Romans 14
แด่ ปา แต่ ลู เตเพร เร๊อ เตเพร เตซื๊อ แต่เหม่
1เอ๊โมฉื่อ เป่ ครี๊พู๊ เด๊อ อาเตหยื่อ ปีตี๊ปา ดื่อเง เนอเต๊เห่ นี๋. เหย่ซี อาเตเตเน เต๊เห่เนอ, อา โค๊ เร๊อ เน เบ่เบ่, เคร๊ฉื่อ แต่ เหย่ซี แต่เหม่ นี๋. a 2แกแย เต๊เห่เห่เนอ อา หยื่อเอ่ เร๊อ เอ่ อิเต๋ หม่า อาหนิ แพ๊ อา เฮ๊ หม่าแน๊เรอ แกแย เด๊อ อาเตหยื่อ ปีตี๊ปา เออเตเพรเนอ อา เอ่ แพ๊ตื๊อ ส่อตอส่อเหล่ แพ๊. 3แกแย เด๊อ อา เอ่ ลอ เตปว๋า เต๊อเจ่อ เตเพรเนอ, อา เบ่ เตเน ปีตี๊หนิ แกแย เด๊อ อา เอ่ เกออู เตปว๋า เต๊อเจ่อ โต่ เออเนอ เตเพร โต่. ฮู๊เนอเฮ๊อ แกแย เด๊อ อา เอ่ เกออู ปว๋า เต๊อเจ่อ โต่ เออเตเพรเนอ, อา เบ่ แด่ เตซื๊อ หนิ แกแย เด๊อ อา เอ่ เตปว๋า เต๊อเจ่อ เออเต๊เห่เนอ โต่, เมเตเฮ๊เรอ จอแปแหร่ เอ๊โมฉื่อ แกแย เออเตเพร. 4เน จว๊า แด่ เตซื๊อ โต่ เจ๊อ อู เพรแรเต เร๊อ หม่า เน หม่า แกแย ฮู๊เต เตเพร เจ๊อ? อา เม ทวาแถ่ อาเตเม เบ่เบ่, อา เม ทวาแถ่ โต่ เบ่เบ่, อาแบ่เจ่ โอ่ดื่อ เฮ๊อ, เร๊อ อา เก่ เฮ๊ เกอเร๊อดื่อ ลู ปา กอกอ, เมเตเฮ๊เรอ แบ่เจ่ จอแปแหร่ เออเนอ, อา เมจว่า เบ๊แจ่ เป่ เหย่ซี อาขว่าอาคยา, เหย่ซี เก่ เมทวาแถ่เบ๊ ปา. 5แซ่ฮู๊เนอเฮ๊อ, แกแย เต๊เห่เห่เนอ อา เตเน แลแค เน๊อ, ม๊อเนอ เต๊เห่เห่เนอ อู แด่ บูโพ๊ ข่อดื่อ ลู, หม่าแน๊เรอ เต๊เห่เห่เนอ อา เตเน แลแคเน๊อ ม๊อเนอ ล๋อ ปลี เนอ อา แซ่ลอ แพ๊ ลู. แกแย เตเพร เร๊อ เตเพร เนอ, อา เบ่ หยื่อเอ่ หม่า เตอเกล๊อ เกอ เร๊อดื่อ อา เหล่เตเน แพ๊. 6แกแย เด๊อ อา เตเน เร๊อ ม๊อเนอ เต๊เห่เห่เนอ, อู โตเบ่ แด่บูโพ๊ ข่อดื่อ ลู อา เก่ เตเน เฮ๊เรอ, แด่บูโพ๊ ม๊อเนอ เออเนอ เด๊อ เตเมลีเมเตเค แบ่เจ่ อาเงเนอ. แกแย เด๊อ อา เอ่ เตปว๋า เต๊อเจ่อ เต๊เห่เนอ, เอ่ เด๊อ เตเมลีเมเตเค แบ่เจ่ อาเง เนอ, เมเตเฮ๊เรอ อา เฮ๊บุ๊ยเฮ๊เตอเรอ โท จอแปแหร่ เร๊อ อา เอ่ เต อาขว่าอาคยา, อา เมลีเมเตเค จอแปแหร่ เฮ๊อ. ฮู๊เนอเฮ๊อ แกแย เด๊อ อา โด่เอ่เฉ่ เต๊เห่เนอ, อา เฮ๊บุ๊ยเฮ๊เตอเรอ เกอ จอแปแหร่ เร๊อ อา เมลีเมเตเค แถ่เกอ จอแปแหร่ อามุย อาขว่าอาคยา, อา แซ่ลู แพ๊. 