Romans 9
จอแปแหร่ เร๊อ อา แกแย เบ๊หมู่ เต๊เห่
1แว เร๊อ ครี๊ ลอ ทวาแถ่ เฮ๊อ ลู เตอเจ๋อ โต เฮ๊อ อาขว่าอาคยา, แว เฮ๊เบ่จ๊อเฮ๊เบ่เต แพ๊ ซี แพ๊. แว แลโฮ ซี โต่. แหย่โยบูโพ๊ แบ่เจ่ เป๊อหนิ ซูหนิ แว ซิปล่อเออ, เร๊อ แว ซิปล่อเออ อา เฮ๊หม่าเฮ๊กลอจว่า เกอโป่ เร๊อ แว เฮ๊เบ่ เตเออเนอหม่า อาโต แพ๊. 2แว ซิเปลซิหย่อ โกโน๋ โต่. อาเช แว ซิปล่อเออ, อา โอ่เหม่ เป่ปา เจ๊อโต่ เฮ๊อ. 3เมเตเฮ๊เรอ, เด๊อ แว โป่แหว่ แกแยยิวพู๊, หม่าเฮ๊อ แวเมวเจอะ เร๊อดื่อ, แวสุ่ยแวเทอ เร๊อดื่อ เออเต๊เห่ อาเงเนอ, จอแปแหร่ เก่ อิชอ ฮามู๊แหม่แก เด๊อ แวเออ หม่า อาหนิ แพ๊. โท๊โต่ จอแปแหร่ เก่ ปาตือ แว เร๊อ ครี๊ เร๊อ เหย่ซี เก่ หนิ เตเมแลเปล๊กา ปา เก่เฮ๊เรอ อา ปาตือแก แว หม่า อาหนิ แพ๊. แว ซิหยื่อ ข่าเป่ แหน่เจ๊อ เด๊อ เหย่ซีเง เจ๊อ. 4เหย่ซี หม่า อิสราเอลพู๊ เต๊เห่. จอแปแหร่ อี๊พู๊อี๊เลอหนิ เฮ๊อ เหย่ซี ฮู๊ อาพู๊อาเลอ เหน่กล่อ เนอเฮ๊อ. เร๊อ อา เด๊อะโล เป่ เฮ๊อ เหย่ซี เร๊อ อา เตเตอเรอดุทู จอแปแหร่ เอ่หม่า โทเฮ๊อ เฉ่ เร๊อ เหย่ซี เร๊อ อา เด๊อะตา โทเฮ๊อ เหย่ซี เร๊อ อา เตซว๊าเตแส่ เฮ๊อ. เหย่ซี พย๊าหนิ เตจ๊อเบ อาแกล๊อาโกล เด๊อ เตหลู่แต โฮกู เร๊อ อา พย๊าหนิ แลแค จอแปแหร่ อา เตอ๊อแลนอแล เต๊เห่ เฮ๊อ. a 5เหย่ซี เพอโพ กลุยแล หม่า ฮีบรู อากลุยอาแล เด๊อ อามีลาดุ มู๋ หนู่เค เต๊เห่. เบ๊อะครี๊ แฮแล โอ่เป๊เจ่ ฮู๊ แกแย เห่ขุพู๊ เบ๊อะเนอ, อา แฮโอ่ เด๊อ เหย่ซี อากลุยอาแล อากู. อา หม่า จอแปแหร่ เด๊อ อา เป๊อตี๊หรี่เต ล๋อ ปลี เตเพร, เร๊อ อู เก่ ถู่เซ๊แถ่ดื่อ อา ตูจูเพร แตแลเคร๊ นี๋. อาเม. 6เก่เฮ๊ฮู๊เนอเรอ, จอแปแหร่ เมปย๊าแกเฮ๊อ อา เตอ๊อแลนอแล เออเนอ เร๊อ แกแยยิวพู๊ เออเต๊เห่ เฮ๊อ แอ? อา เมปย๊าแก เน๊อ โต่. เมเตเฮ๊เรอ ล๋อ อิสราเอลพู๊ เด๊อ อากลุยแล กาแล เด๊อ เพ ยาโคบ อา โอ่ เต๊เห่เนอ, อา ทวาลอ จอแปแหร่ แกแย หม่าแหน่ ปว๋า เตเพร หม่าโต่. 