Philippians 2

1ซี เตโอ่เซอเพร เด๊อ ครี๊ อากู เออเนอหม่า, อา หนิอ๊าหนิเหร่ ช๊าเหล่ ซี แอ? อาเตโม เออเนอหม่า อา เมโม ช๊าเหล่ ซี ซิปล่อ แอ? ซี แบ๊ซว๊าแบ๊โค เกอ ช๊าเหล่ แลแค เนอ แหย่โยบูโพ๊ แบ่เจ่ แอ? ครี๊ เออเตเพร เนอหม่า อา เมแร๊ เกอเร๊อ ซี, อา ซิยอ เกอเร๊อ ช๊าเหล่ ซี แอ? 2โทเนอ, โอ่ แลแค เร๊อ เตเตเน เตอเจ๋อโต, เตโมเร๊อ ลู เตอเจ๋อโต, ซิปล่อ เตเมโต เน๊อ เตเตเนหนื่ออื่อ เตอเจ๋อโต นี๋. ซี เก่ เมฮู๊เนอ เฮ๊เนอหม่า ซี เมเล๊อเมบา เป่ เฮ๊อ แว เตซิครือซิลอ เฮ๊อ. 3เบ๊อะซี เมเต เบ๊อะเนอ, แม๊ดุ เกอเร๊อดื่อ ตื๊อ ซี เตเพร อาเง แต่เหม่ นี๋, พย๊าดุพย๊าแถ่โล แต่ ซีเหน่ แต่เหม่, อู๊เตเต๋เบ่เบ่ แด่แลหนิ แลแค ซี ซิปล่อ เด๊อ เตเพร เร๊อ เตเพร อาเล นี๋, เร๊อ เตเนดุ เล๊อ อูโร เร๊อ ซีเหน่ เร๊อดื่อ นี๋. 4แม๊ปู เกอเร๊อ ตื๊อดื่อแพ๊ ซี เตโหล่ เต๊เห่ อาเงเน๊อ แต่เหม่ นี๋, เตเน โต่ เป่ เกออู เตเพร เร๊อ เตเพร อาเง นี๋.

5ซี โต แด่ แซ่ แลแค ซี ซิปล่อ ฮู๊ ครี๊เนอ.
6ครี๊ โอ่ เร๊อ จอแปแหร่ อาเหล่โกล แซ่เน๊อ จอแปแหร่ เนอเฮ๊อ, หม่าแน๊เรอ อา เตเน แด่ครือแน เกอเร๊อเกอ อาเหน่ เร๊อ จอแปแหร่ โต่. 7ฮู๊เตเต๊เบ่เบ่, อา วีแก อา เตโพรเตเตอเรอ เร๊อ จอแปแหร่ อาเหล่โอ่ เต๊เห่, อา วีแก เตปว๊าเต๊อเจ่อ, เร๊อ อา แฮแล ทวา อาเหน่ แซ่เน๊อ หลู่เล๊ เตเพร. โทโต่ อา แฮแล กลว่า อาเหน่ ฮู๊ แกแย เตเพรเนอ. 8เร๊อ อา แฮ เด๊อะโล เฮ๊อ อาเหน่ ฮู๊ แกแย เนอเฮ๊อ, โทเนอ, อา แด่หยว่า อาเหน่ เด๊อ อูเล. อา หนิดา จอแปแหร่ อาโหง่, อา เซอแก เจ๊อ เร๊อ อา แด่ เต เตอเจ๋อ โต่. โต่เด๊อ อา โตเบ่ เซอ เจ๊อ เด๊อ อี๊ถื่อดีเต่ลู เจ๊อ. เร๊อ อา จูเอ่ แพ๊. 9ฮู๊เนอเร๊อ จอแปแหร่ แด่ดุแด่ทู เกอเร๊อ ลู เร๊อ อา แด่แถ่ ลู เด๊อ อาเหล่โอ่ แถ่โหล่เล๊ออู เร๊อ อา เด๊อ ลู มุย เด๊อ อาดุเล๊อ เจ๊อ เร๊อ อูมุย ปว๋า เตเพร. 10– 11เบ๊อะอู เอ๊แถ่ เหย่ซู่ อามุย ปาเนอ เตเบ่แบ๊ทวา ล๊อ ปลี เด๊อ อา โอ่ เด๊อ ม๊อขุ เต๊เห่เนอ เบ่เบ่, เด๊อ เห่ขุ เต๊เห่เนอ เบ่เบ่, เด๊อ โลเน๊มู๊แหม่รีแจ่ดอ เต๊เห่เนอ เบ่เบ่, แซ่ฮู๊ แกแย ปว๋า เตเพร เก่ แฮ แด๊งือแล แด่หยื่อแด่แหน่ ลอ แลแค เด๊อ เหย่ซู่อาเป๊เส่เง ปา. โทโต่ แซ่ฮู๊ แกแย ปว๋า เตเพร เก่ อ๊อแล ลอ แลแค เร๊อ เหย่ซู่ครี๊ หม่า แบ่เจ่ เตเพร ปา โทโต่ แซ่ฮู๊ เหย่ซี เก่ แด่ดุแด่แถ่โล แลแค เพ จอแปแหร่ เร๊อ เหย่ซี อาเตอ๊อแล ฮู๊เนอ ปา อาเงเนอเรอ, จอแปแหร่ เด๊อะ เตอเรอดุเตอเรอทู เกอเร๊อเฮ๊อ เหย่ซู่ ฮู๊เนอ เฮ๊อ. ^a

