Philippians 1

1เป หม่า คูเปาโล เร๊อ คูทิโมธี. เป หม่า เหย่ซู่ครี๊ อาหลู่ เต๊เห่. เป ราจว๊า เป่ ลี เออต๊าบ่า เนอ จอแปแหร่ อาแกแย เด๊อ อา ทวาแถ่ เฮ๊อ เตเตอเจ๋อ โต เร๊อ เหย่ซู่ครี๊ เร๊อ อา โอ่ แลแค เด๊อ วีฟีลิปปี อากู เนอเต๊เห่ อา โอ่. เป ราจว๊าป่าเต่อ เป่เกอ เร๊อ เพรหยื่อเอ่ตู๊หมู่ตอกล๊อ ทวาดุ ทวาเต เต๊เห่ เร๊อ เพรเมจว่า เพรหยื่อเอ่เต ตู๊หมู่ตอกล๊อพู๊ เต๊เห่. ^a 2เปเพ จอแปแหร่ เร๊อ แบ่เจ่ เหย่ซู่ครี๊ เก่ เด๊อะดื่อ ซี เตเด๊อะบุ๊ยเด๊อะเตอเรอ เน๊อ เตตู๊จุเตอเจ๊อ นี๋.

คูเปาโล กุยจ๊อเบ เด๊อ แกแย วีฟีลิปปีพู๊ เด๊อ อา หยื่อเอ่ ครี๊ เต๊เห่ อาเง

3แว ซิเหน่แถ่เบ่ โต่ ซี เบ๊อะเคเต๋ เบ่เบ่ เนอ, แว เฮ๊บุ๊ยเฮ๊เตอเรอ แว จอแปแหร่. 4แว กุยจ๊อเบ เป่ เด๊อ ซีเง เบ๊อะเคเต๋ เบ่เบ่ เนอ, แว ซิครือซิลอ ปว๊า โตโพ๊ เจ๊อ. 5เมเตเฮ๊เนอ, แว เม เตซิครือมีลา เออเนอ, ซี ย๋อ เมเต่อเกอ เฮ๊อ เนอ แว เด๊อ กูลู่เค โต่กู๊แหน่ เจ๊อ เฮ๊อ. 6จอแปแหร่ เด๊อ อา เป๊อแถ่ ถู่แหล่ แร๊กา โทเฮ๊อ ซี ซิปล่อ เออเตเพรเนอ, แว หยื่อเอ่ ตาเต เจ๊อ เร๊อ อา เก่ เมแร๊ แฮเง ปลื๊อลา โต่เด๊อ เหย่ซู่ครี๊ อาม๊อเนอ แฮโต่ ปาเนอ โตโพ๊ ปา.

7แว ย๋อ โม แหน่เจ๊อ ซี อาขว่าอาคยา, แว เตเน ซีหรี่ซีแก ฮู๊เออเนอหม่า อาโต แพ๊. เบ๊อะแว โอ่ปา เด๊อ ทอกู อาเคเออเนอ เบ่เบ่, เบ๊อะแว โต เฮ๊เบ่ เตเก ตาตือ ฉื่อบี๊ เกอเร๊อ แว เตซิครือมีลา เร๊อ แว โต เฮ๊เบ่ หม่ากลอ ฉื่อ เกอเร๊อ แว เตซิครือมีลา อาเคเออเนอ เบ่เบ่, จอแปแหร่ เมแร๊ แหน่เจ๊อ เป เร๊อ อา เด๊อะตา โค๊ดื่อ เป เตเม เด๊อ เป เก่ เมโหร่ลู เต เร๊อ เล แด๊โฉ่โด่แน เป่ อู เร๊อ เตซิครือมีลา. 8แว ซิหนิโส่ แม๊เถอะ แหน่เจ๊อ ซี เร๊อ แว โม เกอเร๊อ ซี ปว๋า เตเพร เร๊อ เตโม เด๊อ เหย่ซู่ครี๊ เด๊อ แว เออเนอหม่า จอแปแหร่ ซิเง แพ๊.

