Romans 15

โอ่เซอเพร ลือเมโม เป่ อู ซิปล่อ

1เป เด๊อ อาโอ่ เร๊อ เตหยื่อเตแหน่ ชอ เออเต๊เห่เนอ, เป โตเบ่ แด่ทูซิปล่อ เร๊อ เมจว่า เป่เกอ แกแย เด๊อ อา เตหยื่อเตแหน่ ปีตี๊ปา เร๊อ อาซิปล่อ หร่ารอหร่าเหร่ ปา ดื่อเง เนอเต๊เห่. เป โต ลือเมโม แล เกอเร๊อดื่อ เปเหน่ โต่. 2แซ่ฮู๊ อา เก่ ทวาบุ๊ยทวาเตอเรอ เป่ เด๊อ เหย่ซี อาเง, โทเรอ แซ่ฮู๊ เหย่ซี เก่ ดุแถ่ ทูแถ่ เด๊อ เตหยื่อเตแหน่ อากูเนอ, เป โต ลือเมโม เป่ เป โป่แหว่ ครี๊พู๊ เต๊เห่ อาซิปล่อ. 3เมเตเฮ๊เรอ, ครี๊ อาเหน่แบ่เจ่ เร๊อดื่อ เจ๊อ เรอ อา ลือเมโม เกอเร๊อ อาเหน่ โต่. โท๊โต่ ลีเทส่อพ๊ากู เฮ๊ เน๊อ, “เต เด๊อ อู เป๊อเจ่ออิแช๊ เน เต๊เห่เนอ, อา แฮเบ่ เกอเฮ๊อ แว เฮ๊อ.” ^a 4เมเตเฮ๊เรอ, ลีเทส่อพ๊า เด๊อ อู ราโอ่ อา มู๋ หนู่เค เต๊เห่เนอ, อา รา หนื่ออื่อ เด๊อ อา เก่ อิซว๊าอี๊แส่ เป อาเงเฮ๊อ. แซ่ฮู๊ เป เก่ โอ่ เร๊อ เตแม๊ชือ เนอ, ลีเทส่อพ๊า เด๊อะ เฮ๊อ เป แด่ทูซิปล่อ เร๊อ เตเหร่เตแบ เต๊เห่ เฮ๊อ.

5แว กุยจ๊อเบ เร๊อ จอแปแหร่ เด๊อ อา เด๊อะ ซี เตแด่ทูซิปล่อ เออ เร๊อ เตเหร่เตแบ เออเตเพรเนอ, อา เก่ เมจว่า เร๊อดื่อ ซี แซ่ฮู๊ ซี เตเพร เร๊อ เตเพร เก่ โอ่เต่อ ลู เร๊อ ซิปล่อ เตเม่วโต ฮู๊ ซี แม๊บือเกอ เหย่ซู่ครี๊ อา เตโอ่เซอเพร เนอเต๊เห่ นี๋. 6ซี เก่ เมฮู๊เนอ ตื๊อเรอ ซี เก่ ถู่เซ๊แถ่ เบ๊ แลแค เป แบ่เจ่ เหย่ซู่ครี๊ อาเพ จอแปแหร่ เออเนอ เด๊อ ซิปล่อ เตเม๋ จือ อากู เร๊อ เด๊อ เตเฮ๊เบ่เถ่ โหร่ลู เต๊อเจ๋อ โต อากู แพ๊.

