Rom 2 | EkySCThai | STEP | โคแบ๊ซว๊า, เน เก่ เฮ๊ อู เน๊อ, “เหย่ซี เนอหม่า แกแย แร๊โต่,” หม่าแน๊เรอ เน หม่า แกแย แร๊โต่ แซ่เน๊อ เหย่ซีซี แพ๊. เน เฮ๊ แลเปล๊หนิ เนเหน่ หม่า อาหนิ โต่. เบ๊อะเน เฮ๊ เร๊อ เหย่ซี หม่า แกแยจา เร๊อ จอแปแหร่ โตเบ่ เมจากาคยา เหย่ซี เบ๊อะเนอ, เน เมจากาคยา เกอเร๊อดื่อ เฮ๊อ เนเหน่, เมเตเฮ๊เรอ เน เร๊อ เน เม แซ่เกอ ฮู๊เนอเนอ แพ๊.

Romans 2

จอแปแหร่ อา เต เมจากาคยา หม่า อาโตอาเบ่, อาจ๊ออาเต

1 โคแบ๊ซว๊า, เน เก่ เฮ๊ อู เน๊อ, “เหย่ซี เนอหม่า แกแย แร๊โต่,” หม่าแน๊เรอ เน หม่า แกแย แร๊โต่ แซ่เน๊อ เหย่ซีซี แพ๊. เน เฮ๊ แลเปล๊หนิ เนเหน่ หม่า อาหนิ โต่. เบ๊อะเน เฮ๊ เร๊อ เหย่ซี หม่า แกแยจา เร๊อ จอแปแหร่ โตเบ่ เมจากาคยา เหย่ซี เบ๊อะเนอ, เน เมจากาคยา เกอเร๊อดื่อ เฮ๊อ เนเหน่, เมเตเฮ๊เรอ เน เร๊อ เน เม แซ่เกอ ฮู๊เนอเนอ แพ๊. ^a 2 เป ซิเง เร๊อ จอแปแหร่ เมจากาคยา จ๊อเต แพ๊ แกแย เด๊อ อา เม เตซื๊อ ฮู๊เนอเต๊เห่ แพ๊, 3 หม่าแน๊เรอ โคแบ๊ซว๊า, แกแย เม เตซื๊อ ฮู๊เนอ เต๊เห่เนอ, เน จว๊า เป๊อเจ่ออิแช๊หนิ อู เมเต? เน แหน่แบ่เจ่ เร๊อดื่อ เร๊อ เน เม เตซื๊อ แซ่เน๊อ เหย่ซี เนอ แพ๊แพ๊. ฮู๊เนอเรอ, เน เตเน เกอเร๊อ เนเหน่ เร๊อ เน เก่ แลเปล๊ เร๊อ จอแปแหร่ อา เตเมจากาคยา ปา ฮู๊เนอ แอ? 4 จอแปแหร่ แร๊ เด๊อ เนขุ บ๋า เต, อา แด่ทูซิปล่อ เป่ เน บ๋า เต, แด่ทูซิปล่อ เป่ เน บ๋า เต เนอ, เน แด่หยื่อโต่ แอ? แซ่ฮู๊ เน เก่ ถู่แหล่เต๊เปล่กา คยา เนซิปล่อ อาเงเนอเรอ, จอแปแหร่ แอ๊จื๊อ เด๊อะโล เป่ เน อาเตโม เตแร๊ เต๊เห่ เด๊อ เนขุ เนอหม่า, เน ซิเง ตาเต โต่ แอ?

