Revelation of John 18
วีบาบิโลน ตาพรอแก
1ฮู๊เนอโทเรอ แว แม๊เถอะ เตเน่วพู๊ เด๊อ อาโร เตเพร โอ่ เด๊อ ม๊อขุ แฮแล. อา โอ่ เร๊อ อา เตเตอเรอฉว่าชอ เร๊อ เด๊อ อา เตเตเค อาขว่าอาคยา, เห่ขุ ลีเตเคแถ่ ลอ ชีบ่า เจ๊อ. 2อา เอ๊โท ตอว๊อตือซือ ฉว่า เน๊อ, “อา แลตาพรอ เฮ๊อ, วีดุ บาบิโลน แลตาพรอ เฮ๊อ. กู๊แหน่เรอ อา ทวาแก เฮ๊อ โลเน๊ เร๊อ โลเน๊มู๊แหม่ เต๊เห่ อา เหล่โอ่ว๊า เฮ๊อ. a อา ทวาแก เฮ๊อ ถู่ เด๊อ อู เหล่ซิหย่อซิบี, อู เหล่ซิเถ่ซิฮา เต๊เห่ เหล่โอ่ว๊า อาเหล่โอ่ เฮ๊อ. b 3เมเตเฮ๊เร๊อ เทอเก่ ปว๊าเต๊เก่ โอโทเฮ๊อ อา เทอแยแจ หม่าเฮ๊อ สุ่ยเทอ อา เตซิหยื่อซิลอ มู๊แหม่รีแจ่ เต๊เห่. เห่ขุ ปว๊าต๊าบ่า อา คุ๊ยจ๊อแผ่ เต๊เห่ จว๊าซื๊อจว๊าปล๊า ลอ เฮ๊อ เร๊อ เพรเหมาะ เออเตเพร, เร๊อ เด๊อ วีบาบิโลนพู๊ เต๊เห่ อา เตซิหยื่อ ปาต๊าเปอเตอ เต๊เห่เนอ, อา ตาลว๊าตาแก ซื๊อลือ อาขว่าอาคยา, ล๋อ เพร เมกื่อเมค๊า เต เด๊อ เห่ขุ เออต๊าบ่าลอ เนอ, เหย่ซี ดุแหย่แถ่เซ แฮลอ เฮ๊อ.” c 4เร๊อ เบ๊อะเนออาเค แว หนิโฮ โหง่ เด๊อ อาโร ตือมือ พราแถ่ เด๊อ ม๊อขุ เร๊อ อา เฮ๊ เน๊อ, “แว แกแย เบ๊หมู่ ซี๋, แซ่ฮู๊ ซี เก่ ครวาเม เกอ แต่ เตซื๊อ ฮู๊ อา เม เนอ แต่เหม่, โทเรอ แซ่ฮู๊ ซี เก่ ข่าเบ่ เต่อเกอ แต่ เตเมจากาคยา เร๊อ อา แต่เหม่ เนอ, เถ่จว๊าแก เด๊อ วีเออ อากู เนอ. d 5เมเตเฮ๊เรอ อา เตซื๊อเตปล๊า เต๊เห่เนอ, อา โอ่รือดือ เจ๊อ เร๊อ ม๊อขุ, เร๊อ แบ่เจ่ จอแปแหร่ ซิเงแถ่เบ่ เฮ๊อ อา จว๊าแกล๊ เด๊อ อา มู๊แหม่รีแจ่ เนอเต๊เห่ เฮ๊อ. e 6เมจาเมจือ ลาติ มอ อา ฮู๊ อา เมจาเมจือ ซี เนอ, ลอ เต เด๊อ อา เมจาเมจือ โทเฮ๊อ ซี เต๊เห่เนอ, เมเลอ กาคยาฉื่อ ลาติ มอ เจ๊อ อา เนอโพ๊ เนอ. เบหล่อ เด๊อ อา ตี๊หรี่แตแร เป่ ซี เร๊อ เทอเผร่กู่กล๊อ เนอเต๊เบ่ เนอ, ยือบาเล๊อ กาคยาฉื่อ เป่เกอ ลาติ อา เด๊อ อา ชอเล๊อ เน๊อ เออ เนอโพ๊ เนอ. f 7บ๋า อา ถู่เซ๊แล เกอเร๊อ อาเหน่ เร๊อ อา เมโมแล เกอเร๊อดื่อ อาเหน่ เนอ, นอข่าเบ่ เลอกาคยา ฉื่อเกอ ลาติ มอ อา เร๊อ เตจาเตจือ เร๊อ เตซิเปลเหน่เบ่ เออเนอ. อา เฮ๊แล เกอเร๊อ อาเหน่ เน๊อ, ‘แว โอ่แนโอ่ ฮู๊ คุ๊ยโหมะ เตเพร, แวเว โอ่น๊อ เกออู โต่ อาขว่าอาคยา, แว โอ่แคร๊ น๊อ เกออู โต่, กู๊แหน่เออ ตาแฮเง ปาหม่า, แว โหง่แวเห่ น๊อ เกออู โต่.’ g 8เด๊อ อา เฮ๊ ฮู๊เนอ อาขว่าอาคยา, เตอเนอเนอ ปา เนอ, เตเซอหร่า เก่ แฮเบ่ อา ปา, เร๊อ อา เก่ชุ๊ยเก่เช ปา, อา เก่โหง่เก่เห่ ปา, อา เก่ โอ่วีโอ่กอ ปา. แบ่เจ่ จอแปแหร่ เด๊อ อา เมจากาคยา ลู เออเตเพรเนอ อาฉว่าอาชอ, อาโพรอาฉว่าอาชอ แหน่เจ๊อ อาขว่าอาคยา, อา ซื๊ออือแก ลอ ลู เร๊อ หมิ ปา.” 9“เห่ขุ คุ๊ยจ๊อแผ่ ล๋อ ปลี เด๊อ อา จว๊าซื๊อ เร๊อ เพรเหมาะ เออเตเพร เร๊อ อา เมโมแล เกอเร๊อ แลแค อาเหน่ เร๊อ เตดุแหย่แถ่เซ เออเต๊เห่เนอ, ช๋า อา แม๊เถอะเฮ๊อ หมิอือโข่ ตูอูแถ่ เด๊อ วีกูเออ เบ๊อะเนอปาเนอ, อา เก่โหง่เก่เห่ ซิเปล ลอปลี ปา. h 10เหย่ซี ซิอิเช เร๊อ ปาหม่า อา ข่าเบ่ เต่อเกอ เตจาเออ เห๋ อา เตเน แลแค เร๊อ อา จว๊าโอ่ ก๊อถ่อแม๊ แลแค เด๊อ อายา เร๊อ อา เฮ๊ แลแค เน๊อ, ‘เก๋อ อา ต๊อหร่อเซ๊ เซอแก เฮ๊อ นี๋, อาจา เซอแกเฮ๊อ เน นี๋, เก๋อ บาบิโลน, เน หม่า วีดุวีทู, วีแตแน แหน่เจ๊อ ตีวี หม่าแน๊เรอ จอแปแหร่ เมจากาคยา แพ๊ เน เตอเปลอฮู๊ เร๊อ เน ปย๊าแก ลอ เจ๊อ นี๋.’ 11“เพร พรีเอ่อิเช เต เด๊อ เห่ขุ เต๊เห่เนอ, อา เก่โหง่เก่เห่ เกอเร๊อ ลอ ลู ปา, เมเตเฮ๊เรอ อู พรีเอ่เกอ ปา เหย่ซี เตกื่อเตค๊า เตเพร่ว โต่. i 12เหย่ซี รือเท, หล่อเซ๊หล่อโพร เต๊เห่, พ๊าเส่ งูดุงูชอ เต๊เห่, อิเก แบ๊ปลี เต๊เห่, อิเก เต๊เพ่ล๊อซอ เต๊เห่, อิเก ลีกาซุ๊ย เต๊เห่, ตู๊ตู่โพ เต๊เห่, ส่องูดุ ปว๊าเต๊อเจ่อ, ตาเต เด๊อ อู เม อา เร๊อ แตแชแตแม๊ ปว๊าเต๊อเจ่อ, ตาเต เด๊อ อู เม อา เร๊อ ส่อโนมื๊อ ปว๊าเต๊อเจ่อ, ตีลีแบ เต๊เห่ เบ่เบ่, ต่อเท๊ เร๊อ หล่อบู เต๊เห่ เบ่เบ่, j 13อิซุ๊ย อาเคร อาฮว๊าอาจี เต๊เห่, เตโนมื๊อโนฮั๊ว เต๊เห่, เหล่ชื๊ออือ โนมื๊อ เต๊เห่, เทอแย, ถ่าเทอ, โบ๊กู่ลา, โบ๊กู่ลาหมื่อ, ปู่, ซิหมิ, ตีซิ, ตีซิโหล่, หลู่เล๊เต๊เห่ เร๊อ แกแย ซิปล่อเซอเพร เต๊เห่เนอ อู พรีเอ่ ปา เตเพร่ว โต่. 