Rev 1 | EkySCThai | STEP | ลี เออต๊าบ่า หม่า ลี เด๊อ อา ราม๊าราแด เตเมทวาแถ่ อาเหน่ เด๊อ เหย่ซู่ครี๊ เด๊อะโลแถ่ เต๊เห่ อาหรี่อาแก. แซ่ฮู๊ เหย่ซู่ครี๊ เก่ แด๊โฉ่โล เป่ หลู่เล๊ เต๊เห่ เร๊อ เต เตเร ทวาแถ่ ผื่อลาเฮ๊อ ปา เออเต๊เห่ อาเงเนอ, แบ่เจ่ จอแปแหร่ เด๊อะโล เป่ เตเด๊อะโลแถ่ เออเนอ เร๊อ คูยอห์น หม่าดื่อ เฮ๊อ แว เด๊อ อา ทวา เหย่ซู่ครี๊ อาหลู่เล๊ เออเตเพร เฮ๊อ. อา ซูแล อา ม๊อขุ เตเน่วพู๊ เด๊อ แวโอ่ เร๊อ อา เด๊อะซิเง เป่ แว เร๊อ เตหรี่เตแก เออเต๊เห่.

Revelation of John 1

1 ลี เออต๊าบ่า หม่า ลี เด๊อ อา ราม๊าราแด เตเมทวาแถ่ อาเหน่ เด๊อ เหย่ซู่ครี๊ เด๊อะโลแถ่ เต๊เห่ อาหรี่อาแก. แซ่ฮู๊ เหย่ซู่ครี๊ เก่ แด๊โฉ่โล เป่ หลู่เล๊ เต๊เห่ เร๊อ เต เตเร ทวาแถ่ ผื่อลาเฮ๊อ ปา เออเต๊เห่ อาเงเนอ, แบ่เจ่ จอแปแหร่ เด๊อะโล เป่ เตเด๊อะโลแถ่ เออเนอ เร๊อ คูยอห์น หม่าดื่อ เฮ๊อ แว เด๊อ อา ทวา เหย่ซู่ครี๊ อาหลู่เล๊ เออเตเพร เฮ๊อ. อา ซูแล อา ม๊อขุ เตเน่วพู๊ เด๊อ แวโอ่ เร๊อ อา เด๊อะซิเง เป่ แว เร๊อ เตหรี่เตแก เออเต๊เห่. 2 เร๊อ แว แด๊โฉ่โล เป่ อู ล๋อ แว แม๊เถอะ โทเฮ๊อ เออเต๊เห่เนอ, เออ หม่า แว ราโล เป่ อู เร๊อ เตหรี่เตแก โอ่ เด๊อ จอแปแหร่ โอ่ แฮ เต๊เห่ เร๊อ เตเด๊อ เหย่ซู่ครี๊ เด๊อะโล เป่ แว เต๊เห่. 3 แกแย เด๊อ อา แด๊ ลี เออต๊าบ่า เตเพรเพร เนอ, อา พย๊าหนิ เตเด๊อะบุ๊ยเด๊อะเตอเรอ โท๊โต่ แกแย เด๊อ อา หนิโฮ เพรโพร เต๊เห่ อา เตเฮ๊เบ่ เด๊อ อา เก่ ทวาแถ่ กู๊แหน่ เออเต๊เห่เนอ เบ่เบ่, อา เก่ ทวาแถ่ ช๋า โหน่ปา เต๊เห่เนอ เบ่เบ่, เหย่ซี เก่ จูเอ่ เตเด๊อ อู ราโอ่ อา เด๊อ ลี เออต๊าบ่า อากู เต๊เห่เนอ, อา เก่ พย๊าหนิ แลแค เตเด๊อะบุ๊ยเด๊อะเตอเรอ, เมเตเฮ๊เรอ เตเออเต๊เห่ เกเร ทวาแถ่เนอ, อาม๊อเนอ ผื่อแฮ เฮ๊อ.

เฮ๊โมเฮ๊แร๊ จว๊าเร๊อดื่อ เพรหยื่อเอ่ตู๊หมู่ตอกล๊อ โซซว๊าตู๊หมู่

4 แว หม่า คูยอห์น. แว ราจว๊า เป่ ลีเออ เด๊อ เพรหยื่อเอ่ตู๊หมู่ตอกล๊อ โซซว๊าตู๊หมู่ เด๊อ อา โอ่ เด๊อ เอเซียเก่กู เนอเต๊เห่ อาโอ่. ^a จอแปแหร่ เด๊อ อา เซอเพร มู๋ หนู่เค, โท๊โต่ กู๊แหน่เค๋ หม่า อา เซอเพรเพร, เนอปา หม่า อา เก่ เซอเพรเพร เออเตเพร เร๊อ ซิปล่อเซอเพร โซซว๊าเตเม เด๊อ อา โอ่ เด๊อ ลู กู่แกล๊แถ่โล อาเป๊เส่เง เออเต๊เห่ อาบุ๊ยอาเตอเรอ เร๊อ อา เตโส่เตเคร เออเนอ, ซี เก่ พย๊าหนิดื่อ นี๋. ^b 5 ซี เก่ พย๊าหนิ เกอโป่ดื่อ เหย่ซู่ครี๊ เด๊อ อา ข่าเฮ๊โล จ๊อจ๊อเตเต เออเตเพร อาบุ๊ยอาเตอเรอ เร๊อ อา เตโส่เตเคร นี๋. ^c แกแยเซอ เร๊อ อา เซอเพร กาคยา อาเกลเนอ, อา หม่า เพร เด๊อ อา เซอเพร เหร่อเล๊อ อู เตเพร เฮ๊อ. ^d

