Romans 11

จอแปแหร่ ซิยอเกอเร๊อ อิสราเอลพู๊ เต๊เห่

1ฮู๊เนอเรอ แว เก่ แด๊เฮอ แลแค ซี เน๊อ, หม่า จอแปแหร่ วีแก แก เฮ๊อ อา แกแยเมวเจอะพู๊ เร๊อดื่อ เออ เฮ๊อ แอ? อา วีแก เน๊อ เหย่ซี ตีกี๋โต่. เตเนแม๊ แลแค แม๊ แวเออ, แว หม๋า อิสราเอลพู๊ เตเพร แพ๊ กอกอ. แว หม่า เพอับราฮัม อากลุยอาแล, คูเบนยามิน อากลุย กาแล แพ๊. ^a 2จอแปแหร่ วีแก เร๊อ อาแกแย เด๊อ อา นว๊าแถ่ โทเฮ๊อ เหย่ซี เด๊อ กูลู่เค เนอเต๊เห่ โต่. ลีเทส่อพ๊า เฮ๊ เพรโพร เอลียาห์ อาหรี่อาแก เนอหม่า ซี ซิเง แหน่ โต่ แอ? อา โปโอเปเชแถ่ จอแปแหร่ เร๊อ อาเมวเจอะ อิสราเอลพู๊ เต๊เห่ อาหรี่อาแก เร๊อ อา เฮ๊ เน๊อ, 3“เก๋อ แบ่เจ๋, เหย่ซี เมเซอแก เฮ๊อ เพรโพร เด๊อ เน นอแฮ เหย่ซี เนอเต๊เห่ เฮ๊อ. เหย่ซี ด่อโพร๊ ตาลอ เฮ๊อ เตหลู่แตเหร่ เต๊เห่ เฮ๊อ. อา โอ่แก แพ๊ตื๊อ แว เตเพรเพร่ว แพ๊, หม่าแน๊เรอ อู แม๊ปูเมเซอปา แวแว.” ^b 4เร๊อ จอแปแหร่ เฮ๊ฉื่อ กาคยา ลู ฮู๊เต? จอแปแหร่ เฮ๊ฉื่อ ลู เน๊อ, “เน โอ่แก ตื๊อดื่อ เตเพร หม่าโต่, แว แด่โอ่แก เกอปา แกแย โซซว๊าตีรี๊. เตแหย่โย เด๊อ อู เอ๊ เร๊อ บาอัล เออเนอ, เหย่ซี เออเต๊เห่ แด๊งือ จ๊อเบแถ่ เกออู โต่.” ^c 5กู๊แหน่เออ เบ่เบ่ อา แซ่ ฮู๊เนอเฮ๊อ, จอแปแหร่ นว๊าแถ่ เฮ๊อ เป เร๊อ อาบุ๊ยดุอาเตอเรอทู เออเต๊เห่เนอ, อา โอ่แกปา ตี๊กิ. 6เก่ จอแปแหร่ เมแลเปล๊กา เหย่ซี เร๊อ เตบุ๊ยเตเตอเรอ เก่เฮ๊เรอ, อาโหง่แลช๊า หม่า เด๊อ เหย่ซี เม เตแร๊ อาขว่าอาคยา, เนอหม่าโต่. เด๊อ เหย่ซี เมแร๊เต ขว่าคยา เก่เฮ๊เรอ จอแปแหร่ อาบุ๊ยอาเตอเรอ เนอ, อา หม่า ปา เตเด๊อะครา เชหยู่ หม่าปาโต่ เฮ๊อ.

7ฮู๊เนอเรอ, อาโหง่แลช๊า หม่า หม่าเฮ๊อ เต เด๊อ อิสราเอลพู๊ แม๊ปู เกอ เร๊อ เออเนอ, อา แม๊เถอะ เกอเร๊อ โต่. ตื๊อแพ๊ แกแย เด๊อ จอแปแหร่ นว๊าแถ่ เหย่ซี เออเต๊เห่ แม๊เถอะ แลแค แพ๊. ล๋อ อา โอ่แก เนอเต๊เห่ หม่า จอแปแหร่ นอ กู่กล๊อเพรอ ลอ แหน่เจ๊อ เหย่ซี เนอเต๊เห่ เฮ๊อ. 8ฮู๊ ลีเทส่อพ๊ากู เฮ๊หนื่ออื่อ เน๊อ,
“จอแปแหร่ เมคี๊เมตาปาแก เหย่ซี ซิปล่อ. เหย่ซี แม๊เกอ แลแค หม่าแน๊เรอ อา แม๊เถอะ ซิเง เกอ แลแค อู โต่. อา หนิโฮเกอ แลแค อู หม่าแน๊เรอ อา ซิเงโปล เกอ แลแค อู โต่. แกแยยิวพู๊ เต๊เห่ เนอหม่า อา แซ่ แลแค เร๊อ เนอ โต่กู๊แหน่เจ๊อ.” ^d

9โทเรอ คูดาวิด เฮ๊ เน๊อ,
“เหย่ซี เม ป่วย เร๊อ อา โตโครเอ่โตโครโอ เกอเร๊อ แลแค เหล่เอ่ เต๊เห่เนอ, อา เก่ ทวาแถ่ เกอเร๊อ คยาแซ๊ ดื่อ เหย่ซี แด๊ปา ปานี๋. โทเรอ อา เก่ ทวาแถ่ดื่อ เหย่ซี เหล่ตอพอ แลคื๊อ ปานี๋. เหย่ซี โตเบ่ พย๊าหนิ เลอ กาคยาฉื่อ คยาแซ๊ บ๋า เตเนอ, ปลี๊ เกอเร๊อดื่อ เหย่ซี นี๋. ^e
10แซ่ฮู๊ เหย่ซี เก่ แม๊เถอะเกอ ปา แต่ อู เตหมะเตจ๊อ แต่เหม่เนอ, เมเลแก เหย่ซี เป๊เส่ปล่อ เนอ นี๋. นอข่าเบ่แหง่ตอคอ เหย่ซี เร๊อ เตแป่เตเช ตูจูเพร เออเนอ นี๋.” ^f

11ฮู๊เนอเรอ แว เก่ แด๊เฮอ เน๊อ, เบ๊อะแกแยยิวพู๊ เต๊เห่ ตอพอ แลคื๊อ เบ๊อะเนอ, อาปย๊าอาหลู่ ลา เจ๊อ แอ? อาปย๊าอาหลู่ ล๋ายโต่. เหย่ซี ย๋อ เมดื่อเง เตซื๊อ เรอ, จอแปแหร่ เมแลเปล๊กา ลาติ แกแยยิวพู๊ หม่าโต่ เต๊เห่, เร๊อ อา เม ซิเคว๊เกอ อิสราเอลพู๊ เต๊เห่ เร๊อ เหย่ซี แพ๊. 12เด๊อ เหย่ซี เม เตซื๊อเตปล๊า อาขว่าอาคยา, จอแปแหร่ เด๊อะบุ๊ยเด๊อะเตอ เรอ เอ๊แหน่เจ๊อ เฮ๊อ แกแย โอ่ เด๊อ เห่ขุ เออต๊าบ่า เฮ๊อ. เด๊อ เหย่ซี แลจู่แก จอแปแหร่ อา เตแม๊ดุ เหย่ซี อาขว่าอาคยา, แกแยยิวพู๊ หม่าโต่ เต๊เห่ พย๊าหนิ เล๊อบาแก เฮ๊อ จอแปแหร่ อา เตแม๊ดุหนิ เหย่ซี เฮ๊อ. ฮู๊เนอเรอ ช๋า ล๋อ แกแยยิวพู๊ เด๊อ จอแปแหร่ นว๊าแถ่ เหย่ซี เนอเต๊เห่ เก่ หยื่อเอ่กา ลอเฮ๊อ ครี๊ เบ๊อะเนอ ปาเนอ, จอแปแหร่ เก่ เด๊อะบุ๊ยเด๊อะเตอเรอ ลอ เจ๊อ อู บ๋า เต ปาเนอ, เตเนแม๊ แลแค เมอ.

