Matthew 22:23-33
เต แด๊ เฮอโอ่เซอเพร ช๋า เซอโท ปา อาหรี่อาแก
(มาระโก ๑๒:๑๘-๒๗, ลูกา ๒๐:๒๗-๔๐)
23เบ๊อะเนอ เตอเนอเฮ๊อ, สะดูสีพู๊ เด๊อ เหย่ซี หยื่อเอ่ดื่อเง เน๊อ ช๋า เซอโทปา เนอ เร๊อ เตเซอเพร กาคยา โอ่ ปา โต่ ตูหมู่เนอ, เหย่ซี แฮ เด๊อ แบ่เจ่ อา โอ่ เร๊อ อา แฮ แด๊เฮอ ลู โหง่ ตือมือ. a 24เร๊อ เหย่ซี แด๊เฮอ แบ่เจ่ เหย่ซู่ เน๊อ, “ซ๊าร๊าดุ, คูโมเสส เฮ๊ เป่ เป เร๊อ เพรคู เตเพรเพร อา เก่เซอ เร๊อ อาพู๊ เก่ โอ่แก เตเพร่ว โต่ เฮ๊เนอ, แซ่ฮู๊ อากลุยอาแล เก่ โอ่แก เกออู เนอเรอ, อา โป่เพรคู เบ่ พย๊าดว้า อาคี โอ่แกเออ, อา เฮ๊ ฮู๊เนอ. b 25กู๊แหน่ เรอ เด๊อ เปเกลเนอ โป่ เร๊อ แหม่ เพรคู โอ่ โซซว๊าเตเพร. อา แหม่ดุเล๊อ เตเพร พย๊า อาเม เร๊อ เด๊อเหร่อเนอ อา เซอแก อาเม เหล่, เร๊อ อาพู๊ โอ่แก เตเพร่ว โต่ อาขว่าอาคยา, อาโป่ เด๊อคยา เตเพร เบ่พย๊าดว้า อาคี โอ่แก เออเตเพร. 26อาโป่ เนอเพร เตเพร โทเร๊อ โซเพร เตเพร โต่เด๊อ อาเพร โซซว๊าเตเพร เออเตเพรเนอ, อา ทวาแถ่ แซ่เกอ ลอ ฮู๊ อาแหว่เพร่ว ทวาแถ่ เนอ. 27เด๊อคยาตื๊อดื่อ เร๊อ เพรเหมาะ เออเตเพร เซอ เกอเนอ แพ๊. 28ฮู๊เนอเรอ ช๊า เซอเพรกาคยา อาม๊อเนอ ปา เตอเนอเนอ, เออ โซซว๊าเตเพร อาเกลเนอ, เบ๊อะเตเพร อา ทวา อาเว เป? เมเตเฮ๊เรอ เหย่ซี ทวาน๊อลอ ลูเว เนอ,” เหย่ซี แด๊ เฮอ แลแค เหย่ซู่ ฮู๊ เนอ. 29เร๊อ แบ่เจ่ เหย่ซู่ เฮ๊ฉื่อ กาคยา เหย่ซี เน๊อ, “ซี เตเนซื๊อ ลอเฮ๊อ, เมเตเฮ๊เรอ ซี ซิเง ตาเต เกอ อู ลีเทส่อพ๊า เร๊อ จอแปแหร่ อา เตโพรอาฉว่าอาชอ เมแจ่ เต เต๊เห่ โต่. 30เมเตเฮ๊เรอ ช๋า อู เซอ ก๊อถ่อกาคยา ปาเนอ อู พย๊าพู๊พย๊าเม, อู พย๊าพู๊พย๊าเว โอ่ ปาโต่เฮ๊อ, เหย่ซี เก่ แซ่เกอ ลอ ฮู๊ ม๊อขุ เตเน่วพู๊ เนอเต๊เห่ ปาเฮ๊อ. 31– 32เตเซอ ก๊อถ่อกาคยา อาหรี่อาแก เออเนอ, จอแปแหร่ เฮ๊แก เน๊อ, ‘แว หม่า เพอับราฮัม อา จอแปแหร่, เพอิสอัค อา จอแปแหร่, เร๊อ เพยาโคบ อา จอแปแหร่.’ อา เฮ๊ ฮู๊เออ เนอหม่า ซี แด๊น๊อ เกออู โต่ แอ? จอแปแหร่ หม่า แกแยเซอ เต๊เห่ อา จอแปแหร่ หม่าโต่, แกแย เซอเพร เต๊เห่ อา จอแปแหร่.” c 33เบ๊อะแกแย เบ๊หมู่ หนิโฮ อา เตอิซว๊าเออ เบ๊อะเนอ, อาคย๊าอายื๊อ ลอปลี เจ๊อ.
Copyright information for
EkySCThai