Revelation of John 21

ม๊อขุเซ เร๊อ เห่ขุเซ

1โทเรอ แว แม๊เถอะ ม๊อขุเซ เร๊อ เห่ขุเซ. เร๊อ ม๊อขุเลอเออ เร๊อ เห่ขุเลอ เออต๊าบ่า โอ่เหม่แก ลอ. โทเรอ เทอดุซาวา เออเนอหม่า อา โอ่ปา โต่โต่. ^a 2แว แม๊เถอะ วีบูโพ๊ หม่าดื่อเฮ๊อ เยรูซาเล็ม วีเซ เออตีวีเนอ, ^b เร๊อ อา โอ่ เด๊อ ม๊อขุ เด๊อ จอแปแหร่ อา โอ่ เร๊อ อา แฮแล. ^c อู ตี๊หรี่แตแร กือแซ๊ หนื่ออื่อ เป่ ลู ฮู๊ เพรกาฉู่แด่ เพรเหมาะ เตเพร เด๊อ อา โอ่ป่อฉื่อ อาเว เนอ. ^d 3แว หนิโฮ โหง่พราฉว่า ตือมือ เด๊อ จ๊อแผ่ กู่แกล๊เท แถ่โล อาโอ่เนอ, เร๊อ อา เฮ๊ เน๊อ, “กู๊แหน่เออ แบ่เจ่ จอแปแหร่ แฮโอ่เต่อเกอ เฮ๊อ เร๊อ แกแยเห่ขุพู๊ เฮ๊อ. อา เก่ โอ่เต่อเกอ เร๊อ เหย่ซี เร๊อ เหย่ซี เก่ ทวาแถ่ จอแปแหร่ อาแกแย ปา. แบ่เจ่ จอแปแหร่ อาเหน่แบ่เจ่ เร๊อดื่อ เก่ โอ่เต่อเกอ เร๊อ เหย่ซี เร๊อ อา เก่ ทวา เป่ เหย่ซี แบ่เจ่ ปา. ^e 4จอแปแหร่ เก่ ทื๊อซูแก ลอ เหย่ซี อาเป๊เส่เทอ ปา. เตเซอ โอ่ ปา โต่. เตซิเปล เบ่เบ่, เตโหง่เตเห่ เบ่เบ่, เตเชเหน่เชแบ่ เบ่เบ่ อา โอ่ ปา โต่. ^f เต เด๊อ อา ทวาแถ่น๊อ เด๊อ เห่ขุ อาเลอ เออต๊าบ่า เต๊เห่เนอ, อา โอ่ ปา โต่ เฮ๊อ.” ^g

5โทเรอ เพร โอ่แนโอ่ เด๊อ จ๊อแผ่ กู่แกล๊เท แถ่โลอาขุ เนอเตเพร เฮ๊ เน๊อ, “กู๊แหน่เออ แว เมเซ ลอเฮ๊อ เตปว๊าเต๊อเจ่อ.” เร๊อ อา เฮ๊ เกอ ลาติ แว เน๊อ, “ราม๊าแก เต เออเต๊เห่เนอ, เมเตเฮ๊เรอ โหง่เออ เต๊เห่ เนอหม่า อาจ๊ออาเต เร๊อ เหล่ซิเล หยื่อเอ่หนิ อา.”

