Romans 3

จอแปแหร่ เมฮู๊ อา เฮ๊เนอ ปว๋า โตโพ๊

1เก่ เฮ๊ ฮู๊เนอเรอ, ทวา แกแยยิวพู๊ เตเพรเนอ อาบุ๊ยเตอเรอ โอ่อิเต? แกแยยิวพู๊ อา เตดื๊อตีลี๊พ๊า เออเนอหมา อาบุ๊ยเตอเรอ โอ่เต๊อเจ่อเจ่อ แอ? 2ทวา แกแยยิวพู๊ เตเพร เนอหม่า อาบุ๊ยเตอเรอ โอ่เอ๊ หม่าแหน่ เจ๊อ. เตเด๊อ อาบุ๊ยเตอเรอ โอ่เล๊ออู เต๊อเจ่อ เนอหม่า, หม่าเฮ๊อ จอแปแหร่ หยื่อเอ่หนิ เป แกแยยิวพู๊ เต๊เห่ อาขว่าอาคยา, อา แด๊โฉ่โล เป่ เปโหง่ เด๊อ อา ซิหยื่อ แด๊โฉ่ เป่ อู เนอเต๊เห่ เฮ๊อ.

3แกแยยิวพู๊ เต๊เห่เห่ เก่ จ๊อ เกอเร๊อ ปา อาโหง่ เร๊อ จอแปแหร่ โต่ เฮ๊เรอ, จอแปแหร่ อา เตอ๊อแล เต๊เห่ เก่ ตาพูแก ลอ ปา แอ? 4อา ตาพูแก เร๊อ ตีกี๋โต่. แกแย ล๋อ ปลี ทวาลอ เจ๊อ แกแย แลโฮแลแห่ เจ๊อ เบ่เบ่, จอแปแหร่ จ๊อ ตื๊อดื่อปา แหน่ เร๊อ อาโหง่ แพ๊. ลีเทส่อพ๊ากู เฮ๊ เนอ,
“แกแย เก่ เฮ๊ เน เน๊อ เน เฮ๊เบ่ บ๊อเกเต๋ เบ่เบ่, อาโตอาเบ่ ลอ แพ๊. อู เก่ เน เตซื๊อ เด๊อ เน เม เตโตโต่ บ๊อเกเต๋ เบ่เบ่ เนอ, อู แลจู่แก เน เหล่โอ่ แพ๊.” ^a

5หม่าแน๊เรอ เป แกแยยิวพู๊ อา เตจ๊อเตเต โต่ เต๊เห่เนอ, อา เก่ เด๊อะโล ลอหล่าตี๊กลิ เจ๊อ จอแปแหร่ อา เตจ๊อเตเต เก่เฮ๊เรอ เป เตเร เฮ๊เร๊อ อา ฮู๊เต? จอแปแหร่ ซิปล่อดุ เร๊อ อา เมจากาคยา เปเออ เนอหม่า อาซื๊อ แพ๊, เป เก่ เฮ๊ ฮู๊เนอ แอ? (แว เฮ๊เบ่ ฮู๊ แกแย เหล่โกล เฮ๊เนอ แพ๊.) 6เก่ เฮ๊ฮู๊เนอหม่า อา โตโต่. จอแปแหร่ เมเตเออ เก่ อา โตโต่ เฮ๊เรอ อา เก่ เมจากาคยา โต แจ่ แกแย ฮู๊เต ปา? 7แกแย เต๊เห่เห่ เก่ เคร๊ฉื่อ เร๊อ, “แว เม เตจ๊อเตเต โต่ เต๊เห่เนอ, อา เก่ เด๊อะโลแถ่ จอแปแหร่ อา เตหมะเตจ๊อ. โท๊โต่ อา เก่ เม เอ๊แถ่โป่ จอแปแหร่ อา เตอเรอดุเตอเรอทู เก่เฮ๊เรอ, หม่าเมเตเร๊อ อา จว๊า เมจากาคยา โต่ เพรเมเตซื๊อพู๊, ฮู๊ แวเออ เมเต?” 8เหย่ซี เฮ๊เออ อา เก่ โต เฮ๊เรอ, เป โหล่เฮ๊เกอ เน๊อ, “แซ่ฮู๊ อู เก่ ถู่เซ๊แถ่ จอแปแหร่ เร๊อ อา เมเต เนอ อา โตแพ๊ อาเงเนอ, ตูรู๊ เม แลแค เตซื๊อเนอ,” โหล่เฮ๊เกอ ฮู๊เออแพ๊กอ. แกแย เด๊อ อา เฮ๊ ฮู๊เนอ เต๊เห่หม่า จอแปแหร่ เมจากาคยา ลู เนอ อา โตแพ๊. หม่าแน๊เรอ แกแย เต๊เห่เห่เนอ, อา แด๊ ลอ แวแหย่โย เร๊อ แว อิซว๊า อู ฮู๊เนอ. หม่าแน๊เรอ แว อิซว๊า อู ฮู๊เนอ หม่าโต่.

