Revelation of John 7
อิสราเอล อาแกแย อาเพร ตีซี ลุยซ๊อ เร๊อ ลุยรี๊
1เตเมอาเหน่ ฮู๊เออ โทเรอ เห่ขุเออ เบ่เบ่, เทอดุซาวา เออเต๊เห่ เบ่เบ่, ส่อเหมาะ เต๊เห่ เบ่เบ่, แซ่ฮู๊ เก่แลเซ๊ แฮเบ่ แต่ เหย่ซี แต่เหม่ เนอ, แว แม๊เถอะ เตเน่วพู๊ ซิลุย ก๊อถ่อโอ่ แลแค เด๊อ เห่ขุ ลุยเหนาะ เร๊อ อา เมตาตือ ฉื่อแกลอ เก่แลเซ๊ แกล๊. a 2แว แม๊เถอะ เตเน่วพู๊ เด๊อ อาโรเตเพร โอ่ เด๊อ ซิเถ่ ตากยา แฮ เร๊อ อา พย๊าแฮหนิ แบ่เจ่ จอแปแหร่ เด๊อ อา เซอเพร เออเตเพร อา เตม๊าเตแด โต๊โก่. โทเรอ อา จ่าเพรอ เอ๊โทแถ่ เตเน่วพู๊ เออซิลุย เด๊อ จอแปแหร่ เด๊อะ โทเฮ๊อ เหย่ซี อาเตโพรฉว่าชอ เด๊อ อา เก่ เมปย๊าแก เห่ขุ เร๊อ เทอดุซาวา เออเต๊เห่. 3เตเน่วพู๊ เออเตเพร เฮ๊ เน๊อ, “เบ๊อะเป เมม๊าเมแด โท แต่ล๋าย แบ่เจ่ จอแปแหร่ อาหลู่เล๊ เออ เต๊เห่ เร๊อ เตม๊าเตแด เด๊อ อา มาเท๊ลู ล๋ายโต่ เนอ, เห่ขุ เบ่เบ่, เทอดุซาวา เบ่เบ่, ส่อเหมาะเหว่โบ เบ่เบ่, โตเบ่ เมแป่เมเช หนิลา เหย่ซี เตอเจ๋อ โต่.” b 4เร๊อ อู แด๊โฉ่ แว เร๊อ แกแย เด๊อ อู เมม๊า อา เร๊อ จอแปแหร่ อา เตม๊าเตแด เด๊อ อา มาเท๊ลู เต๊เห่เนอ, อาโอ่ อาเพร ตีซี ลุยซ๊อ เร๊อ ลุยรี๊. เหย่ซี เต๊เห่ หม่า หม่าเฮ๊อ ล๋อ อิสราเอลพู๊ เช๊อเนอโหมะ เออเต๊เห่ เฮ๊อ. 5เด๊อ คูยูดาห์ โต๊โหมะเต๊อเจ่อ อาเกล เนอหม่า อาเพร ตอซ๊อ เร๊อ เนอรี๊, เด๊อ คูรูเบน โต๊โหมะเต๊อเจ่อ อาเกล เนอหม่า ตอซ๊อ เร๊อ เนอรี๊, เด๊อ คูกาด โต๊โหมะเต๊อเจ่อ อาเกล เนอหม่า ตอซ๊อ เร๊อ เนอรี๊, 6เด๊อ คูอาเชอร์ โต๊โหมะเต๊อเจ่อ อาเกล เนอหม่า ตอซ๊อ เร๊อ เนอรี๊, เด๊อ คูนัฟทาลี โต๊โหมะเต๊อเจ่อ อาเกล เนอหม่า ตอซ๊อ เร๊อ เนอรี๊, เด๊อ คูมนัสเสห์ โต๊โหมะเต๊อเจ่อ อาเกล เนอหม่า ตอซ๊อ เร๊อ เนอรี๊, 7เด๊อ สิเมโอน โต๊โหมะเต๊อเจ่อ อาเกล เนอหม่า ตอซ๊อ เร๊อ เนอรี๊, เด๊อ เลวี โต๊โหมะเต๊อเจ่อ อาเกล เนอหม่า ตอซ๊อ เร๊อ เนอรี๊, เด๊อ คูอิสสาคาร์เหร่อ โต๊โหมะเต๊อเจ่อ อาเกล เนอหม่า ตอซ๊อ เร๊อ เนอรี๊, 8เด๊อ คูเศบูลุน โต๊โหมะเต๊อเจ่อ อาเกล เนอหม่า ตอซ๊อ เร๊อ เนอรี๊, เด๊อ คูโยเซฟ โต๊โหมะเต๊อเจ่อ อาเกล เนอหม่า ตอซ๊อ เร๊อ เนอรี๊ เร๊อ เด๊อ คูเบนยามิน โต๊โหมะเต๊อเจ่อ อาเกล เนอหม่า อาเพร ตอซ๊อ เร๊อ เนอรี๊.แกแย เบ๊หมู่ดุ ตู๊หมู่
