Rev 3 | EkySCThai | STEP | “ราจว๊า ลีเออ เด๊อ วีซาร์ดิส เพรหยื่อเอ่ตู๊หมู่ตอกล๊อ อา เตเน่วพู๊ อาโอ่ เนอ,” อา เฮ๊ แว ฮู๊เนอ เร๊อ อา เฮ๊ เน๊อ, “เตหรี่เตแก เออเนอหม่า อา แฮ เด๊อ เพร เด๊อ อา เป๊อหนิ อา แหย่โยบูโพ๊ เออโซซว๊าเตเม เด๊อ อา เม จอแปแหร่ อาเตเม เออเต๊เห่ เร๊อ เส่เออ โซซว๊าเตเม อาโอ่. เน เมแคร๋ อิเต เนอหม่า แว ซิเง. เน โอ่เซอเพร จ๊อลา เร๊อ แว อู เฮ๊ ฮู๊เนอ หม่าแน๊เรอ เน ครวา แวคยา โต่, เน แซ่แพ๊เร๊อ แกแยเซอ.

Revelation of John 3

ซูจว๊า เตหรี่เตแก เด๊อ วีซาร์ดิส เพรหยื่อเอ่ตู๊หมู่ตอกล๊อ อาโอ่

1 “ราจว๊า ลีเออ เด๊อ วีซาร์ดิส เพรหยื่อเอ่ตู๊หมู่ตอกล๊อ อา เตเน่วพู๊ อาโอ่ เนอ,” อา เฮ๊ แว ฮู๊เนอ เร๊อ อา เฮ๊ เน๊อ, “เตหรี่เตแก เออเนอหม่า อา แฮ เด๊อ เพร เด๊อ อา เป๊อหนิ อา แหย่โยบูโพ๊ เออโซซว๊าเตเม เด๊อ อา เม จอแปแหร่ อาเตเม เออเต๊เห่ เร๊อ เส่เออ โซซว๊าเตเม อาโอ่. เน เมแคร๋ อิเต เนอหม่า แว ซิเง. เน โอ่เซอเพร จ๊อลา เร๊อ แว อู เฮ๊ ฮู๊เนอ หม่าแน๊เรอ เน ครวา แวคยา โต่, เน แซ่แพ๊เร๊อ แกแยเซอ. 2 ฮู๊เนอ อาขว่าอาคยา, โอ่เมอ ปาโต่, ก๊อถ่อมอ, เตแร๊ เด๊อ อา โอ่แก ปา เร๊อ เน เนอเต๊เห่เนอ, อา เตเร เซอเฮ๊อ เด๊อะฉว่าเด๊อะชอแถ่ คยาแซ๊ เมอ อาเนอ, เมเตเฮ๊เรอ, แว แม๊เถอะ เร๊อ เต เด๊อ เน เมโทเฮ๊อ เต๊เห่เนอ, อาเล๊ออาบา ล๋าย เด๊อ แว จอแปแหร่ อา เป๊เส่เง โต่. 3 เมฮู๊เนอเรอ เตเนแถ่เบ่ หนิคยา เตเด๊อ อู อิซว๊า โทเฮ๊อ เนเนอ เต๊เห่ เร๊อ เตเด๊อ เน หนิโฮ โทเฮ๊อ เนอเต๊เห่. จูเอ่ เตเออเต๊เห่ เร๊อ ถู่แหล่แต๊แกละ เนซิปล่อ เนอ. เก่ เน โอ่เมอ ตื๊อดื่อปา เฮ๊เนอหม่า แว เก่ แฮ เด๊อ เนโอ่ ฮู๊ เพรเอ่โห่ เตเพร เนอ ปา. แว แฮ เบ๊อะเกเต ปาเนอ เน ซิเงโต่. ^a