แกแย จ๊อเต เตเพร่ว โต่

9ฮู๊เนอเรอ, เป เก่ เฮ๊ ฮู๊เต? เป แกแยยิวพู๊ เต๊เห่ หม่า เป แร๊เล๊อ เร๊อ แกแยยิวพู๊ หม่าโต่ เต๊เห่ แอ? เป แร๊เล๊อ เน๊อ ตีกี๋โต่. เป เด๊อะโล โทเฮ๊อ เร๊อ แกแยยิวพู๊ เบ่เบ่, แกแยยิวพู๊ หม่าโต่ เบ่เบ่, เหย่ซี โอ่ลอปลี แพ๊ เด๊อ เตซื๊อเตปล๊า อา เตอเรอฉว่าชอ อาเล แพ๊. 10ลีเทส่อพ๊ากู เฮ๊ เน๊อ, “แกแยจ๊อแกแยเต โอ่ เตเพร่ว โต่. ^b 11แกแย เด๊อ อา โอ่ เร๊อ ลีแมลีเพ๊ เต๊เห่ เบ่เบ่, แกแย เด๊อ อา แม๊ปู จอแปแหร่ เต๊เห่ เบ่เบ่, อา โอ่ เตเพร่ว โต่. 12แกแย ปว๋า เตเพร จว๊า ตาพาแก ลอเฮ๊อ เร๊อ จอแปแหร่. เหย่ซี ทวาลอเฮ๊อ แกแย โอ่เล๊อโอ่กลอ ปว๋า เตเพร เฮ๊อ. แกแย เด๊อ อา เม เตแร๊ เนอ อา โอ่ปา เตเพร่ว โต่, เบ๊อะอากูเตเพร แพ๊ เนอ, อา โอ่ โต่. ^c 13เหย่ซี เตเฮ๊เบ่ เต๊เห่เนอ, เหล่ซิยอซิเร แซ่เจ๊อเร๊อ เน เมโม โลกู เร๊อ อา โนซอ เถ่โล เนอ เจ๊อ. เหย่ซี อิลอแหล่โฮ อู เร๊อ อา เตเฮ๊เบ่เฮ๊โช เต๊เห่. ^d อาแซ่เน๊อ หรู่ซิ อิโพ อู เร๊อ อาแร เนอ, เหย่ซี เมปย๊าเมหลู่ ลอ อู เร๊อ อา เตเฮ๊เบ่ เต๊เห่. ^e 14เหย่ซี อาเตเฮ๊เบ่เฮ๊โช เต๊เห่เนอ, อา เล๊อบา เจ๊อ เร๊อ เตอิชออี๊บ่า. เหย่ซี เฮ๊เบ่ โชชื่อ โหง่ เด๊อ เตเกล หนิโฮ เหย่ซีเนอ เต๊เห่ เจ๊อ. ^f 15เมเซอ แกแย โป๋, เก่เฮ๊เรอ เหย่ซี จว๊า โต๊โปล่ตาปยา เจ๊อ. ^g 16เหย่ซี จว๊า เบ๊อะเต๋ โต๊โผ่ เบ่เบ่, อา จว๊า เมปย๊าเมหลู่ อู, อา จว๊าเม ซิเปลซิหย่อ อู. 17โตโอ่เซอเพรโครเกล เปดวาเกอ เร๊อ อู ฮู๊เตเนอ, เหย่ซี ซิเง เกออู โต่. ^h 18โตเบ่ ซิอิเช จอแปแหร่ เนอ เหย่ซี เตเน โต่เกออู เตอเจ๋อ โต่.” ⁱ