14“เพร เมกื่อเมค๊า เต เต๊เห่ เก่ เฮ๊ วีบาบิโลน ปา เน๊อ, ‘ล๋อ เตกื่อเตค๊า อาแร๊ เด๊อ เน เหล่ซิหยื่อซิลอ เต๊เห่เนอ, อา โอ่เหม่แก ลอเฮ๊อ. โทเรอ ล๋อ เตงูดุงูชอ เต๊เห่ เร๊อ ตาเต เด๊อ อา เตเค แปล๊ตว่า เต๊เห่เนอ, อา โอ่เหม่แก ลอ เฮ๊อเฮ๊อ, เร๊อ เน แม๊เถอะน๊อ ปา อา โตโพ๋ โต่.’ 15ล๋อ เพรเมกื่อเมค๊า ตาหมื่อตาเต เด๊อ วีเนอ ตีวี อากู เต๊เห่เนอ, อา ดุแหย่แถ่เซ ลอปลี เร๊อ วีเนอ ตีวี อาคยา. เหย่ซี เก่ ซิอิเช เร๊อ ปาหม่า เหย่ซี ข่าเบ่ เต่อเกอ เต เร๊อ วีเออ ปา เห่ อา เตเน เร๊อ อา เก่ จว๊า ก๊อถ่อโอ่ ตาพายาแก แลแค โต๊โผ่ ปา, โท๊โต่ เหย่ซี เก่โหง่เก่เห่ แลแค ปา, เร๊อ อา เก่ เฮ๊ แลแค เนอ, k 16‘เก๋อ อา ต๊อหร่อเซ๊ เซอแก เฮ๊อ นี๋, อาจา เซอแก เฮ๊อ เน นี๋. โตโพ๊เคเนอ, เน หม่า วีดุ เร๊อ เน เหล่โกล ตี๊หรี่ อากือแซ๊หนิ เนเหน่ เร๊อ เห่อจา แบ๊ปลี, เห่อจา เต๊เพ่ล๊อซอ, เห่อจา ลีกาซุ๊ย, โท๊โต่ เน ตี๊หรี่แถ่หนิ เนเหน่ เร๊อ เท, หล่อเซ๊หล่อโพร เต๊เห่ เร๊อ พ๊าเส่ งูดุงูชอ เต๊เห่. 17กู๊แหน่เออ จอแปแหร่ เมจากาคยาแพ๊ เน เตอเปลอฮู๊ อากู เนอ, ล๋อ เน เตดุแหย่แถ่เซ เนอเต๊เห่ โอ่เหม่แก ลอ เฮ๊อ เน.’ l “ล๋อ ส่อเกลอดุ กู่กล๊อ เร๊อ เพรครวา แถ่แด๊เกอ เต๊เห่ เร๊อ หลู่เล๊ เต๊เห่ เน๊อ ล๋อ แกแย เด๊อ อาโร เต๊เห่ เด๊อ อา แม๊ปูเอ่ อาฮ๊อกูเฉ่ เร๊อ เตจว๊า เตกา เด๊อ เทอดุซาวากู เออเต๊เห่เนอ, อา เก่ จว๊า ก๊อถ่อโอ่ ตาพายาแก ปา. 18เร๊อ ช๋า เหย่ซี แม๊เถอะ หมิอือ โข่แถ่ เบ๊อะเนอปาเนอ อา เก่ เอ๊โทแถ่ เร๊อ อา เฮ๊ แลแค เน๊อ, ‘วีอาโรเต๊เห่ เด๊อ อาแซ่เน๊อ วีเออ ตีวี เนอ อาโอ่ น๊อล๋าย ตีวี๋ โต่.’ m 19เหย่ซี เก่ เด๊อะโล อา เตซิเปล เร๊อ อา เก่ พ่าแถ่ แลแค เห่หมื่อ เด๊อ อา กู่กล๊อขุ ปา, เร๊อ อา เก่โหง่เก่เห่ แลแค ปา, เร๊อ อา เก่ เฮ๊ แลแค เน๊อ, ‘เก๋อ อา ต๊อหร่อเซ๊ ซิอิเช เซอแก เฮ๊อ แว นี๋, เก๋อ อาจา เซอแก เฮ๊อ เน นี๋. เน หม่า วีดุ ตีวี เร๊อ, ล๋อ แกแย เด๊อ อา ส่อเกลอดุ โอ่ เด๊อ เทอดุซาวา อากู เต๊เห่เนอ, อา ดุแหย่แถ่เซ แลแค เร๊อ เนเต งูดุงูชอ อาขว่าอาคยา หม่าแน๊เรอ, จอแปแหร่ เมจากาคยาแพ๊ เน เตอเปลอฮู๊ เนอ, เน ปย๊าแก ลอ เจ๊อ เฮ๊อ. n 20เก๋อ ม๊อขุพู๊ ซิครือมอ แลแค, เก๋อ จอแปแหร่ อาแกแย ซี, เพรโด่แนพู๊ เต๊เห่ ซี เร๊อ เพรโพร ซี๋, เด๊อ อาปย๊าอาหลู่ เฮ๊อ อาขว่าอาคยา, ซิครือมอ แลแค. เมเตเฮ๊เรอ เด๊อ อา เมจาเมจือ โทเฮ๊อ ซี อาขว่าอาคยา, จอแปแหร่ เมจากาคยา เฮ๊อ อา.’” o 21เบ๊อะเนออาเค เตเน่วพู๊ เด๊อ อา อ๊าฉว่าเหร่ซอ เตเพร พย๊าแฮหนิ หล่อดู๋ เตเม เด๊อ อาแซ่เน๊อ กู๊ฉื่ออิวี. p เนอเรอ อา ต่าตา เด๊อ เทอดุซาวา อากู เร๊อ อา เฮ๊ เน๊อ, q “วีดุ บาบิโลน เออเนอ, อู เบ่ ต่าตาแก ลู แซ่ฮู๊ เออเนอ ปา เร๊อ อู เก่ แม๊เถอะ ปา อา โตโพ๋ โต่. 22เพรด่อติ เต๊เห่, เพรอิโร เตเต๊เห่, เพรโอ๊ ปีโล๊ เต๊เห่ เร๊อ เพรโอ๊ ปีแกแล๊ เต๊เห่เนอ หนิโฮน๊อ ปาโต่. r เพรแรเต อิเตเต๋ เบ่เบ่เนอ แม๊เถอะน๊อ ปา เหย่ซี โต่โต่. โทเรอ หนิโฮน๊อ ปา กู๊ฉื่ออิวี พรา โต่. s 23แม๊เถอะน๊อ ปา หมิลี เด๊อ เนกู โต่. หนิโฮน๊อ ปา กาฉู่แด่เพรคู เบ่เบ่, กาฉู่แด่ เพรเหมาะ เบ่เบ่, อาตาลา โต่. เน เพรเมกื่อเมค๊า เตฮู๊ เต๊เห่เนอ, อา ดุแหย่แถ่เซ เล๊ออูโค เร๊อ อา เตอเรอฉว่าชอ เล๊ออูโค เด๊อ เห่ขุเออ เจ๊อ. โทเรอ โลเน๊ ซ๊าร๊า เอ่อูแหย่โย โอ่ เด๊อ เน วีกู เต๊เห่เนอ, เด๊อ เหย่ซี ย๋อ อิลออี๊โหล่ แลโฮ เห่ขุพู๊ เออเต๊เห่ อาขว่าอาคยา, เห่ขุพู๊ เต๊เห่ เก่ ครวาซื๊อ เกอลอ เน คยา ปา. 24เพรโพร เต๊เห่ อาสุ่ย เร๊อ จอแปแหร่ อาแกแย เต๊เห่ อาสุ่ย เนอ อู แม๊เถอะ อา เบ๊อะวีเนอ ตีวี อากู อาขว่าอาคยา, จอแปแหร่ เมจากาคยาแก เฮ๊อ วีบาบิโลน เฮ๊อ. ล๋อ แกแย เด๊อ อู เมเซอ เหย่ซี เบ๊อะอา โอ่ ปา เด๊อ เห่ขุ เออเต๊เห่เนอ, อู แม๊เถอะ เหย่ซี อาสุ่ย เบ๊อะวีเนอ ตีวี อากูเนอ.” t
Copyright information for
EkySCThai