9แซ่ฮู๊ ซี เตโม เกอเร๊อ ลู เตเพร เร๊อ เตเพร เออ, อา เก่ ฉว่าแถ่ เร๊อ ฉว่าแถ่, โท๊โต่ แซ่ฮู๊ ซี เก่ ซิเงแฮ เอ๊แถ่ เร๊อ เอ๊แถ่ โป่ แลแค โท๊โต่ แซ่ฮู๊ ซี เก่ ซิเง ลีแมลีเพ๊ แลแค เต เด๊อ อาซื๊อ เร๊อ อาโต เต๊เห่ อาเงเนอเรอ, แว กุยจ๊อเบ เป่ เด๊อ ซีเง แพ๊. 10แซ่ฮู๊ ซี เก่ ซิเงโปล ตาเต แร๊ เต เด๊อ อาแร๊เล๊อ เร๊อ ซี เก่ ซิปล่อ โพ๊แปละโพ๊, โท๊โต่ โต่ ช๋า ครี๊ แฮ คยาแซ๊ อาม๊อเนอ ปา เตอเนอเนอ, อู เก่ แด่แจ่ ปา แต่ เตซื๊อ เด๊อ ซีลู แต่เหม่ เนอ, แว กุยจ๊อเบ เป่ เด๊อ ซีเง. 11โท๊โต่ แว กุยจ๊อเบ เป่ เด๊อ ซีเง เนอ, เด๊อ เหย่ซู่ครี๊ อา เตโพรเตเตอเรอ ขว่าคยาเร๊อ, ซี เก่ เส่เถ่ แฮเง เกอ แลแค เตจ๊อเตเต อาเส่ เต๊เห่. เมเตเฮ๊เรอ เบ๊อะอู แม๊เถอะ ซี เส่เถ่ เตจ๊อเตเต อาเส่ เออเต๊เห่ เบ๊อะเนอ, อู เก่ แด่ดุหยื่อแหน่ จอแปแหร่, เร๊อ อู เก่ ถู่เซ๊แถ่หนิ ลู ปา.

แว โอ่เซอเพรเออ แว ซิเลตื๊อ ครี๊ แพ๊

12แว โป่แหว่ ซี, ล๋อ เตเมทวาแถ่ อาเหน่ เร๊อ แว เออเต๊เห่ เนอหม่า หม่า แพ๊ อา เมจว่า เป่ เตซิครือมีลา เก่ ดุแถ่ ทูแถ่ อาเงแพ๊ เนอหม่า แว ซิหยื่อ นอซิเง เกอ ซี. 13เด๊อ แว หยื่อเอ่ ครี๊ อาขว่าอาคยา, เร๊อ อู ด๊อโอ่ แว เด๊อ ทอกู แพ๊ เนอหม่า ล๋อ เกลอฮู๊ โอ่ป่อ คุ๊ยโฮเท เออเนอเต๊เห่ เบ่เบ่, ล๋อ แกแย เด๊อ อาโร เนอเต๊เห่ เบ่เบ่, อา ซิเง ลอ แพ๊. ^b 14เด๊อ อู ด๊อตา แว เด๊อ ทอกู อาขว่าอาคยาเร๊อ, โป่แหว่ ครี๊พู๊ โอ่โหร่โอ่เอ๊ อา เตหยื่อเอ่หนิ แบ่เจ่ เออเนอ อา ฉว่าแถ่ชอแถ่ โต่ แลแค เร๊อ อา แด๊โฉ่โด่แน ฮา แฮ เป่ เฮ๊อ อู เร๊อ จอแปแหร่ อาลาอาโหง่, เร๊อ เหย่ซี ชิอิเช ปา แลแค เตอ เจ๋อ โต่ เฮ๊อ.