7เป โอ่เซอเพร ตื๊อดื่อ เปเง หม่าโต่. โทเรอ เป เซอตื๊อดื่อ เปเง หม่าโต่. 8เป เก่ เซอเพร เฮ๊เรอ, เป โอ่เซอเพร เด๊อ แบ่เจ่ อาเง. เป เก่ เซอ เฮ๊เรอ เป เซอ เด๊อ แบ่เจ่ อาเง. ฮู๊เนอเรอ เป เซอเพร เบ่เบ่, เป เซอ เบ่เบ่, เป หม่า แบ่เจ่ อาเต เต๊เห่. 9เด๊อ เตหรี่เตแก เออเต๊เห่ อาขว่าอาคยา, แซ่ฮู๊ ครี๊ เก่ ทวาแถ่ แกแย เซอเพร เต๊เห่ เร๊อ แกแย เซอ เต๊เห่ อา แบ่เจ่ เร๊อ, อา เซอ โทเรอ อา ก๊อถ่อเซอเพร กาคยา คยาแซ๊ เฮ๊อ เด๊อ เตเซอ เฮ๊อ. 10ฮู๊เนอเรอ, เน จว๊า แด่ เตซื๊อ โต่ เน โป่แหว่ เมเต? หม่าโต่เรอ, เน จว๊า เตเน ปีตี๊โต่ เน โป่แหว่ เออเตเพร เมเต? ล๋อ เป เออเต๊เห่เนอ, เป เบ่ ก๊อถ่อลอ เด๊อ จอแปแหร่ เหล่เมจากาคยา อาเหล่โอ่ เนอ อาเป๊เส่เง ปา. b 11เมเตเฮ๊เรอ, เด๊อ ลีเทส่อพ๊ากู เนอ, แบ่เจ่ เฮ๊ เนอ,“ฮู๊ แว เซอเพร หม่าแหน่ เนอ, แว อ๊อแล ซี เนอ, อูปว๋า เตเพร เก่ แฮ แด๊งือ ช๊าตากลุ๊ยตา ลอ เด๊อ แว เบ๊เง ปา เร๊อ อา เก่ อ๊อแล แลแค ปว๋า เตเพร เร๊อ แว หม่า จอแปแหร่ หม่าแหน่ เตเพร ปา.” c 12ฮู๊เนอเรอ, เป เมโท แคร๋ เฮ๊อ อิเตเนอ เป เบ่ เฮ๊โฉ่แถ่โล ลอ จอแปแหร่ ปว๋า เพร ปา.
เด๊อะ ทวาแถ่ เตแลคื๊อแลลอ, เตซื๊อเตปล๊า เด๊อ อูเง แต่เหม่
13ฮู๊เนอเรอ, แด่ ปา แต่ ลูเตซื๊อ เตเพร เร๊อ เตเพร แต่เหม่ นี๋. เต เด๊อ อา เก่ ทวาแถ่ เตแลคื๊อแลลอ, เตซื๊อเตปล๊า เด๊อ โป่แหว่ เตเพรเพร อาเง เฮ๊เนอ, เน เบ่ แด่แล โค๊แก เน ซิปล่อ เด๊อ เน เก่ เม ปา เตเนอเต๊เห่ เตอเจ๋อ โต่. 14แว ย๋อ ทวาแถ่ เฮ๊อ เร๊อ แบ่เจ่ เหย่ซู่ เตอเจ๋อ โตเฮ๊อ อาขว่าอาคยา, แว ซิเง ตาเต เร๊อ เหล่เอ่ โอ่ดื่อ อาเหน่ เร๊อ อา อาโพ๊อาแปละ โต่เนอ อา โอ่ เตอเจ๋อ โต่. อาโพ๊อาแปละ ลอ แพ๊. หม่าแน๊เรอ เก่ เน หยื่อเอ่ เร๊อ เหล่เอ่ เต๊เห่เห่เนอ, อา โพ๊อาแปละ โต่ เก่เฮ๊เรอ เหล่เอ่เออ อา โพ๊อาแปละ เด๊อ เนเง โต่. 15เด๊อ เน เอ่ เตเต๊อเจ่อเจ่อ อาขว่าอาคยาเร๊อ, เน โป่แหว่ เตเนโม ตีกี๋ โต่ เก่เฮ๊เรอ, เน เม เตเออเนอ เด๊อ เตโม อากู หม่าโต่. เด๊อ เน เอ่เฉ่ อาขว่าอาคยาเร๊อ, จว๊าเมปย๊าแก แต่ เน โป่แหว่ เด๊อ ครี๊ ข่าเซอ เป่ โทเฮ๊อ เด๊อ อาเง เออเนอ เตเพร แต่เหม่. 