19เป ซิเง เน๊อ ลอ เตซว๊าเตแส่ แด๊โฉ่ เต๊เห่เนอ, อา เฮ๊ เป่ แกแย เด๊อ อา พย๊าหนิ เตซว๊าเตแส่ เนอเต๊เห่ อาเงแพ๊. แซ่ฮู๊ เป เก่ เฮ๊เบ่ แลเปล๊แจ่ เกอ เร๊อ ปาแต่ เปเหน่ เร๊อ เป เม เตซื๊อ อาคยา เออ แต่เหม่ เนอเรอ, จอแปแหร่ เด๊อะตา เป่ เป เตซว๊าเตแส่ เออเนอ แพ๊. โท๊โต่ แซ่ฮู๊ จอแปแหร่ เก่ เมจากาคยา ล๋อ แกแย โอ่ เด๊อ เห่ขุ เออต๊าบ่า ปว๋า เตเพร ปา เนอเรอ, อา เด๊อะตา แพ๊. 20เมเตเฮ๊เรอ, เด๊อ อู โอ่เซอเพร ครวาเมเกอ เตซว๊าเตแส่ อาขว่าอาคยาเร๊อ, อู ทวาแถ่แจ่ แกแยจ๊อแกแยเต เด๊อ จอแปแหร่ อา เป๊เส่เง เนอ อา โอ่ เตเพร่ว โต่. แซ่ฮู๊ เป เก่ ซิเงแฮ เกอเร๊อ เป เตซื๊อ เร๊อ จอแปแหร่ เด๊อะตา เป แพ๊. ^j

จอแปแหร่ เมจ๊อเมเต แกแย เต๊เห่ เร๊อ เหย่ซี อาเตหยื่อเตแหน่ อาคยา

21หม่าแน๊เรอ กู๊แหน่เออ, แซ่ฮู๊ แกแย เก่ ทวาแถ่ แกแยจ๊อแกแยเต เด๊อ จอแปแหร่ อา เป๊เส่เง เนอ, อา เม โค๊ดื่อ แกล๊ เด๊อ อาโร โตโบ เร๊อ อาเหน่. จอแปแหร่ อาแกล๊เออ เนอหม่า, เด๊อ เป หนิดา จูเอ่ เตซว๊าเตแส่ อาขว่าอาคยา เนอ หม่าโต่. คูโมเสส เร๊อ เพรโพร เต๊เห่ ราหนื่ออื่อ โทเฮ๊อ เด๊อ ลีเทส่อพ๊ากู มู๋หนู่เค ปา เจ๊อ. 22แกแย เด๊อ อา หยื่อเอ่ เร๊อ เหย่ซู่ครี๊ เมโท เป่เฮ๊อ ลูเง เต๊เห่เนอ, จอแปแหร่ แด่ เฮ๊อ ลู ฮู๊ แกแยจ๊อแกแยเต เนอเฮ๊อ. เออ หม่า แกล๊ เด๊อ จอแปแหร่ เม เป่ ล๋อ แกแย เด๊อ อา หยื่อเอ่ เหย่ซู่ครี๊ เนอเต๊เห่ อาเง เฮ๊อ. เด๊อ จอแปแหร่ อา เป๊เส่เงเนอ อาโค๊อาคยา เร๊อ ลู เตเพร่ว โต่. ^k 23เมเตเฮ๊เรอ แกแย ปว๋า เตเพร เม เตซื๊อเตปล๊า. อา ลือ แถ่โต่ ทว๊าเบ๊ จอแปแหร่ แด่ม๊า อา เตอเรอดุเตอเรอทู เออเนอ เตเพร่ว โต่. 24จอแปแหร่ ย๋อ ซิยอเกอเร๊อ เป อาขว่าอาคยา, อา แด่จ๊อแด่เต คราแพ๊ เป แพ๊. เด๊อ เหย่ซู่ครี๊ อี๊ถ่ากา เฮ๊อ เป อาขว่าอาคยา, เปจ๊อเปเต แพ๊. 25เมเตเฮ๊เรอ จอแปแหร่ เด๊อะโล ลีโพ๊ เจ๊อ เร๊อ ครี๊ แฮแล พย๊าแก เป่เฮ๊อ เป เตซื๊อเตปล๊า เด๊อ จอแปแหร่ เตเร เมจากาคยา เปเออ ปา เนอ เฮ๊อ. เด๊อ เป หยื่อเอ่ เหย่ซู่ครี๊ ข่าเซอ อาซิปล่อ เด๊อ อี๊ถื่อดีเต่ลู เร๊อ อาสุ่ย ทุ๊ยตา เด๊อ เปเง อาขว่าอาคยา, จอแปแหร่ แด่จ๊อแด่เต เฮ๊อ เป. แซ่ฮู๊ จอแปแหร่ เก่ เด๊อะ แถ่โล เร๊อ อา เมจ๊อเมเต เต อาเงเนอ, อา นอแฮ เหย่ซู่ครี๊ เฮ๊อ. เด๊อ เหร่อเคเนอ หม่า, อา แด่ทูซิปล่อ เป่ แกแยเห่ขุพู๊ เต๊เห่ อา เตซื๊อ. อา แม๊ ตาลว๊าแก เหย่ซี เม เตซื๊อ เนอเต๊เห่ เร๊อ อา เมจากาคยา เหย่ซี โต่. 26หม่าแน๊เรอ กู๊แหน่เออ อา เก่ เด๊อะโล เร๊อ อา เม เตเออ อาโต แพ๊ อาเงเนอ, อา นอแฮ เหย่ซู่ เร๊อ อา เก่ แฮ ข่าเซอ เด๊อ อู ปว๋า เตเพร อาเง. ฮู๊เนอ อาขว่าอาคยา, จอแปแหร่ อาเหน่ แบ่เจ่ เร๊อดื่อ อา เด๊อะโล เร๊อ อา เมจ๊อเมเต แพ๊. เร๊อ อา แด่จ๊อแด่เต แกแย เด๊อ อา หยื่อเอ่ เหย่ซู่ เนอเต๊เห่ เร๊อ อาเหน่ เร๊อดื่อ.