เตซิครือมีลา เด๊อ แกแยยิวพู๊ หม่าโต่ เต๊เห่ อาเง

7ฮู๊เนอเรอ เอ๊โมฉื่อหนิ แลแค ลู เตเพร เร๊อ เตเพร นี๋. แซ่ฮู๊ อู เก่ ถู่เซ๊แถ่ แลแค จอแปแหร่ เร๊อ เอ๊โมฉื่อ เกอเร๊อ ลู เตเพร เร๊อ เตเพร ฮู๊ ครี๊ เอ๊โมฉื่อ โทเฮ๊อ ซีเนอ นี๋. 8เมเตเฮ๊เรอ, แว เฮ๊ ซี เน๊อ ครี๊ แฮแล ทวา เป่เฮ๊อ แกแยยิวพู๊ เต๊เห่ อา หลู่เล๊ เฮ๊อ, เมเตเฮ๊เรอ แซ่ฮู๊ จอแปแหร่ เก่ จ๊อ เร๊อ อาโหง่ เด๊อ อา อ๊อแล โทเฮ๊อ เร๊อ เหย่ซี อาเพออาโพ มู๋ หนู่เค เต๊เห่เนอเรอ ครี๊ แฮแล ทวา ฮู๊เนอ. 9โท๊โต่, แซ่ฮู๊ แกแยยิวพู๊ หม่าโต่ เต๊เห่ เก่ ถู่เซ๊แถ่ เกอ จอแปแหร่ อา เตซิยอ หนิเกอ เหย่ซี เออ อาเงเนอเรอ, ครี๊ แฮแล เป่ เต่อเกอ เหย่ซีเงเง. ลีเทส่อพ๊ากู เฮ๊ เน๊อ,
“ฮู๊เนอเรอ, แว เก่ ถู่เซ๊แถ่ เน เด๊อ แกแยยิวพู๊ หม่าโต่ เต๊เห่ อาเกล ปา, แว เก่ ถู่เซ๊แถ่ เน เร๊อ แว เตอิโร ซีเต๊เห่ ปา.” ^b

10เร๊อ อา เฮ๊ เกอโป่ เน๊อ,
“เก๋อ แกแยยิวพู๊ หม่าโต่ ซี, ซิครือซิลอ เต่อเกอมอ เร๊อ จอแปแหร่ แกแยยิวพู๊ เออเนอเต๊เห่ นี๋.” ^c

11อา เฮ๊ เกอปาปา เน๊อ,
“แกแยยิวพู๊ หม่าโต่ ซี๋, ถู่เซ๊แถ่ แลแค แบ่เจ่, ถู่เซ๊แถ่ ล๋อปลี อา ปว๋า เตเพร นี๋.” ^d

12เพรโพร อิสยาห์ เฮ๊ โป่ คยาแซ๊ เน๊อ,
“เพเจสซี อากลุยอาแล เก่ แฮ โอ่โลแถ่ เตเพร ปา, เร๊อ อา เก่ เป๊อหนิ แกแยยิวพู๊ หม่าโต่ เต๊เห่ ปา. แกแยยิวพู๊ หม่าโต่ เต๊เห่ เก่ แม๊ชือ แลแค ลู ปา.” ^e

13เบ๊อะซี หยื่อเอ่หนิ เฮ๊อ จอแปแหร่ เด๊อ อา เมจว่า ซี เออ เบ๊อะเนอ, อา หม่า จอแปแหร่ เตเพร เด๊อ เป เหล่แม๊ชือ อา แก่ช๊าแก่แร อาขว่าอาคยา, อา เก่ เมเล๊อบา เป่ดื่อ ซี เตซิครือซิลอ เน๊อ ซี ซิปล่อ อา เตตู๊จุเตอเจ๊อ นี๋. โท๊โต่ แซ่ฮู๊ ซี เตแม๊ชือ เก่ ฉว่าแถ่ชอแถ่ แฮเง เกอโป่ เด๊อ เง เร๊อ แหย่โยบูโพ๊ แบ่เจ่ อา เตโพรเตเตอเรอ อาขว่าอาคยา แพ๊ เนอเรอ แว กุยจ๊อเบ เป่ เด๊อ ซีเง.

