Mat 21:33-46 | EkySCThai | STEP | “หนิดา โป่ แลแค เตโด่แน เด๊อ อาโร เออโต๊โต่. เบ๊อะเนอโตโพ๊เนอ เกเร๊รา แบ่เจ่ เด๊อ อาโหล่อาช๊อ เกอเร๊อ อา แท๊ทือเหมาะ เต๊เห่ โอ่เตเพร. อา ราตาวาบี๊ เกอเร๊อ ลอ อา เกเร๊เออ, เร๊อ อาขื่อโอ่ เกอเร๊อ อาเห่กู ตูกู เด๊อ อา เก่ วีเถ่ เร๊อ แท๊ทือเส่เทอ อาเง, โทเรอ อา ช๊อแถ่ เกอเร๊อ เหล่โอ่ป่อแม๊ เร๊อ เพร๊ อาเง เตเม โทเรอ อา ปลวา เมเอ่โก๊ เอ่แก อาเพร๊เออ เนอ เพรเมเพร๊ เต๊เห่ เร๊อ อา เถ่จว๊าแก เด๊อ เก่โร เต๊เก่.

Matthew 21:33-46

เตโด่แน ค๊าโข่ เพรเมเอ่ แท๊ทือเผ่ เด๊อ อาจาจือ เต๊เห่

(มาระโก ๑๒:๑-๑๒, ลูกา ๒๐:๙-๑๙)

33 “หนิดา โป่ แลแค เตโด่แน เด๊อ อาโร เออโต๊โต่. เบ๊อะเนอโตโพ๊เนอ เกเร๊รา แบ่เจ่ เด๊อ อาโหล่อาช๊อ เกอเร๊อ อา แท๊ทือเหมาะ เต๊เห่ โอ่เตเพร. อา ราตาวาบี๊ เกอเร๊อ ลอ อา เกเร๊เออ, เร๊อ อาขื่อโอ่ เกอเร๊อ อาเห่กู ตูกู เด๊อ อา เก่ วีเถ่ เร๊อ แท๊ทือเส่เทอ อาเง, โทเรอ อา ช๊อแถ่ เกอเร๊อ เหล่โอ่ป่อแม๊ เร๊อ เพร๊ อาเง เตเม โทเรอ อา ปลวา เมเอ่โก๊ เอ่แก อาเพร๊เออ เนอ เพรเมเพร๊ เต๊เห่ เร๊อ อา เถ่จว๊าแก เด๊อ เก่โร เต๊เก่. ^a 34 แซ่ฮู๊ เพรเมเอ่โก๊ ลู เพร๊ เต๊เห่ เก่ เบเอ่เป่ เกอ ลู ส่อเส่ เต๊เห่เนอเรอ, เบ๊อะผื่อแฮ เฮ๊อ เด๊อ โต บ่าปล๊อ เฮ๊อ แท๊ทือเส่ อาเค เนอ, อา นอแฮ อาหลู่เล๊ เต๊เห่ เด๊อ เพร เม เอ่ โก๊เอ่ เพร๊ เต๊เห่ อา โอ่.

35 “เพรเมเอ่โก๊ เพร๊ เต๊เห่เนอ อา ปื่อ เพร๊ แบ่เจ่ อาหลู่เล๊ เออเต๊เห่ เร๊อ อา มือ ลูเต เตเพร, อา เมเซอแก ลูเต เตเพร, เตเพร เร๊อ อา ต่า ลู เร๊อ หล่อ. 36 เออโตโพ๊เรอ อา นอแฮ โหร่เล๊อ เกอลาติ หลู่เล๊ เด๊อ เหย่ซี โอ่ เร๊อ อา แฮเอ๊ เล๊อ เร๊อ อา แฮ เหร่อ เนอเต๊เห่ เจ๊อ ตื๊อดื่อเรอ เพร เมเอ่โก๊เพร๊ เนอเต๊เห่ เมจาเมจือ เหย่ซี แซ่เน๊อ อา แฮ เหร่อ เนอเต๊เห่ แพ๊. 37 เด๊อ คยาตื๊อดื่อเนอ, อา นอแฮ อา พู๊เพรคู เด๊อ เหย่ซี อา โอ่ อาเตเน เรอ, ‘แวพู๊ เร๊อดื่อ เรอ หม่า เหย่ซี เกล๊ ซิแหน่ซิเตเร เล๊อแหน่ แพ๊,’ อา เฮ๊ ฮู๊ เนอ.

