Tit 1 | EkySCThai | STEP | แว หม่า คูเปาโล, แว ราจว๊า เป่ เน ลี เออต๊าบ่า. แว หม่า จอแปแหร่ อาหลู่ เน๊อ เหย่ซู่ครี๊ อา เพรโด่แนพู๊ เต๊เห่ เตเพร. จอแปแหร่ นว๊าแถ่ แว เร๊อ อา นอจว๊า เมจว่าเฮ๊อ แว เร๊อ แกแย เด๊อ อา นว๊าแถ่เฮ๊อ ลู เนอเต๊เห่ อา เตหยื่อเตแหน่, เร๊อ อา เก่ ซิเง แลแค เตจ๊ออาเต. เตจ๊อเตเต เออเนอหม่า หม่าเฮ๊อ อา เมจว่าเฮ๊อ เหย่ซี เด๊อ อา เก่ โอ่เซอเพร โต เร๊อ จอแปแหร่ อาซิปล่อ เออเนอเต๊เห่ เฮ๊อ.

a โครินธ์ เนอบ่า ต๊าบ่า ๘:๒๓, กาลาเทีย ๒:๓, ทิโมธี เนอบ่า ต๊าบ่า ๔:๑๐

Titus 1

1 แว หม่า คูเปาโล, แว ราจว๊า เป่ เน ลี เออต๊าบ่า. แว หม่า จอแปแหร่ อาหลู่ เน๊อ เหย่ซู่ครี๊ อา เพรโด่แนพู๊ เต๊เห่ เตเพร. จอแปแหร่ นว๊าแถ่ แว เร๊อ อา นอจว๊า เมจว่าเฮ๊อ แว เร๊อ แกแย เด๊อ อา นว๊าแถ่เฮ๊อ ลู เนอเต๊เห่ อา เตหยื่อเตแหน่, เร๊อ อา เก่ ซิเง แลแค เตจ๊ออาเต. เตจ๊อเตเต เออเนอหม่า หม่าเฮ๊อ อา เมจว่าเฮ๊อ เหย่ซี เด๊อ อา เก่ โอ่เซอเพร โต เร๊อ จอแปแหร่ อาซิปล่อ เออเนอเต๊เห่ เฮ๊อ. 2 เตจ๊ออาเต เออเนอ อา เด๊อ เหย่ซี เตแม๊ซื๊อ เด๊อ เหย่ซี เก่ พย๊าหนิ ซิปล่อเซอเพร ตูจูเพร ตาเลเคร๊ อาเง เฮ๊อ. เบ๊อะเห่ขุ โอ่ทวาแถ่ แต่ล๋ายโต่ เบ๊อะเนอ, จอแปแหร่ เด๊อ อา แลโฮน๊อ แตแค๋ โต่ เออเตเพรเนอ, อา อ๊อแล หนื่ออื่อ โทเฮ๊อ เร๊อ อา เก่ เด๊อะ เป เตเซอเพร เออเนอ เฮ๊อ. 3 จอแปแหร่ เด๊อ อา เมแลเปล๊กา เป เออเตเพร เด๊อซิเง เป่ เป เตหรี่เตแก เออเนอหมา, อา ม๊อเนอม๊อเซโตเบ่เฮ๊อ เร๊อ อา หยื่อเอ่เกอ แว เร๊อ อา นอตา แว เด๊อ แว เก่ เด๊อซิเง เป่ ซี เร๊อ เตหรี่เตแก เออเนอ เฮ๊อ.

4 คูติตัส, แว ราจว๊า ลี เออต๊าบ่า เด๊อ เนโอ่. เน เตหยื่อเตแหน่ ลอ แซ่เจ๊อเร๊อ เป เตอเจ๋อโต อาขว่าอาคยา, เนเนอ อา แซ่เจ๊อเร๊อ แวพู๊ ต๊อต่อ เร๊อ แวเหน่ เจ๊อ. ^a

เพ จอแปแหร่ เร๊อ เพรเมแลเปล๊กา เป แบ่เจ่เหย่ซู่ครี๊ เออ เก่ เด๊อะดื่อ เน เตบุ๊ยเตเตอเรอ เร๊อ เตตู๊จุเตอเจ๊อ นี๋.