15แกแย เต๊เห่เห่เนอ อา ซิเคว๊ เกอ แลแค แว, อา ซิหยื่อ ดี๊เจ แลแค แว เร๊อ อา แด๊โฉ่โด่แน เป่เกออู เร๊อ ครี๊ อา เตซิครือมีลา แพ๊. หม่าแน๊เรอ เต๊เห่เห่ หม่า อา แด่จ๊อแด่เต แลแค แพ๊ อาซิปล่อ เร๊อ อา แด๊โฉ่โด่แน เป่ อู แพ๊. 16เหย่ซี โมเร๊อ แว เร๊อ อา เม แลแค แพ๊, เมเตเฮ๊เร๊อ โตเบ่ เฮ๊เบ่เตเกบี๊ ตาตือเร๊อ เตซิครือมีลา อาเตเม เออเนอหม่า จอแปแหร่ เด๊อ แว แพ๊ เนอ, เหย่ซี ซิเง แพ๊. 17แกแย ซิเคว๊ แว เนอเต๊เห่ หม่า อา แด๊โฉ่โด่แน แลแค ครี๊ อาหรี่อาแก เน๊อ เตซิปล่อจ๊อ ซิปล่อเต โต่. เหย่ซี เนอเต๊เห่ หม่า อา ซิ ดี๊เจ แลแค แว แพ๊. แว ย๋อ โอ่ เด๊อ ทอกู อาขว่าอาคยา, เหย่ซี เม ฮู๊เออเนอหม่า อา ซิหยื่อ นอข่าเบ่ จาเล๊อ โป่ แว เตแป่เตเช แพ๊. 18แกแย เต๊เห่เห่เนอ, อา เก่ แด๊โฉ่โด่แน เป่ อู เร๊อ อา เตแด่ซิปล่อสู่เทอ เด๊อ อาซื๊อ เจ๊อ เบ่เบ่, เต๊เห่เห่เรอ อา เก่ แด๊โฉ่โด่แน เป่ อู เร๊อ อา เตแด่ซิปล่อสู่เทอ เด๊อ อาโต เจ๊อเบ่เบ่, อา เม แลแค เบ๊อะเต๊อเจ่อ เบ่เบ่, อา เหล่เฮ่ว โอ่ เน๊อ เตอเจ๋อ โต่. เต เด๊อ อา โหล่ดุเล๊อ เต๊อเจ่อ หม่า หม่า เฮ๊อ เหย่ซี แด๊โฉ่โด่แน เป่ อู เร๊อ ครี๊ อาหรี่อาแก เออเนอเฮ๊อ. แกแย เนอหมู่ลอ อา แด๊โฉ่โด่แน แลแค ครี๊ อาหรี่อาแก อาขว่าอาคยา, แว ซิครือซิลอ แพ๊.

แว เก่ ซิครือ แฮเง ตื๊อดื่อ โป่แหน่ ปา แพ๊, 19เมเตเฮ๊เนอ, เด๊อ ซี กุยจ๊อเบ ขว่าคยา, เร๊อ เหย่ซู่ครี๊ อา แหย่โยบูโพ๊ เก่ เมจว่า เป่ แว ปา ขว่าคยาเร๊อ, แว เก่ แลเปล๊เถ่ เด๊อ ทอกู ปาเนอ แว ซิเง แพ๊. 20แว เตซิหยื่อ เร๊อ แว เตแม๊ชือ หม่า อิเต เฮ๊เรอ, เด๊อ ครี๊ อา เป๊เส่เง ปาเนอ, แว เกล๊ ซิเตเรน๊อ แหน่ ปา ตีกี๋ โต่ เฮ๊อ. แว เซอเพร เบ่เบ่, แว เซอ เบ่เบ่, แซ่ฮู๊ อู เก่ ถู่เซ๊แถ่หนิ ครี๊ อาเงเนอเรอ, แว ซิหยื่อ โอ่เซอเพร เล๊อบา เจ๊อ เร๊อ เตซิปล่อคือฮา ฮู๊ แว คือแฮ เกอเร๊อ ปว๋า โตโพ๊ เนอแพ๊. 21เตโอ่เซอเพร เด๊อ แวเง หม่า อิเต เฮ๊เรอ, แว ซิหยื่อ โอ่เซอเพร เป่ตื๊อแพ๊ เด๊อ ครี๊ อาเง แพ๊, เร๊อ แว เก่ เซอ เฮ๊เนอหม่า เตบุ๊ยเตเตอเรอ โอ่เอ๊ เล๊อ เจ๊อ เด๊อ แวเง เจ๊อ. 22แว เก่ โอ่เซอเพร แฮเงหนิโป่ เฮ๊เรอ, แว เก่ เม เต เด๊อ อาบุ๊ยอาเตอเรอ โอ่ เนอเต๊เห่ ปา. หม่าแน๊เรอ แว เก่ นว๊าพย๊า เบ๊อะเต๊อเจ่อเต เนอ, แว ซิเง ตาเต แล๋ โต่. 23แว โต นว๊าพย๊า เบ๊อะเต๊อเจอะเต เนอ แว ซิเง โต่, อาแหย่ แหน่เจ๊อ เด๊อ แวเง เจ๊อ. แว ซิหยื่อ แด่แก แว เตเซอเพร เออตือทือ เร๊อ แว ซิหยื่อ กาโอ่ เต่อเกอ เฮ๊อ เร๊อ ครี๊ เฮ๊อ, ฮู๊เออเนอหม่า เตเด๊อ อาแร๊เล๊อเฮ๊อ เด๊อ แวเง เฮ๊อ. 24หม่าแน๊เรอ, เต เด๊อ อา โหล่ดุเล๊อ เต๊อเจ่อหม่า แว โตเบ่ โอ่เซอเพร เป่ เกอปา เด๊อ ซีเง เออเนอเฮ๊อ. 25แว ซิเง ตาเต เฮ๊อ เร๊อ แว โตเบ่ โอ่เซอเพร เป่ เกอปา เด๊อ ซีเง เร๊อ แว เก่ โอ่เต่อเกอ เร๊อ ซี ปา. แซ่ฮู๊ ซี เตหยื่อเตแหน่ เก่ฉว่าเก่ชอ แฮโต่, โท๊โต่ เด๊อ ซี หยื่อเอ่ ครี๊ ขว่าคยา, เร๊อ ซี เก่ ซิครือซิลอ แฮฉว่า โต่โป่ ปา เนอ เร๊อ, แว เก่ เมจว่า ซี ปา. 26แซ่ฮู๊ ซี เก่ ถู่เซ๊หนิ เหย่ซู่ครี๊ เม เป่ เตเด๊อ แวเง เออเต๊เห่เนอเร๊อ, แว เก่ กา โอ่เต่อเกอ คยาแซ๊ เร๊อ ซี ปา.

