Romans 12
เด๊อะแล เตโอ่เซอเพร เด๊อ จอแปแหร่ อาเง
1ฮู๊เนอเรอ, โป่แหว่ ซี๋, จอแปแหร่ อา เตซิยอ เป เนอ, อาดุอาแย ตาลว๊าซิลือ เจ๊อ เด๊อ เปเง อาขว่าอาคยา, แว กุยซิยอ ซี เร๊อ ซี เก่ เด๊อะแล ซี เหน่กล่อ เออ เด๊อ จอแปแหร่ อา โอ่ ฮู๊ เตหลู่ เด๊อ อา เซอเพร, ฮู๊ เตหลู่ เด๊อ อา บูโพ๊ เร๊อ ฮู๊ เตหลู่ เด๊อ อาโต ลูซิปล่อ อา เตซิหยื่อ เนอ นี๋. ซี โต จ๊อเบแถ่ จอแปแหร่ ฮู๊เออเนอหม่า หม่าเฮ๊อ แกล๊ เด๊อ อาโตอาเบ่ โตโบ เฮ๊อ. 2โอ่เซอเพร แม๊บือเกอ เต ฮู๊ แกแย เด๊อ อา ซิเง เกออู จอแปแหร่ โต่ เนอเต๊เห่ อาเหล่โกล โอ่เซอเพร เนอแต่เหม่ นี๋. แซ่ฮู๊ ซี เก่ โอ่เซอเพร โค๊ดื่อ เร๊อ เหย่ ซีเนอ เร๊อ, นอถู่แหล่ เต๊เปล่เซ โค๊แก ซี เหล่เตเน เต๊เห่เนอ เร๊อ จอแปแหร่ เนอ นี๋. ซี เก่ เมฮู๊เนอ ตื๊อหม่า ซี ซิเงแฮเบ๊ แพ๊ เต เด๊อ จอแปแหร่ ซิหยื่อ นอเม ซีเนอ เต๊เห่ แพ๊. ตื๊อเรอ ซี เก่ ซิเงแฮ เตแร๊, เตเมโม จอแปแหร่ อาซิปล่อ, เร๊อ เตซิเง เล๊อบาแฮ จอแปแหร่ อา เตซิหยื่อ เต๊เห่ ปา แพ๊. 3เด๊อ จอแปแหร่ อาบุ๊ยอาเตอเรอ ขว่าคยาเร๊อ อา แด่แถ่ แว เร๊อ แว เก่ ทวา เพรโด่แนพู๊ เต๊เห่ เตเพร อาขว่าอาคยา, แว เฮ๊ ซี ปว๋า เตเพร เน๊อ, เตเนดุ เล๊อ แต่ ซีเหน่ เร๊อ บ๊า ซี โตเบ่ เตเน เกอเร๊อ ซีเหน่เนอ แต่เหม่ นี๋. โท๊โต่ ซี โตเบ่ เตเนหนิ ซีเหน่ บ๊า อาโตอาเบ่ เนอแพ๊. แด๊เฮอ แลแม๊ เกอเร๊อ ซี เตหยื่อเตแหน่ เด๊อ จอแปแหร่ เด๊อะ ซี เนอหม่า อาดุ บ๋า เตเนอ เตเนแซ่ แลแค บ๊าเนอแพ๊ นี๋. 4เปเหน่ หม่า เตเพร จือ ลู แพ๊ หม่าแน๊เรอ เปเหน่กล่อ อาครืออาขรว่า เต๊เห่ เนอหม่า อา โอ่โค๊ลู. อาครืออาขรว่า เต๊อเจ่อ เร๊อ เต๊อเจ่อ เนอ, อา เม เตเม แซ่ลู โต่. a 5ฮู๊เนอเฮ๊อ เป โอ่โหร่โอ่เอ๊ หม่าแน๊เรอ เป ทวาแถ่เฮ๊อ ลู เหน่ เตเพรเพร่ว แพ๊ เด๊อ ครี๊ อากูเฮ๊อ. เป โอ่จิจือเต่อ ลอเฮ๊อ ลู ปว๋า