Titus 2
เบ่พย๊าเบ่เม หนิลอ โหมะเผระ เร๊อ เป๊เจ่ เต๊เห่ อาเง
1หม่าแน๊เรอ คูติตัส, เน เรอ อิซว๊าโตอิซว๊าเบ่ เป่ อู เนอ เตอิซว๊าอี๊แส่ เด๊อ อาจ๊ออาเต เนอเต๊เห่ นี๋. 2แซ่ฮู๊ โหมะเผระ เพรคู เต๊เห่ เก่ แอ๊ แซแรฉ่าเผระ เกอ แลแค อาเหน่, แซ่ฮู๊ อู เก่ แด่ดุหยื่อแหน่ เกอ เหย่ซี, เร๊อ แซ่ฮู๊ เหย่ซี เก่ ค๊อเบ๊ เร๊อ แลแค อาซิปล่อ เนอเรอ, อิซว๊าอี๊แส่ แลแค เหย่ซี นี๋. เหย่ซี โตเบ่ โอะ เร๊อ อา เบหยื่อเบแหน่ เด๊อ อาฉว่าอาชอ, เหย่ซี โตเบ่ เล๊อบา เร๊อ เตโมหนี่เร๊ออู, เหย่ซี โตเบ่ ข่าจาข่าจือ แด่ทูซิปล่อเบ๊ แลแค. 3ฮู๊เนอเฮ๊อ, แซ่ฮู๊ เพรเหมาะ โหมะเผระ เต๊เห่ เก่ เบ่หยื่อเบ่แหน่ เกอ อา เตโอะเซอเพร เด๊อ อา โตโอะเซอเพร เร๊อ แด่บูโพ๊ เกอ แลแค ซิปล่อ เด๊อ จอแปแหร่ อา โอะ อาเงเนอ เร๊อ, อิซว๊าอี๊แส่ แลแค เหย่ซี นี๋. โทเรอ เหย่ซี โตเบ่ แด๊หนิ อูแหย่โย โต่, อา โตเบ่ ทวาหนิ เทอเผร่ อาหลู่เล๊ โต่. อู โตเบ่ เมเตแร๊ ฮู๊เตฮู๊เต เนอ, เหย่ซี โตเบ่ อิซว๊า อู. 4เหย่ซี เก่ เมฮู๊เนอ ตื๊อหม่า เพรเหมาะ โหมะเผระ เออเต๊เห่เนอ, อา อิซว๊าแจ่ เป่เกอ เพรเหมาะ หน่าเจ่ เต๊เห่ เนอ เหย่ซี โตเบ่ โม เกอเร๊อ แลแค อาเว เร๊อ อาพู๊อาเลอ เต๊เห่ ฮู๊เต แพ๊. 5แซ่ฮู๊ อู เก่ เป๊อเจ่ออิแช๊ ดื่อ จอแปแหร่ อาลาอาโหง่ แต่เหม่เนอ, เพรเหมาะ โหมะเผระ เออเต๊เห่เนอ, อา เบ่ อิซว๊าเป่ เพรเหมาะ หน่าเจ่ เต๊เห่. เร๊อ อา เบ่ อิซว๊า เหย่ซี เนอ เหย่ซี เบ่ ทวา เพรเหมาะ เต๊เห่ เด๊อ อา ค๊อเป่ เกอเร๊อ อาซิปล่อ, เหย่ซี ซิปล่อ เบ่ อาโพ๊อาแปละ, เหย่ซี เบ่ ทวา เม เด๊อ อา แม๊ตู่ หนิ แร๊ อาหี่อาแพ, เหย่ซี เบ่ เมเต เด๊อ อาแร๊, เร๊อ อา เบ่ จูเอ่ อาเว โหง่. 6ฮู๊เนอเฮ๊อ, เด๊อะอ๊าเด๊อะเหร่ เป่เกอ เพรคู หน่าเจ่ เต๊เห่เนอ เร๊อ อา เก่ ค๊อเบ๊ หนิแจ่ เร๊อเกอ แลแค อาซิปล่อ. 7เน ลาติเรอ, เน เมเต อิเตเต๋. เบ่เบ่, แซ่ฮู๊ เพรคู หน่าเจ่ เต๊เห่ เก่ แม๊บือเกอ เนเนอ เรอ, เม แพ๊ เตแร๊ เนอเต๊เห่ นี๋. เบ๊อะเน อิซว๊าอี๊แส่ อู เบ๊อะเนอ, แด่จ๊อจื้อ เน ซิปล่อ โทเรอ จ่าฉ่าเผระ ฉาอ่อ เนเหน่ นี๋. 