เตเมแลเปล๊กา เด๊อ แกแยยิวพู๊ หม่าโต่ เต๊เห่ อาเง

13กู๊แหน่เออ, แว เฮ๊เบ่ เร๊อ ซี แกแยยิวพู๊ หม่าโต่ เต๊เห่. จอแปแหร่ นอ แว ฮู๊ เพรโด่แนพู๊ เต๊เห่ เตเพร เด๊อ แกแยยิวพู๊ หม่าโต่ เต๊เห่ อาเง อาขว่าอาคยา, เตเม เด๊อ จอแปแหร่ เด๊อ แว เออ แว เตเนดุ เกอ เร๊อ แหน่เจ๊อ อา. 14ฮู๊ จอแปแหร่ เมแร๊ โทเป่เฮ๊อ ซี แกแยยิวพู๊ หม่าโต่ เต๊เห่ อาเงเนอ, แว แม๊ชือ เน๊อ แซ่ฮู๊ แว เก่ เม ซิเคว๊ หนิเป่ เกอดื่อ แวโค แกแยยิวพู๊ เร๊อดื่อ เต๊เห่ อาเง, โท๊โต่ แซ่ฮู๊ แว เก่ อี๊ลอกาหนิ เกอ เหย่ซี เต๊เห่เห่ เน๊อ อา เก่ พย๊าหนิ เกออู เตเมแลเปล๊กา อาเง เนอเรอ, แว เตเนดุ เกอเร๊อ แหน่เจ๊อ เตเม เด๊อ จอแปแหร่ เด๊อ แว เออเนอ เจ๊อ. 15จอแปแหร่ วีแก เหย่ซี อาขว่าอาคยา, ล๋อ แกแย เห่ขุพู๊ เด๊อ อาโร เต๊เห่เนอ อา ทวาแถ่ เต๊เปล่โป่ เฮ๊อ ลู โคแบ๊ซว๊า เฮ๊อ. เก่เฮ๊ฮู๊เนอ เร๊อ ช๊า จอแปแหร่ เอ๊โมฉื่อ คยาแซ๊ เฮ๊อ แกแยยิวพู๊ เออเต๊เห่ เบ๊อะเนอปาเนอ, อา เก่ แซ่เน๊อ หม่าอิเต ปาเนอ เตเนแม๊มอ แลแค. อา เก่ แซ่เจ๊อเร๊อ แกแยเซอ โทเรอ อา เซอเพร กาคยา คยาแซ๊ เนอ เจ๊อ ปา. 16แกแยยิวพู๊ หม่า อาแซ่เน๊อ อู นี๋โอ่ ค๊อมู โฮหมื่อ ตื๊อบื่อเนอ. เด๊อ โฮหมื่อ เออตื๊อบื่อ อาเกลเนอ, โฮหมื่อกล่อ อาเหร่อเล๊อ ต๊อกล่อ เด๊อ อู หลู่แถ่ เร๊อ จอแปแหร่ เออ เก่ อา บูโพ๊ เฮ๊เนอ, อา เก่ บูโพ๊ ลอเฮ๊อ ตื๊อบื่อเฮ๊อ. แกแยยิวพู๊ เต๊เห่เนอ, อา แซ่เกอ โป่ดื่อ เร๊อ ส่อเหมาะ ต๊อเสาะ เนอเนอเฮ๊อ. ส่อหรุ่ยเออ อา เก่ บูโพ๊ เฮ๊เรอ อาเหมาะอาแพ เต๊เห่เนอ อา บูโพ๊ เกอ ลอ แหน่ ดื่อ เฮ๊อ.

