Romans 7

กาฉู่แด่ฉู่เม อาเหล่แม๊บือ

1โป่แหว่ ซี๋, ล๋อ ซี เออเต๊เห่เนอหม่า, ซี ย๋อ ซิเง โทลอเฮ๊อ เตซว๊าเตแส่ อาขว่าอาคยา, เต เด๊อ แว เตเร เฮ๊ เป่ ซี เออเต๊เห่เนอ, ซี ซิเง ตาเต โท ลอดื่อเฮ๊อ. แกแย เตเพร เก่ เซอ ล๋ายโต่ เนอ, เตซว๊าเตแส่ เต๊เห่ เป๊อ ตื๊อดื่อ เกอเร๊อ ปา ลู แพ๊. 2เฮ๊โก๊หลื่อ บย่าเฮ๊อ, เพรเหมาะ เด๊อ อา กาฉู่แด่ โทเฮ๊อ เตเพรเนอ, เตซว๊าเตแส่ ปื่อหม่า เกอเร๊อลู เนอ, อาเว เก่ เซอ ล๋ายโต่ เนอ อา เบ่ โอ่แกหนิ อาเว โต่. หม่าแน๊เรอ เก่ อาเว เซอโทเฮ๊อ เฮ๊เรอ, อา แลเปล๊แกเฮ๊อ เร๊อ เตกาฉู่แด่ อา เตซว๊าเตแส่ เออ เฮ๊อ. 3ฮู๊เนอเรอ, เบ๊อะอาเว โอ่เซอเพร ปา เบ๊อะเนอ, อา เก่ จว๊า กาฉู่แด่โค๊ เร๊อ เพรคู เด๊อ อาโร เตเพร เฮ๊เรอ อู เก่ เฮ๊ ลู เน๊อ เพรเหมาะ เด๊อ อา จว๊าซื๊อ เพรคู. หม่าแน๊เรอ, เก่ อาเว เซอโทเฮ๊อ เร๊อ อา แลเปล๊แก เฮ๊อ เร๊อ เตกาฉู่แด่ อา เตซว๊าเตแส่ เออเนอ เฮ๊อ. อา เก่ จว๊าพย๊า เต๊เปล่ เจ๊อ อาเว เตเพร เบ่เบ่, อู เฮ๊ ปา ลู ฮู๊เนอโต่ เฮ๊อ.

4ฮู๊เนอเรอ, แว โป่แหว่ ซี๋, เบ๊อะครี๊ เซอ เด๊อ อี๊ถื่อดีเต่ลู เบ๊อะเนอ, อา แซ่เฮ๊อ เร๊อ ซี เซอ เต่อเกอเฮ๊อ เร๊อ ลู เฮ๊อ อาขว่าอาคยา, ซี โอ่ปา เด๊อ เตซว๊าเตแส่ อา เตเป๊อเตเบ่ อาเล โต่ เฮ๊อ. กู๊แหน่เออ ซี ทวาแถ่เฮ๊อ เต๊อเจ๋อโต เร๊อ อา เด๊อ จอแปแหร่ เมเซอเพร กาคยา ลู เด๊อ เตเซอ เออเนอ เตเพร เฮ๊อ. เด๊อ เตเมทวาแถ่ เฮ๊อ ฮู๊เออ อาขว่าอาคยา, ซี เก่ เส่เถ่โพเถ่ แลแค เต เด๊อ อาแร๊ เต๊เห่ เร๊อ อา ทวาบุ๊ย ทวาเตอเรอ เป่ เด๊อ จอแปแหร่ อาเง. 5เมเตเฮ๊เนอเรอ เป ย๋อ ซิเงแฮ เตซว๊าเตแส่ เฮ๊ เป อาขว่าอาคยา, เบ๊อะเป โอ่เซอเพร ฮู๊ แกแย อา สุ่ยเทอพ๊าหย่า อา เตซิหยื่อซิลอ เบ๊อะเนอ, เป เตซิหยื่อซิลอ มู๊แหม่รีแจ่ เต๊เห่ โอ่เอ๊แฮ เร๊อ โอ่เอ๊แฮ. เร๊อ เต เออเต๊เห่เนอ, อา ซูจว๊า เป เด๊อ ปอรากยากู ตูจูเพร แพ๊. 6หม่าแน๊เรอ กู๊แหน่ เออเนอ, จอแปแหร่ เมแลเปล๊ เฮ๊อ เป เร๊อ เตซว๊าเตแส่ เฮ๊อ, เมเตเฮ๊เรอ เป ย๋อ เซอ เต่อเฮ๊อเร๊อ ครี๊ อาขว่าอาคยา, เตซว๊าเตแส่ เออ จอกลอหม่า แซ่เกอ เป ฮู๊ เด๊อ เนอเคเนอ อา หนิปาโต่ เฮ๊อ. จอแปแหร่ เมแลเปล๊กา เฮ๊อ เป เร๊อ เตซว๊าเตแส่ เออ, เร๊อ แหย่โยบูโพ๊ แบ่เจ่ เมจว่าเฮ๊อ เป เร๊อ แกล๊ อาเซ เออโตโบ เฮ๊อ อาขว่าอาคยา, เป เมเฮ๊อ อาเตเม เออเฮ๊อ. เป เม จอแปแหร่ อา เตเอ่เตแร เร๊อ เด๊อ เป หนิดา ครวาเมเกอ เตซว๊าเตแส่ อาแกล๊ เลอ เออโตโบ อาขว่าอาคยาเร๊อ หม่า ปาโต่เฮ๊อ.

