Revelation of John 12
เพรเหมาะ เร๊อ แปล โตโบ
1โทเรอ เต โค๊ตีกลี๊ อาดุอาแย เต๊อเจ่อ โอ่โลแถ่ เด๊อ ม๊อเล เร๊อ เพรเหมาะ เตเพร กือแซ๊หนิ ต๊อเหมาะ เร๊อ อา หยิตาโอ่ เล เด๊อ อา กู๊ยาเล โทเรอ อา โก่แถ่หนิ เฉ่ เช๊อเนอเม. 2เพรเหมาะ เออเตเพรเนอ อา โหมะดอดุ เร๊อ อา เตเร พู๊โอ่เฮ๊อ อาขว่าอาคยา อาฮ๊อ เชฉว่า เร๊อ อา เอ๊โทเอ๊โม. 3เร๊อ เตม๊าเตแด อาโค๊คยา เด๊อ อาโร เต๊อเจ่อ โอ่โลแถ่ โป่ เด๊อ ม๊อเล. เร๊อ แปลลีดุ เด๊อ อา กู่กล๊อโอ่ โซซว๊าเตเม, อานอ โอ่ อาแพเช๊อ เร๊อ อา โก่หนิ ลอ กู๊โก่เท เด๊อ อา กู่กล๊อลู ปว๊าเตเม เจ๊อ. a 4อา จุ่ย แลตา เฉ่ โซปุ๊ยตูปุ๊ย เด๊อ ม๊อเล เร๊อ อากู๊หมิ เร๊อ อา วีตา ลอ เฉ่ เออเต๊เห่ เด๊อ เห่ขุ. แปล เออโตโบ เนอ, อา ก๊อถ่อโอ่ เด๊อ เพรเหมาะ เด๊อ อา เตเร พู๊โอ่ ตีลี๊เฮ๊อ เออเตเพร อาเป๊เส่เง เร๊อ อา เก่ พู๊โอ่โอ่ เร๊อ อา เตเร ปื่อเอ่แก ลูพู๊. b 5เออโตโพ๊เรอ เพรเหมาะ เออเตเพร พู๊โอ่ เกอเร๊อ เฮ๊อ อา พู๊เพรคู เตเพร เด๊อ อา เก่ เป๊อเทอเก่ ปว๊าเต๊เก่ เร๊อ อิปอ ต่อเท๊ เนอโตโบ ปา. c เร๊อ เป๊เจ่พู๊ เออเตเพรเนอ อู พย๊าจว๊า ตาพาแก ลู เร๊อ อู จอแถ่แก ลู เด๊อ จอแปแหร่ อาโอ่ เร๊อ อา พย๊าแถ่แก ลู เด๊อ จอแปแหร่ อา กู่แกล๊เท แถ่โล อาเหล่โอ่ เนอ. d 6เพรเหมาะ เออเนอ อา แกล่จว๊า เด๊อ จอแปแหร่ ตี๊หรี่แตแร หนื่ออื่อ เป่ ลู เก่เชเทอแก หล่อตาม๊าขุ อาเหล่โอ่ โต๊โผ่. เร๊อ อู เก่ แม๊ตู่หนิ อา อาม๊อเนอ ตีรี๊ เร๊อ เนอเย เร๊อ เชอโซซว๊า ปา. 7เบ๊อะเนออาเค เตช๊าเตปา โอ่แถ่ เด๊อ ม๊อขุ. เร๊อ ม๊อขุ เตเน่วพู๊ มีคาเอล เร๊อ อา เตเน่วพู๊ เต๊เห่ ช๊า เร๊อ แปล เนอโตโบ. เร๊อ แปล เนอโตโบ เร๊อ อา เตเน่วพู๊ เต๊เห่ ช๊าฉื่อ เหย่ซี. e 8เออโตโพ๊เรอ แปล เออโตโบ แลจู่แก เร๊อ อา เร๊อ อา เตเน่วพู๊ เต๊เห่เนอ, อู เด๊อ โอ่ปา เหย่ซี เบ๊อะม๊อขุ เนอโต่ เฮ๊อ. 9แปล่ดุ มู๊หนู่มู๊ส่าเค โตโบ เด๊อ อู เอ๊ ลูมูย เร๊อ โลเน๊มู๊แหม่รีแจ่ กู่กล๊อ หม่าโต่เรอ ลูซีเฟอร เด๊อ อา จว๊า อิลออี๊โหล่ ลอ อู เห่ขุต๊าบ่า เออโตโบ เนอ, f อู วีตาแก ลอ อา เร๊อ อา เตเน่วพู๊ เต๊เห่ เด๊อ เห่ขุ. g 10โทเรอ แว หนิโฮ โหง่พราแถ่ฉว่า เด๊อ ม๊อขุ เร๊อ อา เฮ๊ เนอ, “กู๊แหน่เออ จอแปแหร่ อา เมแลเปล๊กา แฮโต่เฮ๊อ. กู๊แหน่เออ จอแปแหร่ เด๊อะโล แถ่เฮ๊อ อา เตโพรฉว่าชอเฮ๊อ. กู๊แหน่เออ จอแปแหร่ เป๊อตี๊หรี่ เห่ขุ ฮู๊ คุ๊ย เตเพร เนอเฮ๊อ กู๊แหน่เออ อาพู๊คู เหย่ซู่ครี๊ เป๊อแถ่ เป๊อตี๊หรี่ เตเฮ๊อ. เมเตเฮ๊เรอ แกแย เด๊อ อา ก๊อถ่อ โอ่ เด๊อ เป จอแปแหร่ อา เป๊เส่เง เร๊อ อา แด่ แกแย เด๊อ อา หยื่อเอ่แหน่เอ่เต เออเต๊เห่ อา เตซื๊อ เหมาะคี๊คี๊, เหมาะเชเกลเกล เตเพรเนอ, กู๊แหน่เรอ อู วีตาแก ลู เฮ๊อ. h 11เป โป่แหว่ เต๊เห่เนอ, เด๊อ ซิหมิพู๊ อาสุ่ย อาขว่าอาคยา เร๊อ เหย่ซี แด๊โฉ่โด่แน เป่ อู จอแปแหร่ อาลาอาโหง่ อาขว่าอาคยาเร๊อ, เหย่ซี เมเป่แก เฮ๊อ โลเน๊มู๊แหม่รีแจ่ กู่กล๊อ เฮ๊อ. เหย่ซี แม๊เถอะเบ่ เจ๊อ เร๊อ เตเซอ เบ่เบ่, อา ซิโล เกอเร๊อ อา ซิปล่อเซอเพร โต่. 12เมฮู๊เนอเรอ ม๊อขุ เร๊อ ล๋อ แกแย โอ่ เด๊อ ม๊อขุ เนอเต๊เห่ ล๋อ ปลี ซี, ซิครือซิลอ แลแค นี๋, หม่าแน๊เรอ เด๊อ เห่ขุ เร๊อ เทอดุซาวา อาเงเนอ อาจาอาจือ แหน่เจ๊อ. เมเตเฮ๊เรอ โลเน๊มู๊แหม่รีแจ่ กู่กล๊อ แฮแลเฮ๊อ เด๊อ ซีโอ่ เร๊อ อา ซิปล่อดุ แหน่เจ๊อ เฮ๊อ. เมเตเฮ๊เรอ อา ซิเง เร๊อ อา ม๊อเนอ โอ่แก ปาแพ๊ เตอเปลอ แพ๊.” 13เบ๊อะแปล เออโตโบ ซิเงเฮ๊อ เร๊อ อู วีตาแก เฮ๊อ อา เด๊อ เห่ขุ เบ๊อะเนอ, เป๊อแถ่ ลือปื่อ เพรเหมาะ เด๊อ อาพู๊โอ่หนิเฮ๊อ อา พู๊เพรคู เออเนอ เตเพร. 14หม่าแน๊เรอ แซ่ฮู๊ เพรเหมาะ เออเตเพร เก่ โยกาเบ๊ เด๊อ อาเหล่โอ่ เร๊อดื่อ เด๊อ หมิเกล อาเง ปาเนอ, อู เด๊อ ลู เร๊อ ลาบูดุ อาด๊า ตือครือ. เร๊อ อู เก่ จว๊าแม๊ตู่ ตาพายา โค๊แก ลู เร๊อ แปล เออโตโบ โซหน่า เร๊อ ต๊ากว่า ปา. i 15โทเรอ แซ่ฮู๊ แปลเออ เก่ อาโพร๊ทุ๊ยโล จว๊าแกหนิ เพรเหมาะเออ เตเพร อาเงเนอ, อาปลวา ทุ๊ยเถ่ เทอ เด๊อ อาแกกู แซ่เจ๊อเร๊อ เทอแลโหมะ ทุ๊ยแฮ เนอ. 16หม่าแน๊เรอ เห่ขุ เมจว่า เป่ เพรเหมาะ เนอเตเพร. เบ๊อะเทอโอ่ เด๊อ แปล แกกู เถ่ เร๊อ อา ทุ๊ยแฮ เบ๊อะเนอ, เห่ขุ โมแอ อาแกกู เร๊อ อา จุ๊ยโอ โนแก ลอ เทอเออเนอ เต๊เห่ แพ๊. 17แปล เออโตโบ ซิปล่อดุ เพรเหมาะ เนอเตเพร อาขว่าอาคยา, อา เถ่จว๊า ตาพาแก เร๊อ อา เก่ จว๊าช๊า เกอลาติ เร๊อ เพรเหมาะ อาพู๊อาเลอ เด๊อ อา โอ่แก เนอเต๊เห่ อา โอ่แก เออเต๊เห่ เนอหม่า แกแย เด๊อ อา หนิดา จอแปแหร่ โหง่เฮ๊แก เนอเต๊เห่. เน๊อ แกแย เด๊อ อาจ๊อ เร๊อ อา เตข่าเฮ๊โล เด๊อ เหย่ซู่ เด๊อะโลซิเงแก ลู เนอเต๊เห่ เฮ๊อ. 18เร๊อ แปล เออโตโบ จว๊า ก๊อถ่อโอ่ เบ๊อะเทอดุซาวา อาทือ เนอ.
Copyright information for
EkySCThai