5 เมเตเฮ๊เรอ เน หม่า แกแย กู่กล๊อเพรอซิปล่อชอ แหน่เจ๊อ เตเพร, ฮู๊เนอเรอ ช๋า จอแปแหร่ ซิปล่อดุ เร๊อ อา เก่ เมจากาคยา เต จ๊อจ๊อเตเต โอ่โลแถ่เฮ๊อ ปา เบ๊อะเนอ, อา เก่ ซิปล่อ ดุเล๊อ เน ปา. เร๊อ อา เก่ เมจากาคยา จาเล๊อ เน ปา. 6 จอแปแหร่ เก่ เด๊อ อู เตเมหนิคว๊าเก่ ปว๋า เตเพร ฮู๊ อู โอ่เซอเพร เมโทเฮ๊อ เตเนอ เต๊เห่ ปา. ^b 7 แกแย เต๊เห่เห่ เนอ, อา เด๊อะโล อา เตซิหยื่อ หม่าแหน่ เน๊อ จอแปแหร่ เก่ ถู่เซ๊แถ่ หนิ เหย่ซี ปา. เร๊อ อา เก่ เด๊อะ ลู เตอเรอดุเตอเรอทู ปา, โท๊โต่ อา เก่ เด๊อะ เหย่ซี เตเซอเพร เด๊อ อา เซอแจ่ปาโต่ เออเนอ ปา อา แม๊ชือ แลแค ฮู๊เนอเรอ เหย่ซี แอ๊จื๊อแอ๊เหร่ เม แฮเง ตื๊อดื่อ แลแค เตแร๊. ฮู๊เนอเรอ จอแปแหร่ เก่ เด๊อะ ซิปล่อเซอเพร ตูจูเพร เออเนอ เร๊อ แกแย ฮู๊เนอเต๊เห่ ปา. 8 หม่าแน๊เรอ แกแย เด๊อ อา โมแล เกอเร๊อดื่อ อาเหน่ เนอเต๊เห่, เร๊อ อา วีแก เตหมะเตจ๊อ, เร๊อ อา ครวาเมเกอ เตมู๊แหม่รีแจ่ เต๊เห่เนอ, จอแปแหร่ เก่ ซิปล่อดุ เหย่ซี ปา เร๊อ อา เก่ เมจากาคยา เหย่ซี ปา. 9 ล๋อ แกแย เด๊อ อา เม เตมู๊แหม่ เต๊เห่เนอ, อา ข่าเบ่ เตแป่เตเช เร๊อ เตกู่เตแก ปา. แกแยยิวพู๊ เต๊เห่ เก่ ข่าเบ่ เหร่อเล๊อ ปา, โทปาเร๊อ แกแยยิวพู๊ หม่าโต่ เต๊เห่ เก่ ข่าเบ่เกอ เนอ เด๊อ คยา ปา. 10 หม่าแน๊เรอ จอแปแหร่ เก่ เด๊อะเป่ แกแย เด๊อ อา เม เตแร๊ ล๋อ ปลี เนอเต๊เห่ เร๊อ, เตเตอเรอดุ เตอเรอทู, เตถู่เซ๊หนิ ลู เร๊อ ซิปล่อ ตู๊จู่เตอเจ๊อ ปา. อา เก่ เด๊อะ เหร่อเล๊อ แกแยยิวพู๊ เนอเต๊เห่ ปา, โทปาเรอ อา เก่ เด๊อะโน แกแยยิวพู๊ หม่าโต่ เนอเต๊เห่ เด๊อ คยา ปา. 11 เมเตเฮ๊เรอ จอแปแหร่ เก่ เมจากาคยา แซ่ลอ แพ๊ ลู ปา. อา แม๊ดุ แม๊ปีตี๊ อู เตเพร่ว โต่. ^c