4 “หม่าแน๊เรอ แกแย เด๊อ อา โอ่เซอเพร บูโพ๊ เร๊อ อาเห่อจา ปลีโพ๊ ลอปา เบ๊อะวีซาร์ดิส เพรหยื่อเอ่เออ ตู๊หมู่ตอกล๊อ เออเนอหม่า อา โอ่ปีตี๊ แพ๊. เหย่ซี เก่ กือแซ๊แถ่ เห่อจาบู เร๊อ อา เก่ จว๊าเต่อ เกอดื่อ เร๊อ แว ปา, เมเตเฮ๊เรอ เหย่ซี โต จว๊าเต่อเกอ แหน่ เร๊อ แว เฮ๊อ. 5 แกแย เด๊อ อา เมเป่เต เต๊เห่เนอ อู เก่ เด๊อะกือเด๊อะแซ๊ แถ่เกอดื่อ เหย่ซี เร๊อ เห่อบูจาโพ๊ ฮู๊เออเนอ ปา. โทเรอ อามุย เด๊อ อา โอ่ เด๊อ ลีเซอเพร อากู เออเต๊เห่เนอ, แว ทื๊อปลีแก ลู โต่โต่. ^b เด๊อ แวเพ เร๊อ อา ม๊อขุเตเน่วพู๊ เต๊เห่ อา เป๊เส่เง ปาเนอ, แว เก่ แด๊โฉ่โลแถ่โปล เป่ เหย่ซี เออเต๊เห่เนอ เนอ, เหย่ซี หม่า แวแกแย แพ๊, ฮู๊เนอ ปา. ^c 6 ฮู๊เนอเรอ เน กู๊หลิโกะ เก่โอ่ เร๊อ หนิดา แลแค เต เด๊อ จอแปแหร่ อา แหย่โยบูโพ๊ แด๊โฉ่ เพรหยื่อเอ่ตู๊หมู่ตอกล๊อ เออเนอเต๊เห่.”

ซูจว๊า เตหรี่เตแก เด๊อ วีฟีลาเดลเฟีย เพรหยื่อเอ่ตู๊หมู่ตอกล๊อ อาโอ่

7 “ราจว๊า ลีเออ เด๊อ วีฟีลาเดลเฟีย เพรหยื่อเอ่ตู๊หมู่ตอกล๊อ อา เตเน่วพู๊ อาโอ่ เนอ,” อา เฮ๊ แว ฮู๊เนอ. เร๊อ อา เฮ๊ เน๊อ, “เตหรี่เตแก เออเนอหม่า อา แฮ เด๊อ เพร เด๊อ อาบูโพ๊ อาจ๊ออาเต เออเตเพร อาโอ่. อา ปื่อหม่าโอ่ หนิ คุ๊ยดาวิด อาชอถิ. เบ๊อะอา บ๊าโม กู่ดา เบ๊อะเนอ, อู เมบี๊แจ่ เตเพร่ว โต่. เร๊อ เบ๊อะอา เมบี๊ เบ๊อะเนอ, อู บ๊าโมแจ่ เตเพร่ว โต่. ^d 8 เน เมแคร๋ อิเตเนอ แว ซิเง แพ๊. กู่ดา เด๊อ อู เมบี๊แจ่ เตเพร่ว โต่ เนอ, แว บ๊าโม เป่เฮ๊อ เน. เน อ๊าเจ่เหร่เจ่ หม่าแน๊เรอ เน หนิดา แวโหง่, เน เท๊บิบิแก แว โต่. 9 โลเน๊มู๊แหม่รีแจ่ กู่กล๊อ อา เตจ๊อเบโฮฮู๊ เออตู๊หมู่ เนอ, อา แหล่โฮ แล เกอเร๊อ แลแค อาเหน่ เร๊อ เป หม่า แกแยยิวพู๊ เต๊เห่, หม่าแน๊เรอ เหย่ซี หม่า แกแยยิวพู๊ หม่าโต่. ^e แว เก่ นอแฮ แด๊งือแล เหย่ซี เด๊อ ซี กู๊โด่ แก่ช๊า ปา เร๊อ เหย่ซี ปว๋า เตเพร เก่ ซิเง เร๊อ แว โมเร๊อ ซี เนอ ปา. ^f 10 แว เฮ๊แก โหง่ เด๊อ เน เก่ แด่ทูซิปล่อ อาเง เออเนอ, เน โตเตเนหม่า พย๊าหม่า อาขว่าอาคยา, เตแป่เตเช เด๊อ อา เตเร แฮ เด๊อ เห่ขุเออ เร๊อ อา เก่ เมแม๊ ล๋อ แกแย โอ่เด๊อ เห่ขุ เออต๊าบ่า ลอปา เบ๊อะเนอ, แว เก่ ตอกอเตเก เกอเร๊อ เน ปา.

