Rev 9 | EkySCThai | STEP | ฮู๊เนอโทเรอ เบ๊อะเตเน่วพู๊ แงเพร เตเพร โอ๊แถ่ อากวา เบ๊อะเนอ, แว แม๊เถอะ เฉ่ เตเม แลตา โอ่ โทเฮ๊อ เด๊อ เห่ขุ เออ เร๊อ อู เด๊อะ เฉ่ เออเตเม เร๊อ ครอกูดุ ครอกูแย ตูกู อาชอถี่.

Revelation of John 9

1 ฮู๊เนอโทเรอ เบ๊อะเตเน่วพู๊ แงเพร เตเพร โอ๊แถ่ อากวา เบ๊อะเนอ, แว แม๊เถอะ เฉ่ เตเม แลตา โอ่ โทเฮ๊อ เด๊อ เห่ขุ เออ เร๊อ อู เด๊อะ เฉ่ เออเตเม เร๊อ ครอกูดุ ครอกูแย ตูกู อาชอถี่. 2 เฉ่เออ เตเม บ๊าโม ครอกูดุ ครอกูแย เออตูกู เร๊อ หมิโข่แถ่ เด๊อ อากู เร๊อ อา แซ่เจ๊อเน๊อ หมิโข่แถ่ เด๊อ หมิโปดุกู เนอ เจ๊อ. หมิ ย๋อ โข่แถ่ อาขว่าอาคยา, ต๊อเหมาะ หม่า อาคี๊คี๊, ม๊อเล หม่า อา คี๊แก ลอปลีเจ๊อ. ^a 3 ตีกี เต๊เห่ โอ่ เด๊อ หมิโข่เกล โยเถ่ เร๊อ อา โยเถ่ ตาลอ เด๊อ เห่ขุ เร๊อ อู เด๊อะ เหย่ซี อาเตโพรฉว่าชอ เด๊อ อา เก่ อ่า อู, เร๊อ อา เก่ แร แซ๊เจ๊อเน๊อ แดเม เด๊อ เห่ขุเออ เต๊เห่ อา อ่าแร อู เนอ เจ๊อ ปา. ^b 4 อู เฮ๊หนื่ออื่อ เหย่ซี เร๊อ อา เบ่ เมปย๊าหนิ มีออ เต๊เห่ โต่, ส่อตอเหมาะ ซิโซ เต๊เห่ โต่, ส่อเหมาะเหว่โบ ซีเต๊เห่ ตีกี๋ โต่. เหย่ซี เบ่ อ่า แพ๊ตื๊อ แกแย เด๊อ อา โอ่ เกอเร๊อ เกอเน๊อ จอแปแหร่ อาเตเมม๊าเมแด เด๊อ อา มาเท๊ลู โต่ เนอเต๊เห่ แพ๊. ^c 5 ตีกี เออเต๊เห่เนอ, อู เฮ๊ โอ่ เหย่ซี เด๊อ อา เบ่ เมเซอหนิ แกแย เออเต๊เห่ โต่ หม่าแน๊เรอ แงเล อากูเนอ, อู นอเมชุ๊ยจา เมชุ๊ยจือ เหย่ซี เร๊อ แกแย เออเต๊เห่. เตเมจาเมจือ อู เออเนอ, อา อ่าแรเช แซ๊เจ๊อเร๊อ แดเม อ่าแร เนอ. 6 เออแงเล อากูเนอ, แกแย เออเต๊เห่ เก่ แม๊ปู เตเซอ หม่าแน๊เรอ อา แม๊เถอะ โต่. เหย่ซี ซิหยื่อ เซอ หม่าแน๊เรอ เตเซอ อาโหมะเพ เก่ แกล่ ตาพาแก เหย่ซี เหล่โอ ปา. ^d