คูติตัส แรเต เบ๊อะครีตกลื๊อ

5 แว แด่แก เฮ๊อ เน เบ๊อะครีตกลื๊อ เออเนอหม่า แซ่ฮู๊ เน เก่ จว๊า ตี๊หรี่ เมโตเมเบ่ โทปลื๊อแก ลอ เต เด๊อ อา โหล่เมปา เด๊อ วีเออ ปว๊าวี อากู เนอเต๊เห่ แพ๊. เร๊อ เน เก่ แด่แถ่ เพรหยื่อเอ่ตู๊หมู่ตอกล๊อ โหมะพรูโหมะเผระ เต๊เห่ ฮู๊ แว ยูแกล๊ยูโกล โทเฮ๊อ เน เนอ นี๋. 6 เพรหยื่อเอ่ตู๊หมู่ตอกล๊อ ทวาดุทวาเต เต๊เห่ เนอหม่า เหย่ซี เบ่ ทวาดื่อ แกแย เด๊อ อู เหล่แด่ เตซื๊อ เด๊อ เหย่ซี อาโอ่เนอ อา โตเบ่ โอ่หนิ โต่. อาเม เบ่ โอ่แพ๊ เตเพรเพร่ว แพ๊, อาพู๊ เต๊เห่ เนอหม่า อา เบ่ทวาเพรหยื่อ เตพู๊เร๊อ เหย่ซี มีลาเบ่ โลตว่า โลแร๊, โทเรอ อา เบ่ ทวาดื่อ แกแย เด๊อ อา หนิดา โหมะเพโหง่ เต๊เห่. ^b 7 เมเตเฮ๊เรอ, เพรหยื่อเอ่ตู๊หมู่ตอกล๊อ ทวาดุทวาเต เตเพรเนอ, แรเต ตาเบ่ อา เด๊อ อา โตเบ่ เม จอแปแหร่ อา เหล่เอ่เหล่แร อาขว่าอาคยา, อู เหล่แด่ อา เตซื๊อ หม่า อา โตเบ่ โอ่หนิเกอ โต่. กู่กล๊อเพรอ เร๊อ ซิปล่อ ดุแถ่แพร เต๊เห่เนอ อา โตเบ่ โอ่หนิเกอ โต่, เบ่ เอ่มือโอแพร๊ หนิโต่, เบ่มือเบ่ปอหนิ อูโรโต่, เบ่ เอ่ตือโอตือ หนิ อูขุ โต่. 8 หม่าแน๊เรอ, อา โตเบ่ ทวา แกแย เด๊อ อา เอ๊โมฉื่อ ซิเผระซิแหม่, อา โตเบ่ ทวา แกแย เด๊อ อา โม เต เด๊อ อาแร๊, อา โตเบ่ ค๊อเบ๊แจ่ อาซิปล่อ, อา โตเบ่ โอ่จ๊อโอ่เต เร๊อ บูโพ๊ เร๊อ อารอ เบ๊หนิ อาเหน่, 9 แซ่ฮู๊ อา เก่ เด๊อะอ๊าเด๊อะเหร่เบ๊ อู เร๊อ เตอิซว๊าอี๊แส่ เด๊อ อาโต เต๊เห่, โท๊โต่ แซ่ฮู๊ อา เก่ อิซว๊าอี๊แส่ กาคยาฉื่อแจ่ คยา แกแย เด๊อ อา เฮ๊ โตโมจู๊แก่ เตหรี่เตแก เออเต๊เห่ อาเงเนอ, อา โตเบ่ หยื่อเอ่ ปื่อหม่าปื่อกลอ หนิ แร๊ เตหรี่เตแก เด๊อ อู หยื่อเอ่เกอ อา เร๊อ ฮู๊ อู อิซว๊าอี๊แส่ โทเฮ๊อ ลู เนอเต๊เห่.

