Philippians 4
1ฮู๊เนอ อาขว่าอาคยา, แว โป่แหว่ ซี๋, ซี หม่า แกแย เด๊อ แว โม เกอเร๊อ เต๊เห่ เร๊อ แว ซิหนิโส่ เกอเร๊อ แหน่เจ๊อ เต๊เห่, ซี หม่า เพร เด๊อ อา เม ซิครือซิลอ แหน่เจ๊อ แว เร๊อ แว พย๊าแถ่โล่โม เกอเร๊อ แหน่เจ๊อ แวเหน่ เร๊อ ซีคยา เจ๊อ. โคแบ๊ซว๊าโม ซี๋ เออ หม่า หม่าเฮ๊อ ซี โต โอ่หม่าโอ่กลอ แลแค เด๊อ แบ่เจ่ อากู ฮู๊เตเนอ เฮ๊อ. 2เหมาะยูโอเดีย เร๊อ เหมาะสินทิเค ซี๋, ซี โป่เร๊อแหม่ เฮ๊อ ลู เด๊อ ครี๊ อากู อาขว่าอาคยา, แว กุยซิยอ ซี เร๊อ ซี เก่ ซิปล่อโต เกอลู เตเพร เร๊อ เตเพร. 3เน หม่า แกแย เด๊อ อา เมโหร่ เต เร๊อ แว เด๊อ อาจ๊อ เน๊อ อาโหง่ เตเพร เฮ๊อ. เร๊อ แว ซิหยื่อ กุยเกอ เน เตเมจว่า เต๊อเจ่อ, แซ่ฮู๊ เพรเหมาะเออ ซิเนอ เก่ โครเกล คยาลู อาเงเนอ, เมจว่า เหร่อเป่ เหย่ซี นี๋. เมเตเฮ๊เรอ เหย่ซี เออซิเนอ เนอหม่า อา แอ๊จื๊อ ท๊ออ๊าท๊อเหร่ เมโหร่เกอ เตเฮ๊ตา เตซิครือมีลา อาเตเม เนอ แว หนิ. เหย่ซี เมโหร่เกอ เร๊อ คูเคลเมนท์ เร๊อ แวโค เด๊อ เป เมโหร่ลู เต เด๊อ อาโร เนอเต๊เห่, เร๊อ ล๋อ เหย่ซี เนอเต๊เห่ อามุย หม่า อา โอ่ ลอเฮ๊อ เด๊อ แบ่เจ่ อา ลีเซอเพร อากู เนอเฮ๊อ. 4ซิครือซิลอ แลแค เด๊อ แบ่เจ่ อากู ปว๋า โตโพ๊ นี๋, เร๊อ แว เฮ๊ คยาแซ๊ ซี๋, ซิครือซิลอ แลแค นี๋. 5เน ซิปล่อ ซิโดซิงา เออเนอ นอแม๊เถอะ ลอ เร๊อ อูปวา เตเพร นี๋. แบ่เจ่ เตเร แฮโน อาผื่อลาเฮ๊อ. 6เบ่ยอ แต่ แลแค เตอเจ๋อ แต่เหม่ นี๋. หม่าแน๊เร๊อ เด๊อ เตล๋อ ปลี อากูเนอ, กุยจ๊อเบ เร๊อ กุย แลแค เต เด๊อ ซี โอ่ เนอเต๊เห่, เร๊อ กุย แลแค เน๊อ เตเฮ๊บุ๊ยเฮ๊เตอเรอ จอแปแหร่ นี๋. 7จอแปแหร่ เก่ เด๊อ ซี อา เตเตอเจ๊อตู๊จู่ เด๊อ แกแย เห่ขุพู๊ เตเน ทว๊าโต่ เออเนอ ปา. เด๊อ ซี ทวาแถ่ เฮ๊อ เตเตอเจ๋อโต เร๊อ เหย่ซู่ครี๊เฮ๊อ อาขว่าอาคยา, จอแปแหร่ อา เต เตอเจ๊อตู๊จู่ เก่ โอ่ป่อหม่า เร๊อดื่อ ซี ซิปล่อสู่เทอ เร๊อ ซี เตเตเน เต๊เห่ ปา. 8โป่แหว่ซี๋, หนิดา แลแค แว เตเฮ๊เบ่ เด๊อคยา ตื๊อดื่อเล๊อ เออเต๊เห่ นี๋. เด๊อ ซี ซิปล่อกู เนอ ซี โต เตเน แคร๋ ฮู๊เตเฮ๊เนอ, ซี โต เตเน ตื๊อแพ๊ เตเด๊อ อาหม่าอาจ๊อ เต๊เห่, เตเด๊อ อู แด่หยื่อแด่แหน่ อา เต๊เห่, เตเด๊อ อาโตอาเบ่ เต๊เห่, เตเด๊อ อา โพ๊แปละโพ๊ เต๊เห่, เตเด๊อ อู ซิหยื่อโมเร๊อ เต๊เห่, เตแด่ซิปล่อสู่เทอ เด๊อ อาตว่าอาแร๊ เต๊เห่, เตเด๊อ อาแร๊ แหน่เจ๊อ เต๊เห่, เตเด๊อ อู โตเบ่ ถู่เซ๊แถ่ เต๊เห่ เนอแพ๊ นี๋. 