7 ตีกี เต๊เห่เนอ อาแซ่เน๊อ ตีซิ เต๊เห่ เด๊อ อา โอ่ ตี๊หรี่แตแร อาเหน่ เด๊อ อา เก่ ช๊าเต อาเง เนอ. เด๊อ เหย่ซี กู่กล๊อลู เนอ อา แซ๊ เน๊อ อา โก่หนิ กู๊โก่เท เนอ, โทเรอ เหย่ซี เป๊เส่ เนอ, อา แซ๊ เน๊อ แกแย เป๊เส่. ^e 8 เหย่ซี กู๊โล เนอ, อาแซ่เน๊อ เพรเหมาะ เต๊เห่ อากู๊โล เร๊อ อากู่เคอ เนอ อาแซ่เน๊อ แอ๊ซี เต๊เห่ อากู่เคอ. ^f 9 เด๊อ เหย่ซี โตโอลู เนอ อา แซ่ เร๊อ อา แซ๊หนิ จาต่อเท๊ เร๊อ อา แปล่ อาด๊าเนอ อาพรา กอออแมแฮ แซ่เจ๊อเร๊อ อู แถ่ช๊า เตช๊า เร๊อ อู เหว่อี๊ป่า พรารื๊อพราเต๊แถ่ เอ๊เร๊อ ตีซิโหล่ เต๊เห่ เนอ เจ๊อ. ^g 10 อากู๊หมิ เนอ, อา แซ๊เจ๊อเน๊อ แดเมเนอ เร๊อ อา อ่าแร แซ๊เจ๊อเน๊อ แดเมเนอ เจ๊อเจ๊อ. อากู๊หมิ เออเนอ, อาโอ่ เร๊อ อาเตแร ฉว่าชอ เด๊อ อา เก่ อาจา อาจือ อู แงเล อากู ปา. 11 จ๊อแผ่ เด๊อ อา เป๊อ เหย่ซีเนอ อา โอ่เตเพร. อา หม่าเตเน๊วพู๊ เตเพร เด๊อ อา เป๊อ ครอกูดุ ครอกูแย เออตูกู เนอเตเพร เฮ๊อ. ฮีบรู อาโหง่ เนอหม่า อามุย เร๊อ คูอาบัดโดน เร๊อ กรีก อาโหง่ เนอหม่า, อา เฮ๊ เร๊อ อปอลลิโยน. ^{▼▼อาโหง่แลช๊า หม่า เพรเมปย๊า เต.}

12 เตจาเตจือ อาเหร่อเล๊อ เต๊อเจ่อ เนอหม่า, อา ตาลว๊าแก โทเฮ๊อ เออเต๊อเจ่อ โทปา หม่า เตจาเตจือ เก่ แฮ โป่ เนอเจ่อ ปา.

13 เบ๊อะเตเน่วพู๊ อาเพร โซซว๊า เนอเตเพร โอ๊แถ่ อากวา เบ๊อะเนอ, แว หนิโฮ โหง่พราแถ่ เด๊อ เตหลู่เหร่เท อาหน่อ ลุยโบ อากู เด๊อ อา โอ่ เด๊อ จอแปแหร่ อาเป๊เส่เง เนอตู๊ขู่. ⁱ 14 โหง่ เฮ๊ตาแล เตเน่วพู๊ อาเพร โซซว๊า เด๊อ อา ปื่อหม่าโอ่เร๊อ กวา เนอเตเพร เน๊อ, “ปลวาเถ่จว๊า เตเน่วพู๊ เนอซิลุย เด๊อ อู จอกลอหม่า เหย่ซี เด๊อ แลโหมะดุ ยูเฟรติส อากูเนอ.” 15 เตเน่วพู๊ อาเพร โซซว๊า เออเตเพรเนอ, อา จว๊า ปลวาเถ่แก เตเน่วพู๊ เออซิลุย เร๊อ เหย่ซี เออเนอ, อู ตี๊หรี่แตแร หนื่ออื่อ โค๊ดื่อ เหย่ซี เด๊อ อา เก่ เมเซอ โตตื๊อแก แกแย เห่ขุพู๊ โซปุ๊ยตูปุ๊ย เบ๊อะตือมือ อากู, เตอเนอ อากู, เตเล อากู เร๊อ ต๊าหน่า อากู เออเนอ ปา. 16 เกลอ เด๊อ อา แถ่แด๊ ตีซิ เต๊เห่ อา โอ่เอ๊ เจ๊อ บ๋า เตเนอ, แว หนิโฮ อู เฮ๊โฉ่เป่ แว เร๊อ อา โอ่ เจ๊อ อาซี เนอรี๊ เจ๊อ.

