Revelation of John 6
อู เมหม่าแร๊ เตเมม๊าเมแด เต๊เห่
1แว แม๊เถอะ ซิหมิพู๊ เนอโตโด ปาอ๊าโมแถ่ อู เกล๊จิจือหม่า เตม๊าเตแด เด๊อ โซซว๊าโต๊โก่ อาเกลเออ อาเหร่อเล๊อ โต๊โก่ เร๊อ แว หนิโฮ เด๊อ เตเซอเพร เนอ ลุยโด อาเกล โตโดเนอ อาโหง่พราแถ่ แซ่เร๊อ ฉ่าแล เนอ เร๊อ “แฮมอ” อา เฮ๊ ฮู๊เนอ. 2แว แม๊ เร๊อ แว แม๊เถอะ ตีซิบู โตโด, เร๊อ แกแย เด๊อ อา แถ่แด๊ อา เตเพรเนอ อา ปื่อหม่าหนิ เกล่อ เต๊เบ่ เร๊อ อู เด๊อะ อา กู๊โก่เท เตเม. อาเนอ, อาแซ่เน๊อ แกแย เด๊อ อา ช๊าเป่ โทเฮ๊อ อู เตเพร เนอ. กู๊แหน่เรอ อา แถ่แด๊หนิ คยาแซ๊ ตีซิ เร๊อ อา เถ่จว๊า แซ่ฮู๊ อา เก่ จว๊าช๊าเป่ คยาแซ๊ อู เนอ. a 3เบ๊อะซิหมิพู๊เออ ปาอ๊าโมแถ่ เตม๊าเตแด เนอโก่โต๊โก่ เบ๊อะเนอ, แว หนิโฮ เตเซอเพร เนอโด โตโด เออเนอ เฮ๊ เน๊อ, “แฮมอ.” 4เร๊อ ตีซิลี โตโด แฮเถ่, เร๊อ แกแย เด๊อ อา แถ่แด๊ ลู เตเพรเนอ, อู เด๊อะ ลู เตโพรฉว่าชอ เด๊อ อา เก่ พย๊าแฮ เตช๊าเตปา เด๊อ เห่ขุเออ. เร๊อ เห่ขุพู๊ เต๊เห่ เก่ เมเซอ เกอเร๊อ คยาดื่อ ลู เตเพร เร๊อ เตเพร. โท๊โต่ อู เด๊อะ ลู เน๊ดู๋ เต๊เบ่. b 5โทเรอ ซิหมิพู๊ เนอโตโด ปาอ๊าโมแถ่ เตม๊าเตแด เด๊อ อู เมหม่า อาเนอ, เร๊อ แว หนิโฮ เตเซอเพร โซโด เนอโตโด เฮ๊ เน๊อ, “แฮมอ” อา เฮ๊ ฮู๊เนอ. แว แม๊ เร๊อ แว แม๊เถอะ ตีซิลอ โตโด เร๊อ แกแย เด๊อ อา แถ่แด๊ ลู เตเพรเนอ อาโอ่ เกอเร๊อ เน๊อ แจ๊จู๊เหล่ เด๊อ อา กู๊ยากู. c 6แว หนิโฮ เด๊อ เตเซอเพร เออลุยโด อาเกล เนอ, อา แซ่ เร๊อ โหง่พราแถ่ เต๊อเจ่อ, เร๊อ อา เฮ๊ เน๊อ, “แรเต เตอเน๋อ เหมาะเฮ๊ เนอ, อา หนิ แพ๊ อาคว๊าเก่ โบ๊กู่ลา เตเบ แพ๊, หม่าโต่เรอ โบ๊บ่าหลิ โซเบ แพ๊. เร๊อ เมปย๊าแก แต่ โต๊โฉ่เส่เทอ เร๊อ แท๊ทือเส่เทอแย เนอ แต่เหม่ นี๋.” 7โทเรอ ซิหมิพู๊ เนอโตโด ปาอ๊าโมแถ่ เตม๊าเตแด ลุยโก่โต๊โก่ เด๊อ อูเมหม่า อาเนอ เร๊อ แว หนิโฮ เตเซอเพร ลุยโด เนอโตโด เฮ๊ เน๊อ, “แฮมอ” อา เฮ๊ ฮู๊เนอ. 8แว แม๊ เร๊อ แว แม๊เถอะ ตีซิ แบบูเล โตโด. เร๊อ แกแย เด๊อ อา แถ่แด๊ อา เตเพรเนอ อู เอ๊ ลูมูย เร๊อ เตเซอ. เร๊อ โลเก่เน๊ดอ ครวาต๊อต่อ เกอ ลูคยา. อู เด๊อะ เหย่ซี อาเตอเรอฉว่าชอ เด๊อ อา เก่ เมปย๊าแก เห่ขุ ลุยปุ๊ยตูปุ๊ย ปา. ฮู๊เนอเรอ อา เก่ เมเซอ อู เร๊อ เตช๊าเตปา, เตโอ่วีโอ่กอ, เตชุ๊ยเตเช เร๊อ เตมีเตแหม่ เต๊เห่ ปา. d 9โทเรอ ซิหมิพู๊ เนอโตโด ปาอ๊าโมแถ่ เตม๊าเตแด เด๊อ อู เมหม่า อา