Revelation of John 11
เพรข่าเฮ๊โล ซิเนอ
1เบ๊อะเนออาเค อู เด๊อะ แว ปูเหมาะ เด๊อ อาแซ่เน๊อ เหล่เต อิปลี๊ โตโบ เร๊อ อู เฮ๊ แว เน๊อ, “จว๊าเตแม๊ จอแปแหร่ เตหลู่เเตโฮ เร๊อ เตหลู่เหร่ เนอ, โทเรอ แด๊แม๊ แกแย เด๊อ อา จ๊อบู่จ๊อเบแถ่ เบ๊อะเตหลู่เเตโฮ อากูเนอ เต๊เห่. a 2หม่าแน๊เรอ เด๊อ เตหลู่เเตโฮ อากลอ เกเร๊กู เนอ เตแม๊ โต่ แต่ อา แต่เหม่ นี๋, เมเตเฮ๊เรอ อู เด๊อะตา โทเฮ๊อ อา เด๊อ แกแยยิวพู๊ หม่าโต่ เต๊เห่ อา กู๊ยากู เฮ๊อ. เหย่ซี เก่ แถ่เค หยิลอ วีบูโพ๊ เออตีวี เนอ ลุยเชอ เร๊อ เนอเล อากู ปา. b 3แว แกแย เด๊อ อา เก่ ข่าเฮ๊โล ซิเนอ เนอ, แว เก่ เด๊อะ เหย่ซี เตโพรฉว่าชอ ปา. เหย่ซี เก่ กือแซ๊แถ่ เห่อบ๊อจาบ๊อ อาตูพรู๊ เต๊เห่ ปา. เหย่ซี เก่ เฮ๊โพร หนื่ออื่อ เป่ อู เร๊อ จอแปแหร่ เตหรี่เตแก ปา เร๊อ อา เก่ โอ่งยา อาม๊อเนอ ตีรี๊ เร๊อ เนอเย เร๊อ เชอโซซว๊า ปา.” 4เพรข่าเฮ๊โล ซิเนอเออ เนอหม่า อา แซ่เฮ๊อ เร๊อ โต๊โฉ่เหมาะ เนอเหมาะ เร๊อ หมิเคว๊กอ เนอเม เด๊อ อา ก๊อถ่อโอ่ เด๊อ จอแปแหร่ เด๊อ อา เป๊อ เห่ขุ เออเตเพร อาเป๊เส่เง เนอ เฮ๊อ. c 5แกแย เตเพรเพร เก่ เมหน่าเมจา เหย่ซี เฮ๊เนอ หมิ เถ่ เด๊อ เหย่ซี แกกู, เร๊อ อา อือแก ลอ แกแย เด๊อ อา ซิเถ่ ลู เต๊เห่. เร๊อ แกแย เตเพรเพร เด๊อ อา เตเร เมหน่าเมจา เหย่ซี เฮ๊เนอ อา เก่ เมเซอแก เหย่ซี ฮู๊เนอ ปา. 6เบ๊อะเหย่ซี เฮ๊โพร หนื่ออื่อ เป่ อู เร๊อ จอแปแหร่ อาลาอาโหง่ เบ๊อะเนอ, แซ่ฮู๊ เก่ เก่ จือ แต่ ตีกี๊ เหม่ เนอเรอ, เหย่ซี โอ่ เร๊อ อา เตโพรฉว่าชอ เด๊อ อา เมบี๊แกแจ่ ม๊อขุ อากู่ดา ปา. d โท๊โต่ อา เตโพรฉว่าชอ โอ่ปา เน๊อ อา เก่ เมทวาแถ่ เทอเออเนอ เร๊อ สุ่ย เนอหม่า อา เม แจ่แจ่. eโท๊โต่ อา เตโพรฉว่าชอ โอ่ปา เน๊อ อา เก่ ซิหยื่อ นอทวาแถ่ โตโมโม เก่หร่าเก่ดวา ซีเต๊เห่ เฮ๊เนอ, อา มือตา เห่ขุ เร๊อ อา เมทวาแถ่ เนอหม่า, อา เม แจ่แจ่ แพ๊. f 7เบ๊อะเหย่ซี ข่า เด๊อะโลโทเฮ๊อ อาซิปล่อ เบ๊อะเนอ, เตมีเตแหม่ โตโด โอ่ เด๊อ ครอกูดุ ครอกูแย เร๊อ อา แฮแถ่ ปา. อา เก่ แฮแถ่ ช๊าฉื่อ เหย่ซี เออซิเนอ ปา. g อา เก่ เมเป่ เหย่ซี เออซิเนอ เร๊อ เมเซอแก เหย่ซี ปา h 8อา เมเซอ โท เหย่ซี เร๊อ อู แด่แล เหย่ซี อาเหน่กล่อ เบ๊อะวีดุ เนอตีวี อา แกล๊เดกู เนอ ปา วีกูเนอ ตีวี หม่า วี เด๊อ อู เหล่เมเซอ อา แบ่เจ่ เด๊อ อี๊ถื่อดีเต่ลู เนอโต๊โผะ เฮ๊อ. วีเออ ตีวี เนอหม่า อู เอ๊ ลู เน๊อ เต เด๊อ อู เหล่แม๊บือแม๊ม๊า แก เกอดื่อ วีโสโดม โต่หม่าแน๊ อียิปต์เก่ เนอ แพ๊. i 9ปว๊าเต๊เก่, ปว๊าเตมี, ปว๊าเต๊อเจ่อ, ปว๊าโต๊โหง่, เร๊อ ปว๊าโต๊โหมะ เก่ แม๊ลอ เหย่ซี เหน่กล่อเออ ปา เร๊อ อู โล๊ เหย่ซี โต่. อู นอแด่โอ่ เหย่ซี ฮู๊เนอ โซเนอ เร๊อ ต๊ากว่าเนอ ปา. 10เด๊อ เหย่ซี เออซิเนอ เซอ อาขว่าอาคยา, แกแย โอ่ เด๊อ เห่ขุเออ ปว๋า เตเพร เก่ ซิครือซิลอ ล๊อปลี เจ๊อ ปา. เหย่ซี เก่ เมป่วยเมลู เร๊อ อา เก่ ซูจว๊า เป่ ลู เชหยู่ เตเพร เร๊อ เตเพร ปา, เมเตเฮ๊เรอ เพรโพร เออซิเนอ เนอ อา ย๋อ เมโอ่ทวาแถ่ เอ๊ เป่ เหย่ซี เตจาเตจือ เร๊อ แกแย เห่ขุพู๊ เต๊เห่ ข่าเบ่ลอ อาขว่าอาคยา, อา เซอ เป่ เหย่ซี เร๊อ อา ซิครือซิลอ ลอปลี เจ๊อ. 11หม่าแน๊เรอ เบ๊อะโซเนอ เร๊อ ต๊ากว่าเนอ โอ่บาเฮ๊อ เนอ, ซิปล่อเซอเพร โอ่ เด๊อ จอแปแหร่ อาโอ่ เออเนอ, อา แฮแล โน เด๊อ เหย่ซีเหน่ เร๊อ เหย่ซี ก๊อถ่อเซอเพร คยาแซ๊. เร๊อ แกแย ปว๋า เพร เด๊อ อา แม๊เถอะ เหย่ซี ก๊อถ่อคยา เออเต๊เห่เนอ, อา ต๊อหร่อเซ๊ ซิอิเช ลอปลี เจ๊อ. j 12ฮู๊เนอโทเรอ เพรข่าเฮ๊โล เออซิเนอ หนิโฮ โหง่พราแถ่ เด๊อ ม๊อขุ เร๊อ อา เฮ๊ เหย่ซี เน๊อ, “แฮแถ่ แลแค เด๊อเออ” อา เฮ๊ ลู ฮู๊เนอ. เร๊อ เบ๊อะแกแย เด๊อ อา ซิเถ่ ลู เต๊เห่ โอ่ป่อแม๊ เหย่ซี เบ๊อะเนอ, เหย่ซี กากี๊แถ่ โน เด๊อ อ๊อโหล่ ต๊าบ่า อากู เร๊อ อา แถ่ลา เด๊อ ม๊อขุ. k 13อา กา กี๊แถ่แถ่ เร๊อ เตเน่วท๊อดีฉว่าแหน่เจ๊อ. วี แลตาพรอแก อา ปุ๊ยเช๊อตีปุ๊ย เร๊อ แกแยเซอแก อาเพร โซซว๊าตีรี๊. แกแย เด๊อ อา โอ่แก เต๊เห่เนอ, อา เถ่ตาปา ซิอิเช ลอ แลแค เร๊อ ถู่เซ๊แถ่ ม๊อขุ อา จอแปแหร่ดุ อา เตโพรฉว่าชอ. l 14เตจาเตจือ เนอหื่อตื๊อหื่อ เม โทเฮ๊อ หม่าแน๊เรอ งยาแต่โต่ เนอ เตจาเตจือ โซเจ่อเต๊อเจ่อ เก่ แฮเล๊ โป่ ปา.กวา โซซว๊าเตเม เออเตเม
