Romans 10
1แว โป่แหว่ ซี๋, แซ่ฮู๊ จอแปแหร่ เก่ เมแลเปล๊กา เป่ อิสราเอลพู๊ เต๊เห่เนอเรอ, แว ซิปล่อฉว่า แหน่เจ๊อ เร๊อ แว กุยจ๊อเบ เป่ แหน่เจ๊อ เด๊อ เหย่ซี อาเง เจ๊อ. 2แว ซิเง ตาเต ลอ เหย่ซี อาหรี่อาแก อาขว่าอาคยา, แว เก่ แด๊โฉ่โล เป่ ซี เน๊อ เหย่ซี อาหรี่อาแก เฮ๊เนอหม่า อาหนิ แพ๊. เหย่ซี ซิปล่อฉว่า แม๊ปู ลือครวา เมโต แหน่เจ๊อ จอแปแหร่ ซิปล่อ หม่าแน๊เรอ เบ่โต ลือครวา เม ฮู๊เตเนอ, เหย่ซี ซิเง แลแค โต่. 3จอแปแหร่ แด่จ๊อแด่เต อู อาแกล๊อาโกล เนอ เหย่ซี ซิเงโปล โต่. โท๊โต่ เหย่ซี แม๊ปู เมแถ่ เกอเร๊อดื่อ แลแค เร๊อ เหย่ ซีแกล๊เหย่ซีโกล แพ๊. ฮู๊เนอเรอ จอแปแหร่ แด่จ๊อแด่เต อู อาแกล๊อาโกล เออเนอ, เหย่ซี ซิปล่อซิหยื่อ ครวาเม เกออู ตีกี๋โต่. 4แซ่ฮู๊ จอแปแหร่ เก่ แด่จ๊อแด่เต ลอ แกแย เด๊อ อา หยื่อเอ่ ครี๊ เนอเต๊เห่ อาเงเนอเรอ, ครี๊ เมโทแก ปลื๊อลอเฮ๊อ เตซว๊าเตแส่ อา เตเตเนหนื่ออื่อ เต๊เห่ เฮ๊อ.เตเมแลเปล๊กา เออเนอหมา แกแย ปว๋า เตเพร อาเง
5คูโมเสส รา เป่ แกแย เด๊อ อา ลือครวา เมเบ๊ เตซว๊าเตแส่ เร๊อ อา ทวาแถ่ แกแยจ๊อแกแยเต เด๊อ จอแปแหร่ อาเป๊เส่เง เต๊เห่ อาหรี่อาแก, เร๊อ อา รา เร๊อ อา เฮ๊ เน๊อ, “แกแย เด๊อ อา ครวาลือเม เล๊อบา ลอล๋อ เตซว๊าเตแส่แส่ เออเต๊เห่เนอ, อา เก่ เซอเพร ตูจูเพร ปา,” a อา รา เร๊อ อา เฮ๊ ฮู๊เนอ. 6หม่าแน๊เรอ แกแย เด๊อ จอแปแหร่ แด่จ๊อแด่เต อา เน๊อ อา เตหยื่อเตแหน่ ขว่าคยา เต๊เห่เนอ, อา โตเบ่ แด๊เฮอหนิ เน๊อ, “อูเป เตเร แถ่ (เอ๊ตา ครี๊) เด๊อ ม๊อขุเป?” b ฮู๊เนอโต่. 7โท๊โต่ อา เบ่ แด๊เฮอหนิ เน๊อ, “อูเป เตเร กี๊ตา เด๊อ โลเน๊มู๊แหม่รีแจ่ดอ (เร๊อ เมเซอเพร กาคยา ครี๊ เด๊อ เตเซอ) เป?” cฮู๊เนอโต่. 