Romans 4
จอแปแหร่ แด่จ๊อแด่เต เพอับราฮัม ฮู๊เต
1เก่เฮ๊ฮู๊เนอเรอ, เป แกแยยิวพู๊ เต๊เห่ อาเพ เพอับราฮัม เออเนอเล, เป เก่ เฮ๊ เกอเร๊อ ลู ฮู๊เต? จอแปแหร่ แด่จ๊อแด่เต แกแย เร๊อ อา เตหยื่อเตแหน่ แพ๊ ฮู๊เนอเรอ เพอับราฮัม จว๊าแม๊เถอะ ซิเง น๊อ เกออู เตจ๊อเตเต ฮู๊เต? 2จอแปแหร่ เก่ แด่จ๊อแด่เต เพอับราฮัม เร๊อ อา เมแร๊ เต ขว่าคยา เก่เฮ๊เรอ อา เก่ พย๊าแถ่โล เกอเร๊อ อาเหน่ เน๊อ อา เม เตแร๊ เออเต๊เห่ ขว่าคยา เฮ๊เนอหม่า อาหนิ แพ๊. หม่าแน๊เรอ เด๊อ จอแปแหร่ อา เป๊เส่เง เนอ, อา พย๊าแถ่โล เร๊อ เตเออเต๊เห่ อาขว่าอาคยา เนอ อาหนิ โต่. 3ลีเทส่อพ๊ากู เฮ๊ เน๊อ, “เพอับราฮัม หยื่อเอ่ จอแปแหร่ เร๊อ เด๊อ อาเตหยื่อ อาขว่าอาคยา, จอแปแหร่ แด่จ๊อแด่เต ลู แพ๊.” a 4แกแย เตเพรเพร เก่ จว๊าแร เป่ อูเต เร๊อ อู เก่ เด๊อะ ลู อาคว๊าอาเก่ เฮ๊เนอ, อา พย๊าหนิ อาคว๊าอาเก่ เออเนอหมา อา พย๊าหนิครา ฮู๊ เชหยู่เนอ หม่า แตแค๋โต่. อา แรเต เร๊อ อา พย๊าหนิ อาคว๊าอาเก่ แพ๊. 5หม่าแน๊เรอ แกแย เด๊อ อา หยื่อเอ่ เกอเร๊อ เกอ อา เตเมแร๊ เออเต๊เห่ โต่, เร๊อ อา เก่ หยื่อเอ่หนิ แพ๊ จอแปแหร่ เด๊อ อา เมจ๊อเมเต กา แกแยจา แกแยมู๊แหม่ เออ เตเพร แพ๊ เก่เฮ๊เรอ, จอแปแหร่ แม๊เถอะ ลู เตหยื่อเออ เร๊อ อา เก่ แด่จ๊อแด่เต ลู เน๊อ อาเหน่ เร๊อดื่อ ปา. 6คุ๊ยดาวิด เฮ๊ แซ่เกอ ดื่อ ฮู๊เนอ เด๊อ เนอเค เน๊อ, แกแย เด๊อ อา พย๊าหนิ เตเด๊อะบุ๊ยเด๊อะเตอเรอ เต๊เห่ เนอหม่า, หม่าดื่อ แกแย เด๊อ จอแปแหร่ แด่จ๊อแด่เต เหย่ซี เน๊อ อา เตเมแร๊เต เนอเต๊เห่ อาคยา หม่าโต่. 7คุ๊ยดาวิด เฮ๊ เน๊อ,“แกแย เด๊อ จอแปแหร่ ปลวาแก เฮ๊อ ลูเตซื๊อ เร๊อ เมบี๊แก ลอเฮ๊อ ลูเตซื๊อ เต๊เห่เนอ, อา พย๊าหนิเฮ๊อ เตเด๊อะบุ๊ยเด๊อะเตอเรอ เฮ๊อ. b