คูเปาโล อา เตเอ่เตแร

14โป่แหว่ ซี๋, แว หยื่อเอ่ ตาเต หนิ เจ๊อ ซี เร๊อ ซี โอ่เซอเพร เล๊อบา เจ๊อ เร๊อ เตตว่าเตแร๊, เร๊อ เตซิคว๊าซิเง เด๊อ อาเล๊ออาบา, เร๊อ ซี อิซว๊าอี๊แส่ แจ่ เกอเร๊อ เฮ๊อ แลแค ลู เตเพร เร๊อ เตเพร เฮ๊อ. 15หม่าแน๊เรอ, จอแปแหร่ เด๊อะ เฮ๊อ แว เตบุ๊ยเตเตอเรอ เด๊อ แว เก่ เม เตเมเออ อาขว่าอาคยา, แซ่ฮู๊ ซี เก่ ซิเงแถ่เบ่ หนิคยา โหง่ เด๊อ แว อิซว๊าอี๊แส่ ซี เนอเต๊เห่ เนเร๊อ, เต๊เห่เห่เนอ แว ราหล่าลี เป่ เจ๊อ ซี เจ๊อ. 16จอแปแหร่ อาบุ๊ยอาเตอเรอ อาขว่าอาคยา, อา เด๊อะ แว เตเม เด๊อ แว เก่ เม เหย่ซู่ครี๊ อาเตเม เด๊อ แกแยยิวพู๊ หม่าโต่ เต๊เห่ อาเกล. แซ่ฮู๊ แกแยยิวพู๊ หม่าโต่ เต๊เห่ เก่ ทวาแถ่ เตหลู่ เต๊อเจ่อ เด๊อ จอแปแหร่ เก่ พย๊าฉื่อ อา, โทเรอ เตหลู่ เต๊อเจ่อ เด๊อ แหย่โยบูโพ๊ แบ่เจ่ เมบูโพ๊ โทเฮ๊อ ลู เร๊อ, จอแปแหร่ นว๊าแถ่ โค๊ดื่อเฮ๊อ แว เร๊อ แว เก่ เมเต ฮู๊ เพรหลู่แตเต เด๊อ อา แด๊โฉ่โด่แน โลเป่ อู เร๊อ จอแปแหร่ อา เตซิครือมีลา เนอเตเพร เฮ๊อ.

17ฮู๊เนอเรอ, เด๊อ แว ทวาแถ่ เต๊อเจ๋อ โตเฮ๊อ เร๊อ เหย่ซู่ครี๊ เฮ๊อ อาขว่าอาคยา, แว เตเนดุ เกอเร๊อ แหน่เจ๊อ เตเม เด๊อ แว เม เป่ จอแปแหร่ เออเนอ เจ๊อ. 18– 19เต เด๊ออาโร ซี เต๊เห่เนอ แว เฮ๊เบ่แถ่โล บื่อเกอ เร๊อ อู โต่. แว เฮ๊เบ่แถ่โล บื่อแพ๊ตื๊อ ครี๊ อาเตเม เด๊อ อา เมจว่า แวเออ อาหรี่อาแก แพ๊. เด๊อ แว เฮ๊เบ่ อา อาหรี่อาแก เออ อาขว่าอาคยา, โทเรอ เด๊อ เหย่ซี แม๊เถอะ แว เตเม เต๊เห่, โท๊โต่ เด๊อ แหย่โยบูโพ๊ แบ่เจ่ เด๊อะ แว อาเตโพรเตเตอเรอ เออ เนอ, แว เม โลเป่ เหย่ซี เตโค๊ตีกลี๊ เออเต๊เห่ เน๊อ เตเถ่ตาปา คย๊ายื๊อ เนอเต๊เห่ อาขว่าอาคยา, แว ยูแกล๊ยูโกล เบ๊เป่เฮ๊อ แกแยยิวพู๊ หม่าโต่ เต๊เห่ เด๊อ อา เก่ หนิดา จูเอ่เฮ๊อ จอแปแหร่ เฮ๊อ. เบ๊อะแว เล แด๊โฉ่โด่แน เป่ลอ อู เร๊อ ครี๊ อา เตซิครือมีลา เบ๊อะเนอ, แว จว๊าโน แด๊โฉ่โล เป่ ลอเฮ๊อ อู ปว๋า เตเพร, ปวาตอดอ เด๊อ ดอโอ่ รว๊า วีเยรูซาเล็ม เนอ โต่เด๊อ อิลลีริคุม เก่ เนอเต๊เห่ เฮ๊อ. 20เออ หม่า หม่าเฮ๊อ เต เด๊อ แว ซิหยื่อ แม๊ชือ เม เนอเฮ๊อ. เหล่โอ่ เบ๊อะเต๋ โต๊โผ่ เบ่เบ่ เด๊อ อา หนิโฮแล๋ ครี๊ อาหรี่อาแก โต่ เนอ. แว โด่แนเป่ เหย่ซี เร๊อ เตซิครือมีลา. เมเตเฮ๊เรอ อาแซ่เน๊อ หี่เตเม เด๊อ อู แบ๊ตา โทเฮ๊อ อากู๊โด่ แกซ๊า เร๊อ หล่อเนอ, แว ซิหยื่อ จว๊า ช๊อแถ่ แฮเง เร๊อ อู กู๊เหล่ เด๊อ อู แบ๊ตา โทเฮ๊อ เออ อาโหล่ โต่. 21โท๊โต่ ฮู๊ ลีเทส่อพ๊ากู เฮ๊ เน๊อ, “แกแย เด๊อ อู เฮ๊น๊อ เป่แล๋ เหย่ซี เร๊อ อาหรี่อาแก ล๋ายโต่ เต๊เห่เนอ, เหย่ซี เก่ แม๊เถอะ ลู ปา. แกแย เด๊อ อา หนิโฮน๊อ เกอ ล๋ายโต่ เต๊เห่เนอ, เหย่ซี เก่ ซิเงโปลแฮ ปา,” ^f อา เฮ๊ ฮู๊เนอ.