17แกแยยิวพู๊ เออเต๊เห่ เนอหม่า อาแซ่เน๊อ อู จว๊า ย๊อเก่แก โต๊โฉ่แพ เด๊อ อู ช๊อแด๊ ลู เด๊อ เตเร๊กู เออเต๊เห่ อาแพ เร๊อ อู จว๊า ย๊อเก่กา เกอลาติ โต๊โฉ่แพ เด๊อ อา แด๊เร๊อดื่อ อาเหน่ เด๊อ หมิเกล เนอเต๊เห่ อาแพ เร๊อ อู กา บ่อทือ จิจือลู. ซี แกแยยิวพู๊ หม่าโต่ เต๊เห่ เนอหม่า อาแซ่เน๊อ โต๊โฉ่เหมาะ เด๊อ อา แด๊ เด๊อ หมิเกล เออเต๊เห่ เนอเฮ๊อ. กู๊แหน่เออ ซี พย๊าหนิ เกอเฮ๊อ เตบุ๊ยเตเตอเรอ เด๊อ จอแปแหร่ เด๊อะบุ๊ยเด๊อะเตอเรอ แกแยยิวพู๊ เพอโพ เด๊อ เนอเค เต๊เห่ เฮ๊อ. ซี พย๊าหนิ แซ่เน๊อ ส่อแพ เออเต๊เห่ จุ๊ยโอ หนิอ๊าหนิเหร่ เกอ ส่อแจเทอ เด๊อ อา โอ่ เด๊อ อาหรุ่ยกู เร๊อ อา แฮ เออเต๊เห่ เนอเฮ๊อ. 18หม่าแน๊เรอ ซี เด๊อ อา หม่าดื่อ แกแยยิวพู๊ หม่าโต่ เออเต๊เห่เนอ, ซี โตเบ่ เฮ๊เบ่ แถ่โผ่แถ่ม๊อ เร๊อ เฮ๊ซิค๊าซิแก่ หนิ แกแยยิวพู๊ เด๊อ อา หม่าดื่อ ส่อแพ เด๊อ อู ย๊อเก่แก อา เออเนอเต๊เห่ โต่. ซี เก่ เตเน แถ่เล๊อ เกอเร๊อ ซีเหน่ เฮ๊เรอ, ซิเงแถ่เบ่ แลแค เนอ, ซี เด๊อะอ๊าเด๊อะเหร่ หนิ ส่อหรุ่ย หม่าโต่. ส่อหรุ่ย เด๊อะอ๊าเด๊อะเหร่ หนิ ซี แพ๊. 19ซี เก่ เฮ๊ เน๊อ, “แซ่ฮู๊ จอแปแหร่ เก่บ่อทือ จิจือ หนิ แวเนอ, อา ย๊อเก่แก ส่อแพ เออเต๊เห่ แพ๊.” 20ซี เฮ๊ เออเนอหมา อา หม่าเฮ๊อ. หม่าแน๊เรอ เด๊อ เหย่ซี หยื่อเอ่ ครี๊ โต่ อาขว่าอาคยา, จอแปแหร่ ย๊อเก่แก ส่อแพ เด๊อ อา หม่า แกแยยิวพู๊ เออเนอ แพ๊. เด๊อ ซี เตหยื่อเตแหน่ อาขว่าอาคยาเร๊อ, จอแปแหร่ บ่อทือ จิจือ ซี เร๊อ ส่อเหมาะ เออเนอ แพ๊. ฮู๊เนอเรอ เตเนดุ เกอเร๊อ แต่ แลแค ซีเหน่ แต่เหม่. 21จอแปแหร่ เก่ ซิโล เกอเร๊อ อา ส่อแพเลอ เด๊อ อา หม่า แกแยยิวพู๊ ซี เออเต๊เห่ โต่ เก่เฮ๊เรอ ซี หม๋า อา ซิโล เกอเร๊อ โต่โต่.

22ฮู๊เนอเรอ เตเน ตาเต แลแค. จอแปแหร่ เนอ, ตากยาหม่า อา ซิยอเกอเร๊อ อาแกแย, ตากยา เนอ อา ปื่อ ชอชอ เกอเร๊อ อาแกแย. อา ปื่อชอ เกอเร๊อ อาแกแยยิวพู๊ เด๊อ อา จว๊า ตาพาแก ลู เต๊เห่เนอ หม่าแน๊เรอ อา ซิยอ เกอเร๊อ ซี เด๊อ อา หม่า แกแยยิวพู๊ หม่าโต่ เออเต๊เห่. หม่าแน๊เรอ ซี โต แด่ดุหยื่อแหน่ แฮเง แลแค อา เตซิยอ เกอเร๊อ ซี เออเนอ. เก่หม่าโต่หม่า อา เก่ ปาตือแก เกอ ซี ปา. 23แกแยยิวพู๊ เก่ ตีรี๊ กาคยาโต คยาแซ๊ จอแปแหร่, เร๊อ เหย่ซี เก่ หยื่อเอ่ คยาแซ๊ ลู เฮ๊เนอ, อา เก่ อาบ่อทือ จิจือ กาคยา คยาแซ๊ เหย่ซี เร๊อ ส่อเหมาะ เออเนอ ปา, เมเตเฮ๊เรอ จอแปแหร่ เก่ อา บ่อทือจิจือ กาคยา คยาแซ๊ ฮู๊เนอ หม่า อา เม แจ่แพ๊. 24ซี แกแยยิวพู๊ หม่าโต่ เต๊เห่เนอ อาแซ่เน๊อ โต๊โฉ่แพ เด๊อ อา แด๊ดื่อ อาเหน่ เด๊อ หมิเกล เนอเต๊เห่ เฮ๊อ. เร๊อ อู จว๊า ย๊อเก่กา บ่อทือ จิจือลู เร๊อ โต๊โฉ่เหมาะ เด๊อ อู ช๊อแด๊ อา เนอเต๊เห่ แพ๊. อา เบ่ เมทวา โค๊ดื่อ ซี เร๊อ อาเหล่โกล เมแด๊หนิ เออเนอเต๊เห่. ฮู๊เนอเรอ จอแปแหร่ เก่ บ่อทือจิจือ กาคยา ส่อแพ เด๊อ อา ปาแก เด๊อ เตเร๊กู เนอเต๊เห่ เฮ๊เนอหม่า อายูเล๊อ ปา เจ๊อ เร๊อ อา เมทวา ซี เออเนอ เจ๊อ.

