Revelation of John 17
แม๊เผ่โหมะ เด๊อ อา มีลาดุ เตเพร
1เออโตโพ๊เรอ เตเน่วพู๊ โซซว๊าเตเพร เด๊อ อา ปื่อหม่า เกอเร๊อ เบหล่อดุ โซซว๊าเต๊เบ่ อาเกล เตเพรเนอ, อา แฮ เด๊อ แว โอ่ เร๊อ อา เฮ๊ แว เน๊อ, “แฮเมอ เร๊อ แว เก่ เด๊อะโล เน เร๊อ จอแปแหร่ เก่ เมจากาคยา แม๊เผ่โหมะ มีลาดุ เออเตเพร ฮู๊เต ปา เนอ. แม๊เผ่โหมะ เออเตเพร หม่า หม่าเฮ๊อ วีดุวีทู เด๊อ อา โอ่ เด๊อ แลโหมะดุ แลโอ่เอ๊ อาลู เออตีวี. a 2เห่ขุ คุ๊ยจ๊อแผ่ เต๊เห่ จว๊าซื๊อจว๊าปล๊า เกอ แลแค เร๊อ เพรเหมาะ เออเตเพร. โทเรอ แกแย เห่ขุพู๊ เต๊เห่ เอ่มือโอแพร๊ เกอเร๊อลอ อาเหน่ เร๊อ เทอแย หม่าเฮ๊อ เพรเหมาะ เออเตเพร อา เตปาต๊าเปอเตอ เต๊เห่เนอ เฮ๊อ.” b 3เด๊อ แหย่โยบูโพ๊ แบ่เจ่ อา เตเมจว่า อาขว่าอาคยา, ม๊อขุ เตเน่วพู๊ เอ๊จว๊า แว เด๊อ เก่เชเทอแก หล่อตาม๊าขุ โต๊โผ่. แว จว๊า เบ๊อะเนอ โต๊โผ่ เร๊อ แว จว๊าแม๊เถอะ เพรเหมาะ เตเพร โอ่แนโอ่ เด๊อ เตมีเตแหม่ ลีกาซุ๊ย เนอโตโด อาขุ. เตมีเตแหม่ เออโตโด อาเหน่ลู ชีเพร ล๊อเนอ, อู รา โอ่ ลอปลี เน๊อ มุย เร๊อ อู รา โอ่ อามุย เน๊อ อา เป๊อเจ่ออิแช๊ จอแปแหร่ ฮู๊เนอ. เตมีเตแหม่ เออโตโด เนอ, อากู่กล๊อ โอ่ โซซว๊าเตเม เร๊อ อานอ โอ่ เจ๊อ แพเช๊อ เจ๊อ. c 4เพรเหมาะ เออเตเพรเนอ อา กือแซ๊แถ่ เห่อจา เต๊เผ่ล๊อซอ เน๊อ อาลี กาซุ๊ย เร๊อ อา ตี๊หรี่แถ่หนิ อาเหน่ เน๊อ เท, หล่อ งูดุงูชอ เน๊อ พ๊าเส่ เต๊เห่. เด๊อ อา กู๊ยากู เนอ, อา ปื่อ โอ่ เกอเร๊อ เบหล่อเท เต๊เบ่ เร๊อ เบหล่อ เออเนอ, อา โอ่ บาตีปี๊ เจ๊อ เน๊อ เตซิหย่อซิบี เต๊เห่ เร๊อ อา เตปาต๊าเปอเตอ มู๊แหม่รีแจ่ เต๊เห่ เจ๊อ. d 5เด๊อ อา มาเท๊ลู เนอ, อู ราโอ่ ลูมูย เด๊อ อาโอ่ เร๊อ อาโหง่แลช๊า ด๊อโอ๊ด๊อบี๊ ต๊อปล่อ เร๊อ อา เฮ๊ เน๊อ,“วีดุ บาบิโลน
หม่าเฮ๊อ ล๋อ แม๊เผ่โหมะ เต๊เห่