16แว เก่ เม เตเออเตอเจ้อ หม่า อาแร๊ แพ๊ เด๊อ แวเง, เน เตเน เจ๊อ หม่าแน๊เรอ, เก่ อา ทวาแถ่ โป่แหว่ ครี๊พู๊ เต๊เห่ อาเตเนซื๊อ เก่เฮ๊เรอ เม แต่เหม่. ปาหม่า เหย่ซี เป๊อเจ่อ อิแช๊ ลอเห่. 17เมเตเฮ๊เรอ, จอแปแหร่ อาเทออาเก่กู เนอ, เหล่เอ่เหล่โอ หม่า เต เด๊อ อา โหล่ดุเล๊ออู หม่าโต่. เต เด๊อ อา โหล่ดุเล๊อ อู หม่า, เตจ๊อเตเต, เตโอ่โส่โอ่เคร, เร๊อ เตซิครือซิลอ เด๊อ แหย่โยบูโพ๊ แบ่เจ่ เด๊อะ เป เออเต๊เห่ เนอแพ๊. 18แกแย เด๊อ อา โอ่เซอเพร ครวาเกอ ฮู๊เนอ เต๊เห่, เร๊อ อา เม ครี๊ อา เตเอ่เตแร เต๊เห่เนอ, จอแปแหร่ เบ่เบ่ แกแยเห่ขุพู๊ เบ่เบ่ อาซิปล่อ โอ่หนิ เฮ๊อ ลู เฮ๊อ. 19ฮู๊เนอเรอ, เป เก่ แอ๊จื๊อแอ๊เหร่ โอ่โครโอ่เกล เกอเร๊อ ลู เตเพร เร๊อ เตเพร โทเรอ เป เก่ พย๊าจว่า เมจว่า, เด๊อะอ๊าเด๊อะเหร่ เกอเร๊อ ลู เตเพร เร๊อ เตเพร โป๋. 20เมปย๊าแก แต่ จอแปแหร่ อา เตเอ่เตแร เร๊อ เหล่เอ่เหล่โอ อาคยา แต่เหม่ นี๋. เหล่เอ่ ล๋อ ปลี หม่า อาโพ๊อาแปละ ลอ แพ๊ หม่าแน๊เรอ เหล่เอ่ อิเตเต๋ เบ่เบ่, แกแย เตเพรเพร เก่ เอ่ เร๊อ อา เก่ ทวาแถ่ โป่แหว่ เด๊อ อาโร เตเพร อา เตซื๊อ เฮ๊เนอหม่า, อา เม เตเออเนอหม่า อา ซื๊อเฮ๊อ. 21เอ่ เตหย่า เบ่เบ่, โอ เทอแย เบ่เบ่, เมเต เต๊อเจ่อเจ่อ เด๊อ อา ทวาแถ่ เตซื๊อ เด๊อ โป่แหว่ อาเงเบ่เบ่, เป เก่ โด่ หม่า อาแร๊เล๊อ. 22เต เออเต๊เห่เนอ, เน หยื่อเอ่ อา ฮู๊เต เบ่เบ่, โห่โห๋ แด่โอ่ เนอ, เนเหน่ เร๊อดื่อ เร๊อ จอแปแหร่ เก่ ซิเง หม่า โป่เฮ๊อ. แกแย เตเพร เก่ ซิเง เร๊อ อา เม เตเออเนอหม่า อา โตแพ๊, เร๊อ อา เมโทเร๊อ เด๊อ อา ซิปล่อกู เนอ, โมโม๋ อา โม แพ๊, เร๊อ อาซิปล่อ เร๊อดื่อ เก่ เจแม๊ ลู โต่ เฮ๊เนอ, อา พย๊าหนิ เตบุ๊ยเตเตอเรอ เฮ๊อ. 23หม่าแน๊เรอ อา เอ่ เร๊อ อา เก่ ซิปล่อ ดู๊ดี๊ดู๊แด เก่เฮ๊เนอ จอแปแหร่ เก่ เมจากาคยา อา เบ๊อะอา เอ่เต เบ๊อะเนอ ปา, เมเตเฮ๊เรอ อา เอ่ เตเออ เนอหม่า อา เอ่ เร๊อ เตหยื่อเตแหน่ หม่าโต่. เน เม เต อิเตเต๋ เบ่เบ่, เตหยื่อ เก่ โอ่โต่ เฮ๊เนอ อา ทวา เตซื๊อ เฮ๊อ.
Copyright information for
EkySCThai