8แกแย เด๊อ แบ่เจ่ ราม๊าราแด ปา ลูเตซื๊อ โต่ เต๊เห่เนอ, อา พย๊าหนิเฮ๊อ เตเด๊อะบุ๊ยเด๊อะเตอเรอ เฮ๊อ.” c 9เตเด๊อะบุ๊ยเด๊อะเตอเรอ เออเนอหมา พย๊าหนิแจ่ แพ๊ตื๊อ แกแยยิวพู๊ เด๊อ อา ดื๊อตีลี๊พ๊า เนอเต๊เห่ แพ๊ แอ? อา พย๊าหนิ ตื๊อ แกแยยิวพู๊ เนอเต๊เห่ หม่าโต่. แกแยยิวพู๊ หม่าโต่ เด๊อ อา ดื๊อตีลี๊ เกอ อู พ๊า โต่ เนอเต๊เห่ หม่า, อา โอ่ป่าเต่อ เกอเกอ. เป เฮ๊โทดื่อเฮ๊อ เนอ, เด๊อ เพอับราฮัม อาเตหยื่อ อาขว่าอาคยา, จอแปแหร่ แด่จ๊อแด่เต ลู. d 10เก่ เมฮู๊เนอ เฮ๊เรอ เบ๊อะจอแปแหร่ แด่จ๊อแด่เต เพอับราฮัม เบ๊อะเนอหม่า อาโต เบ๊อะเกเต? หม่า อาเหร่อ เน๊อ อา ดื๊อตีลี๊พ๊า เนอ แอ? หม่าโต่เรอ อาเนอเล๊อ เร๊อ เนอ แอ? อาเนอเล๊อ เร๊อ เนอ หม่าโต่, อาเหร่อเล๊อ เน๊อ เนอเจ๊อ. 11อา ดื๊อตีลี๊พ๊า เนอหม่า อาเนอ เด๊อ คยา แพ๊. เบ๊อะอา ดื๊อตีลี๊ แต่ลา พ๊า โต่ เบ๊อะเนอ, เด๊อ อาเตหยื่อ อาขว่าอาคยา, จอแปแหร่ แด่เฮ๊อ อา ฮู๊ แกแยจ๊อแกแยเต เตเพรเฮ๊อ. ฮู๊เนอเรอ อา เมม๊าเมแดแก ลู เร๊อ เตดื๊อตีลี๊พ๊า ฮู๊เนอ เต๊อเจ่อ แพ๊. ฮู๊เนอเรอ แกแย เด๊อ อา ดื๊อตีลี๊ เกอ เจ๊ออู พ๊า โต่ หม่าแน๊เรอ, อา หยื่อเอ่ จอแปแหร่ เต๊เห่เนอ, เพอับราฮัม ทวา เป่ ลอ แกแย ฮู๊เนอ เต๊เห่ อาเพ เฮ๊อ. ฮู๊เนอ อาขว่าอาคยา, จอแปแหร่ แด่จ๊อแด่เต เกอเฮ๊อ เหย่ซี เฮ๊อ. e 12โท๊โต่, เป แกแยยิวพู๊ เออเต๊เห่เนอ, เป ดื๊อตีลี๊ เจ๊อ พ๊า หม่าแน๊เรอ เป เก่ ซิเลแถ่หนิ เตดื๊อตีลี๊พ๊า เออ โต่ เต๊เห่เนอ, เพอับราฮัม หม่า อา ทวา เกอดื่อ เปเพเพ. เบ๊อะเปเพ เพอับราฮัม ดื๊อตีลี๊ แต่ล๋าย พ๊า โต่ เค. อา เตหยื่อเตแหน่ เออเนอ, เป เก่ ครวา แม๊บือ เกอดื่อ อา.