เร๊อ เห่ขุ อา เตมู๊แหม่รีแจ่ เต๊เห่ อาโหมะ,” อู ราโอ่ ฮู๊เนอ. 6เร๊อ แว แม๊เถอะ เพรเหมาะ เนอเตเพร โอมือ อาเหน่ เน๊อ จอแปแหร่ อาแกแย เด๊อ อาจ๊อ เร๊อ เหย่ซู่ เร๊อ อู เมเซอ ลู เนอเต๊เห่ อาสุ่ย. เบ๊อะแว แม๊เถอะ อา เบ๊อะเนอ, แว คย๊ายื๊อ โกโน๋ โต่. 7เตเน่วพู๊ แด๊เฮอ แว เน๊อ, “เน คย๊ายื๊อ เมเต?” แว เก่ แด๊โฉ่ เป่ เน เต เด๊อ อาโหง่แลช๊า ด๊อโอ๊ด๊อบี๊ เฮ๊อ เพรเหมาะ เออเตเพร อาหรี่อาแก, โทเรอ อา หม่าเฮ๊อ เตมีเตแหม่ เด๊อ อาโอ่ เร๊อ อากู่กล๊อ โซซว๊าเตเม เออเนอ โตโด เร๊อ อานอ โอ่ แพเช๊อ เด๊อ อา แถ่แด๊ เกอเร๊อ เนอ โตโด อาหรี่อาแก. 8เตมีเตแหม่ เด๊อ เน แม๊เถอะ โทเฮ๊อ เน๊อ โตโพ๊เคเนอ อาโอ่ โทเฮ๊อ หม่าแน๊เรอ กู๊แหน่เออ อา โอ่ ปา โต่ เนอโตโด เก่ โอ่โลแถ่ คยาแซ๊ ปา. e อา โอ่ เด๊อ ครอกูดุ ครอกูแย เนอตูกู เร๊อ อา เก่ แฮเถ่ ปา. เร๊อ แบ่เจ่ เอ๊จว๊า ลู เด๊อ เตเมจากาคยา อาเหล่โอ่ เร๊อ อา เก่ เมปย๊าแก ลู ตูจูเพร ปา. เป๊อแถ่ เด๊อ อู แบ๊แลลู่ เห่ขุ อาเคปา, แกแย เด๊อ อา โอ่เซอเพร เด๊อ เห่ขุ เออเต๊เห่ เร๊อ อู ราโอ่เต่อเกอ ล๋าย เหย่ซีมุย เด๊อ ลีเซอเพร อากู ล๋ายโต่ เต๊เห่เนอ, อา เก่ คย๊ายื๊อ ลอ แลแค เบ๊อะเหย่ซี แม๊ เตมีเตแหม่ เออโตโด อาเค เนอ ปา, เมเตเฮ๊เรอ, โตโพ๊เคเนอ เตมีเตแหม่ เออโตโด ย๊อ โอ่เซอเพร เร๊อ กู๊แหน่ เร๊อ อา โอ่ ปา โต่, หม่าแน๊เรอ อา เก่ โอ่โล คยาแซ๊ ปา อาขว่าอาคยา, เหย่ซี คย๊ายื๊อ ลอ แลแค แพ๊. f 9แซ่ฮู๊ เน เก่ ซิเง เออเนอ, เน โตเบ่ ลีแม. กู่กล๊อ โซซว๊าเตเม หม่า อา ซิ เฮ๊ เฮ๊อ โฉ่ฮู๊โซซว๊าเตเม เด๊อ เพรเหมาะ เออเตเพร โอ่แนโอ่ เกอเร๊อ ลู เนอเต๊เห่ เฮ๊อ. 10คุ๊ยจ๊อแผ่ โซซว๊าเตเพร๋ หม่า อาหม่าหม่า. เด๊อ เหย่ซี อาเกลเนอ อา ตาแกเฮ๊อ ซิแง เฮ๊อ. เตเพรเนอ อา เป๊อะปา เต, อา โอ่แกปา เตเพร, หม่าแน๊เรอ อา แฮ ล๋ายโต่, ช๋า อา แฮ ปา เนอ อา เก่ เป๊อแพ๊ เตอเปลอฮู๊ ปา. 11เตมีเตแหม่ เด๊อ อา โอ่เซอเพร โทเฮ๊อ โตโพ๊ เร๊อ กู๊แหน่เออ อา โอ่ ปา โต่ เนอโตโดเนอ, อา หม่า หม่าเฮ๊อ จ๊อแผ่ อาเพรลุยซว๊า เนอเตเพร เฮ๊อ. อา หม่า อา โอ่ป่าเต่อ เกอดื่อ เด๊อ จ๊อแผ่ โซซว๊าเตเพร เนอเต๊เห่ อาเกล. แบ่เจ่ เอ๊จว๊า ลู เด๊อ อา เก่ จว๊า เมจากาคยา เมปย๊าแกลู. 