38 “หม่าแน๊เรอ เบ๊อะเพรเมเอ่ โก๊ เอ่เพร๊ เออเต๊เห่ แม๊เถอะ ลู เบ๊อะเนอ, เหย่ซี เฮ๊ เกอเร๊อลู เน๊อ, ‘อา หม่า เพร เด๊อ อา พย๊าหนิ อู่เจเต๊เหย่ เนอเตเพร เฮ๊อ, จว่า! จว๊าเมเซอแก ลู โป๋, เร๊อ เป เก่ พย๊า แกเผ่ อา อูเจเต๊เหย่ ปา,’ อา เฮ๊ แลแค ฮู๊เนอ. 39 เร๊อ อา ปื่อ ลู เร๊อ อา จุ่ยเถ่แก ลู เด๊อ เกเร๊กลอ เร๊อ อา เมเซอแก ลู.

40 “ฮู๊เนอเรอ ช๋า เพร๊แบ่เจ่ แฮโต่ ปาเนอ, อา เก่ เม เหย่ซี ฮู๊เต ปา?”

41 เพรหลู่แต กู่กล๊อ เต๊เห่ เร๊อ แกแยยิวพู๊ เตจ๊อบู่จ๊อเบ โหมะพรู โหมะเผระ เฮ๊ฉื่อ เน๊อ, “อา เก่ เมจาเมจือ, เมเซอแก แกแยมู๊แหม่ รีแจ่ เนอเต๊เห่ ปา. เร๊อ อา เก่ ปลวาเมเอ่ โค๊ลาติ อาเพร เพรเมเอ่โก๊เพร๊ เด๊อ อา เก่ เบ กาคยาเอ่ เป่ ลู ปา เบ๊อะเตเส่เตโพ เถ่เค เนอเต๊เห่ ปา.”

42 แบ่เจ่ เฮ๊ เหย่ซี เน๊อ, “ลีเทส่อพ๊ากู ราม๊า เนอ,

‘แกแย เมแถ่ หี่ เร๊อ หล่อ เด๊อ เหย่ซี วีแก ลู เนอเตเมเนอ อา ทวาแถ่ หล่อ เด๊อ อา ตาทว๊าหม่า ลอ เจ๊อ หี่เตเม เจ๊อ เออเนอหมา แบ่เจ่ จอแปแหร่ เมเต แพ๊, เร๊อ อา เมเต เออเนอหมา อา โคตีกลี๊ แหน่เจ๊อ’ ^b

ลีเทส่อพ๊ากู ราม๊า เออเนอหม่า ซี แด๊น๊อ เกออู โตโพ๋ โต่ แอ? ซี เกล๊ แด๊ น๊อ แหน่ แพ๊.”

43 “ฮู๊เนอเรอ แว เฮ๊ ซี ม๊อขุ เทอเลเก่กู เด๊อ ซี โต พย๊าหนิเนอ จอแปแหร่ พย๊าเผ่แก ซี ปา. เร๊อ อา เก่ เด๊อ เร๊อ แกแย เด๊อ อา จูเอ่ จอแปแหร่ อาโหง่ เนอเต๊เห่ ปา. 44 แกแย เด๊อ อา ลูตา เด๊อ หล่อ เออเตเม อาลูเนอ, อาครุ๊ย อา แลเก่ แพ๊ ปา, หม่าแน๊เรอ หล่อ เออเตเม เก่ ลูตา เด๊อ ลู ลูปา, อาครุ๊ยอาคร๊วา อา หมื่อ ตีพรี ลอ เจ๊อ ปา.” ^{▼▼อู รา ลีพ๊า มู๋ หนู่เค เต๊เห่เห่เนอ, อู แม๊เถอะ ลีเทส่อพ๊า เออตามา โอ่ป่า เต่อเกอ โต่}

45 เบ๊อะเพรหลู่แต ทวาดุทวาเต เต๊เห่ เร๊อ ฟาริสี เต๊เห่ หนิโฮ แบ่เจ่ เหย่ซู่ แด๊ค๊าโข่ เบ๊อะเนอ, เหย่ซี ซิเง เร๊อ แบ่เจ่ เฮ๊โข่ เหย่ซี. 46 เร๊อ เหย่ซี แม๊ปู แลแค แกล๊ เด๊อ อา เตเร ปื่อ เหย่ซู่ หม่าแน๊เรอ เหย่ซี ซิอิเช แกแย เบ๊หมู่ เนอเต๊เห่ อาเหล่, แกแย เบ๊หมู่ เต๊เห่ ย๋อ หยื่อเอ่ แลแค เน๊อ เหย่ซู่ หม่า เพรโพร เตเพร อาขว่าอาคยา, อาปื่อ บื่อ ลูโต่.