12 เตซว๊าเตแส่ เด๊อ จอแปแหร่ นอราม๊าโอ่ คูโมเสส เต๊เห่เนอ แกแยยิวพู๊ หม่าโต่ เต๊เห่ อาเต โอ่ เกออู โต่ หม่าแน๊เรอ จอแปแหร่ เก่ เมจากาคยา เหย่ซี เตซื๊อ ปา. แกแยยิวพู๊ เด๊อ อา โอ่ เร๊อ เตซว๊าเตแส่ เออเต๊เห่เนอ เบ่เบ่, อา ย๋อ หนิดา แลแค จอแปแหร่ อา เตซว๊าเตแส่ โต่ เร๊อ อา เมซื๊อ แลแค เต อาขว่าอาคยา, จอแปแหร่ เก่ เมจากาคยา เหย่ซี ปาปา. 13 จอแปแหร่ แด่จ๊อแด่เต แกแย เร๊อ อา หนิโฮน๊อ เตซว๊าเตแส่ ขว่าคยาเนอ หม่าโต่. จอแปแหร่ แด่จ๊อแด่เต แกแย เร๊อ อา ครวาเมเกอ ฮู๊ เตซว๊าเตแส่ เฮ๊แก โหง่ เนอเต๊เห่ แพ๊. 14 แกแยยิวพู๊ หม่าโต่ เต๊เห่เนอ อา พย๊าหนิเกอ จอแปแหร่ อา เตซว๊าเตแส่ โต่ หม่าแน๊เรอ โตโพ๊แต๊แข่เนอ, เหย่ซี ซิปล่อ เหล่โกล เตเน เต เต๊เห่เนอ อา แซ่เกอ ฮู๊ เตซว๊าเตแส่ เฮ๊เนอ อาโอ่ เต๊เห่. ฮู๊เนอเรอ เด๊อ เหย่ซี อาซิปล่อกู เนอ อา เด๊อะโล เร๊อ เหย่ซี ซิเง เตแร๊ เร๊อ เตมู๊แหม่. ฮู๊เนอเรอ เหย่ซี แหน่ แบ่เจ่ เร๊อดื่อ เออเนอ, อา ทวาแถ่ เป่ เฮ๊อ เหย่ซี อา เตซว๊าเตแส่ เฮ๊อ. 15 เหย่ซี อาเตเฮ๊เบ่เฮ๊โช, อา เตก๊อถ่อโอ่แน ซี เต๊เห่เนอ, อา เด๊อะโล เร๊อ จอแปแหร่ อา เตซว๊าเตแส่ เฮ๊เบ่ ลู เด๊อ อา ซิปล่อกู. เหย่ซี ซิปล่อ เด๊อ อา ซิเง เร๊อดื่อ เตแร๊ เร๊อ เตมู๊แหม่ เออเนอ, อา เฮ๊โล หนิเป่ดื่อ เหย่ซี. เหย่ซี ซิปล่อ อา เหล่เตเน เออเนอ, โตโพ๊โพ๊ อา แร๊กาคยา เกอเร๊อ คยาแซ๊ลู เร๊อ อา ซื๊อ, โตโพ๊โพ๊ เร๊อ อา โต, อา เม ฮู๊เนอ. 16 เบ๊อะจอแปแหร่ เด๊อะตา อา เตโพรเตเตอเรอ ฉว่าชอ เด๊อ เหย่ซู่ครี๊ เก่ เมจากาคยา อู ล๋อ ปลี ปา เตอเนอเนอ, อา เก่ แซ่ เกอดื่อ ฮู๊เนอ ปา. เบ๊อะเนออาเคปา, ล๋อ แกแย อา เหล่เตเน ด๊อโอ๊ด๊อบี๊ เต๊เห่เนอ, จอแปแหร่ เก่ เมจากาคยา ลอ เหย่ซี อาเตด๊อโอ๊ด๊อบี๊ เนอเต๊เห่ ปา. เออ หม่า เตซิครือมีลา เด๊อ แว โด่แน เป่ อู เออเนอเฮ๊อ.