12อานอ โอ่ แพเช๊อ เด๊อ เน แม๊เถอะ โทเฮ๊อ อาเนอ หม่า หม่าเฮ๊อ จ๊อแผ่ อาเพรเช๊อ เด๊อ อา เป๊อ แต่ล๋าย เทอเก่ โต่ เต๊เห่ หม่าแน๊เรอ อู เก่ เด๊อะ เหย่ซี เตอเรอฉว่าชอ เด๊อ อา เก่ เป๊อ งยา นาที เฉอโซซว๊า ปา. อา เก่ เป๊อ เต่อเกอ เต เร๊อ เตมีเตแหม่ ฮู๊ จ๊อแผ่ เต๊เห่เนอ ปา. g 13ล๋อ จ๊อแผ่ อาเพรเช๊อ เออเนอ, อา โอ่ ลอปลี เร๊อ อา เตเตเนหนื่ออื่อ เด๊อ อา แซ่ลู เต๊เห่ เร๊อ อา เก่ เด๊อะแลแก อา เตโพร เน๊อ อา เตอเรอฉว่าชอ เด๊อ เตมีเตแหม่ เนอโตโด อา กู๊ยากู ปา. 14เหย่ซี เก่ ช๊า ซิหมิพู๊ เนอโตโด ปา, หม่าแน๊เรอ ซิหมิพู๊ เออโตโด เก่ ช๊าเป่แก เหย่ซี ปา, เมเตเฮ๊เรอ ซิหมิพู๊ เออเนอหม่า หม่า แบ่เจ่ เต๊เห่ อา แบ่เจ่, จ๊อแผ่ เต๊เห่ อาจ๊อแผ่, เร๊อ แกแย เด๊อ อา โอ่เกอ เร๊อ อา เนอเต๊เห่ หม่า หม่าเฮ๊อ แกแย เด๊อ จอแปแหร่ เอ๊ แหน่ เหย่ซี, โท๊โต่ จอแปแหร่ นว๊าแถ่ แหน่ เหย่ซี, โทเรอ เหย่ซี หม่า แกแย เด๊อ อาจ๊อ เร๊อ อาโหง่ เต๊เห่. 15เร๊อ เตเน่วพู๊ แด๊โฉ่ แว เน๊อ, “เทอแลโหมะ แลโอ่เอ๊ เด๊อ เน แม๊เถอะ แม๊เผ่โหมะ โอ่แน เด๊อ อาขุ เนอ เต๊เห่ เนอหม่า หม่าเฮ๊อ แกแย ปว๊า เตเพร, เมวเจอะ ปว๊าเต๊อเจ่อ, เร๊อ โหง่ ปว๊าโต๊โหง่ เด๊อ เห่ขุ เออเนอเฮ๊อ. 16อานอ โอ่ อาแพเช๊อ เด๊อ เน แม๊เถอะ โทเฮ๊อ เนอ เร๊อ เตมีเตแหม่ เนอโตโด เก่ ซิโตโคแก แม๊เผ่โหมะ เนอเตเพร ปา. เหย่ซี เก่ พย๊าเพ่แก ลอเผ่ ลู ล๋อ เต เด๊อ อาโอ่ เร๊อ ลู เนอเต๊เห่ ปา, เร๊อ อา นอ โอ่กาโกล่แก ลู ปา. เหย่ซี เก่ เอ่แก ลูหย่า ปา, เร๊อ อา เก่ ชื๊ออือแก ลอ ลู เร๊อ หมิ ปา. 17เมเตเฮ๊เรอ แซ่ฮู๊ เหย่ซี เก่ เมเล๊อบาแถ่ จอแปแหร่ อา เตเตเนหนื่ออื่อ เออ อาเงเนอ, จอแปแหร่ ฉู่โน โทเฮ๊อ อา เตเตเนหนื่ออื่อ เออ เด๊อ เหย่ซี ซิปล่อกู เร๊อ เหย่ซี เก่ ซิปล่อโอ่ เด๊อะตาแก อา เตอเรอฉว่าชอ เออเนอ เร๊อ เตมีเตแหม่ เด๊อ อา เก่ เป๊อ โต่เด๊อ จอแปแหร่ อาลาอาโหง่ เล๊อแถ่บาแถ่ เฮ๊อ ปาเนอ. 18เพรเหมาะ เด๊อ เน แม๊เถอะ อา เตเพรเนอ หม่า แพ๊ วีดู๋ เนอตีวี เด๊อ อา เป๊อ เห่ขุ อาคุ๊ยจ๊อแผ่ เต๊เห่ เนอแพ๊.”
Copyright information for
EkySCThai