27– 28อา ทวาแถ่ ฮู๊เต๋ เบ่เบ่, ซี โต โอ่เซอเพร แลแค ฮู๊ ครี๊ อา เตซิครือมีลา แด๊โฉ่ เป่ ซีเนอ นี๋. ซี เก่ เมฮู๊เนอ เฮ๊เร๊อ แว แฮแม๊เถอะ ซี เบ่เบ่, แว โอ่ตาพายา เร๊อ ซี เร๊อ แว หนิโฮ แพ๊ ซีหรี่ซีแก เบ่เบ่, แว เก่ ซิเง แหน่ดื่อเฮ๊อ เร๊อ ซี ซิปล่อ จี่จื่อเฮ๊อ ลู เร๊อ ซี ก๊อถ่อช๊าฉื่อ แตแนโหร่เฮ๊อ ลู เด๊อ เตซิครือมีลา อา เตหยื่อเตแหน่ อาเงเฮ๊อ. โท๊โต่ ซี ชิอิเช ปา แกแย เด๊อ อา ซิเถ่ซิฮา ซี เนอเต๊เห่ อาเหล่ โต่เฮ๊อ. ซี เก่ เมฮู๊เนอ เฮ๊เรอ ซี ข่าเฮ๊โล เป่เฮ๊อ เหย่ซี เร๊อ จอแปแหร่ เก่ เมปย๊าแก เหย่ซี ปา, เร๊อ จอแปแหร่ เก่ เมแลเปล๊กา ลาติ ซี เร๊อ อาเหน่ เร๊อดื่อ ปา. 29เมเตเฮ๊เรอ, จอแปแหร่ เด๊อ ตื๊อแพ๊ ซี เตเด๊อะบุ๊ยเด๊อะเตอเรอ เด๊อ ซี เก่ หยื่อเอ่ ครี๊ เออเนอ หม่าโต่, อา ซิปล่อโอ่ เกอดื่อ เร๊อ ซี เก่ ข่าเกอ เตเมจาเมจือ เด๊อ ครี๊ อาเงเง. 30เตช๊า เด๊อ ซี ช๊า เออเนอหม่า อาแซ่เน๊อ แว ช๊า โทเฮ๊อ เนอเต๊เห่ แพ๊. แว ข่าเบ่ เต เด๊อ อาเหร่ออาเนอ เนอเต๊เห่หม่า ซี แม๊เถอะ โทดื่อ เฮ๊อ. โทเร๊อ ฮู๊ ซี หนิโฮ เฮ๊อ เนอ, แว ช๊า ตื๊อดื่อ โต่ ปา เจ๊อ กู๊แหน่เออเนอ เจ๊อ. ^c