แกแยยิวพู๊ เต๊เห่ เร๊อ เตซว๊าเตแส่

17 เน เด๊อ อา ทวา แกแยยิวพู๊ เกอ เลอ ติเล๋, เน เฮ๊ เกอ เร๊อ เนเหน่ เน๊อ แว หม่า แกแยยิวพู๊ เตเพร แวเฮ๊ โต่. เน หยื่อเอ่หนิ คูโมเสส อา เตซว๊าเตแส่ เร๊อ เน เตเนเกอเร๊อ เนเหน่ เน๊อ จอแปแหร่ โมแหน่เจ๊อ เน แวเฮ๊โต่. ซี เฮ๊เบ่ แถ่ม๊อแถ่โผ่ เกอเร๊อ ซีเหน่ เน๊อ, “จอแปแหร่ นว๊าแถ่ เป แกแยยิวพู๊ เด๊อ เป เก่ ทวาแถ่ เร๊อดื่อ อาแกแย,” แวเฮ๊โต่. 18 จอแปแหร่ ซิหยื่อ นอเม แคร๋ เน หม่าอิเตเนอ เน ซิเง เฮ๊อ. เด๊อ อู อิซว๊าเฮ๊อ เน เร๊อ เตซว๊าเตแส่ เต๊เห่ อาขว่าอาคยา, เน ซิเง นว๊าแจ่ เบ๊เฮ๊อ เตเด๊อ อา โตเล๊อ อู เต๊เห่ เฮ๊อ. 19 เน เตเน เกอเร๊อ เนเหน่ เร๊อ เน หม่า แกแย เตเพร เด๊อ อา ยูเป่ แกแยยิวพู๊ หม่าโต่ เด๊อ อาแซ่เน๊อ แกแย เป๊เส่คี๊ เต๊เห่ อาแกล๊. เน เตเน เกอเร๊อ เนเหน่ เร๊อ เน ลีแถ่ เป่ แกแย โอ่ เด๊อ เตคี๊เตลอ เออเต๊เห่ อาเง. 20 เน เตเน เกอเร๊อ เนเหน่ เร๊อ เน ยูเบ๊ เป่ แกแย ตอครอ เออเต๊เห่ อาแกล๊ เร๊อ เน อิซว๊าอี๊แส่แจ่ เป่ แกแย เด๊อ อาแซ่เน๊อ เป๊เจ่ เด๊อ อา อินู๊ ปา เออเต๊เห่, เมเตเฮ๊เรอ เตซว๊าเตแส่ ยูแกล๊ยูโกล เป่ ลอ เฮ๊อ ซี เร๊อ ซี เก่ ซิเง จอแปแหร่ อาหรี่อาแก เร๊อ เตหมะเตจ๊อ เต๊เห่ เฮ๊อ. 21 เน อิซว๊า เป่ อู ว๊า! หม่าเมเตเรอ เน อิซว๊าแล เกอ เร๊อ เนเหน่ โต่? เน แด๊โฉ่โด่แน เป่ อู เร๊อ เอ่โห่เอ่ฮี๊ แต่ อู เต แต่เหม่ นี๋, เน เฮ๊ ฮู๊เนอ หม่าแน๊เรอ หม่า เน จว๊า เอ่โห่ เจ๊อ อูเต เจ๊อ แอ? 22 จว๊าซื๊อ แต่ อูพู๊อูเม แต่เหม่ นี๋, เน เฮ๊ ฮู๊เนอ หม่าแน๊เรอ หม่า เน จว๊าซื๊อ เจ๊อ อูพู๊อูเม เจ๊อ แอ? เน ซิรอซิเร เตแหย่โยแหย่กี หม่าแน๊เรอ หม่า เน จว๊าพย๊าเผ่ เจ๊อ แกแยยิวพู๊ หม่าโต่ เต๊เห่ อา เตงูดุงูชอ เด๊อ อา เตหลู่แต โฮกู เนอเต๊เห่ เจ๊อ แอ? 23 เน พย๊า แถ่โลแถ่ม๊อ หนิแหน่เจ๊อ เนเหน่ เร๊อ จอแปแหร่ เด๊อะตา เน อา เตซว๊าเตแส่ หม่าแน๊เรอ เด๊อ เน จูเอ่ หนิดา เกอ อู เตซว๊าเตแส่ โต่ อาขว่าอาคยาเรอ, หม่า เน จว๊า เม ซิเตเร เจ๊อ เฮ๊อ จอแปแหร่ แอ? 24 “เด๊อ ซี แกแยยิวพู๊ เต๊เห่ อาขว่าอาคยาเร๊อ, แกแยยิวพู๊ หม่าโต่ เต๊เห่ เป๊อเจ่ออิแช๊ ลอ เฮ๊อ จอแปแหร่,” ลีเทส่อพ๊ากู เฮ๊ฮู๊เนอ. ^d

