Rom 5 | EkySCThai | STEP | ฮู๊เนอเรอ จอแปแหร่ แด่จ๊อแด่เต เฮ๊อ เป เร๊อ เป เตหยื่อเตแหน่ อาคยา เฮ๊อ. เป โอ่โอ่เพรโอ่ดือ โอ่โครโอ่เกล เต่อ คยาแซ๊ เฮ๊อ เร๊อ จอแปแหร่ เฮ๊อ. เพร เม ทวาแถ่ เป่ เป ฮู๊เออเนอหม่า หม่าเฮ๊อ เป แบ่เจ่ เหย่ซู่ครี๊ เฮ๊อ.

Romans 5

เตเปเตดวา เร๊อ เตซิครือซิลอ

1 ฮู๊เนอเรอ จอแปแหร่ แด่จ๊อแด่เต เฮ๊อ เป เร๊อ เป เตหยื่อเตแหน่ อาคยา เฮ๊อ. เป โอ่โอ่เพรโอ่ดือ โอ่โครโอ่เกล เต่อ คยาแซ๊ เฮ๊อ เร๊อ จอแปแหร่ เฮ๊อ. เพร เม ทวาแถ่ เป่ เป ฮู๊เออเนอหม่า หม่าเฮ๊อ เป แบ่เจ่ เหย่ซู่ครี๊ เฮ๊อ. 2 เด๊อ เป หยื่อเอ่ แบ่เจ่ เหย่ซู่ครี๊ อาขว่าอาคยาเร๊อ, อา นอ โอ่เซอเพร เฮ๊อ เป เด๊อ จอแปแหร่ อาบุ๊ยอาเตอเรอ อากู เฮ๊อ. กู๊แหน่เออ เป โอ่เซอเพร เกอเฮ๊อ เด๊อ อาบุ๊ยอาเตอเรอ อากู เฮ๊อ. เร๊อ เป ซิครือ แม๊ชือแม๊ตู่ เกอ เฮ๊อ จอแปแหร่ อา เตอเรอดุเตอเรอทู เออเนอ เฮ๊อ. 3 เป แม๊ชือ ตื๊อแพ๊ เออเนอ หม่าโต่, เบ๊อะเป แม๊เถอะ เร๊อ เตจาเตจือ, เตแป่เตเช เบ๊อะเนอ เบ่เบ่, เป ซิครือซิลอ แพ๊, เมเตเฮ๊เรอ เป ซิเง เร๊อ เต เออเต๊เห่เนอ อา เด๊อะ เอ๊แถ่ เป่ โป่ เป เตข่าเบ่ เตจาเตจือ แพ๊. 4 เตข่าเบ่ เตจาเตจือ เนอ อา เด๊อะ โอ่เอ๊แถ่ เตเมโต จอแปแหร่ อาซิปล่อ, เตเมโต จอแปแหร่ อาซิปล่อ เนอ, อา เด๊อะ โอ่ทวาแถ่ เอ๊โป่ เตแม๊ชือ. 5 เบ๊อะเป แม๊ชือ เร๊อ จอแปแหร่ เก่ เม เป่ เป เบ๊อะเนอ, เป ซิปล่อปย๊า โต่, เมเตเฮ๊เรอ, เบ๊อะจอแปแหร่ เด๊อะตา เป แหย่โยบูโพ๊ แบ่เจ่ เบ๊อะเนอ, อา กลอ แล แล๊แล เป่เฮ๊อ เป อาเตโม เด๊อ เป ซิปล่อกู เฮ๊อ.

6 เมเตเฮ๊เรอ, เบ๊อะเป เมจว่า แลเบ๊ แจ่ เกอเร๊อ ปา เปเหน่ โต่ เบ๊อะเนอ, เหย่ซู่ครี๊ แฮข่าเซอ ม๊อเนอม๊อเซ โตเป่ แกแยจา แกแยจือ เต๊เห่ อาเง. 7 แกแย เตเพร เก่ ข่าเซอ เป่ แกแยจ๊อแกแยเต อาเง เตเพร เฮ๊เนอหม่า, อาแก แหน่เจ๊อ. หม่าแน๊เรอ แกแยแร๊ หม่าแหน่ เตเพร อาเง เฮ๊เนอ, ตาแร๋ หม่า เพร ข่าเซอบื่อ เด๊อ อาเง เนอหม่า อา โอ่ แพ๊ เก่. 8 หม่าแน๊เรอ จอแปแหร่ โม เจ๊อ เป บ๋า เต เฮ๊เรอ, เบ๊อะเป ทวาปา เจ๊อ เพรเมเตซื๊อ เตโอ่หร่าพู๊ เบ๊อะเนอ ปา เจ๊อ เนอเรอ, ครี๊ แฮข่าเซอ อาซิปล่อ เด๊อ เปเง. เออ หม่า จอแปแหร่ เด๊อะโลเป่เฮ๊อ เป เน๊อ อาเตโม เป เฮ๊อ.