เด๊อ เห่ขุ เออเนอ ซี เก่ ลีแถ่ ฮู๊ เตลี เต๊เห่เนอ ปา

12ฮู๊เนอเรอ, โคแบ๊ซว๊าโม ซี๋ เบ๊อะแว โอ่เต่อเกอ เร๊อ ซี เบ๊อะเนอ, ซี หนิดา แว โหง่, กู๊แหน่เออ แว โอ่ยา เร๊อ ซี อาขว่าอาคยา, ซี โตเบ่ หนิดา เล๊อ ปา เจ๊อ แวโหง่ เจ๊อ. แซ่ฮู๊ ซี เก่ เมเล๊อบาแถ่ เตเมแลเปล๊กา ซี อาเงเนอ, แอ๊จื๊อ เม แลแค เต เด๊อ เตแด่หยื่อแด่แหน่ จอแปแหร่ อากู, เร๊อ เม เต่อเกอดื่อ เร๊อ เตชิอิเช แตแนตากยา เจ๊อ อาเนอ นี๋. 13เมเตเฮ๊เรอ, แซ่ฮู๊ ซี เก่ ซิปล่อฉว่า ซิหยื่อ หนิดา ครวาเม เกอ ฮู๊ จอแปแหร่ อา เตซิหยื่อ เด๊อ อาแร๊ เต๊เห่ อาเงเนอ, อา เม เป่เฮ๊อ เต เด๊อ ซีกู ปว๋า โต๊โพ๊ เจ๊อ เฮ๊อ.