คูเปาโล ตี๊หรี่แตแร เด๊อ อา เก่ จว๊าโอ่เล โอ่เกอ ครี๊พู๊ เด๊อ วีโรมอากู เนอเต๊เห่

22เด๊อ เตเออเต๊เห่ อาขว่าอาคยา, แว เตเร แฮ เด๊อ ซีโอ่ เนอ, เตเม ดู๊แด ตาตือ โตโมโม เจ๊อ แว เจ๊อ. ^g 23หม่าแน๊เรอ, กู๊แหน่เออ, ล๋อ เหล่โอ่ ตีวี๊ตาวา เบ๊อะเออ โต๊โผ่เนอ, แว เมโท ลอเฮ๊อ, แว เหล่เม เหล่โอ่เหล่แบ่ เนอ อา โอ่ ปาโต่เฮ๊อ. โท๊โต่ แว ซิหยื่อ แฮ โอ่เล แม๊เถอะ แหน่เจ๊อ ซี เจ๊อ. 24ฮู๊เนอเรอ ช๋า แว จว๊า เด๊อ สเปนเก่ เบ๊อะเนอปาเนอ, แว เตเน ซิจว๊าโอ่เล เต่อเกอ ซี ปา. ช๋า แว จว๊า เฮ๊อ เด๊อ สเปนเก่ เบ๊อะเนอปาเนอ. แว จว๊าโอ่เลแก โก๊เกอ ซี เบ๊อะวีโรม อากู เนอ ปา. เร๊อ แว เก่ จว๊า แบ๊ซว๊าแบ๊โคแก หนิเกอ เร๊อ ซี แตแปล๊เตอเปลอฮู๊ ปา แว เตเน ฮู๊เนอ. โทเรอ แว แม๊ชือ เด๊อ ซี เก่ เด๊อะเกอ แว ซี เตเมจว่า เด๊อ แว เตจว๊า แฮเง เด๊อ สเปนเก่ เออเนอ ปา, แว แม๊ชือ ฮู๊เนอ. 25หม่าแน๊เรอ, กู๊แหน่เออ แว จว๊า เด๊อ วีเยรูซาเล็ม. เร๊อ แว เก่ จว๊าพย๊า รือ เด๊อ อู เมหลู่เมแต เต๊เห่ เบ๊อะเนอ ปา, เร๊อ แว เก่ เมจว่า เร๊อ จอแปแหร่ อาแกแย เบ๊อะเนอ เต๊เห่ ปา. ^h 26เมเตเฮ๊เรอ, มาซิโดเนียเก่พู๊ เต๊เห่ เร๊อ อาคายา เก่พู๊ เต๊เห่เนอ, อา ซิปล่อฉว่า เด๊อะจว๊า เป่เกอ รือเต๊เห่ เร๊อ จอแปแหร่ อา เพรบูโพ๊พู๊ เด๊อ อา โซพ๊าโซแร เร๊อ อา โอ่ แลแค เด๊อ วีเยรูซาเล็ม อากู เนอเต๊เห่. 27เหย่ซี ซิปล่อฉว่า เมลู แหน่เจ๊อ. เก่ เฮ๊หม่าแหน่ เนอ, เหย่ซี โหล่เมจว่า แหน่ แกแยยิวพู๊ เด๊อ อา หยื่อเอ่ กาเกอ เออเนอเต๊เห่ เฮ๊อ. อาแซ่เน๊อ เหย่ซี ฉู่ โอ่เอ๊ เฮ๊อ แกแยยิวพู๊ เออเต๊เห่ เฮ๊อ. เมเตเฮ๊เรอ แกแยยิวพู๊ เออเต๊เห่เนอ อา เด๊อะเอ่ แฮเง เป่เกอโต่ดื่อ เฮ๊อ แกแยยิวพู๊ หม่าโต่ เต๊เห่ เตบุ๊ยเตเตอเรอ เด๊อ แหย่โย ตากยา เต๊เห่ เฮ๊อ ฮู๊เนอเรอ แกแยยิวพู๊ หม่าโต่ เต๊เห่ ฉู่โอ่ แกแยยิวพู๊ เต๊เห่ เน๊อ อา เก่ เบ่ เบเอ่ กาคยา เป่ คยาแซ๊ เหย่ซี เร๊อ เตบุ๊ยเตเตอเรอ หม่าเฮ๊อ รือเท เร๊อ ตาหมื่อตาเต เออเต๊เห่ เฮ๊อ. ⁱ 28ฮู๊เนอเรอ ช๋า แว เด๊อะแก โทเฮ๊อ รือ เด๊อ เหย่ซี กู๊ยากู ปาเนอ, โทเรอ ช๋า แว ซิเง ตาเตเฮ๊อ เร๊อ เหย่ซี พย๊าหนิ โทเฮ๊อ รือ ปา เบ๊อะเนอ, แว เก่ เถ่จว๊า เด๊อ สเปนเก่ ปา, เร๊อ แว เก่ โน โอ่เล โก๊ล๊าเกอ ซี เบ๊อะเนอ ปา. 29แว ซิเง เร๊อ ช๋า แว แฮโต่ เด๊อ ซี โอ่ปา เนอ, แว เก่ พย๊าแฮหนิ ครี๊ อา เด๊อะบุ๊ยเด๊อะเตอเรอ เด๊อ อาเล๊ออาบา เออเนอ ปา.

