Romans 1

คูเปาโล อาเตเฮ๊โมเฮ๊แร๊

1แว หม่า คูเปาโล. แว ราจว๊าเป่ ซี ลี เออต๊าบ่า. แว หม่า เหย่ซู่ครี๊ อาหลู่ เตเพร อา เอ๊ แว เร๊อ แว เก่ ทวาแถ่ เพรโด่แนพู๊ เต๊เห่ เตเพร. โทเรอ อา นว๊าแถ่ แว เร๊อ แว เก่ แด๊โฉ่โด่แน เป่ อู เร๊อ จอแปแหร่ อา เตซิครือมีลา. 2เตซิครือมีลา เออเนอ, จอแปแหร่ อ๊อแล หนื่ออื่อ อางย๊าลาเฮ๊อ อาโหง่ มู๋ หนู่เค เร๊อ อาเพรโพร เต๊เห่ ฮู๊ อา ราหนื่ออื่อ โทเฮ๊อ เด๊อ ลีเทส่อพ๊า อากูเนอ. 3เตซิครือมีลา เออเนอหมา อา หม่าเฮ๊อ อาพู๊คู หม่าดื่อ เป แบ่เจ่ เหย่ซู่ครี๊ เออ อาหรี่อาแก เด๊อ อา แฮแล กลว่าอาเหน่ ฮู๊ แกแย เออเนอ เตเพร เฮ๊อ. เร๊อ อา แฮ โอ่เป๊เจ่แล เด๊อ คุ๊ย ดาวิด อากลุยอาแล อากู เออเนอ เตเพร เฮ๊อ. 4เด๊อ แหย่โยบูโพ๊ แบ่เจ่ อาขว่าอาคยา, เร๊อ เบ๊อะจอแปแหร่ เมเซอเพร กาคยา เป แบ่เจ่ เหย่ซู่ครี๊ เด๊อ เตเซอ เร๊อ อา เตโพรเตเตอเรอ เบ๊อะเนอ, อา เด๊อะโล เฮ๊อ ลู เร๊อ อา หม่า จอแปแหร่ อาพู๊คู เตเพร หม่าแหน่ เฮ๊อ. 5เด๊อ ครี๊ อาขว่าอาคยาเร๊อ, จอแปแหร่ เด๊อะตา เป อา เตบุ๊ยเตเตอเรอ เร๊อ ม๊อเนอม๊อเซโตแร๊ เด๊อ เป เก่ ทวาแถ่ เพรโด่แนพู๊ เต๊เห่ เด๊อ ครี๊ อาเง. แซ่ฮู๊ ล๋อ แกแยยิวพู๊ หม่าโต่ เต๊เห่ เก่ หยื่อเอ่แหน่ เกออู เหย่ซู่, เร๊อ เหย่ซี เก่ หนิดา เกอ จอแปแหร่ โหง่ อาเงเนอเรอ, อา นอทวาแถ่ เป แพ๊. 6จอแปแหร่ เอ๊ อู เด๊อ อู เก่ ทวาแถ่ เหย่ซู่ครี๊ อาแกแย เต๊เห่ อาเกลเนอ, ซี หม่า ซี โอ่โนเต่อเกอ เบ๊อะเนอเนอ เฮ๊อ.

7โคแบ๊ซว๊าโม เด๊อ อา โอ่ เด๊อ วีโรม อากู ซี, จอแปแหร่ โม เกอเร๊อ ซี, โท๊โต่ อา เอ๊ เฮ๊อ ซี เด๊อ ซี เก่ ทวาแถ่ อาแกแย เร๊อดื่อ เฮ๊อ.

แว ราจว๊า เป่ลอ ซี ลีเออต๊าบ่า. เปเพ จอแปแหร่ เร๊อ เป แบ่เจ่ เหย่ซู่ครี๊ เก่ เด๊อะดื่อ ซี เตบุ๊ยเตเตอเรอ เร๊อ เตตู๊จุเตอเจ๊อ นี๋.