17 เด๊อ แว เตแม๊เถอะลว๊า หนื่ออื่อ อากูเออเนอ แว แม๊เถอะ ตีซิ เต๊เห่ เร๊อ เพรแด๊ ลู เต๊เห่. เหย่ซี แซ๊ แลแค จาต่อเท๊ เต๊เห่ เด๊อ อาลี แซ่เจ๊อเน๊อ หมิ, เร๊อ อาอ๊อม๊อเต๊เพ่, โทเรอ อา แบ แซ่เจ๊อเน๊อ หย่าซู๊แบ เด๊อ อู เอ๊ เน๊อ ติโอ๊ติเสอ เนอ เจ๊อ. ตีซิ เออเต๊เห่ อากู่กล๊อ เนอ, อาแซ่เน๊อ แอ๊ซี กู่กล๊อ เร๊อ เด๊อ ตีซิ เออเต๊เห่ อาแกกู เนอ, หมิ เน๊อ หมิโข่ เต๊เห่ เน๊อ หย่าซู๊แบ ติโอ๊ติเสอ เถ่ ลอปลี. 18 หมิแกเถ่, หมิโข่เถ่, หย่าซู๊แบ เถ่ เด๊อ ตีซิ เออเต๊เห่ อาแกกู. เด๊อ เตเออโซเจ่อ เมจาเมจือ อู อาขว่าอาคยา, แกแย เซอ โซปุ๊ยตูปุ๊ย. 19 เมเตเฮ๊เรอ ตีซิ เต๊เห่ อา อาเตอเรออาฉว่าซอ เด๊อ อา เก่ เมเชอู เนอ, อา โอ่ เด๊อ เหย่ซี แกกู เร๊อ อากู๊หมิ อาลูเนอ. อากู๊หมิ เต๊เห่เนอ อา กู่กล๊อโอ่ เร๊อ อากู๊หมิ เออเต๊เห่เนอ, อาแซ่เน๊อ หรู่ กู่กล๊อ, เร๊อ อา เมชุ๊ยเมเช ล๊อปลี อู เร๊อ อากู๊หมิ เออเต๊เห่.

20 แกแย เด๊อ อาโอ่ แลเปล๊แก เร๊อ เตเมจาเมจือ อาเต เซอหร่า เออเต๊เห่เนอ, อา เม แฮเง ตื๊อดื่อ หนิเร๊อปา อา เตมู๊แหม่รีแจ่ เนอเต๊เห่. อาถู่แหล่แต๊แกละกา เป่ แลแค อาซิปล่อ โต่. เหย่ซี จ๊อเบ ตื๊อดื่อปา แลแค โลเน๊มู๊แหม่รีแจ่, เตแหย่โย เด๊อ อู เมเร๊อ เท, อู เมเร๊อ รือ, อู เมเร๊อ ตีลี เร๊อ หล่อ เร๊อ ส่อ เด๊อ อา แม๊เถ่แจ่โต่, โทเรอ อา หนิโฮ แจโต่, อา จว๊าแจ่โต่ เนอเต๊เห่. ^j 21 โท๊โต่ เหย่ซี อาเตเมเซอ แกแยเห่ขุพู๊, อาเตเม โลเน๊ ซ๊าร๊า เอ่ อูแหย่โย เต๊เห่, อา เตจว๊าซื๊อ เพรเหมาะเพรคู เร๊อ อา เตเอ่โห่เอ่ฮี๊ เต๊เห่เนอ, อา ถู่แหล่แต๊แกละ เป่ แลแค อาซิปล่อ โตโพ๋ โต่.