8หม่าแน๊เรอ, จอแปแหร่ แด่จ๊อแด่เต อู อาแกล๊อาโกล เนอหม่า อา เฮ๊ ฮู๊เต? เร๊อ อา เฮ๊ เน๊อ, “จอแปแหร่ อาลาอาโหง่ โอ่ผื่อ ต๊อต่อ เจ๊อ เร๊อ เน เจ๊อ. อา โอ่ แพ๊ เบ๊อะเน กู๊อู่พ๊าลูเนอ แพ๊, อา โอ่ แพ๊ เบ๊อะเน ซิปล่อ ฮ๊อกู เนอแพ๊” dเนอหม่า หม่าเฮ๊อ เตหยื่อ อา เตซิครือมีลา เด๊อ เป โด่แน เป่ ซีเออ เนอเฮ๊อ. 9เก่ เน อ๊อแล เร๊อ เนกู๊อู่ เร๊อ เน เก่ เฮ๊ เร๊อ เหย่ซู่ หม่า แบ่เจ่ เตเพร เร๊อ เน เก่ หยื่อเอ่ เด๊อ เน ซิปล่อกู เน๊อ จอแปแหร่ เมเซอเพร กาคยา เหย่ซู่ เด๊อ เตเซอ เก่เฮ๊เนอ, เน เก่ พย๊าหนิ เตแลเปล๊กา ปา. 10เมเตเฮ๊เรอ, แกแย เด๊อ อา หยื่อเอ่ เด๊อ อา ซิปล่อกู เต๊เห่เนอ, จอแปแหร่ เก่ แด่จ๊อแด่เต ลู. โทเรอ แกแย เด๊อ อา อ๊อแล เร๊อ อากู๊อู่ เต๊เห่เนอ, อา พย๊าหนิเฮ๊อ เตแลเปล๊กา เฮ๊อ. 11ลีเทส่อพ๊ากู เฮ๊ เหย่ซู่ อาหรี่อาแก เน๊อ, “อูเป๊ เบ่เบ่, เด๊อ อา หยื่อเอ่แหน่ ลู เต๊เห่เนอ, อา เก่ โต่เด๊อ เต เหล่ซิปล่อปย๊า อาเหล่โอ่ เนอ อา โอ่ แตแค๋ โต่.” e 12เมเตเฮ๊เรอ แกแยยิวพู๊ เร๊อ แกแยยิวพู๊ หม่าโต่ เต๊เห่เนอ อา เหล่โค๊เหล่คยา ลูเนอ, อาโอ่ เตอเจ๋อ โต่. ล๋อ เพร หยื่อเอ่เตฮู๊ เออเต๊เห่ เนอหม่า อา แบ่เจ่ โอ่โหร่ลู เตเพรเพร่ว แพ๊. แกแย เด๊อ อา กุยแถ่ ลู เตเมจว่า เต๊เห่เนอ, อา เด๊อะบุ๊ยเด๊อะเตอเรอ ตาป่อตาเป เป่ เจ๊อ เหย่ซี เจ๊อ. 13เมเตเฮ๊เรอ, ฮู๊ ลีเทส่อพ๊า เฮ๊ เน๊อ, อูเปเป๋ เบ่เบ่ เด๊อ อา กุยแถ่ เตเมจว่า เด๊อ แบ่เจ่ อาโอ่ เต๊เห่เนอ, แบ่เจ่ จอแปแหร่ เก่ เมแลเปล๊กา ลู ปา. f 14เก่ เมฮู๊เนอเรอ, เหย่ซี เตหยื่อ เก่ โอ่โต่ เฮ๊เรอ อา จว๊า กุยแถ่แจ่ เตเมจว่า เด๊อ แบ่เจ่ เหย่ซู่ อา โอ่ ฮู๊เต? เก่ เหย่ซี หนิโฮน๊อ โต่ เฮ๊เรอ อา จว๊า หยื่อเอ่แจ่ แบ่เจ่ เหย่ซู่ ฮู๊เต? เพรโด่แนพู๊ เต๊เห่แด๊โฉ่ เป่ เหย่ซี เก่ โอ่โต่ เฮ๊เรอ เหย่ซี จว๊าหนิโฮแจ่ ฮู๊เต? 15อู เก่ ปลวาแฮ เพรโด่แนพู๊ เต๊เห่ แด๊โฉ่ เป่ เหย่ซี โต่ เฮ๊เรอ เหย่ซี จว๊า โด่แน แด๊โฉ่แจ่ เป่ อู ฮู๊เต? ลีเทส่อพ๊ากู เฮ๊ เน๊อ, “แกแย เด๊อ อา พย๊าแฮ เป่ เตซิครือมีลา เต๊เห่ อากู๊โด่ เนอ อาตว่า แหน่เจ๊อ.” g 16หม่าแน๊เรอ อิสราเอลพู๊ เต๊เห่เนอ, อา พย๊าฉื่อลอ เตซิครือมีลา ปว๋า เตเพร โต่. เมเตเฮ๊เรอ, เพรโพร อิสยาห์ เฮ๊ เน๊อ, “เก๋อ แบ่เจ่, หม่าอูเป เตเร หยื่อเอ่เกอ เป เตหรี่เตแก เออเนอ เป?” h 17เมฮู๊เนอเรอ, เตหยื่อ หม่า อา โอ่ เด๊อ เตหนิโฮ เตหรี่เตแก อาโอ่ แฮ แพ๊. เด๊อ อู โด่แนแด๊โฉ่ เป่ ครี๊ อาหรี่อาแก อาขว่าอาคยาเร๊อ, อู หนิโฮน๊อ เกอ เตหรี่เตแก แพ๊. 18หม่าแน๊เรอ แว เก่ แด๊เฮอ เน๊อ, “หม่า เหย่ซี หนิโฮน๊อ เกอ แหน่โต่ แอ?” แว เก่ เฮ๊ เน๊อ, เหย่ซี หนิโฮน๊อ วา. ลีเทส่อพ๊ากู เฮ๊ เน๊อ,“เหย่ซี โหง่พรา จว๊า ลอเฮ๊อ เด๊อ เห่ขุต๊าบ่าลอ เฮ๊อ. เหย่ซี อาลาอาโหง่ เออเนอ, อา จว๊าโต่ ลอเฮ๊อ เด๊อ เห่ขุ ตื๊อดื่อ เฮ๊อ.” i 19แว เก่ แด๊เฮอ คยาแซ๊ เน๊อ, อิสราเอลพู๊ เต๊เห่ หม่า อา ซิเงโปลเกอ แหน่ อู โต่ แอ? แกแย เด๊อ อา เฮ๊ฉื่อ เหร่อเล๊อ อู เนอหม่า คูโมเสส เฮ๊อ เร๊อ อา เฮ๊ ฮู๊เออ,
“เมวเจอะโร เด๊อ ซี เตเนดุ เกอ ลู โต่ เต๊เห่เนอ, แว เก่ เด๊อะบุ๊ยเด๊อะเตอเรอ เหย่ซี เร๊อ นอซิเคว๊เกอ เร๊อ ซี ปา. แว เก่ เด๊อะบุ๊ยเด๊อะเตอเรอ เมวจ่อโรพู๊ เด๊อ อา ซิเงโปลเบ๊ เกอ แว โต่ เต๊เห่ เร๊อ แว นอซิปล่อดุ เร๊อ ซี ปา.” j 20เด๊อคยา เร๊อ เพรโพร อิสยาห์ เฮ๊คือเฮ๊ฮา เล๊อโป่ เจ๊อ เร๊อ อา เฮ๊ เน๊อ, “แกแยยิวพู๊ หม่าโต่ เด๊อ อา แอ๊จื๊อ แม๊ปูเกอ แว โต่ เต๊เห่เนอ, อา แม๊เถอะเฮ๊อ แว เฮ๊อ, เร๊อ แว โอ่โลแถ่ เป่ แกแยยิวพู๊ หม่าโต่ เต๊เห่ เด๊อ อา แม๊ปู แด๊เฮอเกอ แว โต่ เต๊เห่ เฮ๊อ.” 21หม่าแน๊เรอ, เพรโพร อิสยาห์ ราหนิ อิสราเอลพู๊ เต๊เห่ อาหรี่อาแก เร๊อ อา เฮ๊ เน๊อ,
“แว โอ่ ตี๊หรี่แตแร โอ่ป่อแม๊ชือฉื่อ แวแกแย เก่ กาคยาโต คยาแซ๊ เด๊อ แวโอ่ เตอเน๋อ เหมาะเฮ๊ เจ๊อ, หม่าแน๊เรอ เหย่ซี หนิดา แลแค แวโหง่ โต่, อา กู่กล๊อเพรอ แลแค แพ๊.” k
Copyright information for
EkySCThai