Titus 3
เม เต เด๊อ อาแร๊
1แซ่ฮู๊ เพรหยื่อเอ่ เต๊เห่ อา นอเป๊อ เกอเร๊อ เกอ แลแค อาเหน่ เร๊อ คุ๊ยจ๊อแผ่ เต๊เห่ เรอ อา เก่ จูเอ่ เกอ แลแค เหย่ซี อาโหง่, โท๊โต่ แซ่ฮู๊ เหย่ซี เก่ โอ่ ตี๊หรี่แตแร แลแค อาเหน่ เด๊อ อา เก่ เมเตแร๊ ปว๋า เต๊อเจ่อ อาเงเนอ, เด๊อ ซิเหน่แถ่ คยาแซ๊ เหย่ซี นี๋. 2เด๊อ ซิเหน่แถ่ โป่คยาแซ๊ เหย่ซี เร๊อ นอเป๊อเจ่ออิแช๊ แต่อู เตเพร่ว แต่เหม่ นี๋. นอ รอหนิ แลแค เหย่ซี เร๊อ เตกย๊าตางาลู เนอเต๊เห่ นี๋. โทเรอ นอโอ่ แลแค เหย่ซี เร๊อ ซิปล่อ ซิโดซิ งยา, เร๊อ นอเด๊อะโล เป่ อู เร๊อ เหย่ซี อาเตแด่ทูซิปล่อ อา แด่หยว่า อาซิปล่อ หม่าแหน่ เนอเต๊เห่ เร๊อ อูปว๋า เตเพร นี๋. 3เมเตเฮ๊เรอ เด๊อ เหร่อเคเนอ เป เต๊เห่ หม่า แกแยบูบย่า แกแย จูเอ่ เกออู โหง่ โต่ เต๊เห่. เป หม่า แกแย เด๊อ อา ครวาซื๊อเกอ แกแย แลโฮ เต๊เห่ อาคยา. เป ทวา โทเฮ๊อ แกแย เด๊อ อา ซิหยื่อซิลอ เมโม เกอเร๊อ เหน่ เต๊เห่ อาหลู่เล๊ เฮ๊อ. เป โอ่เซอเพร เมลอแก อาม๊อเนอม๊อเซ เนอ เป เม เตมู๊แหม่รีแจ่ เนอ เตซิค๊าซิเถ่ อู เต๊เห่ เฮ๊อ. โท๊โต่ อู ซิเถ่ เป เร๊อ เป ซิเถ่ฉื่อ อู. 4หม่าแน๊เรอ เบ๊อะจอแปแหร่ เด๊อ อา เมแลเปล๊กา เป เออเตเพร อา เตซิยอ เร๊อ อาเตโม เป โอ่โลแถ่ เฮ๊อ เบ๊อะเนอ, อา เมแลเปล๊กา เฮ๊อ เป. 5เตเด๊อ อา เมแลเปล๊กา เป เออเนอหมา หม่าเด๊อ เป แหน่แบ่เจ่ เร๊อดื่อ เม อาจ๊ออาเต อาคยา เนอ หม่าโต่, หม่าเด๊อ อา ซิยอ เร๊อดื่อ เป ขว่าคยา อา เมแลเปล๊กา เป แพ๊. เด๊อ แหย่โยบูโพ๊ แบ่เจ่ อา เตโพรเตเตอเรอ อาขว่าอาคยาเร๊อ, อา ซู๊ปลีแก เป, โทเรอ อา เด๊อ เป เตโอ่เป๊เจ่แล อาเซ เร๊อ เตโอ่เซอเพร อาเซ เต๊เห่. 6เหย่ซู่ครี๊ เด๊อ อา เมแลเปล๊กา เป เออเตเพร อาขว่าอาคยาเรอ, จอแปแหร่ ซิปล่อฉว่า กลอแล ยู งย๊าแพ๊ อา แหย่โยบูโพ๊ เด๊อ เปโอ่ แพ๊. 7จอแปแหร่ แด่จ๊อแด่เต เป เนอ อาบุ๊ยดุอาเตอเรอทู ขว่าคยา เฮ๊อ. ฮู๊เนอเรอ กู๊แหน่เออ เป พย๊าหนิเฮ๊อ เป เตแม๊ชือ เด๊อ อา หม่าดื่อ ซิปล่อเซอเพร อู่เจเต๊เหย่ ตูจูเพร ตาเลเคร๊ เออเนอ เฮ๊อ. 8เตเฮ๊เบ่ เออเนอหมา อาจ๊ออาเต. แซ่ฮู๊ แกแย เด๊อ อา หยื่อเอ่แลแค จอแปแหร่ เต๊เห่ เก่ ซิปล่อป่า เร๊อ เด๊อะแลเกอ แลแค ซิปล่อ เด๊อ อา เก่ เม เตแร๊ เต๊เห่ อาเงเนอ, แว ซิหยื่อ เด๊อ เน