6เร๊อ อา เฮ๊ เน๊อ, “อา โทเฮ๊อ, แว หม่า อาเหร่อเล๊อ เร๊อ อาโหน่เล๊อ อู เฮ๊อ. แว หม่า อาแก่ช๊า เร๊อ อาตื๊อดื่อ เฮ๊อ เทอเถ่ขุ เด๊อ อา เด๊อะ ตูจูเพร เนอ อา โอ่ ต๊ออ่อ. แกแย เด๊อ อา ซิโอ เตเพรเพร เนอ, แว เก่ เด๊อะโอครา อา ปา. ^h 7แกแย เตเพรเพร เด๊อ อา เมเป่ เตเนอ, อา เก่ พย๊าหนิ ลอล๋อ เตเออ เต๊เห่ เด๊อ แวโอ่ ปา. แว เก่ ทวา เหย่ซี แบ่เจ่ จอแปแหร่ ปา เร๊อ เหย่ซี เก่ ทวา แวพู๊ เต๊เห่ ปา. ⁱ 8หม่าแน๊เรอ แกแย เด๊อ อา โต๊โหร่ เต๊เห่, แกแย เด๊อ อาจ๊อ เร๊อ อา เตหยื่อเตแหน่ โต่ เต๊เห่, แกแย เด๊อ อาซิปล่อ มู๊แหม่ เต๊เห่, แกแย เด๊อ อา เมเซอ แกแย เต๊เห่, แกแย เด๊อ อา จว๊าซื๊อ เพรเหมาะเพรคู เต๊เห่, แกแย เด๊อ อา ทวา โลเน๊มู๊แหม่รีแจ่ ซ๊าร๊า เอ่อูแหย่โย เต๊เห่, แกแย เด๊อ อา จ๊อเบ เตแหย่โย เต๊เห่, เร๊อ แกแย เด๊อ อา แลโฮ อู เต๊เห่เนอ อาเหล่โอ่เหล่แบ่ หม่าเฮ๊อ หมิเผ่ เด๊อ อา หม่า เตเซอ เนอโพ๊โตโพ๊ เด๊อ อู ชื๊ออือ อา เร๊อ หย่าซู๊แบ เออเต๊เผ่ เนอ เฮ๊อ.”

เยรูซาเล็ม วีเซ

9เตเน่วพู๊ โซซว๊าเตเพร เด๊อ อา ปื่อหม่า เกอเร๊อ เบหล่อดุ โซซว๊าเต๊เบ่ เด๊อ อา บา เร๊อ เตจาเตจือ เด๊อคยาเล๊อ โซซว๊าเต๊อเจ่อ เออ อาเกล เตเพรเนอ, อา แฮ เด๊อ แว โอ่ เร๊อ อา เฮ๊ แว เน๊อ, “แฮมอ เร๊อ แว เก่ ยูโล เน เร๊อ ซิหมิพู๊ อาเม เพรกาฉู่แด่ เพรเหมาะ เออเตเพร.” 10จอแปแหร่ อา ซิปล่อเซอเพร โอ่เกอ เร๊อ แว เร๊อ เตเน่วพู๊ เตเพร พย๊าจว๊า แว เด๊อ โฉ่ดุโฉ่ทู เตเม อาคยา. เร๊อ อา ยูโล แว เร๊อ วีเยรูซาเล็ม บูโพ๊ เออตีวี. วีเออเนอ อา โอ่ เด๊อ ม๊อขุ เด๊อ แบ่เจ่ จอแปแหร่ อา โอ่ เร๊อ อา แฮแล. ^j 11เร๊อ วีเออเนอ, อา เล๊อบา เจ๊อ เร๊อ จอแปแหร่ อาลีอาเตเค เจ๊อ. วีเออเนอ, อา เตเค แซ่เจ๊อเร๊อ หล่อ โซหลู่โซเลแปล๊ เด๊อ อางูดุงูชอ เตเมเนอ เจ๊อ, โท๊โต่ อา แซ่เจ๊อเร๊อ หล่อซู๊บู แปล๊ลีชี๊ เตเม เนอ เจ๊อ. 12วีเออเนอ อู ต่าแถ่โล ตาวา เบ๊อะลู เร๊อ เตเร๊หล่อดุ แถ่โล. โทเรอ กู่ดาดุ โอ่ เช๊อเนอกู เร๊อ เตเน่วพู๊ โอ่ป่อ เกอเร๊อ อา เช๊อซิเนอ. เด๊อ กู่ดาดุเออ อาโล เนอ อู ราโอ่หนิ อิสราเอลพู๊ เช๊อเนอโหมะ เออ อามุย. ^k 13เด๊อ วีเตเร๊ หล่อดุ ตากยา เร๊อ ตากยา เนอ กู่ดาดุ โอ่โซกู. เด๊อ ซิเถ่ โซกู, ซีโน โซกู, ซิโท โซกู, ซิแล เร๊อ โซกู. 14วีเต๊เร๊ หล่อดุ อาช๊า เนอ อู แบ๊แถ่ ลู เร๊อ หล่อดุ เช๊อเนอเม. เร๊อ เด๊อ หล่อ เออเต๊เห่ ลูเนอ เนอ อู ราโอ่ อา เร๊อ ซิหมิพู๊ อา เพรโด่แนพู๊ เต๊เห่ เช๊อซิเนอ เต๊เห่ อามุย.