14– 15แซ่ฮู๊ ซี เก่ ทวาแถ่ แกแย อาโพ๊อาแปละ เร๊อ อู เหล่แด่ เตซื๊อ เด๊อ ซีลู เก่ โอ่ ปา แต่เหม่, โท๊โต่ แซ่ฮู๊ ซี เก่ ทวาดื่อ จอแปแหร่ อา พู๊เหมาะพู๊คู เด๊อ อาเตซื๊อ โอ่ โต่ เต๊เห่, เร๊อ เบ๊อะซี โอ่เซอเพร เด๊อ แกแย มู๊แหม่ จ๊อเตโต่ เออเต๊เห่ อาเกล เอออาเค, แซ่ฮู๊ ซี เก่ ลีเตเคแถ่ เป่ อู ฮู๊ เฉ่เต๊เห่ เด๊อ เห่ขุต๊าบ่า เอออาเงเนอ, ซี เมเต อิเตเต๋ เบ่เบ่, ตามวาเตเล เคร๊แขะ แต่ แลแค แต่เหม่ นี๋. ^b 16แด๊โฉ่โด่แน เป่เกอ แลแค อู เตเซอเพร อาหรี่อาแก เออเนอ นี๋. ซี เก่ เมฮู๊เนอ เฮ๊เร๊อ เบ๊อะครี๊ แฮแล คยาแซ๊ อาม๊อเนอ ปา เตอเนอเนอ, ล๋อ แว เตแอ๊จื๊อ เต๊เห่ เนอ แว เตเอ่เตแร เออเต๊เห่เนอ อา ทวาแถ่ แกเด ปาโต่เฮ๊อ อาขว่าอาคยา, เด๊อ ซีขว่าซีคยา เร๊อ แว เก่ พย๊าแถ่โล เกอเร๊อ แวเหน่ ปา. 17เด๊อ แว โด่แน เตซิครือมีลา อาขว่าอาคยา เร๊อ, เตแร๊หม่า แว เซอ เจ๊อ ปา แอ เบ๊อะซี หยื่อเอ่ เตซิครือมีลา อาเบ๊อะเนอ, ซี เด๊อะแล เฮ๊อ ซี ซิปล่อเซอเพร เด๊อ จอแปแหร่ อา โอ่ แซ่เจ๊อเฮ๊อเน๊อ เพรหลู่แตเต หลู่แถ่ เตมีเตดอ เด๊อ จอแปแหร่ อา โอ่ เนอ เฮ๊อ. อู เก่ เมเซอ แว เฮ๊เรอ, แวสุ่ย เก่ ทุ๊ยตา แซ่เจ๊อเร๊อ เพรหลู่แตเต เตเพร ยือตา เทอแย เด๊อ เห่ขุ เด๊อ อาแซ่เน๊อ อู หลู่แถ่ เตหลู่เตแต เนอเฮ๊อ. อา เก่ ทวาแถ่ ฮู๊เนอ เฮ๊เรอ แว เก่ ซิครือซิลอ, ซิกอล๊อแกแน เต่อเกอ ลอ เร๊อ ซี ปว๋า เตเพร แพ๊. 18ซี เบ่เบ่, ซี โตเบ่ ซิครือซิลอ, ซิกอล๊อแกแน เต่อเกอ แลแค เร๊อ แวแว.

คูทิโมธี เน๊อ คูเอปาโฟรดิทัส

19แซ่ฮู๊ แว เก่ ซิเงซีหรี่ซีแก เร๊อ อา เก่ เด๊อะอ๊าเด๊อะเหร่ เมโมแถ่โต่ โป่ แว ซิปล่อ ปา อาเงเนอ, อา เก่ โต แบ่เจ่ เหย่ซู่ อาซิปล่อ เฮ๊เร๊อ แว เก่ นอแฮ แพร เป่ ซี คูทิโมธี เด๊อ ซี โอ่ ปา เร๊อ อา เก่ กา แด๊โฉ่โล เป่ แว ปา. 20อาซิปล่อ โอ่ หม่าแหน่ เจ๊อ ซี เจ๊อ. ล๋อ แกแย เด๊อ อา โอ่ เกอ เร๊อ แว เบ๊อะเออ เต๊เห่ เด๊อ อา แซ่เน๊อ ลูเนอ แว แม๊เถอะน๊อ เตเพร่ว โต่. 21แกแย เด๊อ อาโร ล๋อ ปลี เต๊เห่ เนอหม่า อา แม๊ปู เมหนิ แลแค แพ๊ตื๊อ เต เด๊อ อา ทวาบุ๊ยทวาเตอเรอ เด๊อ เหย่ซี อาเง เร๊อดื่อ เนอเต๊เห่ แพ๊. อา แม๊ปู เม เป่ แลแค เหย่ซู่ครี๊ อาเง โต่. 22ซี ซิเงดื่อเฮ๊อ, คูทิโมธี หม่า แกแย งูดุงูชอ เตเพร. อา เมเต่อเกอ เฮ๊อ เต เร๊อ แว เด๊อ เตซิครือมีลา เก่ ดุแถ่ทูแถ่ อาเง เออเนอหม่า อา แซ่เจ๊อเฮ๊อ เร๊อ พู๊ เร๊อ เพ เนอเฮ๊อ. 23ฮู๊เน๊อเร๊อ ช๋า แว ซิเงเฮ๊อ เน๊อ เต เก่ ทวาแถ่ เฮ๊อ อาเหน่ เร๊อ แว เบ๊อะเออ ฮู๊เต ปา เบ๊อะเนอ, แว แม๊ชือ เด๊อ แว เก่ นอแฮแล เล๊แพร คูทิโมธี เด๊อ ซี โอ่ ปา. 24งยาแต๋โต่ ปาเนอ, แว หยื่อเอ่หนิ เร๊อ แบ่เจ่ เก่ เมจว่า แว ปา เร๊อ แว เหน่แบ่เจ เร๊อดื่อ, แว เก่ แฮเต่อเบ๊ เกอ เด๊อ ซี โอ่ ปา.