9 เป ทวาเฮ๊อ แกแยจ๊อแกแยเต เด๊อ จอแปแหร่ อา เป๊เส่เง เร๊อ ครี๊ อาสุ่ย ขว่าคยา เฮ๊อ. ฮู๊เนอเรอ ครี๊ เก่ เมแลเปล๊กา หม่าแหน่ เจ๊อ เป เร๊อ จอแปแหร่ อา เตเมจากาคยา เออเนอ ปา. 10 เด๊อ อาเหร่อเค เนอหม่า, เป ทวา แกแย เด๊อ อา ซิเถ่ จอแปแหร่ เต๊เห่. เด๊อ อาพู๊คู ข่าเซอ อาซิปล่อ เด๊อ เปเง อาขว่าอาคยา, อา เม โครเกล กาคยา คยาแซ๊ เฮ๊อ เป เฮ๊อ. กู๊แหน่เออ เป ทวาเฮ๊อ อาโค แบ๊ซว๊า เฮ๊อ. เป ซิเง ตาเต เจ๊อเฮ๊อ. เร๊อ เป เหล่แลเปล๊เบ๊ แพ๊ เร๊อ อาพู๊คู อา เตโอ่เซอเพร อาคยา แพ๊. 11 เป เหล่ซิครือซิลอ เนอ อาโอ่ ตื๊อ เออเนอ หม่าโต่. เด๊อ แบ่เจ่ เหย่ซู่ครี๊ อาขว่าอาคยาเร๊อ, เป ซิครือซิลอ แบ๊ซว๊าหนิ เฮ๊อ เร๊อ จอแปแหร่ เฮ๊อ. เพร เด๊อ อา เม แบ๊ซว๊า กาคยา เป่ คยาแซ๊ เป เร๊อ จอแปแหร่ หม่า เหย่ซู่ครี๊ เออเนอ เฮ๊อ.

เตเซอ เร๊อ เพอาดัม, เตเซอเพร เร๊อ ครี๊

12 เมฮู๊เนอเรอ, เด๊อ แกแย เตเพร หนิดา จอแปแหร่ อาโหง่ โต่ อาขว่าอาคยาเร๊อ, แกแย ปว๋า เตเพร เมลอ เฮ๊อ เตซื๊อ เฮ๊อ. เตซื๊อเตปล๊า เออ อา เด๊อะทวาแถ่ เฮ๊อ เตเซอ เฮ๊อ. ฮู๊เนอเรอ เด๊อ เตซื๊อเตปล๊า เออ อาขว่าอาคยาเรอ, แกแย ปว๋า เตเพร แม๊เถอะ ป่อชิเต่อเบ่ ลอ เร๊อ เตเซอ เฮ๊อ. ^a 13 แกแย เมเหร่อเล๊อ เตซื๊อ เร๊อ จอแปแหร่ เด๊อะแล เตซว๊าเตแส่ เออเนอ. หม่าแน๊เรอ เก่ เตซว๊าเตแส่ โอ่โต่ เฮ๊เนอ, จอแปแหร่ เมจากาคยา เร๊อ แกแย เตซื๊อโต่. 14 เป๊อแถ่ เบ๊อะเพอาดัม หนิดา จอแปแหร่ อาโหง่ โต่ อาทือเคเนอ, เร๊อ อา โต่แฮ เด๊อ คูโมเสส อาทือเค เนอ, แกแย ล๋อ ปลี เบ่เซอลอ. แกแย เนอเต๊เห่ หม่า, อา เมซื๊อเกอ ฮู๊ เพอาดัม เมซื๊อ เนอ หม่าโต่ หม่าแน๊เรอ เหย่ซี เบ่เซอ เกอลอ แพ๊. เพอาดัม หม่า อาแซ่เน๊อ ครี๊ เด๊อ อา เตเร แฮปา เนอเตเพร เฮ๊อ.