เก่ อิซว๊า ซิปล่อป่า ตาเต เป่อู เร๊อ เตหรี่เตแก เออเต๊เห่. เตเออเต๊เห่ หม่า อาแร๊ แหน่เจ๊อ เร๊อ อา ทวาบุ๊ยทวาเตอเรอ แหน่เจ๊อ เด๊อ อู ปว๋า เตเพร อาเง เจ๊อ. 9หม่าแน๊เรอ รอหนิ แลแค ซีเหน่ เนอ เตเฮ๊เบ่ เคร๊แขระ แกเด เกอลู เนอเต๊เห่ เร๊อ เตแด๊กลุยแด๊แล เด๊อ อาทู เต๊เห่. โทเรอ รอหนิ แลแค เตเคร๊แขระ ลูโพร๊ลูแพร เกอลู เร๊อ เตซว๊าเตแส่ อาคยา เนอเต๊เห่ นี๋, เมเตเฮ๊เรอ เต เออเต๊เห่ เนอหม่า อาบุ๊ยเตอเรอ โอ่ เตอเจ๋อ โต่. อา แกเด แพ๊. 10แกแย เตเพรเพร เด๊อ อา เด๊อ โอ่แถ่ เตลูโพร๊ลูแพร เต๊เห่เนอ, เด๊อะรอ อา เนอโพ๊ โทเรอ เด๊อ คยา เนอ แบ๊ซว๊า ปา ดื่อ เร๊อ อา แต่เหม่ นี๋. 11เน ซิเง ตาเต เฮ๊อ เนอ แกแย ฮู๊เนอ เต๊เห่ หม่า แกแย เด๊อ อา โบเต๊เปล่แก เตหมะเตจ๊อ เร๊อ อา เม เป่แฮ ตื๊อดื่อ แลแค เตซื๊อ แพ๊. โท๊โต่ อาเตซื๊อ เต๊เห่เนอ อา ข่าโล หนิเป่ เฮ๊อ ลู เร๊อ อา หม่า แกแย เตซื๊อโอ่ เตเพรเฮ๊อ.เตอิซว๊าอี๊แส่ เด๊อคยา ตื๊อดื่อเล๊อ เต๊เห่
12ช๋า แว นอแฮแล คูอารราเทมาส หม่าโต่เรอ คูทีคิกัส เด๊อ เนโอ่ ปา เบ๊อะเนอ, แอ๊จื๊อ แฮ เหร่อ เด๊อ แวโอ่ เด๊อ วีนิโคบุรี เนอ ปา นี๋, เมเตเฮ๊เรอ แว แด่แล โทเฮ๊อ แว ซิปล่อ เนอ เก๊โหร่เค เออปาเนอ, แว เก่ จว๊าโอ่ เบ๊อะเนอ ปา. a 13แอ๊จื๊อ เด๊อะอ๊าเด๊อะเหร่ เมจว่าเกอ เป่โก๊หลื่อ เพรเฮ๊เบเมโตเต คูเศนาส เร๊อ คูอปอลโล อา เตจว๊าเตกา อาเง เออเนอ นี๋. โท๊โต่ แม๊ ตี๊หรี่แตแร เป่ โป่ เต เด๊อ เหย่ซี โหล่ เนอเต๊เห่ นี๋. b 14แซ่ฮู๊ เป ครีตกลื๊อขุครี๊พู๊ เออเต๊เห่ เก่ นอเอ่แจ่ เกออู ม๊อเนอม๊อเซ เด๊อ อา เก่ เม เตแร๊ เต๊เห่ อาเงเนอ, โตเบ่ อิซว๊า เป่เกอ เหย่ซี โทเรอ แซ่ฮู๊ อา เก่ เมจว่าเบ๊ เป่เกอ แกแย เด๊อ อา โหล่ แหน่ เนอเต๊เห่, โท๊โต่ แซ่ฮู๊ เหย่ซี เก่ โอ่เซอเพร แกเด ดื่อ เน๊อเต เด๊อ อาบุ๊ยเตอเรอ โอ่โต่ เนอเต๊เห่ อาเง แต่เหม่เนอ, โตเบ่ อิซว๊า เป่เกอ เหย่ซีซี. 15แกแย เด๊อ อา โอ่เกอ เร๊อ แว ล๋อ ปลี เบ๊อะเออ เต๊เห่ ซูแฮ เป่เกอ เน เร๊อ อาเตเฮ๊โมเฮ๊แร๊. เร๊อ ซูจว๊า เป่เกอ เป่ แฮเง เตเฮ๊โมเฮ๊แร๊ เออเนอ เด๊อ เพรหยื่อเอ่ เด๊อ อา โมแหน่เร๊อ เป เนอเต๊เห่ อา โอ่ นี๋. จอแปแหร่ บู๊ยดุเตอเรอทู เก่โอ่เกอดื่อ เน๊อ ซี นี๋.
Copyright information for
EkySCThai