25แว โตเบ่ นอกาคยา เป่ ซี คูเอปาโฟรดิทัส เด๊อ ซี โอ่ แว เตเน ฮู๊เนอ. อา หม่า แว โป่แหว่ เตเพร, อา หม่า แกแย เด๊อ อา เมเต่อ โทเฮ๊อ เต เร๊อ แว เร๊อ อา ช๊า โหร่เต่อเกอ โทเฮ๊อ เต เร๊อ แว เฮ๊อ. อา หม่า แกแย เด๊อ อา ซู เป่ ซี ลี เนอเตเพร เฮ๊อ เร๊อ แซ่ฮู๊ อา เก่ เมจว่า เป่ แว เตโหล่ เต๊เห่เนอ เร๊อ ซี นอแฮ ลู เด๊อ แว โอ่ เนอเตเพร เฮ๊อ. 26หม่าเมเตเร๊อ ซี หนิโฮ เร๊อ คูเอปาโฟรดิทัส โอ่โมโอ่แร๊ โต่ อาขว่าอาคยา, อา ซิหนิโส่ แม๊เถอะ แหน่เจ๊อ ซี ปว๋า เตเพร เจ๊อ. เร๊อ อา เตเนกู่ เตเนแก เป่ แหน่เจ๊อ เด๊อ ซีเง เจ๊อ. ฮู๊เนอเร๊อ แว นอกาคยา คยาแซ๊ อา เด๊อ ซี โอ่. 27อา ซิชุ๊ย หม่าแหน่ เจ๊อ หนิ, อา เตเรผื่อเซอ ตีลี๊ เจ๊อ เฮ๊อ. หม่าแน๊เร๊อ จอแปแหร่ ซิยอเร๊อ ปา อา, เร๊อ อา ซิยอเร๊อ ตื๊อ อา หม่าโต่, อา ซิยอเร๊อ เกอ ปา แว. เมเตเฮ๊เร๊อ อา เก่ เซอบย่า เฮ๊เนอหม่า, แว เก่ ซิเปล เล๊อ โป่ เจ๊อ แหน่ เร๊อ เออ เฮ๊อ. 28ฮู๊เนอเรอ, ช๋า ซี แม๊เถอะ อา ปา เนอ, แซ่ฮู๊ ซี เก่ ซิครือซิลอ คยาแซ๊ ปา, โท๊โต่ แซ่ฮู๊ แว เก่ ซิปล่อกู่ หย่าเข่ แฮโต่ปา อาเงเนอเรอ, แว ลื๋อ ซิปล่อ ฉว่าเล๊อ โป่ เร๊อ แว เก่ นอกาคยา อา เด๊อ ซี โอ่ ปา. 29ฮู๊เนอ อาขว่าอาคยา, เอ๊โมฉื่อแร๊ แลแค อา ฮู๊ โป่แหว่ เด๊อ อา หยื่อเอ่ แบ่เจ่ เตเพรเนอ นี๋. เอ๊โมฉื่อ อา เร๊อ เตซิครือซิลอ เร๊อ แด่หยื่อแด่แหน่ แกแย เด๊อ อา แซ่เน๊อ อาเนอ เต๊เห่ นี๋. 30เมเตเฮ๊เรอ, ซี ย๋อ เมจว่าเบ๊ แว โต่ อาขว่าอาคยา, แซ่ฮู๊ อา เก่ เมจว่า แว อาเงเนอ, เด๊อ ครี๊ อา เตเอ่เตแร อาเง เนอ, อา โอ่ผื่อ เจ๊อ เร๊อ เตเซอ เจ๊อ.