Revelation of John 14
ซิหมิพู๊ เร๊อ อา แกแย เบ๊หมู่
1เบ๊อะเนอเค, แว แม๊เถอะ ซิหมิพู๊ เนอโตโด ก๊อถ่อโอ่ เด๊อ ซีโยน โฉ่ขุ. เร๊อ อู ก๊อถ่อ โอ่เต่อเกอ เร๊อ อา อาเพร ตีซี เร๊อ ลุยซ๊อ เร๊อ ลุยรี๊. เด๊อ แกแย เออเต๊เห่ อา มาเท๊ลู เนอ, อู ราม๊าโอ่ ซิหมิ เออโตโด อามุย เร๊อ อาเพ อามุย. a 2เร๊อ แว หนิโฮ เตพราแถ่ เด๊อ ม๊อขุ เต๊อเจ่อ เร๊อ อา พรา แซ่เร๊อ เทอเคว ช๊าตา โทเรอ ฉ่าแล เนอ. โท๊โต่ อา พรา แซ่เจ๊อเร๊อ อู ด่อ พรารื๊อพราเต๊ ติ เต๊เห่เนอ เจ๊อ. 3แกแย เด๊อ อู อี๊ถ่ากา เหย่ซี อาเพร ตีซี เร๊อ ลุยซ๊อ เร๊อ ลุยรี๊ เออเต๊เห่เนอ, อา ก๊อถ่อโอ่ แลแค เด๊อ จ๊อแผ่ กู่แกล๊เท แถ่โล เร๊อ เตเซอเพร เออ ลุยโด เร๊อ โหมะพรูโหมะเผร่ เนอเต๊เห่ อาเป๊เส่เง. เหย่ซี อิโรลี อาเซ โต๊โต่ เด๊อ อู อิซว๊าเบ่แจ่ เป่ แพ๊ตื๊อ เหย่ซี แพ๊ เออเนอ โต๊โต่. 4เหย่ซี เออเต๊เห่ เนอหม่า เพรคู เด๊อ อาซิปล่อ อาโพ๊อาแปละ เร๊อ อา โอ่เมอ เต่อน๊อ เร๊อ เพรเหมาะ โต่ เต๊เห่. เหย่ซี หม่า เพรคูพู๊เส่ เด๊อ อา จ๊อจื้อ เต๊เห่. ซิหมิพู๊ เนอโตโด จว๊าเบ๊อะเต๋ โต๊โผ่ เบ่เบ่, เหย่ซี ครวาจว๊าเกอ ลูคยา. เหย่ซี หม่า อู อี๊ถ่ากา โทเฮ๊อ อา เด๊อ เห่ขุพู๊ เต๊เห่ อาเกล เร๊อ เหย่ซี หม่า แกแย เต๊เห่ เด๊อ อู หลู่แถ่ เหร่อเล๊อ ลู เด๊อ จอแปแหร่ เร๊อ ซิหมิพู๊ เนอโตโด อาโอ่ เฮ๊อ. 5เหย่ซี เฮ๊เบ่ แลโฮ เกออู โต่. เหย่ซี เตซื๊อเตปล๊า โอ่เกออู โต่ เนอหม่า อู ซิเง. bเตเน่วพู๊ ซิโซ
6โทเรอ แว แม๊เถอะ เตเน่วพู๊ เด๊อ อาโรเตเพร เร๊อ อา โหย่แถ่โล เด๊อ ม๊อเล เร๊อ อา พย๊าแฮหนิ เตซิครือมีลา ตูจูเพร อาหรี่อาแก. เร๊อ อา เก่ แด๊โฉ่ ซิเงเป่ แกแย เห่ขุพู๊ เต๊เห่ เร๊อ เมวเจอะ ปว๊าเต๊อเจ่อ, เร๊อ แกแย ปวาโต๊โหมะ, เร๊อ แกแย เด๊อ อา เฮ๊เบ่ โหง่ อิเตเต๋ เบ่เบ่ เร๊อ แกแย ปว๊าตู๊หมู่ เร๊อ เตซิครือมีลา เออเนอ ปา. 7อา เอ๊โท พราฉว่า เร๊อ อา เฮ๊ เน๊อ, “แด่ดุแด่ทู จอแปแหร่ เร๊อ เมลีเมเตเค อา, เมเตเฮ๊เรอ ม๊อเนอโต แฮโต่เฮ๊อ เด๊อ อา เก่ เมจากาคยา แกแย เห่ขุพู๊ เฮ๊อ. จ๊อเบแถ่ มอ จอแปแหร่ เด๊อ อา แบ๊แล ม๊อขุ เร๊อ เห่ขุ เทอดุซาวา เร๊อ เทอเถ่ขุ เออเต๊เห่ เตเพรเนอ.” 