คูเปาโล กุยจ๊อเบ เร๊อ อา เฮ๊บุ๊ยเฮ๊เตอเรอ จอแปแหร่

8เด๊อ เหย่ซู่ครี๊ อาขว่าอาคยาเรอ, แว เฮ๊บุ๊ยเฮ๊เตอเรอ เหร่อเล๊อ เฮ๊อ แว จอแปแหร่ เด๊อ ซี ล๋อ ปลี อาเง เฮ๊อ, เมเตเฮ๊เรอ ซี เตหยื่อเตแหน่ เออเนอ, อู หนิโฮ ลอเฮ๊อ เห่ขุ ต๊าบ่า เฮ๊อ. 9เบ๊อะแว กุยจ๊อเบแถ่ จอแปแหร่ เบ๊อะเนอ, แว ซิเงแถ่เบ่ ซี ปว๋า โตโพ๊ เจ๊อ. แว เม หม่าแหน่ เจ๊อ ฮู๊เออ เนอหม่า จอแปแหร่ ซิเง แพ๊. แว เม เป่ ลู เตเม เร๊อ แว ซิปล่อซีเม, เร๊อ แว ข่าเฮ๊โล เป่ อาพู๊คู แบ่เจ่ เหย่ซู่ครี๊ อา เตซิครือมีลา อาหรี่อาแก เออ อาคยา เฮ๊อ. 10แว กุยจ๊อเบ งย๋า ลาเฮ๊อ จอแปแหร่ เนอ, อา เก่ ซิปล่อโอ่ เร๊อ แว เก่ จว๊าโอ่เล เกอ ซี เก่เฮ๊เรอ แว ซิหยื่อ จว๊าโอ่เล เกอลา ซี.

11เมเตเฮ๊เรอ แซ่ฮู๊ แว เก่ แฮ เด๊อะ เป่เกอ ซี จอแปแหร่ อา แหย่โยบูโพ๊ อาเชหยู่ เออเนอเรอ, แว ซิหยื่อ แฮ โอ่เล เกอ ลา ซี. จอแปแหร่ อา แหย่โยบูโพ๊ อาเชหยู่ เก่ เด๊อะฉว่าเด๊อะชอแถ่ ดื่อ ซี ซิปล่อ นี๋. 12แว ซิหยื่อ เฮ๊ ฮู๊เต เฮ๊เรอ เป เด๊อะอ๊าเด๊อะเหร่ เมจว่าเลอ เมจว่าเก่ คยาแซ๊ลู ซี เตหยื่อ เร๊อ แว เตหยื่อ ฮู๊เนอ เต๊อะเจ่อแพ๊. 13โป่แหว่ ซี๋, แว ซิหยื่อ นอซิเง เกอ ซี เร๊อ แว เต เตเนหนื่ออื่อ เด๊อ แว เก่ แฮ โอ่เล เกอ ซี ปา อาหรี่อาแก เออเนอหมา บ๊าโพ๊เต๊ ลาเฮ๊อ. หม่าแน๊เรอ เตเม ดู๊ดี๊ดู๊แด แว เนอ อาโอ่ โต่ปา เจ๊อ กู๊แหน่ เออเนอ เจ๊อ. ฮู๊ แว เมโทเฮ๊อ เด๊อ แกแยยิวพู๊ หม่าโต่ เต๊เห่ อาเกลเนอ, แซ่ฮู๊ แกแย โอ่ เด๊อ ซีเกล เนอเต๊เห่ เก่ ทวาแถ่เกอ เพรหยื่อเอ่เตพู๊ เออ อาเงเนอเรอ, แว ซิหยื่อ แฮ โอ่เล เมจว่า เป่ เกอ แกแย เนอเต๊เห่ แพ๊. ^a

14กรีกเมวเจอะพู๊ เต๊เห่ เบ่เบ่, กรีกเมวเจอะพู๊ หม่าโต่ เต๊เห่ เบ่เบ่, แกแย เตลีแมลีเพ๊ โอ่ เบ่เบ่, แกแย เตลีแมลีเพ๊ โอ่โต่ เบ่เบ่, เตแร แลเบ่เฮ๊อ แว เด๊อ แว เก่เบ่ แด๊โฉ่โด่แน เป่ เมวเจอะ ปว๋า เต๊อเจ่อ เร๊อ เตซิครือมีลา เออเฮ๊อ. 15ฮู๊เนอ อาขว่าอาคยา, ซี เด๊อ อา โอ่ แลแค เด๊อ วีโรม อากู เออเต๊เห่เนอ, แว ซิปล่อฉว่า โด่แน เป่เกอ แหน่เจ๊อ ซี เร๊อ เตซิครือมีลา เออ อาหรี่อาแก เจ๊อ.