25 เก่ ซี หนิดา เตซว๊าเตแส่ เฮ๊เรอ, ซี ดื๊อตีลี๊พ๊า ^{▼▼เตดื๊อตีลี๊พ๊า อาโหง่แลช๊า หม่า แกแยยิวพู๊ เต๊เห่ อา เตจ๊อบู่จ๊อเบ อาเหล่โกล เมม๊าเมแด เต๊อเจ่อ. เบ๊อะแกแยยิวพู๊ เพร คู เต๊เห่. โอ่เป๊เจ่แล โอ่บาเฮ๊อ อาเนอ ลุยซว๊า เนอ, จอแปแหร่ นอดื๊อม๊าดื๊อแด อา พู๊เพรคู เต๊เห่. เออ หม่า หม่าดื่อ จอแปแหร่ อา เตอ๊อแล อา เมม๊าเมแด เร๊อ เหย่ซี เต๊อเจ่อ เฮ๊อ.} เนอหม่า อา งูดุงูชอ ลาว๊า. หม่าแน๊เรอ ซี เก่ หนิดา โต่ เฮ๊เรอ เด๊อ จอแปแหร่ อา เป๊เส่เง เนอ, ซี แซ่แพ๊ เน๊อ แกแย เด๊อ อา ดื๊อตีลี๊พ๊า โต่ เนอเต๊เห่ แพ๊แพ๊. 26 ฮู๊เนอเรอ เหย่ซี เด๊อ อา ดื๊อตีลี๊ เกออู พ๊าโต่ เต๊เห่เนอ, เก่ อา หนิดา เตซว๊าเตแส่ เฮ๊เนอหม่า จอแปแหร่ แด่แซ่ เกอ เฮ๊อ เหย่ซี ฮู๊ แกแย เด๊อ อา ดื๊อตีลี๊พ๊า เนอเต๊เห่ เฮ๊อ. 27 ฮู๊เนอเรอ แกแยยิวพู๊ หม่าโต่ เต๊เห่ เด๊อ อา ดื๊อตีลี๊ เกออู พ๊าโต่ เออเต๊เห่เนอ, เก่ อา หนิดา จอแปแหร่ อา เตซว๊าเตแส่ เฮ๊เรอ อา เก่ ยูตาแรตา ดื่อ เน เตซื๊อ ปา. เน โอ่ เร๊อ เตซว๊าเตแส่ เร๊อ เน ดื๊อตีลี๊ เจ๊อ พ๊า เบ่เบ่, เน ย๋อ หนิดา เกออู เตซว๊าเตแส่ โต่ อาขว่าอาคยา, อา เก่ยูตา เน เตซื๊อ ปา.

28 เก่ เฮ๊ ลอลอโหง่ เฮ๊เรอ, เด๊อ เป ครวา โอ่เซอเพร เกอ ฮู๊ แกแยยิวพู๊ อาเหล่โกล เนอเต๊เห่ อาขว่าอาคยาเร๊อ, เป ทวาแถ่ เบ๊แจ่ แกแยยิวพู๊ อา หม่าแหน่ เตเพร่ว โต่. โท๊โต่ แกแยยิวพู๊ อา หม่าแหน่ เตเพร เนอหม่า, อา ดื๊อตีลี๊ แพ๊ตื๊อ เหน่กล่อพ๊าหย่า เนอ หม่าโต่. 29 แกแยยิวพู๊ หม่าแหน่ เตเพร เนอหม่า, อา เบ่ ดื๊อ อาซิปล่อ เด๊อ อา หม่าเฮ๊อ แหย่โยบูโพ๊ แบ่เจ่ ถู่แหล่ เต๊เปล่แก ลูซิปล่อ เออเนอ. เตซว๊าเตแส่ เออเนอ อา ถู่แหล่ เต๊เปล่แก แจ่ ลูซิปล่อ โต่. แกแยเห่ขุพู๊ ถู่เซ๊แถ่ เกอ แกแย เด๊อ อา ดื๊อ อาซิปล่อ เนอ เต๊เห่ โต่ หม่าแน๊เรอ จอแปแหร่ ถู่เซ๊แถ่ เกอเร๊อ เหย่ซี. ^f