คูฟีเลโมน หม่า ครี๊พู๊ เด๊อ อามุย โลเทอโลเก่ เตเพร. ตาแร๊หม่า อา หม่า โคโลสี เพรหยื่อเอ่เต ตู๊หมู่ตอกล๊อพู๊ เตเพรเก่. อา หม่า อา ทวา คูโอเนสิมัส อาหลู่เล๊ แบ่เจ่ เตเพร. คูโอเนสิมัส แกล่ เถ่จว๊า ตาพาแก เร๊อ อาแบ่เจ่ คูฟีเลโมน เร๊อ อา จว๊า แม๊เถอะ ตาฉื่อ เร๊อ คูเปาโล เด๊อ อู ด๊อตา ลู เด๊อ ทอกู เออเตเพร. เด๊อ คูเปาโล อาขว่าอาคยาเร๊อ, คูโอเนสิมัส ทวาแถ่แก ครี๊พู๊. คูเปาโล รา ลีฟีเลโมน เออต๊าบ่า เนอหม่า อา รา กุยซิยอ จว๊า คูฟีเลโมน เร๊อ อา เกเร กาคยา คยาแซ๊ เร๊อ อาหลู่เล๊ คูโอเนสิมัส เด๊อ คูเปาโล ซู กาคยา คยาแซ๊ เด๊อ ลูโอ่ เออเตเพร. เร๊อ อา รา กุยซิยอ ลู เน๊อ อา เก่ เอ๊โมฉื่อแร๊ ฮู๊ หลู่เล๊ เด๊อ อา ปลวาแก เฮ๊อ ลู เตซื๊อ เตเพร ตื๊อเนอ หม่าโต่, อา เก่ เอ๊โมฉื่อแร๊ ลูฮู๊ โป่แหว่ ครี๊พู๊ เตเพรเนอ.

เตเฮ๊เบ่ โต๊โต่ เร๊อ โต๊โต่

เตเฮ๊เบ่ เหร่อ เด๊อ เง ๑:๑-๓

ถู่เซ๊หนิ คูฟีเลโมน ๑:๔-๗

กุยซิยอ เป่ คูโอเนสิมัส เออเตเพร อาเง ๑:๘-๒๒

เตเฮ๊เบ่ เด๊อ คยา ๑:๒๓-๒๕

Philemon

1– 2แว หม่า คูเปาโล. แว เร๊อ คูทิโมธี หม่า เด๊อ ครี๊อาขว่าอาคยา, เป โป่แหว่ ลู. เร๊อ ราจว๊าเป่ ฟีเลโมน ลีเออต๊าบ่า. เด๊อ แว เม เป่ เหย่ซู่ครี๊ อาเตเม อาขว่าอาคยา, อู ด๊อตา แว เด๊อ ทอกู.

เป ราจว๊าเป่ ลีเออ เด๊อ เป โคแบ๊ซว๊า คูฟีเลโมน เด๊อ อา เม เต่อเกอเต เร๊อ เป เออเตเพร อา โอ่, เร๊อ เป โป่แหว่ ครี๊พู๊ เพรเหมาะ เหมาะอัปเฟีย, เร๊อ เป โป่แหว่ ครี๊พู๊ คูอารคิปปัส เด๊อ อาแซ่เน๊อ เกลอฮู๊ เตเพร เออเต๊เห่ อา โอ่, เร๊อ เพรหยื่อเอ่เต ตู๊หมู่ตอกล๊อ โอ่ เด๊อ คูฟีเลโมน อาหี่กู เนอเต๊เห่ อา โอ่. ^a

3เปเพ จอแปแหร่ เร๊อ แบ่เจ่ เหย่ซู่ครี๊ เก่ เด๊อะแลดื่อ ซี เตบุ๊ยเตเตอเรอ เร๊อ เตตู๊จุเตอเจ๊อนี๋.