9เตเมอาเหน่ ฮู๊เออ โทเรอ แว แม๊เถอะ แกแย โอ่โหร่โอ่เอ๊ แหน่เจ๊อ ตู๊หมู่ เร๊อ อู แด๊ ลอเป่ เหย่ซี เตเพร่ว โต่. เหย่ซี โอ่ เด๊อ เมวเจอะ ปว๊าเต๊อเจ่อ, กลุยแล ปว๊าโต๊โหมะ, แกแย ปว๊าตู๊หมู่, เร๊อ โหง่ ปว๊า เต๊อเจ่อ แฮ เร๊อ เหย่ซี แฮก๊อถ่อโอ่ เด๊อ ซิหมิพู๊ เร๊อ อาจ๊อแผ่ กู่แกล๊เท แถ่โล อาเป๊เส่เง. โทเรอ เหย่ซี อากือแซ๊หนิ จาจวาบูทู เร๊อ ปื่อหม่าหนิ แลแค กอน๊อเหมาะแพ เต๊เห่. 10เหย่ซี จ่าเพรอ เอ๊โท เร๊อ อา เฮ๊ เนอ, “ตื๊อแพ๊ เป จอแปแหร่ เด๊อ อา โอ่แนโอ่ เด๊อ จ๊อแผ่ กู่แกล๊เท แถ่โล อาโอ่ เนอ เตเพร เร๊อ ซิหมิพู๊ เนอโตโด เมแลเปล๊กา เป แพ๊.” 11ล๋อ เตเน่วม๊อขุ เต๊เห่ ก๊อถ่อโอ่ ตาวา ล๊อปลี เร๊อ จ๊อแผ่ กู่แกล๊เท แถ่โล เออ เร๊อ โหมะพรูโหมะเผร่ เนอเต๊เห่ เร๊อ เตเซอเพร เนอ ลุยโด. เบ๊อะเนออาเค เหย่ซี แด๊งือแล ล๊อปลี เด๊อ จ๊อแผ่ กู่แกล๊เท แถ่โล อาเป๊เส่เง เร๊อ จ๊อบู่จ๊อเบแถ่ แลแค จอแปแหร่. 12เร๊อ อา เฮ๊ แลแค เนอ, “อาเมน, เตถู่เซ๊แถ่, เตลีเตเค, เตลีแมลีเพ๊, เตเฮ๊บุ๊ยเฮ๊เตอเรอ, เตแด่ดุแด่ทู, เตโพรฉว่าชอ, เร๊อ เตเหร่เตแบ เต๊เห่เนอ, เป แบ่เจ่ จอแปแหร่ เก่ พย๊าหนิ ดื่อ ตูจูเพร แตแลเคร๊ นี๋, อาเมน.” 13โทเรอ เด๊อ โหมะพรูโหมะเผร่ เนอเต๊เห่ อาเกล เตเพรเนอ อา แด๊เฮอ แว เน๊อ, “แกแย เด๊อ อา กือแซ๊ จาจวาบูทู เออเต๊เห่ เนอหม่า อูเป? เหย่ซี หม่า อา โอ่ เบ๊อะเตแฮ?” 14“ซ๊าร๊าดุ, แว ซิเงโต่, เน ซิเง แพ๊,” แว เฮ๊ฉื่อ อา ฮู๊เนอ. เร๊อ อา เฮ๊ฉื่อ แว เน๊อ, “เหย่ซี เต๊เห่ เนอหม่า แกแย เด๊อ อา จว๊า ตาลว๊าเบ๊ โทเฮ๊อ เตเมจาเมจือ เด๊อ อา ต๊อหร่อเซ๊ ซิอิเช เออเต๊อเจ่อเนอ เฮ๊อ. เหย่ซี โฉ่ปลี โทเฮ๊อ อา จาจวาทู เออเต๊เห่ เฮ๊อ, โทเรอ อา เมบู โทเฮ๊อ เร๊อ ซิหมิพู๊ เนอโตโด อาสุ่ย เฮ๊อ. c 15ฮู๊เนอ อาขว่าอาคยา, เหย่ซี ก๊อถ่อโอ่ หนิเบ๊เฮ๊อ เด๊อ จอแปแหร่ อาจ๊อแผ่ กู่แกล๊เท แถ่โล อาเป๊เส่เง เฮ๊อ เร๊อ เหย่ซี เม เฮ๊อ ลู เตเม เหมาะคี๊คี๊, เหมาะเชเกลเกล เด๊อ เตหลู่แต โฮกู เนอ เฮ๊อ. เพร เด๊อะ อา โอ่แนโอ่ เด๊อ จ๊อแผ่ อา กู่แกล๊เท แถ่โล อาโอ่ เออเตเพรเนอ, อา เก่ โอ่เกอ เร๊อ เหย่ซี เร๊อ อา เก่ ตอกอเตเก เกอเร๊อ เหย่ซี ปา. 16ซิเอ่ซิโอ ปา โตโพ๋ โต่. ต๊อเหมาะ ช๊าเบ่ ปา เหย่ซี โตโพ๋ โต่. อา ข่าเบ่น๊อ ปา เตอากู่อาลว๊า โต่. d 17เมเตเฮ๊เรอ ซิหมิพู๊ โอ่ เด๊อ จ๊อแผ่ กู่แกล๊เท แถ่โล อากล๊าเมกู เนอโตโด e เก่ เก่ เหย่ซี เร๊อ อา เก่ ซูจว๊า เหย่ซี เด๊อ เทอ เด๊อ อา เด๊อะ เหย่ซี ซิปล่อเซอเพร อา เทอเถ่ขุ เต๊เห่ อาโอ่ ปา. f โทเรอ จอแปแหร่ เก่ ทื๊อซูแก เป่ เหย่ซี เป๊เส่เทอ ปว๊าเตเม๊ เจ๊อ ปา.” g
Copyright information for
EkySCThai