9ล๋อ ซี อิซว๊าพย๊าหนิ โทเฮ๊อ เร๊อ ซี แม๊เถอะ หนิโฮ โทเฮ๊อ แว เตเฮ๊เบ่เฮ๊โช เต๊เห่ เนอ แว เตเอ่เตแร เด๊อ แว โอ่ เต๊เห่เนอ, โอ่เซอเพร ครวาเม เกอ แลแค ฮู๊เนอ เร๊อ เตตู๊จุเตอเจ๊อ อา จอแปแหร่ เก่ โอ่ เกอดื่อ เร๊อ ซี ปา.คูเปาโล เฮ๊บุ๊ยเฮ๊เตอเรอ เชหยู่ เด๊อ อา พย๊าหนิครา เต๊เห่
10แว เฮ๊บุ๊ยเฮ๊เตอเรอ แหน่เจ๊อ แบ่เจ่ เร๊อ แว ถู่เซ๊หนิ แหน่เจ๊อ ลู, เมเตเฮ๊เร๊อ เด๊อ คยา ตื๊อดื่อเล๊อ เออเนอ, ซี ซูแฮ เป่ คยา แว เตเมจว่า เออเนอหม่า ซี เด๊อะโล คยาแซ๊ เฮ๊อ ซี เตแร๊ เต๊เห่ เด๊อ แวขุ เฮ๊อ. แว ซิเง เร๊อ ซี แร๊แหน่เจ๊อ เด๊อ แวขุ ปว๋า โตโพ๊ เจ๊อ หม่าแน๊เร๊อ ซี เตเร เด๊อะโล คยาแซ๊ ซี เตซิปล่อโอ่หนิ แว เออตื๊อหื่อเนอ, ซี แม๊เถอะ แต่ แล๋ เต ตาโตตาเบ่ แร๊ เด๊อ ซีเง ล๋ายโต่ เร๊อ ซี ซูแฮเล๊ เป่ล๋า แว โต่ ฮู๊เนอแพ๊. 11แว เฮ๊ ฮู๊เออ เร๊อ อาโต เร๊อ แว โหล่รือ ฮู๊เนอ หม่าโต่, เมเตเฮ๊เรอ แว แม๊เถอะเบ่ เจ๊อ เตเมอาเหน่ เร๊อ แว ฮู๊เตเต๋ เบ่เบ่, จอแปแหร่ อิซว๊า โทเฮ๊อ แว เน๊อ แว เก่ แด่โมแจ่แว ซิปล่อ แพ๊. 12แว โอ่เซอเพร โชโด ตาเต เบ่เบ่, แว เต โอ่ปลูโอ่เผ่ เจ๊อ เบ่เบ่, แว โอ่เซอเพรแฮ เบ่น๊อ ลอปลี เฮ๊อ. แว เหล่เอ่เหล่โอ โอ่ ตาป่อตาเป เจ๊อเบ่เบ่, อา โอ่ ตีลี๊โตโจ แพ๊ เบ่เบ่, แว ตาเต โอ่ปลูโอ่เผ่ เจ๊อ เบ่เบ่, อา โอ่ ปีตี๊ แพ๊ เบ่เบ่, แว อิซว๊า แฮหนิ ลอ โทเฮ๊อ แวเหน่ เน๊อ เตทวาแถ่ เร๊อ แว ฮู๊เตเต๋ เบ่เบ่เนอ, แว โอ่เซอเพร ซิปล่อโมแพ๊. 13เหย่ซู่ครี๊ เด๊อ อา เด๊อะ แว เตอ๊าเตเหร่ เออเตเพร เมจว่า แว อาขว่าอาคยา, แว เมเบ๊ลอ เฮ๊อ เตปว๋า เต๊อเจ่อ เฮ๊อ. 14หม่าแน๊เรอ ซี เออเต๊เห่เนอ, ซี เมแร๊ แหน่เจ๊อ แว เจ๊อ. เบ๊อะแว แม๊เถอะ ป่อชิเต่อเบ่ เร๊อ เตแป่เตเช เบ๊อะเนอ, ซี เมจว่า แว. 15วีฟีลิปปีพู๊ ซี. เบ๊อะแว จว๊า แด๊โฉ่โด่แน ลู่ เป่ ซี