8เบ๊อะเน อิซว๊าอี๊แส่ อู เบ๊อะเนอ, แซ่ฮู๊ อู เก่ แม๊ปู แด่แจ่ ปา ดื่อ เร๊อ เตซื๊อ แต่เหม่เนอ, เฮ๊เบ่จ๊อจ๋อ เนโหง่ นี๋. เร๊อ เน เก่ เมฮู๊เนอ เฮ๊เรอ เหย่ซี เหล่เฮ๊ มู๊แหม่รีแจ่ เปหรี่เปแก อา โอะ ปา โต่ อาขว่าอาคยา, เหย่ซี เก่ ซิเตเรแก แพ๊. 9แกแย เด๊อ อา ทวา หลู่เล๊ เต๊เห่เนอ, อา เม อิเตเต๋ เบ่เบ่, อา โตเบ่ เด๊อะเป๊อ อาเหน่ เร๊อ อาแหน่แบ่เจ่ เร๊อ เหย่ซี เบ่ เมโต อาแหน่แบ่เจ่ เต๊เห่ อาซิปล่อ. เหย่ซี เบ่ กย๊าฉื่อ เท๊ฉื่อหนิ อาแหน่แบ่เจ่ โต่. 10เหย่ซี โตเบ่ เอ่โห่เอ่ฮี๊หนิ อาแหน่แบ่เจ่ อาเต โต่, หม่าแน๊เรอ, แซ่ฮู๊ อาแหน่แบ่เจ่ อา หยื่อเอ่ ตาเต หนิแจ่ เหย่ซี อาเงเนอ, เหย่ซี โตเบ่ โอ่เซอเพร โลแร๊ เป่ อาแบ่เจ่. อาเก่ เมฮู๊เนอ เฮ๊เรอ อู เก่ ถู่เซ๊หนิ ลอ จอแปแหร่ เด๊อ อา เมแลเปล๊กา เป เออเตเพร อา เตอิซว๊าอี๊แส่ เออ เด๊อ เตปว๋า เต๊อเจ่อ อากู ปา. 11เมเตเฮ๊เรอ แซ่ฮู๊ จอแปแหร่ เก่ เมแลเปล๊กา แกแย เห่ขุพู๊ ล๋อปลี อาเงเนอ, อา เด๊อะโลเฮ๊อ อาบุ๊ยอาเตอเรอ เฮ๊อ. 12จอแปแหร่ อาบุ๊ยอาเตอเรอเออ, อา อิซว๊า เป่ เร๊อ เป เก่วีแก แกล๊ เด๊อ อา มู๊แหม่ เต๊เห่ เร๊อ เห่ขุ อา เตซิหยื่อซิลอ เต๊เห่. กู๊แหน่เรอ จอแปแหร่ อาบุ๊ยอาเตอเรอ อิซว๊า เป เด๊อ เป โตเบ่ ค๊อเบ๊ข่าเบ๊ หนิ เด๊อ เปซิปล่อ. เร๊อ เป โตเบ่ โอ่เซอเพร จ๊อจ๊อเตเต, โท๊โต่ เป โตเบ่ โอ่เซอเพร ฮู๊ อาโต จอแปแหร่ อาซิปล่อ เนอ. 13เบ๊อะเป โอะป่อแม๊ชือ เฮ๊อ เตเด๊อะบุ๊ยเด๊อะเตอเรอ อาม๊อเนอ หม่าดื่อเฮ๊อ ช๋า เปเพ จอแปแหร่ ดุเนอ เพรเมแลเปล๊กา เป แบ่เจ่เหย่ซู่ครี๊ อาเตเด๊อะบุ๊ยเด๊อะเตอเรอ อา แฮโอะโลแถ่ เฮ๊อ เนอปา เบ๊อะเนอ, เป เบ่ โอะเซอเพร ฮู๊ อา เฮ๊ เป เออเนอ เต๊เห่. 14แซ่ฮู๊ อา เก่ เมแลเปล๊กา เป เด๊อ เตมู๊แหม่รีแจ่ ล๋อ ปลี เต๊เห่ อากู, aโท๊โต่ แซ่ฮู๊ อา เก่ เม อาโพ๊อาแปละ กา เป เร๊อ เป เก่ ทวาแถ่ อาแกแย, โท๊โต่ เป เก่ ซิปล่อฉว่า เมเต เด๊อ อาแร๊ เต๊เห่ อาเงเนอ, อา ข่าเซอ เป่ เฮ๊อ อาซิปล่อ เด๊อ เปเง เฮ๊อ. b 15อิซว๊าอี๊แส่ เป่เกอ แลแค เหย่ซี เออเนอเต๊เห่. เด๊อะอ๊าเด๊อะเหร่ เป่ เหย่ซีเนอ. ซิพรวา แลแค เหย่ซี เร๊อ นอจ่อ ลอ เน เตอเรอฉว่าชอ เนอ นี๋. นอเตเนปีตี๊ แต่อู เร๊อ เนเหน่ แต่เหม่ นี๋.
Copyright information for
EkySCThai