8เตเน่วพู๊ เนอเพร เตเพร ครวาเฮ๊เกอ ลูคยา เน๊อ, “อา แลตาพรอแก เฮ๊อ, วีดุ บาบิโลน แลตาพรอแก เฮ๊อ, อา นอโอ โทลอเฮ๊อ อู เร๊อ เทอแยแจ หม่าเฮ๊อ สุ่ยเทอพ๊าหย่า อา เตซิหยื่อซิลอ มู๊แหม่รีแจ่ เออเต๊เห่ เนอเฮ๊อ.” c 9เร๊อ เตเน่วพู๊ โซเพร เตเพร ครวาเฮ๊ พราแถ่ฉว่า เกอ เตเน่วพู๊ อาเหร่อ เนอซิเนอ อาคยา เน๊อ, “แกแย เด๊อ อา จ๊อบู่จ๊อเบแถ่ เตมีเตแหม่ เออ เร๊อ อาเตแหย่โย เออเตเพร เนอเต๊เห่ เร๊อ อา พย๊าฉื่อ เตม๊าแด เด๊อ อู เมม๊า เป่ เหย่ซี เด๊อ อา มาเท๊ลู เนอเต๊เห่ เบ่เบ่, เก่หม่าโต่เรอ อู เมม๊า เป่ เหย่ซี เด๊อ อา กู๊ขุลู เนอเต๊เห่ เบ่เบ่, 10เหย่ซี อาเหน่แบ่เจ่ เร๊อดื่อ อา เก่ โอ เกอ แลแค จอแปแหร่ อา เตซิปล่อดุ อาเทอแย ปา. อา เตซิปล่อดุ อาเบ เออเตเบ เนอ, อู ยือโนบา เร๊อ เทอแยแจ. d ล๋อ แกแย เด๊อ อา เมเต ฮู๊เออ เต๊เห่เนอ อา เบ่ ข่าเบ่ แหน่เจ๊อ เตจาเตจือ เด๊อ หมิ เด๊อ อู ชื๊ออือ เน๊อ หย่าซู๊แบ อากู เออเนอ ปา. อา เก่ ข่าจาข่าจือ เด๊อ เตเน่วพู๊ บูโพ๊ เต๊เห่ เร๊อ ซิหมิ เนอโตโด อา เป๊เส่เง ปา. e 11หมิ เด๊อ อา อือกู่จา อือกู่จือ เหย่ซี เออเนอ, อา เก่ โข่แถ่ ตูจูเพร แตแลเคร๊ ปา. แกแย เด๊อ อา จ๊อเบแถ่ เตมีเตแหม่ เออ, เร๊อ อาเพรโพร เออเต๊เห่, โทเรอ อูเป๋ เบ่เบ่ เด๊อ อา พย๊าฉื่อ เตมีเตแหม่ อา เตม๊าเตแด เด๊อ อาโอ่ เร๊อ ลูมูย เออเต๊เห่เนอ, เหมาะเชเกล เบ่เบ่, เหมาะคี๊ เบ่เบ่, เตจาเตจือ อาพุยแฮ เป่ ปา เด๊อ เหย่ซีเง โตโพ๋ โต่.” f 12ฮู๊เนอเรอ จอแปแหร่ อาแกแย บูโพ๊ เด๊อ อา หนิดา เร๊อ อา โอ่เซอเพร ครวา ฮู๊ จอแปแหร่ อา เตเฮ๊แก เต๊เห่ เร๊อ อาจ๊อ เน๊อ เหย่ซู่ เต๊เห่เนอ, โตเบ่ ข่าแอ๊จื๊อ เบ๊เต. 13โทเรอ แว หนิโฮ เตพราแถ่ เด๊อ ม๊อขุ เร๊อ อา เฮ๊ เน๊อ, “ราม๊าแก เออเนอ, เป๊อแถ่ กู๊แหน่เออ ตาแฮเง เนอ, แกแย เด๊อ อา เซอ เด๊อ จอแปแหร่ อา เตเอ่เตแร อากู เต๊เห่เนอ, อา เก่ พย๊าหนิ เตเด๊อะบุ๊ยเด๊อะเตอเรอ” แบ่เจ่ อา แหย่โยบูโพ๊ เฮ๊ เน๊อ, “อา หม่าแหน่ เจ๊อ. เมเตเฮ๊เรอ เหย่ซี เก่ โอ่โก๊แก แลแค เฮ๊อ เด๊อ อา เตเอ่เตแร เต๊เห่ อากู เร๊อ อา เตจาเตจือ เต๊เห่ อากู เฮ๊อ. โท๊โต่ เหย่ซี อาเตเอ่เตแร เด๊อ อาบุ๊ยอาเตอเรอ โอ่ เต๊เห่เนอ, อา เก่ ครวาเกอ เหย่ซีคยา ปา.”เห่ขุ อา เตเก๊โบ๊ เบ๊อะเนอ