15เตเน่วพู๊ เด๊อ อา เฮ๊เบ่ เร๊อ แว เออเตเพรเนอ, อา ปื่อหม่า เกอเร๊อ เน๊อ อาเหล่เต อิปลี๊เท โตโบ เร๊อ อา เก่ เตแม๊ วี เร๊อ วีกู่ดาดุ เต๊เห่. เร๊อ วีเตเร๊หล่อดุ เต๊เห่. ^l 16วีเนอ อาหน่อ โอ่ ลุยหน่อ เร๊อ อาทู เร๊อ อาแหล่เนอ อา ครือแน ลู แพ๊. เตเน่วพู๊ เตแม๊ วีเออ เร๊อ อาเหล่เต อิปลี๊เท เนอโตโบ เร๊อ อาทูเนอ อา โอ่ กิโลเมตร เนอรี๊ลุยเย, เร๊อ อาแหล่เนอ, อา ครือแน แซ่เร๊อ อาทู เนอแพ๊. 17เตเน่วพู๊ เตแม๊ โป่ วีเตเร๊หล่อดุ เออเนอ เร๊อ เหล่เต อิปลี๊เท เนอโตโบ ฮู๊ แกแยเห่ขุ เหล่โกล เตเนอ. อา เต โทเฮ๊อ เร๊อ อาโดเนอ อา โอ่ เตเย เร๊อ ลุยเชอ เร๊อ ลุยเปล่. 18วีเตเร๊หล่อดุ เนอ อู แบ๊ อา เร๊อ หล่อโซหลู่โซเล เต๊เห่ โทเรอ วีเนอ อู แบ๊ อา เร๊อ เท หม่าแหน่ เจ๊อ เร๊อ อา แปล๊ลีชี๊ แม๊เถอะ ล๊อปลู๊ โน เจ๊อ ฮู๊ หล่อซู๊บู เนอ เจ๊อ. ^m 19วีอู อาแก่ช๊า เนอ อู ตี๊หรี่ โอ่ อา เร๊อ หล่อเซ๊หล่อโพร อาเมวเมว อาเจ่อเจ่อ เจ๊อ. หล่อ เด๊อ อู แบ๊ ลู เด๊อ วีเตเร๊หล่อดุ อาแก่ช๊า อาเหร่อเล๊อ เตเม เนอหม่า หล่อโซเล เร๊อ อู เอ๊ เร๊อ หล่อโซเล เร๊ออูเอ๊ ลูเน๊อ จัสเปอร์, เนอเมเตเม หม่า หล่อเต๊เผ่ เร๊อ อู เอ๊ เร๊อ ส่าพี๊หร่า, โซเมเตเม หม่า หล่อเต๊เผ่ลอ เร๊อ อู เอ๊ เร๊อ อากาต่า, ลุยเมเตเม หม่า หล่อโซเล เร๊อ อู เอ๊ เร๊อ ส่าเมอราโด่. 20แงเมเตเม หม่า หล่อเก่อแล เร๊อ อู เอ๊ เร๊อ สะโดหนิ, อาเม โซซว๊า เออเตเม หม่า อาลี เร๊อ อู เอ๊ เร๊อ ส่าดีอ่อ, โซซว๊าเตเม เนอเตเม หม่า หล่อแบ, เร๊อ อู เอ๊ ลู เร๊อ, ขรุโซลีโต่, อาเม ลุยซว๊า เออเตเม เนอ หล่อโซเล เร๊อ อู เอ๊ เน๊อ แบรีหล่า, ลุยซว๊าเตเม เนอเตเม เร๊อ หล่อแบ เร๊อ อู เอ๊ เน๊อ โตปาซีโอ่, อาเม เช๊อ เนอเตเม หม่า หล่อโซเล เร๊อ อู เอ๊ เน๊อ ขรุโซพราโส่, เช๊อเตเม เนอเตเม หม่า หล่อลีแบ เร๊อ อู เอ๊ เน๊อ อูกีโต่, เช๊อเนอเม เนอเตเม หม่า อา เต๊เผ่ล๊อซอ เร๊อ อู เอ๊ เน๊อ อาเมตูเซอโต่. 21กู่ดาดุ เช๊อเนอเบ่ เนอ เต๊เบ่ เร๊อ พ๊าเส่ งูดุงูชอ ต๊อปล่อ, เต๊เบ่ เร๊อ พ๊าเส่ งูดุงูชอ ต๊อปล่อ อู เม โอ่ อา ฮู๊เนอ. อู เม อา ฮู๊เนอ อาขว่าอาคยา, อาลอ พ๊าเส่ งูดุ เช๊อเนอปล่อ. วี อาแกล๊ เนอ เท หม่าแหน่ เจ๊อ, เร๊อ อา โอ่โล เช๊อเกอเล๊อ แม๊เถอะ ล๊อปลู๊ เจ๊อ ฮู๊ หล่อซู๊บู เนอ เจ๊อ.