เตซิครือมีลา อา เตโพรเตเตอเรอ

16เด๊อ เตซิครือมีลา เออ อาขว่าอาคยา, แว ซิเตเรโต่, เมเตเฮ๊เรอ, ล๋อ แกแย เด๊อ อา หยื่อเอ่ เตซิครือมีลา เออเต๊เห่เนอ, จอแปแหร่ เมแลเปล๊กา ลอ เหย่ซี เน๊อ อา เตโพรเตเตอเรอ เฮ๊อ. อา เมแลเปล๊กา เหร่อเล๊อ แกแยยิวพู๊ เต๊เห่, โทเรอ อา เมแลเปล๊กา เกอโป่ แกแยยิวพู๊ หม่าโต่ เต๊เห่. ^b 17จอแปแหร่ แด่จ๊อแด่เต เฮ๊อ แกแย เต๊เห่ อาเหน่ เร๊อดื่อ ฮู๊เตเนอ, เตซิครือมีลา เออ เด๊อะโลแถ่ เป่ เฮ๊อ. เตจ๊อเตเต เออเนอหมา, อา เป๊อแถ่ เน๊อ เตหยื่อ เร๊อ อา ตื๊อดื่อ เน๊อ เตหยื่อ. ลีเทส่อพ๊า เฮ๊ เน๊อ, “แกแย เด๊อ จอแปแหร่ แด่จ๊อแด่เต อา เน๊อ อาเตหยื่อ เต๊เห่เนอ, เหย่ซี เก่ พย๊าหนิ เตโอ่เซอเพร อาเซ หม่าแหน่ ปา.” ^c

แกแย เมลอปลี เตซื๊อ ปว๋า เตเพร

18จอแปแหร่ อา เตซิปล่อดุ โอ่โลแถ่ เด๊อ ม๊อขุ. เร๊อ อา โอ่โลแถ่ เป่ ล๋อ แกแย เด๊อ อา เม เตซื๊อเตปล๊า เนอเต๊เห่ เร๊อ แกแย เด๊อ อา เม เตมู๊แหม่รีแจ่ เนอเต๊เห่. เด๊อ เหย่ซี เม เตมู๊แหม่รีแจ่ เต๊เห่ อาขว่าอาคยาเร๊อ, อา นอ ซิเง ปา อู เร๊อ เตหมะเตจ๊อ เออเนอ โต่ เฮ๊อ. 19เมเตเฮ๊เรอ เหย่ซี เหล่ซิเงแจ่ จอแปแหร่ อาหรี่อาแก เนอ, อา โอ่โล ลอหล่าตี๊กลิ เจ๊อ เด๊อ เหย่ซีเง เจ๊อ, เมเตเฮ๊เรอ จอแปแหร่ อาเหน่แบ่เจ่ เร๊อดื่อ เด๊อะโล หล่าลี เป่ เจ๊อ เฮ๊อ เหย่ซี เจ๊อ เฮ๊อ. 20เมเตเฮ๊เรอ เป๊อแถ่ เด๊อ จอแปแหร่ แบ๊แลลู่เห่ขุ เบ๊อะเนอ, แกแย เต๊เห่ ซิเงโปล แร๊แร๊แหน่แหน่ เจ๊อ เร๊อ จอแปแหร่ โอ่ เร๊อ อา เตอเรอฉว่าชอ ตูจูเพร เจ๊อ, โท๊โต่ เหย่ซี ซิเง โปล ปลื๊อ เจ๊อ เร๊อ อา หม่า จอแปแหร่ อา หม่าแหน่ เตเพรเจ๊อ. จอแปแหร่ อา เตอเรอฉว่าชอ ตูจูเพร เออเต๊เห่เนอ, เร๊อ อา หม่า จอแปแหร่ หม่าแหน่ เตเพร เจ๊อ เออเนอ, เหย่ซี แม๊เถอะแจ่ โต่ หม่าแน๊เรอ เหย่ซี ซิเงแจ่ แพ๊. เหย่ซี ย๋อ แม๊เถอะ จอแปแหร่ แบ๊ทวาแล เตเออเต๊เห่ อาขว่าอาคยา, เหย่ซี ซิเงแจ่ แลแค จอแปแหร่ อาหรี่อาแก เออเต๊เห่ แพ๊. ฮู๊เนอ อาขว่าอาคยา, ล๋อ เตเด๊อ เหย่ซี เมโทเฮ๊อ เต๊เห่เนอ, เหย่ซี เฮ๊โทเฮ๊แล แจ่ ปาโต่.