15โทเรอ เบ๊อะเตเน่วพู๊ อาเพร โซซว๊าเตเพร เออเตเพร โอ๊แถ่ อากวา เบ๊อะเนอ, โหง่เต๊เห่ พราแถ่ ฉว่าแหน่เจ๊อ เด๊อ ม๊อขุ เร๊อ อา เฮ๊ เนอ, “กู๊แหน่เออ เตโพรฉว่าชอ เด๊อ อา เก่ เป๊อ เห่ขุ เออเนอหม่า อา ทวาเฮ๊อ เป แบ่เจ่ เร๊อ อา เมสิยาห์ หม่าเฮ๊อ เพรเมแลเปล๊กาอาเต เฮ๊อ เร๊อ อา เก่ เป๊อเต ตูจูเพร แตแลเคร๊ เฮ๊อ.” m 16โทเรอ โหมะพรูโหมะเผร่ เนอเชอ เร๊อ ซิลุย เด๊อ อา โอ่แนโอ่ เด๊อ จ๊อแผ่ กู่แกล๊เท แถ่โลอาขุ เด๊อ แบ่เจ่ จอแปแหร่ อาเป๊เส่เง เออเต๊เห่เนอ, อา แด๊งือแล จ๊อเบแถ่ จอแปแหร่ เร๊อ อา เฮ๊ แลแค เนอ, 17“แจ่เตลอ ซิเงเตปลี อา แบ่เจ่ จอแปแหร่ เด๊อ อา โอ่เซอเพร มู๋ หนู่เค, อา โอ่เซอเพร โต่กู๊แหน่ เตเพร่ว, เด๊อ เน นอเอ่เฮ๊อ เน เตโพรฉว่าชอ เด๊อ อาดุ เร๊อ เน เป๊อแถ่ เป๊อเฮ๊อเต อาขว่าอาคยา เป เฮ๊บุ๊ยเฮ๊เตอเรอ เน. 18เมวเจอะโรพู๊ เต๊เห่เนอ, อา ซิปล่อดุ สู่เทอทู แลแค เฮ๊อ เน เฮ๊อ. nหม่าแน๊เรอ, ฮู๊เตเต๋ เบ่เบ่, เน เตซิปล่อดุ อาม๊อเนอม๊อเซ แฮโต่ แหน่ เฮ๊อ. อาม๊อเนอม๊อเซ แฮโต่ แหน่ เฮ๊อ เด๊อ เน เก่เบ่ เมจากาคยา แกแยเซอ เต๊เห่ เฮ๊อ. อาม๊อเนอม๊อเซ แฮโต่ แหน่ เฮ๊อเด๊อ เน เก่เบ่ เด๊อะ เฮ๊อ เน เพรโพร เด๊อ อาเม เน เตเม เต๊เห่ เบ่เบ่, เน แกแย เบ๊ปล๊อเบ๊หมู่ เนอเต๊เห่ เบ่เบ่, แกแย ปว๋า เตเพร เด๊อ อา แด่ดุหยื่อแหน่ เน เนอเต๊เห่ เบ่เบ่, แกแย มีลาดุ เต๊เห่ เบ่เบ่, แกแย เด๊อ อู เตเน ปีตี๊ ลู เต๊เห่ เบ่เบ่ อาม๊อเนอม๊อเซ แฮโต่ แหน่ เฮ๊อ เด๊อ จอแปแหร่ เก่ เบ่ เด๊อะ เหย่ซี อาคว๊าอาเก่ เฮ๊อ. อาม๊อเนอม๊อเซ แฮโต่ แหน่ เฮ๊อ เด๊อ เน เก่ เมปย๊าแก แกแย เด๊อ อา เมปย๊าแก เห่ขุ เนอเต๊เห่ เฮ๊อ.” o 19เบ๊อะเนอเค อู โบ๊โมแถ่ จอแปแหร่ อา เตหลู่เเตโฮ เด๊อ ม๊อขุ เนอเตเม. p เร๊อ อู แม๊เถอะ เตอ๊อแลนอแล อา เตบูโพ๊ โอ่ เด๊อ เตหลู่แต โฮกู เนอ. โทเรอ ฉ่าลีบ๊อ, อาพรารื๊อพราเต๊, ม๊อครอ ฉ่าแล, เตเน่วท๊อดี, ตื๊อครื่อจ่า ปล่อดุ เต๊เห่ จ่าตา แซ่เจ๊อฮู๊ เก่จือ เนอ. q
Copyright information for
EkySCThai