เตซิครือมีลา เร๊อ แว เถ่จว๊าแก เด๊อ มาซิโดเนีย เก่กู เบ๊อะเนอ, เพร เด๊อ อา เมจว่า แว เร๊อ รือ เนอหม่า ตื๊อแพ๊ ซี เพรหยื่อเอ่ตู๊หมู่ตอกล๊อ เออตู๊หมู่ แพ๊ เนอหม่า ซี ซิเง ตาเต ลอดื่อ เฮ๊อ. 16เบ๊อะแว โอ่ เด๊อ วีเธสะโลนิกา อากู เบ๊อะเนอ เจ๊อ เบ่เบ่, แว โหล่เบ่ เตเมจว่า เร๊อ ซี ซูจว๊าน๊อ เป่ แว เตเมจว่า เนอโซโพ๊ เจ๊อ. a 17แว แม๊ปู เด๊อ อู เก่ เด๊อะครา แว เชหยู่ ฮู๊เนอ หม่าโต่. แซ่ฮู๊ จอแปแหร่ เก่ เด๊อ ซี เตเมหนิคว๊าเก่ เนอเร๊อ แว ซิปล่อฉว่า ซิหยื่อ แม๊เถอะ เล๊อตาเปล๋ เด๊อ ซี เก่ เม เอ๊แถ่โป่ เตแร๊ เต๊เห่ ฮู๊ ซี เม โทเฮ๊อ เนอเต๊เห่ เจ๊อตาเปล๊. 18ล๋อ ซี ซูแฮ เป่ แว เต๊เห่เนอ แว พย๊าหนิ ลอ เฮ๊อ, เร๊อ อา เล๊อบา ตาลว๊าซิลือ เจ๊อ เด๊อ แวเง เจ๊อ. ล๋อ ซี เด๊อะ เต๊เห่เนอ คูเอปาโฟรดิทัส พย๊าแฮ เป่ เฮ๊อ แว, เร๊อ กู๊แหน่เออ, ล๋อ แว โหล่เบ่ เต๊เห่เนอ อาโอ่ ลอปลี เฮ๊อ. เตเด๊อะ เออเต๊เห่เนอ, อา แซ่เน๊อ เตหลู่โนมื๊อ เด๊อ อู หลู่แถ่ เด๊อ จอแปแหร่ โอ่ เนอเฮ๊อ. เตหลู่ เด๊อ อาโต จอแปแหร่ อาซิปล่อ, เร๊อ อา เมโม ลู ซิปล่อ เนอเต๊เห่ เฮ๊อ. b 19เด๊อ เหย่ซู่ครี๊ อาขว่าอาคยาเร๊อ, จอแปแหร่ เก่ เมจว่า เป่ ลอ ซี ล๋อ ซี โหล่เนอเต๊เห่ ปา. ฮู๊ อา ดุแหย่แถ่เซ เล๊อบา ตาป่อตาเป เฮ๊แจ่ ปา เจ๊อโต่ เออเนอ, อา เก่ เมจว่า เกอดื่อ ซี ฮู๊เนอ ปา. 20เปเพ จอแปแหร่ เก่ พย๊าหนิดื่อ เตเตอเรอดุ เตอเรอทู ตูจูเพร แตแลเคร๊ นี๋. อาเมน.เตเฮ๊โมเฮ๊แร๊ เด๊อคยา ตื๊อดื่อ
21แว เฮ๊โมเฮ๊แร๊ จว๊า เร๊อดื่อ จอแปแหร่ อาแกแย ปว๋า เตเพร เด๊อ อา หยื่อเอ่ เหย่ซู่ครี๊ เต๊เห่. โป่แหว่ ครี๊พู๊ เด๊อ อา โอ่ เกอ เร๊อ แว เบ๊อะเออ เต๊เห่ ซูจว๊า เป่เกอ อา เตเฮ๊โมเฮ๊แร๊ เต๊เห่ เด๊อ ซีโอ่. 22ล๋อ จอแปแหร่ อาแกแย เบ๊อะเออ เต๊เห่ ซูจว๊า เป่เกอ ลอ อา เตเฮ๊โมเฮ๊แร๊ เต๊เห่ เด๊อ ซีโอ่. เล๋อ หม่าเฮ๊อ โป่แหว่ เด๊อ อา เม เตเม เด๊อ จ๊อแผ่ดุ โฮกู เนอเต๊เห่ เฮ๊โมเฮ๊แร๊ จว๊าหนิ เป่เกอ เจ๊อ ซี เจ๊อ. 23แบ่เจ่ เหย่ซู่ครี๊ อาบุ๊ยอาเตอเรอ เก่ โอ่เกอดื่อ เร๊อ ซี ล๋อ ปลี นี๋. อาเมน.
Copyright information for
EkySCThai