เตซว๊าเตแส่ เร๊อ เตซื๊อเตปล๊า

7เมฮู๊เนอเรอ เป เก่ เฮ๊ ฮู๊เต? เตซว๊าเตแส่ หม่า อาซื๊อ แพ๊ เป เก่ เฮ๊ ฮู๊เนอ แอ? เป เฮ๊ ฮู๊เนอหม่า อา โตโต่. เน เม ฮู๊เนอหม่า อาซื๊อ เตซว๊าเตแส่ เก่ ยูโล โต่ เฮ๊เนอ, เต เด๊อ แว เมซื๊อ โทเฮ๊อ แคร๋ อิเตเนอ แว ซิเง กาคยา เกอเร๊อ หม่าแหน่โต่. เฮ๊โก๊หลื่อ, “ซิหยื่อซิลอ แต่ อู เต แต่เหม่ นี๋,” ^a เก่ เตซว๊าเตแส่ ราโล ฮู๊เออ โต่ เฮ๊เรอ, ซิหยื่อซิลอ อูเต เนอหม่า อา ทวา เตซื๊อ เฮ๊อ เนอ, แว ซิเง โต่. 8หม่าแน๊เรอ แว ย๋อ ทวา เพรเมเตซื๊อ อาขว่าอาคยา, เตซว๊าเตแส่ เฮ๊ แว เน๊อ ซิหยื่อซิลอ แต่ อูเต แต่เหม่ อา เฮ๊เนอ, แว เหล่ ซิหยื่อซิลอ ฉว่าฉว่า. เมฮู๊เนอเรอ เตซว๊าเตแส่ เก่ โอ่โต่ เฮ๊เนอ, เตซื๊อ เออเนอ อา เตอเรอฉว่าชอ โอ่ โต่, อา เซอ แพ๊. 9เด๊อ อาเหร่อเค เนอ, แว ซิเง จอแปแหร่ อา เตซว๊าเตแส่โต่ อาขว่าอาคยา, แว โอ่เซอเพร โต แพ๊ จอแปแหร่ อาซิปล่อ แพ๊, แว เตเน ซิปล่อเป่ เกอ เร๊อ ฮู๊เนอ. หม่าแน๊เรอ เบ๊อะโหง่เฮ๊แก แฮโต่เฮ๊อ เบ๊อะเนอ, เตซื๊อ อาแกล๊ แฮโนเฮ๊อ เด๊อ แว เตโอ่เซอเพร อากู เฮ๊อ, เร๊อ แว เซอ แก เฮ๊อ เด๊อ แหย่โย ตากยา เฮ๊อ. 10แว แม๊เถอะ เร๊อ จอแปแหร่ เด๊อะตา โหง่เฮ๊แก เออเต๊เห่เนอ, อา โตเบ่ ซูจว๊า เป เด๊อ เตเซอเพร ตูจูเพร อาแกล๊ หม่าแน๊เรอ ตื๊อดื๋อ ตื๊อดื่อ เนอ อาเล๊ ซูจว๊า แว เด๊อ เตเซอ แพ๊.