7ล๋อ อากลุยอาแล ตา เด๊อ เพอับราฮัม อา โอ่ เต๊เห่เนอ เบ่เบ่, อา ทวา ลอ เพอับราฮัม อาพู๊ ปว๋า เตเพร หม่าโต่. หม่าเด๊อ, จอแปแหร่ อ๊อแล เน๊อ, “เนกลุยเนแล เต๊เห่เนอ อา เก่ แฮตา แฮเง เด๊อ คูอิสอัค อา โอ่ ปา.” b 8อา ซิหยื่อ เฮ๊ อาโหง่แลซ๊า ฮู๊เต เฮ๊เรอ, แกแย พู๊โอ่ เร๊อ อากลุยแล กาแล แฮเง เด๊อ เพอับราฮัม สุ่ย หย่าเทอ เต๊เห่เนอหม่า, จอแปแหร่ อาพู๊อาเลอ ลอ ปว๋า เตเพร หม่าโต่. แกแย เด๊อ อา โอ่เป๊เจ่แล ฮู๊ จอแปแหร่ อา เตอ๊อแลนอแลแก เนอเต๊เห่หม่า ตื๊อ อู เก่ แด่ เหย่ซี ฮู๊ เพอับราฮัม อากลุยอาแล แพ๊. 9เมเตเฮ๊เรอ, จอแปแหร่ อ๊อแล นอแลแก อาโหง่ เน๊อ, “ช๋า เบ๊อะตาโตตาเบ่เฮ๊อ ปาเนอ, แว เก่ แฮ คยาแซ๊ ปา เร๊อ โหมะซาราห์ เก่ พู๊โอ่หนิเร๊อ อา พู๊เพรคู ปา.” c 10ตื๊อเนอโทโต่, โหมะเรเบคา พู๊โอ่ ดีคยา เกอเร๊อ โทเฮ๊อ อาเพรคู ซิเนอ เฮ๊อ, เร๊อ อาเพ หม่า เตเพรเพร่ว แพ๊. อาเพ หม่า หม่าเฮ๊อ เปเพ เพอิสอัด เด๋อ งย๊าเค เนอเตเพร เฮ๊อ. 11– 12เบ๊อะอาพู๊ ดีคยา เออซิเนอ โอ่เป๊เจ่แล แต่ล๋ายโต่ เบ๊อะเนอ, โทเรอ เบ๊อะอาพู๊ เออซิเนอ เม แต่ลา เตซื๊อ เร๊อ เตแร๊ ล๋ายโต่ เบ๊อะเนอ, จอแปแหร่ เฮ๊หนื่ออื่อ เหร่อ อาโหมะ เน๊อ, “อาแหว่เพร่ว เตเพร เบ่แร เป่ อาโป่ เนอเตเพร อาเตเม ปา.” d แซ่ฮู๊ อู เก่ ซิเง เร๊อ จอแปแหร่ นว๊าแถ่ จู๋ ดื่อ อาซิปล่อ ฮู๊ อา เต เตเนหนื่ออื่อ โทเฮ๊อ เนอเรอ, อา เมเฮ๊อ ฮู๊ อา เต เตเนหนื่ออื่อ เออเนอ เฮ๊อ. เด๊อ แกแย เตเพรเพร เมโทเฮ๊อ เตเต๊อเจ่อเจ่อ อาขว่าอาคยาเร๊อ, อา นว๊าแถ่ ลู หม่าโต่. โท๊โต่, อา โอ่ เด๊อ จอแปแหร่ อา กู่ยากู เร๊อ อา นว๊าแถ่ เกอเร๊อ ลู แพ๊. 13ลีเทส่อพ๊ากู เฮ๊ เน๊อ, “แว โม เกอเร๊อ คูยาโคบ, แว ซิโตโคแก คูเอซาว.” eอา เฮ๊ฮู๊เนอ. 14เก่ เมฮู๊เนอเรอ เป เบ่ เฮ๊ ฮู๊เต? จอแปแหร่ เม เตโต๊โก่เรอ อาจ๊อโต่, เป เก่ เฮ๊ ฮู๊เนอ แอ? เป เฮ๊ ฮู๊เนอ หม่า อาโต โต่. 