15 หม่าแน๊เรอ จอแปแหร่ อา เตเด๊อะตา ครา เชหยู่ เออเนอ เร๊อ เพอาดัม เมเตซื๊อ เออเนอเจ่อ เนอหม่า อา แซ่ลู โต่. เมเตเฮ๊เรอ, เด๊อ แกแย เตเพร หนิดา จอแปแหร่ อาโหง่ โต่ อาขว่าอาคยาเร๊อ, แกแย เบ่ เซอ เอ๊แหน่เจ๊อ. หม่าแน๊เรอ จอแปแหร่ อาบุ๊ยอาเตอเรอ เนอ อาดุเล๊อ ปา เจ๊อ เร๊อ เนอ เจ๊อ. โท๊โต่ เชหยู่ หนิครา เด๊อ อา แฮ เด๊อ แกแย อาโร เตเพร อา โอ่ หม่า หม่าเฮ๊อ เหย่ซู่ครี๊ เออเนอเฮ๊อ. เด๊อ อาบุ๊ยอาเตอเรอ ขว่าคยาเนอ, อา เด๊อะ ตาป่อตาเป เอ๊ เป่ แหน่เจ๊อ อู ตูปลูเต๊เผ่เจ๊อ. 16 แว เก่ เฮ๊โป่ คยาแซ๊ เนอ, จอแปแหร่ อา เตเด๊อะครา เชหยู่ เออเนอ, เร๊อ แกแย เตเพร เมเตซื๊อ เนอหม่า อา แซ่ลู โต่. เบ๊อะอา เมเฮ๊อ เตซื๊อ เบ๊อะเนอ, จอแปแหร่ เมจากาคยา เฮ๊อ ลู ฮู๊ แกแย เด๊อ อา เมซื๊อเมปล๊า เต เตเพรเนอ เฮ๊อ. หม่าแน๊เรอ เบ๊อะแกแย เมเอ๊ เฮ๊อ เตซื๊อ เบ๊อะเนอ, จอแปแหร่ เด๊อะครา เป่ เหย่ซี เร๊อ อาบุ๊ยอาเตอเรอ อาเชหยู่เออ อาขว่าอาคยา, อา แด่จ๊อแด่เต เฮ๊อ เหย่ซี เฮ๊อ. 17 เด๊อ เพรคู เพอาดัม เม เตซื๊อเตปล๊า อาขว่าอาคยา, แกแย ล๋อ ปลี เบ่เซอ เนอหม่า อาโต แพ๊. หม่าแน๊เรอ แกแย เด๊อ อา ซิปล่อโอ่ พย๊าฉื่อ จอแปแหร่ เด๊อะ ลู เร๊อ อาบุ๊ยดุ เตอเรอทู เออเนอ, เร๊อ อา เด๊อะครา ลู เตจ๊อเตเต อาเชหยู่ เออเต๊เห่เนอ, อา เก่ โอ่เซอเพร ตูจูเพร เกอ เร๊อ เหย่ซู่ครี๊ ปา. โท๊โต่ อา เก่ เป๊อ เต่อเกอ เต เร๊อ เหย่ซู่ครี๊ ปา. เมเตเฮ๊เรอ แกแย เตเพร เด๊อ อา หม่า ครี๊ เออเนอ, อา เม เป่ โทเฮ๊อ เต เด๊อ เปเง เฮ๊อ.

18 ฮู๊เนอเรอ แกแย เตเพร หม่าเฮ๊อ เพอาดัม เออ เมซื๊อเต เต๊อเจ่อ อาขว่าอาคยา, จอแปแหร่ เมจากาคยา เฮ๊อ แกแย ปว๋า เตเพร เฮ๊อ. ฮู๊เนอเฮ๊อ, แกแย เตเพร เด๊อ อา หม่าเฮ๊อ เหย่ซู่ครี๊ เออ อา เมเฮ๊อ เตจ๊อเตเต เต๊อเจ่อ อาขว่าอาคยา, จอแปแหร่ แด่จ๊อแด่เต ลอเฮ๊อ แกแย ปว๋า เตเพร เฮ๊อ. เร๊อ เหย่ซี เก่ พย๊าหนิ แลแค ซิปล่อเซอเพร ตูจูเพร ปา. 19 เมเตเฮ๊เรอ เด๊อ แกแย เตเพร หนิดา จอแปแหร่ อาโหง่ โต่ อาขว่าอาคยา, แกแย ปว๋า เตเพร ทวาลอ เฮ๊อ เตซื๊อเตปล๊า อา พู๊เหมาะพู๊คู เต๊เห่ เฮ๊อ. หม่าแน๊เรอ เด๊อ แกแย เตเพร หนิดา จอแปแหร่ อาโหง่ อาขว่าอาคยา, จอแปแหร่ แด่จ๊อแด่เต ลอเฮ๊อ แกแย ปว๋า เตเพร เฮ๊อ.

20 แซ่ฮู๊ แกแย ล๋อ ปลี เก่ ซิเง เร๊อ เหย่ซี เมซื๊อ เอ๊แหน่เจ๊อ อาเงเนอ, จอแปแหร่ เด๊อะตาเป่ เฮ๊อ เหย่ซี เตซว๊าเตแส่ เออเนอ เฮ๊อ. หม่าแน๊เรอ เบ๊อะเหย่ซี เมเตซื๊อ เอ๊แถ่ เร๊อ เอ๊แถ่ เบ๊อะเนอ, จอแปแหร่ อา เตบุ๊ยเตเตอเรอ เออ อา ลื๋อ โอ่เอ๊แถ่ เร๊อ โอ่เอ๊แถ่แถ่ เจ๊อ. 21 เมฮู๊เนอเรอ, ฮู๊ เตซื๊อเตปล๊า เพรเป๊อตี๊หรี่ ลอ แกแย ล๋อ ปลี เร๊อ อา นอโอ่ทวาแถ่ เฮ๊อ เตเซอ ฮู๊เนอ, กู๊แหน่เออ แซ่ฮู๊ เป เก่ พย๊าหนิ แฮเง เกอ ซิปล่อเซอเพร ตูจูเพร เด๊อ เป แบ่เจ่ เหย่ซู่ครี๊ อา โอ่ เนอ, จอแปแหร่ อาบุ๊ยอาเตอเรอ เป๊อตี๊หรี่ เกอ เร๊อ เกอ เฮ๊อ เป เร๊อ เตจ๊อเตเต เฮ๊อ.