อา หม่า เพร เด๊อ อา เป๊อ เห่ขุ อาคุ๊ยจ๊อแผ่ เต๊เห่. อา หม่า อา โมเร๊อ แหน่เจ๊อ เป โท๊โต่ เด๊อ อา เซอ อาขว่าอาคยา, อา เมแลเปล๊กา เป เด๊อ เตซื๊อเตปล๊า อากู. 6 โทเรอ แซ่ฮู๊ เป เก่ เม อาเพ จอแปแหร่ อา เตเอ่เตแร อาเงเนอ, เหย่ซู่ครี๊ เด๊อะทวาแถ่ เป เร๊อ เพรหลู่แตเต เต๊เห่ เด๊อ อาเทออาเก่กู. เตลีเตตาเค เร๊อ เตโพรฉว่าชอ เก่ โอ่ เกอดื่อ เร๊อ เหย่ซู่ครี๊ ตูจูเพร นี๋. อาเมน. ^e
7 แม๊มอ แลแค, อา เตเร แฮเต่อเฮ๊อ เร๊อ อ๊อโหล่ เฮ๋อ. ^f แกแย ปว๋า เตเพร เก่ แม๊เถอะ ลอ อา ปา. แกแย เด๊อ อา ชือเซอ ลู เนอเต๊เห่ เบ่เบ่, อา เก่ แม๊เถอะ ลู ปาปา. เมวเจอะ ปว๊า เตอเจ๊อ เด๊อ เห่ขุเออ เก่โหง่เก่เห่ ลอ เร๊อ อา อาขว่าอาคยา ปา. เต เก่ ทวาแถ่ หม่าแหน่ ฮู๊เออเนอ ป๋า อาเมน. ^g

8 แบ่เจ่ จอแปแหร่ เฮ๊ เน๊อ, “แว หม่า อาแก่ช๊า เฮ๊อ เร๊อ แว หม่า อาตื๊อดื่อเฮ๊อ” เร๊อ อา เฮ๊ เน๊อ, “แว หม่า จอแปแหร่ เด๊อ อา เซอเพร มู๋ หนู่เค เตเพร, กู๊แหน่เค หม่า แว เซอเพรเพร, โหน่ปาหม่า แว เซอเพรเพร. ^h แว หม่า จอแปแหร่ เด๊อ อา แจ่ เตล๋อ ปลี เตเพรเฮ๊อ.” ⁱ

เตแม๊เถอะลว๊า ครี๊

9 แว หม่า ซี โป่แหว่ คูยอห์น เด๊อ อา หยื่อเอ่ ครี๊ แซ่เกอ เร๊อ ซี เตเพร. แว หม่า ซี โคแบ๊ซว๊า เด๊อ อา ข่าจาข่าจือ โหร่เกอเต เน๊อ ซี เตเพร, แว หม่า จอแปแหร่ อา เทอพู๊เก่พู๊ แซ่เกอ เร๊อ ซีซี, เร๊อ แว แด่ทูซิปล่อ โหร่เกอเต เร๊อ ซี เตเพร แพ๊. เด๊อ แว แด๊โฉ่โด่แน เป่ อู เร๊อ แบ่เจ่ จอแปแหร่ อา เตหรี่เตแก เร๊อ เตเด๊อ เหย่ซู่ครี๊ เด๊อะโล เป่ แว เต๊เห่ อาขว่าอาคยา, อู จว๊า แด่โอ่แก แว เด๊อ ปัทมอส กลื๊อขุ เฮ๊อ. 10 เบ๊อะแบ่เจ่ อาม๊อเนอ เตอเนอเนอ จอแปแหร่ อา แหย่โยบูโพ๊ โอ่ป่อหม่าหนิ แว เร๊อ แว หนิโฮ โหง่พราแถ่ฉว่า เร๊อ พราแถ่ชอ เด๊อ แวคยา เร๊อ อา แซ่เจ๊อเร๊อ กวา พราแถ่ เนอ เจ๊อ. 11 โหง่พราแถ่ เร๊อ อา เฮ๊ เน๊อ, “ราม๊าราแด เตเด๊อ เน แม๊เถอะ เนอเต๊เห่. โทเรอ ซูจว๊าเป่ ลีเออ เด๊อ เพรหยื่อเอ่ตู๊หมู่ตอกล๊อ โซซว๊าตู๊หมู่ เด๊อ อา หม่าดื่อ วีเอเฟซัส, วีสเมอร์นา, วีเปอร์กามัน, วีธิยาทิรา, วีซาร์ดิส, วีฟีลาเดลเฟีย, วีเลาดีเซีย เด๊อ อา โอ่ แลแค เด๊อ วี โซซว๊าเตอวี เออเต๊เห่ อากูเนอ.”