15เมเตเฮ๊เรอ, โตโพ๊เค อา เฮ๊ คูโมเสส เน๊อ,“แว เก่ ซิยอเกอเร๊อ แกแย เตเพรเพร เด๊อ จู๋ ดื่อ แว ซิปล่อ เหล่ซิยอหนิ ลู เนอเตเพร ปา. แว เก่ เมจว่าครา แกแย เตเพรเพร เด๊อ จู๋ ดื่อ แว ซิปล่อ ซิหยื่อ เมจว่า เนอเตเพร ปา.” f 16ฮู๊เนอเรอ เป เหล่ซิเลแถ่ เกอเร๊อ เป แกแย อา เตซิหยื่อ, หม่าโต่เรอ, อาเต แอ๊จื๊อแอ๊เหร่ เต๊เห่ เนอหม่า อาหนิ โต่. เตล๋อ ปลี เด๊อ เป เหล่ซิเล แถ่หนิ เนอหม่า ตื๋อแพ๊ จอแปแหร่ อา เตซิยอ แพ๊. 17เมเตเฮ๊เรอ ลีเทส่อพ๊ากู เฮ๊ดื่อ คุ๊ยฟาโรห์ เน๊อ, “แซ่ฮู๊ แว เก่ เด๊อะโล หนิ แฮเง แว เตอเรอฉว่าชอ เต๊เห่ เร๊อ เน, โท๊โต่ แซ่ฮู๊ แวมุย เก่ โลเทอโลเก่ ลอ เด๊อ เห่ขุต๊าบ่า เออเนอเร๊อ, แว นอทวาแถ่ เน เร๊อ คุ๊ย แพ๊,” gอา เฮ๊ ลู ฮู๊เนอ. 18เมฮู๊เนอเรอ จอแปแหร่ ซิยอเกอเร๊อ อู จู๋ ดื่อ อา ซิยอ เนอ, อา เม กู่กล๊อเพรอ แกแย เด๊อ จู๋ ดื่อ อา ซิหยื่อ เมกู่กล๊อเพรอหนิ อู เนอเต๊เห่ แพ๊.
จอแปแหร่ อา เตซิปล่อดุ เร๊อ อา เตซิยอ
19แตแร๊หม่า เด๊อ ซีเกลเนอ, อา เก่ แด๊เฮอ แว เน๊อ, “เก่ เมฮู๊เนอเรอ หม่าเมเตเร๊อ อา จว๊า แด่ตื๊อดื่อปา เป เตซื๊อ เมเต? อูเป เตเพร เก่ เมตาตือ เบ๊ ลู ซิหยื่อเมเต เออเนอ เป?” 20หม่าแน๊เรอ แว เก่ เฮ๊ เน เน๊อ, เน หม่า แกแยเห่ขุพู๊แพ๊. เน โหล่เฮ๊ เป๊อเจ่อ กาคยาฉื่อ จอแปแหร่ ฮู๊เนอโต่. ปอเห่ เตเมเนอ, เก่ อา เฮ๊ กาคยาฉื่อ เพรแบ๊ลู เออเตเพร เน๊อ, “เน จว๊าแบ๊ แว ฮู๊เออ เมเต?” h อา เฮ๊ กาคยาฉื่อ ฮู๊เออ เนอหม่า อาหนิ โต่. 21ป่าอ๊า ตูกลู๊ เออเนอ, อา โอ่ เด๊อ เพรแบ๊ปอเห่ เออเตเพร อา กู๊ยากู แพ๊. อา เก่ แบ๊ปอเห่ จู๋ ดื่อ ฮู๊ อา ซิหยื่อ แบ๊เนอ หม่า อาหนิ แพ๊. ป่าอ๊า ตูกลู๊ อากูเนอ, อา เก่ แบ๊ปอเห่ เด๊อ อู นอเอ่ โค๊คยาดื่อ อา เบ๊อะป่วยเค อาเง เนอเบ่เบ่, หม่าโต่เรอ อา เก่ แบ๊ปอเห่ เด๊อ อู เก่ นอจ่อเอ่ อา เหมาะเฮ๊เหมาะลี อาเง เนอเบ่เบ่, อา แบ๊ จู๋ ดื่อ อาซิปล่อ ซิหยื่อ แบ๊ เนอหม่า อาหนิ แพ๊. 