Rev 4 | EkySCThai | STEP | เตเออเต๊เห่ โท เร๊อ แว แม๊เถอะลว๊า หนื่ออื่อโป่ เตอาโร เต๊อเจ่อ. เด๊อ ม๊อขุเนอ, กู่ดา เต๊เบ่ ลูโมโอ่ เร๊อ แว หนิโฮ เตพราแถ่ เต๊อเจ่อ เร๊อ อา พรา แซ๊เร๊อ กวาพรา ฮู๊ แว หนิโฮ โทเฮ๊อ เด๊อ กูลู่เค เนอ, เร๊อ อา เฮ๊เบ่ แว เร๊อ อา เฮ๊ เน๊อ, “แถ่เด๊อเออ, เออเต๊เห่ ทวาแถ่ โทปา เร๊อ แคร๋ หม่าเต เบ่ ทวาแถ่ ลาติ ปาเนอ, แว เก่ เด๊อะโล เป่ เน.”

Revelation of John 4

อู จ๊อบู่จ๊อเบแถ่ จอแปแหร่ เด๊อ ม๊อขุ เทอเลเก่กู

1 เตเออเต๊เห่ โท เร๊อ แว แม๊เถอะลว๊า หนื่ออื่อโป่ เตอาโร เต๊อเจ่อ. เด๊อ ม๊อขุเนอ, กู่ดา เต๊เบ่ ลูโมโอ่ เร๊อ แว หนิโฮ เตพราแถ่ เต๊อเจ่อ เร๊อ อา พรา แซ๊เร๊อ กวาพรา ฮู๊ แว หนิโฮ โทเฮ๊อ เด๊อ กูลู่เค เนอ, เร๊อ อา เฮ๊เบ่ แว เร๊อ อา เฮ๊ เน๊อ, “แถ่เด๊อเออ, เออเต๊เห่ ทวาแถ่ โทปา เร๊อ แคร๋ หม่าเต เบ่ ทวาแถ่ ลาติ ปาเนอ, แว เก่ เด๊อะโล เป่ เน.” 2 เออโตโพ๊เรอ จอแปแหร่ อา แหย่โยบูโพ๊ ปื่อหม่า โตโพ๊ ปื่อหม่า แว เร๊อ เด๊อ ม๊อขุ เนอ จ๊อแผ่ อา กู่แกล๊เท แถ่โล โอ่ เตเม เร๊อ อู โอ่แนโอ่ เด๊อ อาขุ เนอ เตเพร. ^a 3 แกแย เนอเตเพร เนอ อาเป๊เส่ เตเค แซ่เจ๊อเร๊อ หล่อเซ๊ ลีโซเล เตเม เร๊อ หล่อเซ๊ ลีอ๊อล๊อซอ เต๊เห่, โทเรอ เบ๊อะจ๊อแผ่ กู่แกล๊เท แถ่โล อาแก่ช๊า เนอ, เทอหล่อโบโอ๊ โอ่ ตาวา ลอ ลู แซ่เจ๊อเน๊อ หล่อเซ๊ โซเล เนอ เจ๊อ. 4 จ๊อแผ่ กู่แกล๊เท แถ่โล เด๊อ อาโร เนอเชอ เร๊อ ลุยเม เออเนอ อา โอ่ตาวา เร๊อ จ๊อแผ่ กู่แกล๊เท แถ่โล เออ เร๊อ จ๊อแผ่ กู่แกล๊เท แถ่โล เออเต๊เห่ อาขุ เนอ, โหมะพรูโหมะเผร่ เนอเชอ เร๊อ ซิลุย เด๊อ อา กือแซ๊แถ่ เห่อจาบู เร๊อ อา โก่แถ่ กู๊โก่เท เต๊เห่ โอ่แนโอ่ แลแค เบ๊อะเนอ. 5 เบ๊อะเนออาเค, เด๊อ จ๊อแผ่ กู่แกล๊เท แถ่โล เนอเตเม อากู เนอ, ฉ่าลีบ๊อ เถ่, ม๊อครอม๊อโหง่, ฉ่าแลลอปลี เจ๊อ, ^bเด๊อ จ๊อแผ่กู่แกล๊ เทแถ่โล อาแบ๊เงเนอ, หมิเต๊โบโซซว๊าโตโบ หม่าดื่อ จอแปแหร่อาแหย่โยบูโพ๊ โซซว๊าเตเม เออเนอ, ^c อาแกโลโซ แถ่ เบ๊อะเนอ. ^d 6 เบ๊อะจ๊อแผ่ กู่แกล๊เท แถ่โล อาเป๊เส่เงเนอ, เทออ่อดุ เด๊อ อาเช๊อเกอเล๊อ แซ่เจ๊อเน๊อ หล่อซู๊ บูแปล๊ เตเมเนอ อาโอ่ ต๊ออ่อ. ^e