12 หม่าอูเป เฮ๊เบ่ แว, แว เตเน เร๊อ แว ตีรี๊ แม๊กาคยา เบ๊อะเนอ, แว แม๊เถอะ หมิกอเท โซซว๊าเตเม. 13 เร๊อ เด๊อ หมิกอเท โซซว๊าเตเมเออ อากลาเมกู เนอ อาแซ่เน๊อ แกแยเห่ขุพู๊ อาพู๊คู โอ่ เตเพร. ^j เร๊อ อา แซ๊หนิ จาจวาทู ล๋ายโต่ เด๊อ อาแข่แด๊พ๊าขุ ตือปือ เร๊อ อา ชา ตาวา แถ่หนิ เทต๊าบย่า ต๊าบ่า. ^k 14 อากู๊โล บู แซ่เจ๊อเร๊อ ซิหมิฉื่อเนอ, หม่าโต่เรอ อา แซ่เจ๊อเร๊อ บูขุ เนอ. อา เป๊เส่ปล่อ เนอ, อา แซ่เจ๊อเร๊อ หมิแก แถ่ เนอ เจ๊อ. ^l ^m 15 อากู๊โด่ เนอ อา เตเค แซ่เจ๊อเร๊อ ตาลีแบ เด๊อ อู โล โทเฮ๊อ ลู เร๊อ หมิ เนอ เจ๊อ. อาโหง่ พรา ตาว๊อ แซ่เจ๊อเร๊อ เทอ ช๊าตา เนอ เจ๊อ. ⁿ 16 อากู๊ขุ จ๊อทว๊า ตากยาเนอ อา ปื่อหม่าหนิ เฉ่ โซซว๊าเตเม. โทเรอ เน๊ เด๊อ อา แท เนอโค๊เนอกยา โต่เบ่ โอ่เด๊อ อาแกกู เถ่. อา เป๊เส่เนอ อา ตาเข่อเตเค แซ่เจ๊อเร๊อ ต๊อเหมาะ ช๊าเตเคตา เบ๊อะเหมาะโถ่เค เนอ เจ๊อ.

17 เบ๊อะแว แม๊เถอะ อา เบ๊อะเนอ, แว แลคื๊อตา เซอโง แซ่เจ๊อเร๊อ แกแยเซอ เตเพร เด๊อ อา กู๊โด่ซ๊า เนอ, โทเรอ อา แด่แถ่ อากู๊ขุ จ๊อทว๊า เด๊อ แวเหน่ลู เร๊อ อา เฮ๊ เน๊อ, “ซิอิเช แต่เหม่, แว หม่า เตอาแก่ซ๊า เร๊อ เตอาตื๊อดื่อ เตเพรเฮ๊อ. ^o 18 แว หม่า แกแย เด๊อ อา เซอเพร เตเพร. แว เซอ โทเฮ๊อ หม่าแน๊เรอ กู๊แหน่เออ แว เซอเพร ตูจูเพร แตแลเคร๊. แว โอ่เร๊อ เตอเรอฉว่าชอ เร๊อ เตโพร เร๊อ แว เป๊อะลอ เตเซอ เร๊อ โลเน๊มู๊แหม่รีแจ่ดอ เต๊เห่.

19 “ฮู๊เนอเรอ เตเด๊อ เน แม๊เถอะเฮ๊อ เนอเต๊เห่ เบ่เบ่, เตเด๊อ เน แม๊เถอะ อา ทวาแถ่ กู๊แหน่เออ เต๊เห่เนอ เบ่เบ่, เตเด๊อ เน แม๊เถอะ อา ทวาแถ่ ช๋าโหน่ปา เต๊เห่เนอ เบ่เบ่, ราม๊าราแด อาเนอ. 20 เฉ่ โซซว๊าเตเม เด๊อ เน แม๊เถอะ อา โอ่ เด๊อ แว กู๊ขุ จ๊อทว๊า อากู เออเนอ เร๊อ หมิกอเท โซซว๊าเตเมเออ อาโหง่แลช๊า อาจ่ออาแย หม่า ฮู๊เตเฮ๊เร๊อ เฉ่ โซซว๊าเตเม อาโหง่แลช๊า เนอหม่า หม่าเฮ๊อ เพรหยื่อเอ่ตู๊หมู่ตอกล๊อ โซซว๊าตู๊หมู่ อา เตเน่วพู๊ เต๊เห่ เร๊อ หมิเคว๊กอ โซซว๊าเตเม อาโหง่แลช๊า หม่า หม่าเฮ๊อ เพรหยื่อเอ่ตู๊หมู่ตอกล๊อ โซซว๊าตู๊หมู่ เออเต๊เห่เนอ เฮ๊อ.”