จอแปแหร่ เก่ เมแลเปล๊กา เกอ แกแยยิวพู๊ เต๊เห่

25โป่แหว่ ซี๋, แซ่ฮู๊ ซี เก่ พย๊า แถ่โลแถ่ม๊อ แต่ ซีเหน่ แต่เหม่ เนอ, กู๊แหน่เออ แว ซิหยื่อ นอซิเง ตาเต ซี เร๊อ เตหมะเตจ๊อ อาจ่ออาแย เด๊อ อู ซิเงโปลน๊อ ลู โต่ เออเนอเต๊อเจ่อ. เมเตเฮ๊เรอ, จอแปแหร่ นอ กู่กล๊อเพรอ แกแยยิวพู๊ เต๊เห่. หม่าแน๊เรอ อา กู่กล๊อเพรอ งยาตื๊อดื่อแฮเง โต่แพ๊ เบ๊อะจอแปแหร่ นว๊าแถ่ หนื่ออื่อเฮ๊อ แกแยยิวพู๊ หม่าโต่ เด๊อ อา หยื่อเอ่ ครี๊ เต๊เห่ อาแกแย บาเพร เฮ๊อ ปา เบ๊อะเนอ แพ๊. 26โทปาเรอ, ล๋อ อิสราเอลพู๊ เนอเต๊เห่ เก่ พย๊าหนิ ลอ เตเมแลเปล๊กา ปา อา เก่ ทวาแถ่ ฮู๊ เพรโพร อิสยาห์ ราหนื่ออื่อ เนอ ปา. ^g เร๊อ อา เฮ๊ เน๊อ,
“เพร เมแลเปล๊กา จอแปแหร่ อาแกแย เออเตเพรเนอ อา เก่ โอ่ เด๊อ วีศิโยน เร๊อ อา แฮ ปา. อา เก่ พย๊า ตาพาแก ลอ ล๋อ เพ ยาโคบ อากลุยอาแล เออเต๊เห่ อา เตมู๊แหม่รีแจ่ เนอเต๊เห่ ปา.
27เบ๊อะแว พย๊า ตาพาแก โทลอเฮ๊อ เหย่ซี เตซื๊อ เออเต๊เห่ เบ๊อะเนอปาเนอ, แว เม เล๊อบาแถ่ เฮ๊อ แว เตอ๊อแล เร๊อ เหย่ซี เด๊อ เหร่อเคเนอ เนอตือมือ เฮ๊อ.” ^h