คูฟีเลโมน อาเตโม เร๊อ อา เตหยื่อเตแหน่

4คูฟีเลโมน๋, เบ๊อะแว กุยจ๊อเบ เบ๊อะเนอ, แว เตเนแถ่เบ่ โต่ เน ปว๋า โตโพ๊ เร๊อ แว เฮ๊บุ๊ยเฮ๊เตอเรอ แว จอแปแหร่. 5เมเตเฮ๊เรอ, แว หนิโฮ เด๊อ เน หยื่อเอ่ หม่าแหน่ เฮ๊อ แบ่เจ่ เหย่ซู่ โทเรอ เน โมหนิเร๊อ ลอปลี แกแย หยื่อเอ่ หม่าแหน่ จอแปแหร่ เนอเต๊เห่ อาขว่าอาคยา, แว เฮ๊บุ๊ยเฮ๊เตอเรอ แว จอแปแหร่. 6แซ่ฮู๊ เน เตซว๊าแบ๊โค เร๊อ เพรหยื่อเอ่ เด๊อ อาโรเต๊เห่ เก่ เมจว่า แฮเงโต่ เน เด๊อ เน เก่ ซิเง เล๊อบาลอ เตแร๊ ปว๋า เต๊อเจ่อ เด๊อ เป พย๊าหนิ เด๊อ ครี๊ เออ เต๊เห่ อาเงเนอ, แว กุยจ๊อเบ เป่ เด๊อ เนเง. ▼

▼ลีเออ ตามาเนอ, เป เก่ แด๊ เน๊อ, “แว กุยจ๊อเบ เด๊อ เน เก่ แด๊โฉ่โด่แน เป่ อู เร๊อ เน เตหยื่อเตแหน่,” ฮู๊เออเนอหม่า อาหนิ แพ๊แพ๊. โต่หม่าแน๊ เป เก่ แด๊ เน๊อ, “แว กุยจ๊อเบ เด๊อ เปเตซว๊าแบ๊โค เร๊อ เน ฮู๊ เพรหยื่อเอ่ เตเพร เออเนอ,” ฮู๊เออเนอหม่า อา หนิหนิ.

7โคแบ๊ซว๊า โม, เน เตโม เนอ, อา เม ซิครือซิลอ แหน่เจ๊อ แว เร๊อ อา เด๊อะ ชอแถ่ แหน่เจ๊อ แวอ๊าแวเหร่. เด๊อ หม่าเต อาขว่าอาคยา เฮ๊เร๊อ, เน เมโม โทเฮ๊อ ล๋อ แกแย หยื่อเอ่ จอแปแหร่ เนอเต๊เห่ อาซิปล่อ เฮ๊อ.

เตกุยซิยอ เด๊อ โอเนสิมัส อาเง.

8เด๊อ เตเออ อาขว่าอาคยา, แว ซิหยื่อ กุย เร๊อ เตเมจว่า เต๊อเจ่อ. ครี๊ เด๊อะ เจ๊อ แว เตเตอเรอฉว่าชอ เด๊อ แว เก่ เบ่ เฮ๊เบ่บื่อ เฮ๊เบ่ฮา เจ๊อ แวโหง่ เร๊อ แว เบ่ นอเม เน เต เด๊อ อาแร๊ ฮู๊ เน โตเบ่ เมเนอ เจ๊อ ตื๊อดื่อเรอ, 9เป ย๋อ โม หนิเกอเร๊อ คยาแซ๊ลู เตเพร เร๊อ เตเพร อาขว่าอาคยา, แว กุยซิยอแพ๊ เน แพ๊. กู๊แหน่เร๊อ แว หม่าเฮ๊อ คูเปาโล เออ, แว โหมะเผระเฮ๊อ, โท๊โต่ เด๊อ เหย่ซู่ครี๊ อาขว่าอาคยาเร๊อ, อู ล๋อ ด๊อตาปา แว เด๊อ ทอกู เร๊อ แว กุยซิยอ เน แพ๊. 10แว กุยซิยอ เน เด๊อ คูโอเนสิมัส เฮ๊เป่ ลูเง แพ๊. อา หม่า อา แซ่เจ๊อเร๊อ แว พู๊เพรคู เตเพร เจ๊อ. เบ๊อะแว ตา เด๊อ ทอกู เบ๊อะเนอ, อา ทวาแถ่เฮ๊อ แวพู๊คู เด๊อ ครี๊ อากู เตเพรเฮ๊อ. ^c 11เด๊อ อาเหร่อเค เนอหม่า อา ทวาบุ๊ยทวาเตอเรอ เด๊อ เนเง โต่ ตื๊อดื่อเรอ กู๊แหน่เออ อา เก่ ทวาบุ๊ยทวาเตอเรอ เด๊อ เนเง เร๊อ แวเง เฮ๊อ.