เตเพรเฮ๊อ. 6เป เก่ นอจ่อเอ่ เป เชหยู่ เด๊อ จอแปแหร่ เด๊อบุ๊ย เด๊อะเตอเรอ ลู เตเพร เร๊อ เตเพร เออเนอ. จอแปแหร่ เก่ นอแด๊โฉ่โด่แน แกแย เตเพรเพร เร๊อ อาลาอาโหง่ เก่เฮ๊เรอ, อา โตเบ่ แด๊โฉ่โด่แน บ๊า จอแปแหร่ เด๊อ ลู เตหยื่อเตแหน่ เนอแพ๊. b 7เก่ จอแปแหร่ เด๊อ แกแย เตเพรเพร อา เตแจ่เตลีแม เด๊อ อา นอเมจว่า ลู. เร๊อ อูโร เก่เฮ๊เรอ, อา โตเบ่ เมจว่า อา เก่ เด๊อ แกแย เตเพรเพร อา เตแจ่เตลีแม เด๊อ อา เก่ นออิซว๊า ลู เร๊อ อู เก่เฮ๊เรอ, อา โตเบ่ อิซว๊า อู. 8เก่ จอแปแหร่ เด๊อ แกแย เตเพรเพร อา เตแจ่เตลีแม เด๊อ อา เบ่ แฉ่ครวา อูคยา เก่เฮ๊เรอ อา โตเบ่ แฉ่ครวา อู. เก่ แกแย เตเพร อา ซิปล่อฉว่า เมหลู่เมแต แกแย โซพ๊าโซแรพู๊ เต๊เห่ เร๊อ อา ตาหมื่อตาเต เต๊เห่ เก่เฮ๊เรอ อา โตเบ่ ซิปล่อฉว่า เมหลู่เมแต เป่ดื่อ อู. จอแปแหร่ เก่ เด๊อ แกแย เตเพรเพร อา เตแจ่เตลีแม เด๊อ อา เบ่ ทวา ทวาดุทวาเต เฮ๊เรอ อา โตเบ่ เม ชาเผร่ชาอ่อ เร๊อดื่อ. แกแย เตเพรเพร เก่ อา ซิยอ เมจว่าหนิ อู เก่เฮ๊เรอ, อา โตเบ่ เม เด๊อ เตซิครือซิลอ อากู. 9โมค๊าโมโข่ แต่ อู แต่เหม่ นี๋. ซิหย่อแก เตมู๊แหม่รีแจ่ นี๋. ดี๊กลา หม่าหนิแร๊ แลแค เตแร๊ นี๋. 10โม เกอเร๊อ ลู ฮู๊ โป่แหว่ โต๊โหมะ ฮ๊อกูเนอ นี๋. แด่หยื่อแด่แหน่ เกอ เร๊อ ลู เตเพร เร๊อ เตเพร นี๋. 11เมครือ แลแค แบ่เจ่ อาเตเม นี๋. เตเกล แลแค แต่เหม่ นี๋. ดา เมเฮ๊อ แบ่เจ่ อาเตเม เฮ๊อ เฮ๊เนอหม่า แด่ชอ แลแค ซี ซิปล่อ นี๋. 12ซี เตแม๊ชือ เด๊อ จอแปแหร่ ตี๊หรี่แตแร เป่ ซีเง เออเต๊เห่เนอ, ซิครือซิลอ แลแค นี๋. เบ๊อะเตแป่เตเช แฮเบ่ ซี เบ๊อะเนอ, แด่ทูซิปล่อ แลแค, กุยจ๊อเบ แลแค ปว๋า โพ๊ นี๋. 13จอแปแหร่ อาแกแย เต๊เห่ เก่ โซพ๊าโซแร เฮ๊เรอ, พย๊าจว่าเมจว่า เป่เร๊อ เกอ เหย่ซี นี๋. แม๊ เด๊อะเอ่เด๊อะโอฉื่อ แลแค ซิเผระซิแหม่ นี๋. เอ๊ โอ่เมอ โอ่เป่ แลแค เหย่ซี เด๊อ ซี หี่ด๊อกู นี๋. 