10 เมเตเฮ๊เรอ แกแย เด๊อ อา เฮ๊ โตโมจู๊แก่ เต เต๊เห่เนอ อา โอ่ เอ๊แหน่เจ๊อ. เหย่ซี เนอเต๊เห่หม่า, อา เฮ๊เบ่ เต เด๊อ อาโหง่แลช๊า โอ่โต่ เต๊เห่, เร๊อ อา เฮ๊เบ่ แลโฮแลแห่ ลอ อู. แกแย ฮู๊เนอ เต๊เห่หม่า, เอ๊ตี๊กิ, เป แม๊เถอะแจ่ เหย่ซี เบ๊อะเฮ๊เรอ, เหย่ซี เนอเต๊เห่หม่า, อา เฮ๊เบ่ ชอเกอเด๊อ แลแค เร๊อ แซ่ฮู๊ อู เก่ พย๊าหนิ เตแลเปล๊กา อาเงเนอ, อู เบ่ ดื๊อตีลี๊พ๊า, อา เฮ๊ แลแค ฮู๊เนอ เต๊เห่ เด๊ออาเกล เนอเฮ๊อ. 11 โตเบ่ นอโอ่โส่แก เหย่ซี เตเฮ๊เบ่ เนอเต๊เห่, เมเตเฮ๊เรอ เตอิซว๊าอี๊แส่ เด๊อ อา โตอิซว๊า โต่ เต๊เห่เนอ เหย่ซี จว๊าอิซว๊า อู อาขว่าอาคยา, เหย่ซี จว๊า เมซู๊ซ๊า ดู๊แด ลอ อู ตี๊หี่แตแพ ลอ อา เตหยื่อเตแหน่ เจ๊อ. เหย่ซี ซิหยื่อ พย๊าหนิ แลแค รือ เร๊อ อา จว๊า เล อิซว๊า อู แพ๊. 12 เหย่ซี แกแยกลื๊อขุ เพรโพร เร๊อดื่อ เด๊ออาเกล เตเพรเนอ อา เฮ๊ เน๊อ, “แกแยครีต กลื๊อขุ เต๊เห่หม่า แกแยแลโฮ ปว๋า โตโพ๊, เหย่ซี หม่า อาแซ่เน๊อ เตมีเตแหม่ เด๊อ อา ฮามู๊แหม่ เต๊เห่ โทเรอ เหย่ซี หม่า แกแย เจเกลพู๊ เด๊อ อา เอ่ตาลว๊า โอตาแก เต๊เห่.” 13 อา เฮ๊ เต เออเต๊เห่ เนอหม่า อา โตแพ๊ อาขว่าอาคยา, แซ่ฮู๊ เหย่ซี เก่ โอ่จ๊อโอ่เต เด๊อ เตหยื่อเตแหน่ อากูเนอ, ซิพรวาชอ เหย่ซี นี๋. 14 โทเรอ แซ่ฮู๊ เหย่ซี เก่ วีแก แกแยยิวพู๊ แด๊โฉ่ กี๊นีโก๊เนอ เด๋อ งย๊าเค เนอเต๊เห่, โทเรอ แซ่ฮู๊ เหย่ซี เก่ วีแก โหง่เฮ๊แก เด๊อ แกแย เท๊แตแอฉื่อแก เตจ๊อเตเต เนอเต๊เห่ โหง่เฮ๊แก เนอเต๊เห่ อาเงเนอ, ซิพรวาชอ เหย่ซี เนอ. 15 แกแย เตเพรเพร เด๊อ อา โพ๊แปละอาโพ๊อาแปละ เฮ๊อ เด๊อ จอแปแหร่ อา เป๊เส่เง เนอ, เตล๋อ ปลี โพ๊แปละอาโพ๊อาแปละ ลอ เฮ๊อ เด๊อ อาเง เฮ๊อ. หม่าแน๊เรอ แกแย เด๊อ อา โพ๊แปละอาโพ๊อาแปละ เกออู โต่ เร๊อ อา หยื่อเอ่แหน่ เกออู โต่ เนอเต๊เห่เนอ, เด๊อ อาเงเนอ อา โพ๊แปละอาโพ๊อาแปละ เตอเจ๋อ โต่. เหย่ซี เตซื๊อ เต๊เห่เนอ อา เม โตโพร๊ มู๊แหม่ ลอ หนิคยาดื่อ เหย่ซี อาเหล่เตเน เร๊อ อาซิปล่อ เด๊อ อา ซิเง เร๊อดื่อ เตแร๊ เร๊อ เตมู๊แหม่ เออเนอเฮ๊อ. 16 เหย่ซี เฮ๊ เร๊อ อา ซิเง จอแปแหร่ ตื๊อดื่อเรอ แรเต เด๊อ เหย่ซี เม เต๊เห่เนอ อา โอ่โลแถ่ เร๊อ เหย่ซี ซิเง จอแปแหร่ เตกี๋ โต่. เหย่ซี เนอเต๊เห่หม่า เล๊ซิหย่อซิบี, โทเรอ แกแย เด๊อ อา หนิดา เกออู โหง่ โต่ เต๊เห่, เหย่ซี เตเร แรเต อาแร๊ เต๊อเจ่อเจ่อเนอ อา เมเบ๊ เกออู โต่.