แงโก่โต๊โก่. แว แม๊เถอะ แกแย เด๊อ อา แด๊โฉ่โด่แน เป่ อู เร๊อ จอแปแหร่ อาลาอาโหง่, โท๊โต่ อา เด๊อะโล จ๊อจ๊อเตเต, เร๊อ อู เมเซอโทเฮ๊อ เหย่ซี เต๊เห่เนอ, แว แม๊เถอะ เหย่ซี ซิปล่อเซอเพร เต๊เห่ โอ่เด๊อ เตหลู่อาเหร่ อาเล เนอ. 10เหย่ซี เอ๊โทแถ่ ฉว่า แลแค อาโหง่ เน๊อ, “แบ่เจ่ เด๊อ อา แจ่เตลอ เร๊อ อา บูโพ๊, อาจ๊ออาเต เตเพร, แกแยเห่ขุพู๊ เด๊อ อา เมเซอ เป เออเต๊เห่เนอ, เน เก่ เมจากาคยา เหย่ซี, เน เก่ เมเลอ กาคยา เหย่ซี บ๊อเกเต ปา?” 11อู เด๊อะ เหย่ซี จาจวาบู ปว๋า เตเพร, โทเรอ อู เฮ๊ เหย่ซี เน๊อ เหย่ซี เก่ โอ่โก๊ เตเบ๊ซิพร๊า โป่ เตอเปลอฮู๊. เร๊อ เหย่ซี เก่ โอ่โก๊ โต่เด๊อ อู เมเซอ บาแถ่ เฮ๊อ เหย่ซี อาโคหลู่เล๊ เต๊เห่ เร๊อ อาโป่แหว่ เด๊อ อา หยื่อเอ่แหน่เอ่เต เต๊เห่ ฮู๊ อู เมเซอโทเฮ๊อ เหย่ซี เนอ ปา. 12แว แม๊ เร๊อ, แว แม๊เถอะ ซิหมิพู๊ เนอโตโด ปาอ๊าโมแถ่ เตม๊าเตแด อาโก่ โซซว๊า เออโต๊โก่. eเออโตโพ๊เรอ, เตเน่วท๊อดี ฉว่าแหน่เจ๊อ, ต๊อเหมาะ คี๊แก แซ่เร๊อ อิเก อาตูพรู๊ ลอกี ตือปือ เนอ, โทเรอ เล เร๊อ อาลี กาซุ๊ยแก แซ่เร๊อ สุ่ย เนอ เจ๊อ. f 13เฉ่ เต๊เห่ แลตาพรอ ลอ เด๊อ เห่ขุ แซ่เร๊อ เก่แลเซ๊ดุ แฮ เร๊อ ก่อดุ๊ยเส่ เด๊อ อามี ล๋ายโต่ เต๊เห่ แลตา เซอลอ เด๊อ เห่ขุ เนอ. g 14ม๊อเล เนอ อา โอ่เหม่แก แซ่เร๊อ อู ถู่ลู ดว้าแก ลีตูกลู๊ เนอ. โฉ่ ปว๊าเตเม เร๊อ กลื๊อ ปว๊าตือกลื๊อ เนอ, อา ซ๊อซื๊อ จว๊าแก ลอ เร๊อ อาเหล่โอ่. h 15เบ๊อะเนอเค ปาเนอ, เห่ขุ จ๊อแผ่ เต๊เห่, เพรเป๊อตี๊หรี่เต เต๊เห่ เร๊อ เกลอ กู่กล๊อดุ เต๊เห่ เร๊อ เพรดุแหย่แถ่เซ เต๊เห่ เร๊อ เพร อ๊าฉว่าเหร่ชอ เต๊เห่, โทเรอ ล๋อ หลู่ เต๊เห่เนอ เบ่เบ่, ล๋อ เพร พย๊าหนิ เตปาลา ซี เต๊เห่เนอ เบ่เบ่, อา จว๊า โอ่ว๊าโอ่บิ เกอเร๊อ แลแค อาเหน่ เด๊อ หล่ากู โฉ่กู, เด๊อ หล่อปลูหล่อเปล่ เด๊อ อา โอ่ เด๊อ หล่าเกลโฉ่เกล เนอเต๊เห่ ปา. i 16เหย่ซี เอ๊โทแถ่ แลแค โฉ่เต๊เห่ เร๊อ หล่อเต๊เห่ เร๊อ อา เฮ๊ แลแค เน๊อ, “แลตาพรอ เด๊อ เปโอ่ เออ เร๊อ แลตาพรอ โฮ๊บี๊ เป่แก เป เร๊อ เพร เด๊อ อา โอ่แนโอ่ เด๊อ จ๊อแผ่ กู่แกล๊เท แถ่โล อาขุ เนอเตเพร อาเป๊เส่ เน๊อ ซิหมิพู๊ อา เตซิปล่อดุ เป เออเน๋อ. j 17เมเตเฮ๊เรอ, ม๊อเนอม๊อเซ แฮโต่เฮ๊อ เด๊อ จอแปแหร่ เร๊อ ซิหมิพู๊ เก่ เมจากาคยา อู ปว๋า เตเพรเฮ๊อ, อูเป เตเพร เตเร ข่าเบ๊ ปาเป?” k
Copyright information for
EkySCThai