14ฮู๊เนอโทเรอ เด๊อคยาเนอ แว แม๊เถอะ อ๊อโหล่บู ต๊าบ่า, เร๊อ เด๊อ อ๊อโหล่ เนอต๊าบ่า อาลู เนอ, อาแซ่เน๊อ แกแย โอ่แนโอ่ เตเพร เร๊อ อา โก่หนิ กู๊โก่เท เตเม เร๊อ อา ปื่อหนิ เตเจ แทแร๊ เต๊เบ่ เด๊อ อา กู๊ยากู. g 15โทเรอ เตเน่วพู๊ เด๊อ อาโร เตเพร โอ่เด๊อ เตหลู่เเตโฮ อากู เร๊อ อา แฮเถ่. เร๊อ อา เอ๊โทแถ่ แกแย โอ่แนโอ่ เด๊อ อ๊อโหล่ลู เนอเตเพร เน๊อ, “นอเอ่ เน เตเจเนอ เร๊อ เก๊เมอ โบ๊เนอ, เมเตเฮ๊เรอ โต เก๊ โบ๊ เบ๊อะเนอ โต่เฮ๊อ. เด๊อ เห่ขุ เออ, โบ๊มี ลอเฮ๊อ.” h 16เออโตโพ๊เรอ แกแย โอ่แนโอ่ เด๊อ อ๊อโหล่ลู เนอเตเพร แรตา อาเตเจ เด๊อ เห่ขุ เร๊อ อา เก๊แก โบ๊ เด๊อ เห่ขุ เออเนอ เต๊เห่. 17ฮู๊เนอโทเรอ แว แม๊เถอะ เตเน่วพู๊ เด๊อ อาโรเตเพร โอ่ เด๊อ ม๊อขุ เตหลู่เเตโฮ อากู เร๊อ อา แฮเถ่ เร๊อ อา ปื่อหนิ เร๊อเกอ เตเจ แทแร๊ เต๊เบ่เบ่. 18โทเรอ เตเน่วพู๊ เด๊อ อาโร เตเพร เด๊อ อู เด๊อะ ตา ลู เตเม เด๊อ อา เบ่ เพรเป๊อตี๊หรี่หนิ หมิ เออเตเพรเนอ, อา โอ่ เด๊อ เตหลู่เหร่ เหล่โอ่ เนอ เร๊อ อา เถ่. เร๊อ เอ๊โทแถ่ เตเน่วพู๊ เด๊อะ อาเตเจ แทแร๊ โอ่ เนอเตเพร เร๊อ อา เฮ๊ ลู เน๊อ, “แรตา เน เตเจ แทแร๊ เออเนอ, เร๊อ เก๊กาปล๊อ แกเมอ เห่ขุ แท๊ทือเส่ เด๊อ อาเส่ บี๊จ๊อ เออเนอ เต๊เห่, อามี ลอเฮ๊อ.” 19ฮู๊เนอ อาขว่าอาคยา, เตเน่วพู๊ เนอเตเพร แรตา อาเตเจ เด๊อ เห่ขุ เร๊อ อา เก๊แก อา แท๊ทือเส่เออ โทเรอ อา วีโนแก เด๊อ อู เหล่วีเถ่ ถ่าเทอ เด๊อ อาดุอาแตแน เด๊อ อาแซ่เน๊อ จอแปแหร่ อา เตซิปล่อดุ เออเนอ อากู. 20แท๊ทือเส่ เออเต๊เห่เนอ, อู วี เหย่ซี เด๊อ เหล่วีเถ่ แท๊ทือเส่เทอ อาเหล่โอ่ เด๊อ อา โอ่ เด๊อ วีกลอ เนอ. เหล่วีเถ่ แท๊ทือเส่เทอ อาเหล่โอ่ เออเนอ, สุ่ยเต๊เห่ ทุ๊ยเถ่ จว๊ายา กิโลโซเย, เร๊อ อาแย เนอ อาโอ่ แงตือ. i
Copyright information for
EkySCThai