30โป่แหว่ ซี๋, เด๊อ เป แบ่เจ่ เหย่ซู่ครี๊ เร๊อ แหย่โยบูโพ๊ แบ่เจ่ อาเตโม อาขว่าอาคยา, แว กุยซิยอ ซี เร๊อ ซี เก่ กุยจ๊อเบ โหร่โต่เกอ เร๊อ แว ปา, เร๊อ ซี เก่ กุยจ๊อเบแถ่ เป่เกอ แว เด๊อ จอแปแหร่ อา โอ่ ปา. เร๊อ ซี เก่ กุยจ๊อเบ ลอซิปล่อเตเมลอ เป่เกอ เด๊อ แวเง ปา นี๋. 31โทเรอ, แซ่ฮู๊ จอแปแหร่ เก่ เมแลเปล๊ แว เร๊อ แกแย เด๊อ อา โอ่ เด๊อ ยูดาห์ เก่กู เด๊อ อา หยื่อเอ่ เกออู ครี๊ โต่ เนอเต๊เห่ อา กู๊ยากู เนอเร๊อ, กุยจ๊อเบ เป่เกอ เด๊อ แวเง นี๋. โทเรอ กุยจ๊อเบ เป่เร๊อ เกอโป่ เพรหยื่อเอ่ เออ เด๊อ อา โอ่ เด๊อ วีเยรูซาเล็ม อากู เนอเต๊เห่ เก่ ซิครือซิลอ พย๊าฉื่อ เตหลู่แต เด๊อ แว ซูจว๊า เป่ เหย่ซี เออเนอเต๊เห่ นี๋. 32เก่ จอแปแหร่ ซิปล่อโอ่ เร๊อ แว เก่ แฮ โอ่เล เต่อเกอ ซี ปา เฮ๊เรอ, แว เก่ แฮโอ่โก๊ เตเบ๊ซิพร๊า เกอ ซี ปา, เร๊อ แว เก่ แฮ ซิลอซิอือ เต่อเกอ เร๊อ ซี ปา. โท๊โต่ แว เก่ แฮ พย๊าหนิ เตอ๊าเตเหร่ เด๊อ อาเซ เต๊เห่ ปา. 33จอแปแหร่ อา เตโอ่โส่โอ่เคร ตู๊จู่เตอเจ๊อ เก่ โอ่เกอดื่อ เร๊อ ซี ล๋อ ปลี นี๋. อาเมน.