11เมเตเฮ๊เรอ, เตซื๊อ แม๊เถอะหนิ อา เหล่โอ่แร๊ เด๊อ อา เก่ ตาเต แถ่หนิ โหง่เฮ๊แก เออ อาขว่าอาคยา, อา อี๊ลอแลโฮ แพ๊ แว. โทเรอ อา นอเอ่ โหง่เฮ๊แก เออ เร๊อ อา เมเซอแก แว แพ๊. ^b 12ฮู๊เนอเรอ, เตซว๊าเตแส่ หม่า อาบูโพ๊. เร๊อ โหง่เฮ๊แกเออ เต๊เห่ เนอหม่า อาบูโพ๊, อาจ๊ออาเต เร๊อ อาโตอาเบ่ แพ๊.

เตช๊าเตปา โอ่ เด๊อ เปกู

13เก่เฮ๊ฮู๊เนอเรอ, เต อาตว่าอาแร๊ เออเนอหมา อา เม เซอแก แว แอ? อา เมเซอแก แว หม่าโต่. อา เมเซอแก แว เออเนอหมา เตซื๊อเตปล๊า แพ๊. อา นอเอ่ จอแปแหร่ อา เตซว๊าเตแส่ เด๊อ อาแร๊ เออ เร๊อ อา อี๊ลอ เมเซอแก แว แพ๊. เมเตเฮ๊เรอ แซ่ฮู๊ แว เก่ ซิเง ตาเต เร๊อ เต เด๊อ แว เมโทเฮ๊อ เนอเต๊เห่ หม่า, อา ซื๊อเฮ๊อ เนอเรอ, จอแปแหร่ เด๊อะตา เตซว๊าเตแส่ แพ๊. ฮู๊เนอเรอ เด๊อ โหง่เฮ๊แก เออ อาขว่าอาคยาเร๊อ, แว เก่ แม๊เถอะแฮ เร๊อ เตซื๊อเออ อา มู๊แหม่รีแจ่ แหน่เจ๊อ.

14เป ซิเง เร๊อ จอแปแหร่ อา แหย่โยบูโพ๊ เด๊อะตา เป เตซว๊าเตแส่ เออเต๊เห่ หม่าแน๊เรอ แว หม่า แกแย เห่ขุพู๊ เด๊อ อา เซอแจ่ เตเพร แพ๊. แว หม่า อาแซ่เน๊อ หลู่เล๊ เด๊อ อู อิเช จว๊าแก ลู เน๊อ อา เก่ จว๊าทวา เป่ เตซื๊อเตปล๊า แบ่เจ่ เออเตเพร อาหลู่เล๊ แพ๊. 15หม่าเมเต เร๊อ แว จว๊า เมโต่ เตซื๊อ ฮู๊เออเนอ, แว ซิเง เกอเร๊อ แวเหน่ โต่. เมเตเฮ๊เรอ แว เม ฮู๊ แว ซิหยื่อ เมเนอ หม่าโต่. เต เด๊อ แว ซิหยื่อ เม ตีกี๋ โต่ เต๊เห่เนอ แว จว๊าเม เต่อเต่อ. ^c 16เต เด๊อ แว ซิหยื่อ เมโต่ เต๊เห่ เร๊อ แว จว๊าเมโต่ เนอหม่า อา เด๊อะโลเฮ๊อ เร๊อเตซว๊าเตแส่ เออเนอ, อาแร๊ แพ๊ แว ซิปล่อโตเกอ ฮู๊เนอ เฮ๊อ. 17ฮู๊เนอเรอ, เก่เฮ๊หม่าแหน่หม่า เพร เด๊อ อา เม เตเออ เตเพร เนอหม่า แว หม่าโต่. เนอหม่า เตซื๊อ เด๊อ อา โอ่ เด๊อ แวกู เออเนอ เตเพร เม แพ๊. 18เด๊อ แวพ๊าแวหย่า อา เตซิหยื่อซิลอ อากูเนอ, แว ซิเง เร๊อ เตแร๊ โอ่ เตอเจ๋อ โต่, เมเตเฮ๊เรอ แว ซิหยื่อ เมเตแร๊ หม่าแน๊เรอ แว เมเบ๊โต่. 19เตแร๊ เด๊อ แว ซิหยื่อ เม เหย่ซีเนอ, แว เม อา โต่, แว จว๊า เม ตาค๊าโต่ เด๊อ เตมู๊แหม่รีแจ่ เด๊อ แว ซิหยื่อ เม อา โต่ เต๊เห่. 20เก่ แว เม ฮู๊ แว ซิหยื่อ เมเนอ โต่ เฮ๊เนอหม่า, อา เม เนอเตเพร หม่า แว หม่าแหน่ หม่าโต่. เนอหม่า เตซื๊อ เด๊อ อา โอ่ เด๊อ แวกู เนอเตเพร เม แพ๊.