14เด๊อะบุ๊ยเด๊อะเตอเรอ ดื่อ แกแย เด๊อ อา เมจาเมจือ ซี เนอเต๊เห่ นี๋. กุยจ๊อเบ เด๊อ จอแปแหร่ เก่ เด๊อะบุ๊ยเด๊อะเตอเรอ เหย่ซี เนอ นี๋, อี๊ชออี๊บ่าฉื่อ แต่ เหย่ซี แต่เหม่ นี๋. c 15ซิครือซิลอ โหร่เกอ เร๊อ แกแย เด๊อ อา ซิครือซิลอ เนอเต๊เห่ นี๋. ซิเปลซิหย่อ โหร่เกอ เร๊อ แกแย เด๊อ อา ซิเปลซิหย่อ เนอเต๊เห่ นี๋. 16โอ่เซอเพร โหร่ลอ ลู เด๊อ ซิปล่อ เตเม๋ จือ อากู นี๋. พย๊าแถ่โล แต่ แลแค ซี ซิปล่อ แต่เหม่ นี๋. โท๊โต่ แบ๊ซว๊าเค๊โค หนิเกอ แลแค เร๊อ แกแย โซพ๊าโซแรพู๊ เนอเต๊เห่ นี๋. เตเนดุ เกอ เร๊อ เนเหน่ แต่เหม่ นี๋. d 17แกแย เด๊อ อา เมจาเมจือ เน เนอ, เมจา เมจือฉื่อ แต่ เหย่ซี แต่เหม่ นี๋. เตเม เด๊อ อู ปว๋า เตเพร เตเน เร๊อ อาแร๊ เต๊เห่เนอ, แอ๊จื๊อ แม๊ปูเม แลแค เตเม ฮู๊เนอ เต๊เห่ นี๋. 18แอ๊จื๊อ โอ่เซอเพร โครเกล เกอ แลแค เร๊อ อู เบ๊อะเนแอ๊จื๊อเบ๊ ตื๊อดื่อ เนอ นี๋. 19โคแบ๊ซว๊า ซี, อู เก่ เมเช ซี เฮ๊เรอ, เมเลอ กาคยาฉื่อ แต่ อู แต่เหม่ นี๋. นอ เมจากาคยา ดื่อ อา เร๊อ จอแปแหร่ ปา, เมเตเฮ๊เรอ ลีเทส่อพ๊ากู เฮ๊ เน๊อ, “เพร เด๊อ อา เมเลอฉื่อ กาคยา แกแย เด๊อ อา เม เตมู๊แหม่ เนอเต๊เห่ หม่า แว แพ๊. แว เมเลอ กาคยาฉื่อดื่อ เร๊อ แวเหน่ ปา,” e แบ่เจ่ เฮ๊ ฮู๊เนอ. 20โท๊โต่, ฮู๊ ลีเทส่อพ๊ากู เฮ๊ เน๊อ,“แกแย เด๊อ อา ซิเถ่ เน เต๊เห่เนอ, อา เก่ ซิกู๊ซิวี เฮ๊เรอ, ตูรู๊ เด๊อะเอ่ อา นี๋. อา เก่ แลแด๊ ซิโอเทอ เฮ๊เรอ, ตูรู๊ เด๊อะโอ ลู นี๋, ซี เก่ เมฮู๊เนอ เฮ๊หม่า, อา เก่ ซิเตเร เกอ เร๊อ อาเหน่ แซ่เน๊อ ซี แด่แถ่ หมิกล๊วา เด๊อ อา กู่กล๊อขุ เนอ ปา.” f 21ปลวา เมเป่ แต่ เตมู๊แหม่ เร๊อ เนเหน่ แต่เหม่ นี๋. เมเป่แก เตมู๊แหม่ เออเนอ เร๊อ เตแร๊ เออเนอ นี๋.
Copyright information for
EkySCThai