เด๊อ เตหยื่อ อาขว่าอาคยา พย๊าหนิ จอแปแหร่ อา เตอ๊อแล
13จอแปแหร่ อ๊อแล เพอับราฮัม เร๊อ อากลุยอาแล เต๊เห่ เด๋อ เนอเค เน๊อ, เห่ขุ เออต๊าบ่าลอ, อา เก่ ทวาแถ่ เหย่ซีเต ปา. หม่าแน๊เรอ เด๊อ เหย่ซี จูเอ่ ลือครวา เมเกอ เตซว๊าเตแส่ อาคยา เร๊อ, อา เก่ ทวาแถ่ เหย่ซีเต ปา, อา อ๊อแล ลู ฮู๊เนอ หม่าโต่. จอแปแหร่ แด่จ๊อแด่เต เหย่ซี เร๊อ อา เตหยื่อเตแหน่ อาขว่าอาคยา, อา อ๊อแล เร๊อ อา เก่ เด๊อ เหย่ซี ปา แพ๊. f 14จอแปแหร่ เก่ อ๊อแล เร๊อ แกแย เด๊อ อา ลือครวาเม เกอ เตซว๊าเตแส่ เออเต๊เห่เนอ, อา เก่ พย๊าหนิ จอแปแหร่ อา เตอ๊อแล ปา เก่เฮ๊เรอ เตหยื่อเตแหน่ เออเนอ อาบุ๊ยเตอเรอ โอ่ ปา โต่ เฮ๊อ. เตอ๊อแล เออเนอ อาโหง่แลช๊า โอ่ปา เตอเจ๋อโต่ เฮ๊อ. g 15เมเตเฮ๊เรอ เตซว๊าเตแส่ หม่า อา เมซิปล่อดุ แถ่ จอแปแหร่. แกแย ลือเบ๊ เตซว๊าเตแส่ ปว๋า โตโพ๊ โต่ อาขว่าอาคยา, อา เมซิปล่อดุ แถ่ จอแปแหร่ เร๊อ อา เก่ เมจากาคยา เหย่ซี ปา. เตซว๊าเตแส่ เก่ โอ่โต่ เฮ๊เนอ, แกแย เตเพร่ว หม่า อา เมซื๊อ เตซว๊าเตแส่ โต่. 16ฮู๊เนอเรอ, เป พย๊าหนิแจ่ จอแปแหร่ อา เตอ๊อแล เน๊อ เป เตหยื่อ เตอเจ๋อ แพ๊. เมเตเฮ๊เรอ แซ่ฮู๊ เป เก่ พย๊าหนิ เกอ เตเออเนอ เร๊อ อาบุ๊ยอาเตอเรอ อาขว่าอาคยา ตื๊อแพ๊ อาเงเนอ, เป เบ่ โอ่ เร๊อ เตหยื่อ. โท๊โต่, ล๋อ เพอับราฮัม อากลุยอาแล เต๊เห่เนอ, อา เก่ พย๊าหนิ ลอ เตอ๊อแล เออ ปา. แกแย เด๊อ อา ลือครวาเมเกอ แกแยยิวพู๊ อาเตซว๊าเตแส่ เนอเต๊เห่ เก่ พย๊าหนิ ตื๊อดื่อ หม่าโต่, แกแย เด๊อ อา หยื่อเอ่ แซ่เกอ เร๊อ เพอับราฮัม เนอเต๊เห่ เก่ พย๊าหนิ ลอเกอ ปา ปา. เพอับราฮัม หม่า เป ล๋อ ปลี อาเพ. h 17ลีเทส่อพ๊ากู เฮ๊หนื่ออื่อ เน๊อ, “แว นอทวาแถ่ เฮ๊อ เน เร๊อ เมวเจอะ ตูปลูเต๊เผ่ อาเพ เฮ๊อ.” i อา ทวา เป่ เปเพ เด๊อ จอแปแหร่ อาเป๊เส่เง. จอแปแหร่ เออเตเพร เนอหม่า, อา หม่าเฮ๊อ เปเพ เพอับราฮัม หยื่อเอ่เกอเร๊อ เนอเตเพร