21เหย่ซี ซิเงเฮ๊อ จอแปแหร่ หม่าแน๊เรอ เหย่ซี แด่หยื่อแด่แหน่ เกอ ลู ฮู๊ จอแปแหร่ เตเพร โต่. อา เฮ๊บุ๊ยเฮ๊เตอเรอ เกอ ลู โต่โต่. ฮู๊เนอเรอ เหย่ซี อาเหล่เตเน เต๊เห่เนอ, อา ทวาแถ่ ลอ เตโอ่เล๊อโอ่กลอ. โท๊โต่ เหย่ซี อาเหล่เตเน โอ่เล๊อโอ่กลอ. เออเต๊เห่เนอ, เตคี๊เตลอ เมบี๊แก เฮ๊อ เหย่ซี เฮ๊อ. ^d 22เหย่ซี เฮ๊แล เกอเร๊อ แลแค อาเหน่ เน๊อ อา เตลีแมลีเพ๊ โอ่, หม่าแน๊เรอ อา ทวา แลแค แกแย ตอครอ แพ๊. 23เหย่ซี โต จ๊อเบแถ่ จอแปแหร่ เด๊อ อา โอ่ เร๊อ อา เตอเรอดุเตอเรอทู เร๊อ อา เซอแจ่โต่ เออเตเพร, หม่าแน๊เรอ อา จว๊า จ๊อเบ เต๊เปล่ดื่อเง เตแหย่โยแหย่กี เด๊อ อู แบ๊ เร๊อ กู๊ขุ เต๊เห่. เหย่ซี จ๊อเบ เตแหย่โยแหย่กี เด๊อ อาแซ่เน๊อ แกแย เด๊อ อา เซอแจ่ เออเนอเต๊เห่, หม่าโต่เรอ อาแซ่เน๊อ ถู่พู๊โหย่พู๊ เต๊เห่, หม่าโต่เรอ อาแซ่เน๊อ เตมีเตดอ เต๊เห่, โต่หม่าแน๊ อาแซ่เน๊อ หรู่แปล๊ เตเท๊ เต๊เห่. ^e

24ฮู๊เนอ อาขว่าอาคยา, เหย่ซี ซิปล่อ ซิหยื่อ ปาต๊าเปอเตอ มู๊แหม่รีแจ่ ฮู๊เตเนอ, จอแปแหร่ ปลวา เมแก เหย่ซี แพ๊. เร๊อ เหย่ซี เม ซิเตเร เกอเร๊อ ลอ ลู เตเพร เร๊อ เตเพร. 25อา โต หยื่อเอ่ จอแปแหร่ อา เตหมะเตจ๊อ หม่าแน๊เรอ อา ถู่แหล่ เต๊เปล่แก เร๊อ อา จว๊า หยื่อเอ่ เร๊อดื่อ เตแลโฮแลแห่. อา โต จ๊อเบ ต๊อต่อเจ๊อ จอแปแหร่ เร๊อ อา โต เม เป่ แพ๊ตื๊อ เพร เด๊อ อา แบ๊แล เต เออเตเพร อาเตเม แพ๊ หม่าแน๊เรอ อา จว๊า จ๊อเบ เร๊อ เม เป่ โต่ เต เด๊อ จอแปแหร่ แบ๊แล ลู เต๊เห่ อาเตเม. แบ่เจ่ เออเตเพรเนอ อู เก่ ถู่เซ๊แถ่ ดื่อ ลู ตูจูเพร แตแลเคร๊นี๋. อาเมน.