22จอแปแหร่ ซิหยื่อ เม จู๋ ดื่อ อาซิปล่อ เนอ, อาหนิ ปว๋า โตโพ๊ เจ๊อ. อา ซิหยื่อ เด๊อะโล เป่ อู เร๊อ อา เตซิ ปล่อดุ โทเรอ อา ซิหยื่อ นอซิเง เกออู เร๊อ อา เตโพรเตเตอเรอ เต๊เห่. หม่าแน๊เรอ แกแย เด๊อ อา เบ่ ข่าเบ่ ลู เตซิปล่อดุ ปา, เร๊อ อา เบ่ โต่เด๊อ เตปย๊าเตหลู่ ปา เต๊เห่ อาเงเนอ, อา เด๊อะโล เต๊เปล่ โค๊เป่ เหย่ซี เร๊อ อา เตแด่ทูซิปล่อ, อา เตแด่ทูซิปล่อ เต๊เห่. 23แซ่ฮู๊ จอแปแหร่ เก่ เด๊อะโลเร๊อ เป่ แกแย เด๊อ อา ซิยอ เกอเร๊อ ลู เนอเต๊เห่ เร๊อ อา เม โค๊ตีกลี๊ เป่ แหน่เจ๊อ เหย่ซี, เร๊อ อา แด่ทูซิปล่อ เป่ แหน่เจ๊อ เหย่ซี เจ๊อ. อา นว๊าแถ่ หนื่ออื่อ เหร่อ เฮ๊อ เหย่ซี เฮ๊อ เร๊อ อา เก่ เด๊อะ เป่ เหย่ซี เร๊อ อา เตอเรอดุทู เออเนอ ปา. 24เป หม่า แกแย เด๊อ จอแปแหร่ เอ๊ เจ๊อ เป เต๊เห่ เฮ๊อ. อา เอ๊ ตื๊อ แกแยยิวพู๊ เต๊เห่ อาเกลเนอ หม่าโต่, เด๊อ แกแยยิวพู๊ หม่าโต่ เต๊เห่ อาเกลเนอหม๋า, อา เอ๊ หนิ เต่อเกอ ดื่อดื่อ. 25ฮู๊ จอแปแหร่ นอเฮ๊ เพรโพร คูโฮเชยา เน๊อ,“เด๋อ เนอเค เหย่ซี หม่า อา ทวา แวแกแย หม่าโต่, หม่าแน๊เรอ แว เก่ เอ๊ เหย่ซี เน๊อ, ‘แวแกแย’ ปา, โท๊โต่, เด๋อ เนอเค เร๊อ เหย่ซี หม่า แกแย เด๊อ แว โม เกอเร๊อ อา เต๊เห่ หม่าโต่ หม่าแน๊เรอ กู๊แหน่เออ แว เก่ เอ๊ เหย่ซี เน๊อ, ‘แกแย เด๊อ แว โมเร๊อ อา เต๊เห่’ ปา.” i
26“เหล่โอ่ เด๊อ แว เฮ๊โทเฮ๊อ ซี มู๋ หนู่เค เน๊อ, ‘ซี หม่า แวแกแย หม่าโต่’ เนอโต๊โผะ เนอ, กู๊แหน่เรอ แว เก่ เอ๊ เหย่ซี เร๊อ ‘จอแปแหร่ เด๊อ อา เซอเพร เตเพร อา พู๊เหมาะพู๊คู เต๊เห่’ เฮ๊อ,” jเพรโพร คูโฮเชยา เฮ๊ ฮู๊เนอ. 27เพรโพร อิสยาห์ เฮ๊ อิสราเอลพู๊ เต๊เห่ อาหรี่อาแก เน๊อ,
