต่เรอ, เบ๊อะแกแย เตเพร จว๊าโน เด๊อ แกแยฉว่าแกแยชอ เตเพร อาหี่ เบ๊อะเนอ, แซ่เน๊อ โลเน๊ มู๊แหม่ กู่กล๊อ, เก่ โน จอกลอหม่า เหร่อ ลู โต่ เก่เฮ๊เรอ อา จว๊า พย๊าเผ่ แจ่ ลูตาเต ฮู๊เต? อา จอกลอ หม่า โท ลู ตื๊อหม่า อา พย๊าเผ่ หนิ แจ่ ลู ตาเต แพ๊. 30“แกแย เด๊อ อา โอ่เกอ เด๊อ แว ตากยา โต่ เนอ, หม่า แกแย เด๊อ อา ซิเถ่ แว เฮ๊อ, แกแย เด๊อ อา เมเต่อเกอ เต เร๊อ แว โต่ เนอ, หม่า แกแย เด๊อ อา เมโพร๊ เมแพร เต เฮ๊อ. b
Copyright information for
EkySCThai