21ฮู๊เนอเรอ แว แม๊เถอะ เร๊อ เตซื๊อ เด๊อ แกแย เหล่โกลเม โป๊เนอ เกอเร๊อ เออเนอ อา เม เด๊อ แวกู. เบ๊อะแว ซิหยื่อ เมเตแร๊ เบ๊อะเนอ, แว แม๊เถอะ โชชื่อ เจ๊อ เตมู๊แหม่ โอ่ เด๊อ แวกู เจ๊อ. 22เด๊อ แว ซิปล่อกู เนอ แว โม แหน่เจ๊อ จอแปแหร่ อา เตซว๊าเตแส่ เจ๊อ. 23หม่าแน๊เรอ แว แม๊เถอะ เหล่โกล เมโป๊เนอ เตซื๊อ เด๊อ อาโร เต๊อเจ่อ เด๊อ อา นอเม แว เหน่กล่อ อาครืออาขรว่า เออเต๊เห่ เร๊อ เตมู๊แหม่รีแจ่ เต๊เห่. เหล่โกล เมโป๊เนอ เตซื๊อ เออเนอ. อาช๊าอาปา เร๊อ แว ซิปล่อ เด๊อ อา ซิหยื่อเม เตแร๊ เออเนอ เตซื๊อ อาเหล่โกล เมโป๊เนอ เออเนอ, อา ช๊าเป่แก ลู เร๊อ อา นอทวาแก แว เร๊อ เตซื๊อ เด๊อ อาเหล่โกล เมโป๊เนอ เออเนอ อาหลู่เล๊ เฮ๊อ. เร๊อ เตซื๊อ เด๊อ อาเหล่โกล เมโป๊เนอ เด๊อ เออเนอ อา โอ่ เด๊อ แว เหน่กล่อ ครือขรว่า เต๊เห่ อากู. 24เอ๋อ เมอเหยอ! แว จว๊า ทวา เตซื๊อ อาหลู่เล๊ ฮู๊เออ เร๊อ อาจา แหน่เจ๊อ แว. เตซื๊อ เด๊อ อา โอ่ เด๊อ แวกูเออ เร๊อ อา ซูจว๊า แว เด๊อ เตเซอ เออเนอ, อูเป เตเพร เก่ เมแลเปล๊กา เบ๊ เป่ แว เป? 25แว เฮ๊บุ๊ยเฮ๊เตอเรอ จอแปแหร่, เมเตเฮ๊เรอ เด๊อ เป แบ่เจ่ เหย่ซู่ครี๊ อาขว่าอาคยาเร๊อ, อา เมแลเปล๊กา เฮ๊อ แว เฮ๊อ.

ฮู๊เนอเรอ เตเมทวาแถ่ อาเหน่ เร๊อ แว หม่า ฮู๊เตเฮ๊เร๊อ แว ซิปล่อ เออเนอ, อา ซิหยื่อ เม โชชื่อ แพ๊ จอแปแหร่ อา เตซว๊าเตแส่ หม่าแน๊เรอ แวพ๊าแวหย่า อา เตซิหยื่อซิลอ เออเนอ อา เม โชชื่อแพ๊ เต เด๊อ อาเหล่โกล เมโป๊เนอ เตซื๊อ เออเนอเต๊เห่ แพ๊.