11 “งยาแต่โต่เนอ แว เก่ แฮ ปา. แซ่ฮู๊ อู เก่ พย๊าเผ่แก แต่ เน กู๊โก่เท แต่เหม่เนอ, ปื่อหม่า หนิ แร๊ เต เด๊อ ซี พย๊าหนิ โทเฮ๊อ, เตอิซว๊าอี๊แส่ เด๊อ อาโตอาเบ่ เนอ เต๊เห่ นี๋. 12 แกแย เด๊อ อา เมเป่ เตเนอ, แว เก่ เด๊อะทวาแถ่ อา เร๊อ แว จอแปแหร่ อา เตหลู่เเตโฮ อาอี๊ถื่อ ปา, โทเรอ อา เก่ โอ่ ตื๊อดื่อลา เบ๊อะเนอ ปา. ^g แว เก่ ราโอ่หนิ แว จอแปแหร่ อามุย เด๊อ อาลู ปา. โทเรอ แว เก่ ราโอ่ แว จอแปแหร่ อาวี หม่าดื่อ เยรูซาเล็ม วีเซ อามุย เออเนอ เด๊อ อาลู ปา. เยรูซาเล็ม วีเซ เออเนอ, อา โอ่ เด๊อ ม๊อขุ เด๊อ แว จอแปแหร่ อาโอ่ เร๊อ อา แฮแล. เร๊อ แว เก่ ราโอ่เกอ แว มุยเซ เด๊อ อาลู ปา. ^h 13 เน กู๊หลิโกะ เก่โอ่ เร๊อ หนิดา เต เด๊อ จอแปแหร่ อา แหย่โยบูโพ๊ แด๊โฉ่ เพรหยื่อเอ่ตู๊หมู่ตอกล๊อ เออเต๊เห่เนอ.”