28แกแยยิวพู๊ เต๊เห่ ย๋อ พย๊าฉื่อเกอ เตซิครือมีลา เออ โต่ อาขว่าอาคยา, เหย่ซี ทวาแถ่แก เพร เด๊อ อา ซิเถ่ จอแปแหร่ เต๊เห่ เฮ๊อ. หม่าแน๊เรอ ซิเง เกอลาติ เร๊อ จอแปแหร่ เด๊อะครา เฮ๊อ ซี เชหยู่ อาขว่าอาคยา, อา หนิบุ๊ยหนิเตอเรอ เด๊อ ซี แกแยยิวพู๊ หม่าโต่ เต๊เห่ อาเง เฮ๊อ. เก่ แม๊เกอลาติ เด๊อ แกแยยิวพู๊ ตากยา เฮ๊เรอ จอแปแหร่ ย๊อ นว๊าแถ่ โทเฮ๊อ เหย่ซี เร๊อ อาแกแย เฮ๊อ อาขว่าอาคยา, อา โม เกอเร๊อ เหย่ซี. เมเตเฮ๊เรอ อา อ๊อแล หนื่ออื่อ โทเฮ๊อ อาโหง่ เร๊อ เหย่ซี เพอโพ มู๋หนู่เค เต๊เห่ เฮ๊อ. 29เมเตเฮ๊เรอ จอแปแหร่ เด๊อะตาครา โทเฮ๊อ เชหยู่ เออเนอ เร๊อ แกแย เด๊อ อา นว๊าแถ่ เฮ๊อ ลู เออเต๊เห่เนอ, อา เฮ๊เบ่ ฉิกย๊า กาคยา ปา อาโหง่ ตีกี๋โต่ เฮ๊อ. 30อา แซ่เฮ๊อ เน๊อ ซี เด๊อ เหร่อเคเนอ เฮ๊อ เนอ, เด๊อ เหร่อเคเนอ หม่า ซี จูเอ่ หนิดา เกออู จอแปแหร่ อาลาอาโหง่ โต่ หม่าแน๊เรอ กู๊แหน่เออ เด๊อ แกแยยิวพู๊ เต๊เห่ จูเอ่ หนิดา เกออู จอแปแหร่ อาโหง่ โต่ อาขว่าอาคยา, จอแปแหร่ ซิยอเกอเร๊อ เฮ๊อ ซี แกแยยิวพู๊ หม่าโต่ เออเต๊เห่ เฮ๊อ. 31ฮู๊เนอเฮ๊อ, กู๊แหน่เออ แกแยยิวพู๊ เต๊เห่ หนิดา ปา จอแปแหร่ อาโหง่ โต่. เร๊อ จอแปแหร่ ย๊อ ซิยอเกอเร๊อ ซี อาขว่าอาคยา, เตอเนอเนอ ปาเนอ แกแยยิวพู๊ เต๊เห่ เก่ พย๊าหนิเกอ จอแปแหร่ อา เตซิยอ ปา. 32เมเตเฮ๊เรอ แซ่ฮู๊ จอแปแหร่ เก่ ซิยอเกอเร๊อ ลออู ปว๋า เตเพร เนอเร๊อ, อา ด๊อโน โอ่แซ๊ ล๊อปลี อู ปว๋า เตเพร เด๊อ เตหนิดา โหง่ โต่ อาทอกู เออเนอ เฮ๊อ.

เตถู่เซ๊แถ่ จอแปแหร่

33จอแปแหร่ อา เตซิยอ, อา เตลีแมลีเพ๊ เร๊อ อา เตซิคว๊าซิเง เออเต๊เห่เนอ, อาดุอาแย แหน่เจ๊อ. อา ตี๊หรี่แตแร เมเต เออเต๊เห่เนอ, อู ซิเงทว๊า เบ๊ เจ๊อ เตเพร่ว โต่. อาแกล๊ เต๊เห่เนอ, อู ครวา ซิเง เบ๊ เจ๊อ เตเพร่ว โต่. ⁱ

34ลีเทส่อพ๊ากู เฮ๊ เน๊อ,
“หม่าอูเป ซิเงทว๊า เบ๊น๊อ จอแปแหร่ อาซิปล่อ เป? หม่าอูเป เตเพร ยูแกล๊ยูโกล เบ๊น๊อเกอ จอแปแหร่ เป? อา โอ่น๊อ เตเพร่ว โต่.” ^j

35“แกแย เด๊อ อา เมบุ๊ยเมเตอเรอ น๊อ เอ๊ลู เฮ๊อ จอแปแหร่ เร๊อ จอแปแหร่ โต เมบุ๊ยเมเตอเรอ กาคยาฉื่อ เกอ ลาติ ลู เนอหม่า อา โอ่ อูเป?” ^k

36เมเตเฮ๊เรอ, อา แบ๊แล เตล๋อ ปลี, อา แม๊ตู่หนิ เตล๋อ ปลี เร๊อ อา เตอ เรอฉว่าชอ เต๊เห่, เร๊อ เด๊อ อา แบ๊แล เตปว๋า เต๊อเจ่อ อาขว่าอาคยา, อู ถู่เซ๊แถ่หนิ เฮ๊อ จอแปแหร่ เฮ๊อ. แกแย ปว๋า เตเพร เก่ ถู่เซ๊แถ่ดื่อ จอแปแหร่ อาตูจูเพร แตแลเคร๊ นี๋. อาเมน. ^l