27เก่เฮ๊ฮู๊เนอเรอ, เป เหล่พย๊าแถ่โล เกอเร๊อ เปเหน่ เนอ อาโอ่ เตอเจ๋อ โต่. เมเตเฮ๊เรอ จอแปแหร่ แด่จ๊อแด่เต แกแย เด๊อ อา หนิดา จูเอ่ เตซว๊าเตแส่ ขว่าคยา เนอ หม่าโต่. หม่าแน๊เรอ, แกแย ย๋อ หยื่อเอ่หนิ ครี๊ เซอ เป่ เด๊อ เหย่ซีเง อาขว่าอาคยา, จอแปแหร่ แด่จ๊อแด่เต เหย่ซี แพ๊. 28เมเตเฮ๊เรอ แกแย ลือครวาเม เกอ เตซว๊าเตแส่ อาคยา เร๊อ จอแปแหร่ แด่จ๊อแด่เต เหย่ซี ฮู๊เนอ หม่าโต่. เด๊อ เหย่ซี หยื่อเอ่แหน่เอ่เต ขว่าคยาเนอ, อา แด่จ๊อแด่เต ลู แพ๊. 29จอแปแหร่ เออเนอหมา แกแยยิวพู๊ อา จอแปแหร่ ตื๊อดื่อแพ๊ แอ? หม่า แกแยยิวพู๊ หม่าโต่ เต๊เห่ อา จอแปแหร่ หม่า เต่อเกอดื่อ โต่ แอ? จอแปแหร่ เออเนอหมา แกแยยิวพู๊ หม่าโต่ เต๊เห่ อาเง๋ หม่า อาหม่าหม่า. 30เมเตเฮ๊เรอ จอแปแหร่ โอ่แพ๊ เตเพรเพร่ว แพ๊. เบ๊อะแกแยยิวพู๊ หยื่อเอ่เฮ๊อ ครี๊ เบ๊อะเนอ, อา เก่ แด่จ๊อแด่เต ลู ปา. โท๊โต่, เบ๊อะแกแยยิวพู๊ หม่าโต่ เต๊เห่ หยื่อเอ่เกอ ครี๊ อาเคปาเนอหม๋า, อา แด่จ๊อแด่เต เกอ เหย่ซี ปาปา. ^l 31จอแปแหร่ เก่ แด่จ๊อแด่เต เป เร๊อ เป เตหยื่อเตแหน่ ขว่าคยา แพ๊, เก่เฮ๊เรอ เตซว๊าเตแส่ เออเต๊เห่ เนอหม่า, อา ตาพูแก ลอเฮ๊อ กอ? อา ตาพูแก โต่. ซี เฮ๊ แต่ เน๊อ อา ตาพูแก แต่เหม่, อา ลื๋อ เม ฉว่าแถ่ชอแถ่ เล๊อ ปา เตเปล่เจ๊อ, เมเตเฮ๊เรอ เก่ เป หยื่อเอ่ เหย่ซู่ เฮ๊เนอ, เป เหล่ หนิดา แร๊แฮ เล๊อ โป่โป่ เตซว๊าเตแส่ เจ๊อ.