12อา หม่า แกแย เตเพร เด๊อ แว โม เกอเร๊อ แหน่เจ๊อ ลู เร๊อ แว ซูกาคยา โตคยาแซ๊ อา เด๊อ เนโอ่. 13เด๊อ เตซิครือซิลอมีลา อาขว่าอาคยาเร๊อ, อู ด๊อโอ่ปา แว เด๊อ ทอกู เออเบ๊อะเนอ, แซ่ฮู๊ อา เก่ เมจว่า แว เด๊อ เน เงเนอเรอ, แว ซิหยื่อ เอ๊ โอ่ ตื๊อดื่อปา อา เด๊อ แว ช๊า. 14หม่าแน๊เรอ เน ย๋อ ซิเง แล๋ ลู อาหรี่อาแกโต่, โทเรอ เน ย๋อ อ๊อแล แล๋ แว เตอเจ๋อ โต่ อาขว่าอาคยา, แว ซิหยื่อ เมล๋ายโต่. แว ซิหยื่อ นอฉว่า เร๊อ เน โต่โต่. จู๋ ดื่อ เน ซิปล่อ ซิหยื่อ เมจว่า แว แพ๊. 15ตาแร๊หม่า เตหรี่เตแก เด๊อ อา เถ่จว๊า ตาพาแก เร๊อ เน แตแปล๊เตอเปลอ เออเนอหมา, แซ่ฮู๊ เน เก่ เมหนิ กาคยา คยาแซ๊ อา ตูจูเพร อาเง เนอแพ๊ เก่. 16เร๊อ เน พย๊าหนิ กาคยา คยาแซ๊ คูโอเนสิมัส เออเนอหมา อา หม่าปา ฮู๊ หลู่เล๊ เตเพร โต่, อาแร๊ เล๊อ เจ๊อ เร๊อ หลู่เล๊, อา ทวา เจ๊อ เฮ๊อ ฮู๋ ครี๊อาขว่าอาคยา, เร๊อโป่แหว่ ลู เตเพร เนอเจ๊อ เฮ๊อ. อา หม่า อาแซ่เน๊อ โป่แหว่ เด๊อ แว โมหนิเร๊อ ลู ตื๊อดื่อเรอ เน เก่ โมเล๊อ เจ๊อ ลู เร๊อ แว ปา, เมเตเฮ๊เรอ เน พย๊าหนิ กาคยา คยาแซ๊ อา ฮู๊ หลู่เล๊ เตเพร เร๊อ เด๊อ ครี๊อาขว่าอาคยา, เร๊อ โป่แหว่ ลู เนอเจ่อ ลอเฮ๊อ.

