Matthew 13:18-23
แบ่เจ่ เหย่ซู่ เฮ๊โฉ่โปล เป่ อู เพรเว๊อตา เตกลุย อาโหง่แลช๊า อาหรี่อาแก
(มาระโก ๔:๑๓-๒๐, ลูกา ๘:๑๑-๑๕)
18“เมฮู๊เนอเรอ หนิดา แลแค เตโด่แน ค๊าโข่ เพรเว๊อตา เตกลุย อาโหง่แลช๊า อาหรี่อาแก เออ. 19เบ๊อะแกแย เตเพรเพร หนิโฮโปล จอแปแหร่ อาเทออาเก่ เตหรี่เตแก เร๊อ อา ซิเงโปล โต่ เนอหม่า, อาแซ่เน๊อ เตกลุย ลูตา เด๊อ แกล๊เดกู เร๊อ โลเน๊มู๊แหม่รีแจ่ กู่กล๊อ แฮพย๊า ตาพาแก เตกลุย เด๊อ อู เว๊อตา เด๊อ เหย่ซี ซิปล่อกู เนอเต๊เห่. 20เตกลุย เด๊อ อา ลูตาโต เด๊อ หล่อเกล เออเต๊เห่ เนอหม่า อาแซ่เน๊อ แกแย เด๊อ อา หนิโฮ จอแปแหร่ อาลาอาโหง่ เร๊อ โตโพ๊โต อา ซิครือซิลอ พย๊าฉื่อ เนอเต๊เห่ เฮ๊อ. 21หม่าแน๊เรอ อา หยื่อเอ่ แลแค เตอเปลอฮู๊ แพ๊, เมเตเฮ๊เรอ จอแปแหร่ อาลาอาโหง่ เนอ, อา โน โอ่หม่าโอ่กลอ เด๊อ เหย่ซี ซิปล่อกู โต่. เด๊อ อา หยื่อเอ่ จอแปแหร่ อาลาอาโหง่ เออ อาขว่าอาคยา, อา ข่าเบ่ เตแป่เตเช, เตเมจาเมจือ เร๊อ อา วีแก คยาแซ๊ อา เตหยื่อเตแหน่. 22เตกลุย เด๊อ อา ลูตา เด๊อ ส่อแช๊ส่อกิเกล เนอเต๊เห่ หม่า อาแซ่เน๊อ แกแย เด๊อ อา หนิโฮ จอแปแหร่ อาลาอาโหง่ ตื๊อดื่อเรอ อา ย๋อ เบ่กู่เบ่แก เกอเร๊อ เน๊อ อา เตโอ่เซอเพร, โทเรอ อา ย๋อ ซิหยื่อ ดุแหย่แถ่เซ แลแค อาขว่าอาคยา, ล๋อ เตเออเต๊เห่เนอ อา แค๊ปลื่อแถ่บี๊แก ลอเฮ๊อ ลู เร๊อ อาเส่อาโพ เถ่เบ๊ ปาโต่เฮ๊อ. 23เตกลุย เด๊อ อา ลูตา เด๊อ เห่หย่าเห่แร๊ขุ เต๊เห่ เนอหม่า อาแซ่เน๊อ แกแย เด๊อ อา หนิโฮ จอแปแหร่ อาลาอาโหง่ เร๊อ อา ซิเงโปล เนอเต๊เห่ เฮ๊อ. แกแย เออเต๊เห่เนอ อาเส่ โอ่เอ๊แถ่ โต่ เจ๊อ เด๊อ อาโพ๊ เตเย, อาโพ๊ เชอโซซว๊า, อาโพ๊ โซเชอ.”
Copyright information for
EkySCThai