ซูจว๊า เตหรี่เตแก เด๊อ วีเลาดีเซีย เพรหยื่อเอ่ตู๊หมู่ตอกล๊อ อาโอ่

14 “ราจว๊า ลีเออ เด๊อ วีเลาดีเซีย เพรหยื่อเอ่ตู๊หมู่ตอกล๊อ อา เตเน่วพู๊ อาโอ่ เนอ,” อา เฮ๊ แว ฮู๊เนอ. เร๊อ อา เฮ๊ เน๊อ, “เตหรี่เตแก เออเนอหม่า อา แฮ เด๊อ อู เอ๊ เน๊อ, ‘อาเมน’ เออเนอ เตเพร อาโอ่. อา หม่า เพร เด๊อ อาซิปล่อจ๊อ เร๊อ อาข่าเฮ๊โล จ๊อจ๊อเตเต เออเตเพร อาโอ่. จอแปแหร่ นอแบ๊ตา แฮเง ลอ เตล๋อ ปลี เออเนอ เร๊อ อา แพ๊. ⁱ 15 เน เม โทเฮ๊อ แคร๋ หม่าอิเตเนอ แว ซิเง แพ๊. เน แซ่เน๊อ เทอ เด๊อ อา กู่ เกออู โต่โต่, อา เตอเจ๊อ เกออู โต่โต่, แว ซิหยื่อ เร๊อ เน เก่ กู่ โต่หม่าแน๊ เน เก่ เตอเจ๊อ เนอแพ๊. แว ซิหยื่อ เฮ๊ เร๊อ เก่ ครวา แวคยา เร๊อ ครวาตาเต เก่ ซิหยื่อ ครวา โต่ เฮ๊เรอ ครวา แต่ ตีกี๋ แต่เหม่. 16 หม่าแน๊เรอ เน กู่ โต่โต่, เน เตอเจ๊อ โต่โต่. เลเล๋ เน เลแพ๊ อาขว่าอาคยา, แว เก่ ถู่ปล๊าถู่ซีแก เน เด๊อ แว แกกู ปา. 17 ‘แว ดุแหย่แถ่เซ เร๊อ แว โหล่ ปา เจ๊อ เตอเจ๋อ โต่, แว โหล่ อิเตเต๋ เนอ อาโอ่ ลอ เจ๊อ เฮ๊อ,’ เน เฮ๊จ๊อ ฮู๊เนอ หม่าแน๊เรอ เน ซิเปลซิหย่อ ลื๋อ ซิยอกล่าเบ่เกอเร๊อ เน, เน โซพ๊าโซแร, เน เป๊เส่คี๊, เน โอ่กาโกล เจ๋อ เร๊อ เน ซิเง เกอเร๊อ เนเหน่ โต่. 18 เมฮู๊เนอเรอ แว เด๊อะซิเง จว่าเป่เกอ เน เร๊อ แซ่ฮู๊ เน เก่ ดุแหย่แถ่เซ เกออู เนอ, แฮ พรีเกอ เท เด๊อ แวโอ่ เออ. เท เออเนอหม่า อู โล โทเฮ๊อ เร๊อ หมิ. โท๊โต่ แฮ พรี เกอดื่อ เห่อจาบู เหล่กือเหล่แซ๊ เด๊อ แวโอ่ เออ เร๊อ กือบี๊แซ๊บี๊ เกอเร๊อ เน โอ่กาโกล ซิเตเร ดื่อเง เออเนอ. แซ่ฮู๊ เน เก่ แม๊เถอะ ลีโพ๊แร๊ เกออู อาเงเนอ, แฮ พรีเกอ เตขุ เป๊เส่เช เด๊อ แวโอ่ เออ เร๊อ จีโน เด๊อ เน เป๊เส่ปล่อกู เนอ.

19 “ล๋อ แกแย เด๊อ แว โมเร๊อ อา เต๊เห่เนอ, แว อิซว๊า ซิพรวา ซิลี เร๊อ แว ปลี๊ เกอเร๊อ ลู. ฮู๊เนอ อาขว่าอาคยา แด่ชอ เน ซิปล่อ เร๊อ ถู่แหล่แต๊แกละกา เน อาซิปล่อ เนอ. ^j 20 หนิดา แลแค๋ แว ก๊อถ่อ โอ่เบ๊อะกู่ดา เบ๊เง เร๊อ แว ด่อ กู่ดา เออ. แกแย เตเพรเพร เก่ หนิโฮ แว ด่อ กู่ดา เก่เฮ๊ เร๊อ บ๊าโมฉื่อ เนอ, แว เก่ แฮโน เอ่เต่อโอเต่อ เกอเร๊อ อา, เร๊อ อา เก่ เอ่เต่อโอเต่อ เกอเร๊อ แว ปา.

21 “แว เมเป่ โทเฮ๊อ เร๊อ แว โอ่แนหนิ เต่อเกอ เฮ๊อ เร๊อ แวเพ เด๊อ กู่แกล๊เท แถ่โล อาขุ เฮ๊อ. ฮู๊เนอเรอ แกแย เด๊อ อา เมเป่เต เต๊เห่เนอ, แว เก่ นอโอ่แนโอ่ เต่อเกอ เหย่ซี เร๊อ แว เด๊อ แว กู่แกล๊เท แถ่โล อาขุ เออเนอ ปา. 22 เน กู๊หลิโกะ เก่โอ่ เฮ๊เรอ หนิดา เต เด๊อ จอแปแหร่ อา แหย่โยบูโพ๊ แด๊โฉ่ เพรหยื่อเอ่ตู๊หมู่ตอกล๊อ เออเต๊เห่เนอ.”