เฮ๊อ. อา หม่า จอแปแหร่ เด๊อ อา เมเซอเพร กาคยา แกแยเซอ, โท๊โต่ อา เฮ๊ตา แพ๊ อาโหง่ ตือมือ แพ๊ เร๊อ เต เด๊อ อา โอ่ ล๋ายโต่ เต๊เห่เนอ อา ทวาแถ่ ลอปลี เจ๊อ. 18จอแปแหร่ เฮ๊ เพอับราฮัม เน๊อ, “เน เก่ ทวา เมวเจอะ ตูปลูเต๊เผ่ อาเพ ปา. เนกลุยเนแล เก่ โอ่โหร่โอ่เอ๊ แซ่เจ๊อเร๊อ เฉ่ เด๊อ ม๊อเล เนอเต๊เห่ ปา.” จอแปแหร่ เฮ๊ เตเออเนอ อาเหล่ ทวาแถ่ เป่ เด๊อ เพอับราฮัม เก่ พู๊ โอ่โหร่โอ่เอ๊แถ่ อาเงเนอ อายู ปาโต่ หม่าแน๊เรอ อา หยื่อเอ่ โอ่ป่อ แม๊ชือหนิ เด๊อ อา เก่ ทวาแถ่ ปา. j 19เพอับราฮัม ซิเงเร๊อ อาเหน่ เน๊อ อาหน่า โอ่เฮ๊อ เตเย เฮ๊อ, อา โหมะเผระ เตเร เซอเฮ๊อ. โท๊โต่ อาเม โหมะซาราห์ เบ่เบ่, อา โชพู๊ หม่าแน๊เรอ เพอับราฮัม อาเตหยื่อ ปีตี๊ กาแล โต่ โต่. k 20เพอับราฮัม หยื่อเอ่ จอแปแหร่ อา เตอ๊อแล เออเนอ, อาซิปล่อ ลูโทลูแล ตีกี๋โต่. อา เตหยื่อเตแหน่ เนอ, แต๊แกละ เน๊อ อา ฉว่าแถ่ชอแถ่ เร๊อ อา ถู่เซ๊ เฮ๊บุ๊ยเฮ๊เตอเรอแถ่ จอแปแหร่. 21จอแปแหร่ เก่ เม ฮู๋ อา อ๊อแลเนอ ปาเนอ, อา หยื่อเอ่ลอ เจ๊อ ซิปล่อซีเมเจ๊อ. 22เพอับราฮัม อา เตหยื่อเตแหน่ ย๊อ โอ่ฮู๊เนอ อาขว่าอาคยา, “จอแปแหร่ แด่ อา ฮู๊ แกแยจ๊อแกแยเต เตเพร.” l 23เร๊อ เตเฮ๊เบ่ เด๊อ อา เฮ๊ เน๊อ, “จอแปแหร่ แด่ เพอับราฮัม ฮู๊ แกแยจ๊อแกแยเต เตเพร,” เออตือมือ เนอหม่า, อู รา เป่ตื๊อ เพอับราฮัม เตเพร อาเงเนอ หม่าโต่. 24เตเฮ๊เบ่ เออตือมือ เนอหม่า, เปเง๋ หม่า อา โอ่โนเต่อ หม่าแหน่ เกอ เจ๊อ. เก่ เป หยื่อเอ่ เร๊อ จอแปแหร่ เด๊อ อา เมเซอเพร กาคยา เป แบ่เจ่ เหย่ซู่ เด๊อ เตเซอ เออเตเพร เฮ๊เนอหม่า, อา เก่ แด่เกอ เป ฮู๊ แกแยจ๊อแกแยเต เต๊เห่ ปา. 25 m เด๊อ เป เตซื๊อเตปล๊า อาขว่าอาคยาเร๊อ, จอแปแหร่ นอมือเซอ อู เร๊อ อา พู๊เพร. แซ่ฮู๊ อา เก่ แด่จ๊อแด่เต เป อาเงเนอ, อา เมเซอเพร กาคยา เฮ๊อ ลู เด๊อ เตเซอ เฮ๊อ.
Copyright information for
EkySCThai