อิสราเอลพู๊ เต๊เห่เนอ, อา โอ่เอ๊ แซ่เจ๊อ เร๊อ หล่อตาม๊า เด๊อ เทอดุซาวา อาทือ เนอ เจ๊อ หม่าแน๊เรอ จอแปแหร่ เก่ เมแลเปล๊กา ปีตี๊แพ๊ เหย่ซี ปา. k 28เมเตเฮ๊เรอ, จอแปแหร่ เก่ เมจากาคยา ตื๊อดื่อ เหล่แก เห่ขุเออ ปา. l 29ฮู๊ เพรโพร อิสยาห์ เฮ๊หนื่ออื่อ โทเฮ๊อ เน๊อ,
“แบ่เจ่ เด๊อ อา แจ่เต ล๋อ ปลี เออเตเพร เก่ ซิโลเกอเร๊อ เปกลุยเปแล เต๊เห่ โต่ เฮ๊เนอหม่า, เป เก่ ทวาแถ่ แซ่เกอ ฮู๊ อา เมจากาคยา ปลื๊อแก วีโสโดม เร๊อ วีโกโมราห์ เนอ แพ๊” m ▼
▼วีกูพู๊ เต๊เห่ เม เตมู๊แหม่รีแจ่ อาขว่าอาคยา, จอแปแหร่ เมปย๊าแก ลอ เจ๊อ เนอวี เจ๊อ.
อิสราเอลพู๊ เร๊อ เตซิครือมีลา
30เก่ เมฮู๊เนอเรอ, เป เก่ เฮ๊ ฮู๊เต? แกแยยิวพู๊ หม่าโต่ เต๊เห่เนอ, อา แม๊ปู เกออู แกล๊ เด๊อ จอแปแหร่ แด่จ๊อแด่เต อู เออเนอโตโบ โต่ หม่าแน๊เรอ เหย่ซี พย๊าหนิ เฮ๊อ. เด๊อ เหย่ซี เตหยื่อเตแหน่ อาขว่าอาคยา, เร๊อ จอแปแหร่ แด่จ๊อแด่เต เฮ๊อ เหย่ซี เฮ๊อ. 31หม่าแน๊เรอ แกแยยิวพู๊ เออเต๊เห่เนอ, แซ่ฮู๊ อา เก่ พย๊าหนิ จอแปแหร่ อา เตแด่จ๊อแด่เต เหย่ซี อาเงเนอเรอ, เหย่ซี แอ๊จื๊อ ลือครวาเม แลแค เตซว๊าเตแส่ เต๊เห่ หม่าแน๊เรอ อา พย๊าหนิ แจ่ แตแค๋ โต่. 32อา จว๊า พย๊าหนิ เต่อโต่ เมเตเฮ๊เรอ เหย่ซี แอ๊จื๊อ แม๊ปู เตจ๊อเตเต เนอ, อา ซิเล เกอเร๊อ เกอ แลแค เตหยื่อ โต่. โท๊โต่ เหย่ซี ซิเลเกอเร๊อ แลแค เตแร๊ เด๊อ เหย่ซี เม เนอเต๊เห่ อาโอ่ แพ๊. เหย่ซี ตอพอเบ่ “หล่อ เหล่ตอพอ เตเม.” 33ฮู๊ ลีเทส่อพ๊ากู เฮ๊ คูเมสิยาห์ หม่าเฮ๊อ เพรเมแลเปล๊กา อาหรี่อาแก เน๊อ, “แม๊มอ แลแค, แว แด่โอ่ หล่อ เตเม เด๊อ วีศิโยน อากู ปา, เร๊อ อู เก่ ตอพอ อา ปา, เร๊อ อา เก่ เมแลคื๊อ อู ปา. หม่าแน๊เรอ แกแย เด๊อ อา หยื่อเอ่ ลู เต๊เห่เนอ, อา โต่ เด๊อ เตซิปล่อปย๊า อาเหล่โอ่ แตแค๋ โต่.” o
Copyright information for
EkySCThai