22เด๊อ วีกูเนอ แว แม๊เถอะ เตหลู่เเตโฮ โอ่ เตเม๋ โต่, เมเตเฮ๊เรอ แบ่เจ่ จอแปแหร่ เด๊อ อา แจ่เต ล๋อ ปลี เออเตเพร เร๊อ ซิหมิพู๊ เนอโตโด อา โอ่ แลแค เฮ๊อ เบ๊อะเนอ เร๊อ อู จ๊อเบแถ่ เฮ๊อ เหย่ซี อาขว่าอาคยา, เตหลู่เเตโฮ โหล่ ปาโต่. 23จอแปแหร่ อา เตลีเตเตเค เนอ อา ลีตา เด๊อ วีกู, เร๊อ ซิหมิพู๊ เนอโตโด ลี เป่ เหย่ซี แซ่เร๊อ หมิกอเนอ อาขว่าอาคยา, เด๊อ วีกู เนอ ต๊อเหมาะ อาเตลี เบ่เบ่, เล อาเตลี เบ่เบ่ อา โหล่ ปา โต่. ⁿ 24แกแย เห่ขุพู๊ เออเต๊เห่เนอ, อา เก่ จว๊า เร๊อ จอแปแหร่ เน๊อ เหย่ซู่ อาเตลี เออ ปา, เร๊อ เห่ขุ คุ๊ยจ๊อแผ่ เต๊เห่เนอ อา เก่ พย๊าแฮโนหนิ แลแค อา เตดุแหย่แถ่เซ เด๊อ วีกู เออเนอ ปา. ^o 25วี กู่ดาดุ เต๊เห่เนอ อู บ๊าโมโอ่ ลู ปว๋า เตอเนอ ปา. เหมาะคี๊ โอ่ ปา โต่ อาขว่าอาคยา, อู เมบี๊ ลู โตโพ๋ โต่. ^p 26เทอเก่ อา เตตว่าเตแร๊ เต๊เห่ เร๊อ อา เตดุแหย่แถ่เซ เต๊เห่เนอ, อู เก่ พย๊าแฮโน อา เบ๊อะเนอ ปา. 27หม่าแน๊เรอ เด๊อ วีกู เนอ เต เด๊อ อา บูโพ๊ โต่ เนอเต๊เห่ โนหนิ เตอเจ๋อ โต่. แกแย เด๊อ อา เม เตมู๊แหม่รีแจ่ เบ่เบ่, อา แลโฮแลแฮ เต๊เห่ เบ่เบ่, โนหนิ เตเพร่ว โต่. โนหนิ แพ๊ตื๊อ แกแย เด๊อ อามุย โอ่ เด๊อ ซิหมิ อา ลีเซอเพร เออต๊าบ่า อากู เนอเต๊เห่ แพ๊. ^q