26เด๊อ เหย่ซี เมฮู๊เนอ อาขว่าอาคยา, จอแปแหร่ เด๊อะตาแก เหย่ซี เด๊อ สุ่ยหย่าเทอ อา เตซิหยื่อซิลอ เด๊อ อา เมเตเร มู๊แหม่ เหย่ซี เออ อา กู๊ยากู. เพร เหมาะ เต๊เห่ เจ๊อ เบ่เบ่, อา วีแก อาเหล่โกล แบ๊ซว๊า โอ่เมอเต่อ เร๊อ เพรคู เร๊อ เหยีซี เร๊อ เหย่ซี จว๊า แบ๊ซว๊า โอ่เมอเต่อ เกอเร๊อ ลู. 27เพรคู เต๊เห่เนอ เบ่เบ่ อา แซ่ฮู๊เนอเฮ๊อ. เหย่ซี วีแก อาเหล่โกล โอ่เมอเต่อ เร๊อ เพรเหมาะ เต๊เห่ เร๊อ อาสุ่ยเทอ เหย่ซี เร๊อ เหย่ซี ซิหยื่อจว๊า โอ่เมอ เต่อ เกอเร๊อ คยาดื่อ ลู. เพรคู เต๊เห่เนอ อา เม ซิเตเร เกอเร๊อ คยาดื่อ ลู เตเพร เร๊อ เตเพร. เด๊อ เหย่ซี เมเตซื๊อเตปล๊า ฮู๊เออ อาขว่าอาคยา, จอแปแหร่ เก่ เจแม๊ เมจา เฮ๊อ เหย่ซี ฮู๊ อา โต เร๊อ เหย่ซีเนอ เฮ๊อ.

28โท๊โต่ เหย่ซี ซิเง โทเฮ๊อ จอแปแหร่ อาหรี่อาแก หม่าแน๊เรอ, อา พย๊าฉื่อ แลแค โต่, อา แด่ เต เตอเจ๋อ โต่ อาขว่าอาคยา, จอแปแหร่ นอเป๊อแก เหย่ซี เร๊อ เหย่ซี อาเหล่เตเน มู๊แหม่รีแจ่ เร๊อดื่อ เต๊เห่ เร๊อ อาปลวา เม แลแค เหย่ซี เร๊อ เต เด๊อ อา โต เมโต่ เนอเต๊เห่ เฮ๊อ. 29เหย่ซี เตโอ่เซอเพร เออเนอ อา เล๊อบา โชชื่อ เจ๊อ เร๊อ เตจ๊อเตเต โต่, เตมู๊แหม่รีแจ่, กู๊หว่ากู๊เว เอ่หนิเร๊อ ดื่อเง, โทเรอ อา เล๊อบา เจ๊อ เร๊อ เตซิเคว๊ อู, เมเซอ แกแย, วื๊ออู, แลโฮแลแห่เอ่ อู, ซิค๊าซิเถ่ อู, แด๊เเหมาะเถ่อโย อู. 30โทเรอ เหย่ซี เฮ๊ปย๊า อูมุย, ซิเถ่ จอแปแหร่, อิชอ อี๊บ่าฉว่า พย๊าแถ่โล เหน่, ถู่เซ๊ เกอ เร๊อ อาเหน่. เหย่ซี เตเน เอ๊แถ่โป่ แกล๊ อาเซ เต๊เห่ เด๊อ อา เก่ เม เอ๊แถ่ แฮเงโป่ เตมู๊แหม่รีแจ่. เหย่ซี หนิดา แลแค อาโหมะอาเพ โหง่ โต่. 31เหย่ซี หม่า แกแย ตอครอ แกแย โพแท, อาจ๊อ เกอ เร๊อ อาโหง่ โต่. อา เตโมเร๊อ อูเนอ, อาโอ่โต่, อา ซิยอเกอเร๊อ อูเนอ อาโอ่โต่โต่. 32จอแปแหร่ อา เตซว๊าเตแส่ เฮ๊ เร๊อ แกแย เด๊อ อา โอ่เซอเพร ฮู๊เนอ เต๊เห่ หม่า อา โตเซอ เนอ, อา ซิเง แพ๊ หม่าแน๊เรอ อา เม แฮเง ตื๊อดื่อดื่อโป่ แพ๊. โท๊โต่ อู เก่ เมเกอ ฮู๊เนอ เฮ๊เรอ เหย่ซี ซิปล่อโม แลแค แพ๊.