17ฮู๊เนอ อาขว่าอาคยา, เน เก่ แด่ แว ฮู๊ เพรเมโหร่ลูเต เตเพร เก่เฮ๊เรอ, เอ๊โมฉื่อ คยาแซ๊ อา ฮู๊ เน เมโมฉื่อ แว ปา เนอ นี๋. 18เฮ๊โก๊หลื่อ, อา เก่ เมซื๊อ โทเฮ๊อ เน เก่โอ่ เต๊เห่, โต่หม่าแน๊ อาเนออาฉู่ เก่โอ่ เน เต๊เห่ เก่เฮ๊เรอ, แด่ อา ฮู๊ แวเนอแวฉู่ เนอ นี๋. 19กู๊แหน่เร๊อ แว หม่าเฮ๊อ คูเปาโล เป๊อแถ่ ราหนิ ลีเออ เร๊อ แว กู๊ขุ เร๊อดื่อเจ๊อ. เก่ อา เมซื๊อ โทเฮ๊อ เน เก่โอ่ เต๊เห่, เก่หม่าโต่เรอ อา โหล่ปล๊า เน เก่โอ่ เต๊เห่ เฮ๊เรอ แด่ อา ฮู๊ แวเนอแวฉู่ เนอ, เร๊อ แว เก่ ปล๊าลี กาคยา คยาแซ๊ ดื่อ เน ปา. หม่าแน๊เรอ เด๊อ แวขว่าแวคยา เนอ, เน พย๊าหนิ เตเซอเพร อาเซ เด๊อ ครี๊ เออ เฮ๊อ อาขว่าอาคยา, เน แหน่แบ่เจ่ เร๊อดื่อ เน โหล่เด๊อ แว เนอ, แว โหล่เด๊อ ซิเงแถ่ปา เด๊อ เน โต่เฮ๊อ. 20ฮู๊เนอเรอ, แว โป่แหว่ คูฟีเลโมน๋ เป ย๋อ หยื่อเอ่เกอ แบ่เจ่ เหย่ซู่ อาขว่าอาคยา, แด่ทูซิปล่อ เร๊อ เมบุ๊ยเมเตอเรอ เหร่อเป่ แว เออเต๊อเจ่อ นี๋. แด่ทูซิปล่อเร๊อ เมโมแถ่ โก๊หลื่อ แว ซิปล่อ เด๊อ ครี๊ อากู นี๋. 21แว รา ลี เด๊อ เนโอ่ เออเนอ, แว หยื่อเอ่ เด๊อ เน เก่ จูเอ่ แวลาแวโหง่ เร๊อ แว ซิเง เด๊อ เน เก่ เมเอ๊เล๊อ เจ๊อ เร๊อ แว กุย เน เออเนอ ปา.

22เร๊อ อา โอ่ปา เต๊อเจ่อแด่ทูซิปล่อ เร๊อ ตี๊หรี่แตแร หนื่ออื่อ เหร่อเป่ แวเง หี่ด๊อกู โต๊โต่ นี๋, เมเตเฮ๊เรอ แว แม๊ชือ เด๊อ จอแปแหร่ อา หนิดา ซี เตกุยจ๊อเบ เร๊อ อา เก่ ซูกาคยา แว เด๊อ ซี โอ่ ปา.

เตเฮ๊โมเฮ๊แร๊ เด๊อ คยาเล๊อ

23เด๊อ เหย่ซู่ครี๊ อาขว่าอาคยาเร๊อ, คูเอปาฟรัส ตาเต่อเกอ ทอกู เร๊อ แว, เร๊อ อา ซูแฮ เตเฮ๊โมเฮ๊แร๊ เด๊อ ซีโอ่. ^d 24ฮู๊เนอเฮ๊อ เพรเมเต่อเต เร๊อ แว คูมาระโก, ^e คูอาริสทารคัส, ^f คูเดมาส เร๊อ คูลูกา ซีเต๊เห่ ซูแฮ เกอช๊าเหล่ อา เตเฮ๊โมเฮ๊แร๊ เต๊เห่ เด๊อ ซีโอ่. ^g

25แบ่เจ่ เหย่ซู่ครี๊ อาบุ๊ยอาเตอเรอ เก่โอ่เกอดื่อ เร๊อ ซี ล๋อ ปลี นี๋.