เตเซอเพร ลุยโด เด๊อ อา เป๊เส่ปล่อ โอ่ ลอปลี เด๊อคยาคยา, เด๊อ เงเง เออเนอ, อา โอ่ ตาวา ลอปลี เกอลาติ เบ๊อะจ๊อแผ่ กู่แกล๊เท แถ่โล อาแก่ซ๊า เนอ. ^f 7 อาเหร่อเล๊อ โตโด เนอ อาแซ่เน๊อ แอ๊ซี, เนอโด โตโด เนอ อาแซ่เน๊อ ปู่เพดุ, โซโด โตโด เนอ อาเป๊เส่ แซ่เน๊อ แกแย เป๊เส่ เร๊อ ลุยโด โตโดเนอ, อาแซ่เน๊อ ลาบูดุ เด๊อ อา โย เด๊อ ม๊อเลเนอ. 8 เตเซอเพรเออ ลุยโด ลอเนอ, โตโด๋ เร๊อ อา ด๊าโอ่ อา เบ่ โซซว๊า, อา เป๊เส่ปล่อ เต๊เห่เนอ, อาโอ่ ลอปลี ลูเหน่ ชีเพรเจ๊อ, อาโอ่ โต่ ลอ เจ๊อ เด๊อ อาด๊าเล. เหย่ซี อิโร ถู่เซ๊แถ่ ปวาเนอเน๋อ ปวาเซเซ เจ๊อ, อา โอ่โก๊ โตโพ๋ โต่. เร๊อ อา อิโร ถู่เซ๊แถ่ แลแค เน๊อ, ^g

“แบ่เจ่ จอแปแหร่ เด๊อ อา เมแจ่เต ล๋อ ปลี เด๊อ อา โอ่เซอเพร เด๊อหนู่เด๊อส่าเค, เร๊อ อา โอ่เซอเพร โต่กู๊แหน่, โทเร๊อ อา เก่ โอ่เซอเพร แฮเงลา เออเตเพรเนอ, อา อาบูโพ๊, อาบูโพ๊, อาบูโพ๊.” ^h

9 เตเซอเพรเออ ลุยโดเนอ, อา อิโร เมลีเมเตเคแถ่ โทเร๊อ แด่ดุแด่ทู เร๊อ เฮ๊บุ๊ยเฮ๊เตอเรอแถ่ จอแปแหร่ เด๊อ อา โอ่แนโอ่ เด๊อ จ๊อแผ่ กู่แกล๊เท แถ่โล อาขุ เด๊อ อา เซอเพร ตูจูเพร ตาแลเคร๊ เออเนอ เตเพร. เร๊อ เบ๊อะเหย่ซี อี๊โรแถ่ ฮู๊เออ อาเบ๊อะเนอ, 10 โหมะพรูโหมะเผร่ เนอเชอ เร๊อ ซิลุย เออเนอ อา แด๊งือแล เด๊อ เพร โอ่แนโอ่ เด๊อ จ๊อแผ่ อา กู่แกล๊เท แถ่โล อาขุ เนอเตเพร เป๊เส่เง เร๊อ อา จ๊อเบแถ่ แกแย เด๊อ อา เซอเพร ตูจูเพร เออเนอ เตเพร. เหย่ซี แด่ตาแก อา กู๊โก่เท เออเต๊เห่ เด๊อ จ๊อแผ่ กู่แกล๊เท แถ่โล อาเป๊เส่เง เร๊อ อา อิโรแถ่ แลแค เนอ,

11 “เก๋อ เป แบ่เจ่ จอแปแหร่, เน โต พย๊าหนิ แหน่ เตลีเตตาเค, เตแด่ซิแหน่ซิเตเร เร๊อ เตโพรฉว่าชอ เฮ๊อ, เมเตเฮ๊เรอ เน แบ๊แล เต ล๊อ ปลี เร๊อ เน แบ๊แล เหย่ซี เร๊อ เน แด่ โอ่เซอเพร เหย่ซี จู๋ ดื่อ เนซิปล่อเฮ๊อ.”